Oroisa Natal 2021

 

OROISA NATAL

 

Fa’omasi Keriso Samehi’a Fa’atalifusõta (bdk. 1Fetero 1:22)

Me no mihaogõ dõdõmi, ba wolo’õ si duhu, ba wangomasi’õ talifusõ, 

fa’omasi, si lõ famine tõdõ, ba faoma moroi si’aikõ ba dõdõmi mi’omasi’õ nawõmi.

 

Ya’ami ira talifusõ ni’omasi’õ,

Persekutuan Gereja-Gereja di Indonesia ba Konferensi Waligereja Indonesia zama’ema fangowai Mbongi Natal ba khõda fefu.

Ba zimendrua kali ta’owasaini Mbongi Natal ba gotalua wõkhõ covid-19. Ta’andrõ saohagõlõ, bõrõ lala halõwõ si lõ mo’aetufa ba wamareta, sifao fefu ngasi tanõ bõ’õ ba bua fa’atalifusõta si no tobali sambua tandra wa’auri soida, iada’a no so ita bakha ba lala wa’auri sitohude moroi ba ginõtõ si no tatalu’i. Ba wamangawuli furi ba lala wa’auri sito’õlõ, mangehaogõ si no tekiko bõrõ wa’abõlõ covid-19, soamakhaita ba ngawalõ lala halõwõ ba lala wa’auri, lõ mamalõ mu’oguna’õ ginõtõ ba fa’owõlõ’õlõ fefu nono wobanua – ba famareta, ira so khõ lala halõwõ ba ono mbanua samosa. Ba zimanõ mu’oguna’õ sibai wa’abõlõ wa’atalifusõta ba geluaha sabõlõ ebua.

Ya’ami ira talifusõ ni’omasi’õ,

Fangowasaini Mbongi Natal ba ndrõfi simendrua ba wõkhõ covid-19 andre, idõnia’õ ita ba wonehegõ mangawuli ira talifusõda si so ba zi fasui ya’ita. Sura 1Fetero no tobali bõrõta wangerangera ba Goroisa Natal andre, nisura sofeta ba niha samati ba Asia side’ide si so bakha ba wanandraigõ bõrõ wangosawuyu. Õsi zura yaia menemene so’amakhaita ba wa’auri si’ero ma’õkhõ ba sifaudu molo’õ famati niha Keriso ba lala niha samati wanaõgõ fanandraigõ ba folohi. Niha samati sanema sura andre la’amenesi ena’õ so khõra dõdõ wa’atalifusõta sifao fa’ahele dodo ba khõ Keriso. Ya’ira ba no sifahuwu “si so ba sikoli” ba gulidano andre (2:11). Bõrõ me sifagõlõ lala wa’auri ba sifagõlõ forasoi, sindruhunia ya’ira andrõ ba no sifatalifusõ sambua mo’ina. Hewa’ae so bakha ba ngawalõ wanandraigõ, fefu niha samati lõ mamalõ la’a’aro’õ dõdõra ba zo’amakhaita ba lala wa’auri si lõ aetu andrõ, ya’ia ena’õ lõ mo’aetufa labohouni wamatira (1:7) ba sifao ira bakha ba wamakao Keriso (4:3). Ba zitambai da’õ, ba wamaigi Yesu si no kara ba watalinga, fefu niha samati ladõnia’õ ba wondrõi amuata sanudugõ fa’atalifusõta, simane: fa’afaito, falimosa, fa’asiliawa, fa’afõkhõ dõdõ ba famõbõgõ si lõ duhu (2:1). Ba wamati simane da’õ, dozi solo’õ Keriso lasõndra dõi sibohou tobali soi tana khõ Lowalangi samosa (2:9) ba tekaoni ba wanuriaigõ lala halõwõ-Nia bakha ba wa’aurira ba gotalua gulidanõ si lõ fahuwu ba sifao fa’asindruhu ba si’oroi ba dõdõ wangomasi’õ awõ. (2:12,17).

Natal 2021 ifasugi ba dõdõda ena’õ faoma ta’omasi’õ nawõda si’oroi sibai ba dõdõ bakha ba wa’omasi wa’atalifusõta sahele dõdõ ba si lõ mangai bõligõlõ ba wamalua fangobadõdõi awõ. Yesu Keriso ni’owasainida fa’atumbu-Nia zangabõlõ’õ ya’ita ba wangalui lala sibohou ba wamalua fa’omasi ba nawõ, wanuriaigõ fa’atulõ, ba solohe fa’ohahau dõdõ sindruhu.

Ya’ami ira talifusõ ni’omasi’õ.

Haniha dalifusõda andrõ? Khõra ya’ira si so bakha ba wa’abu dõdõ, ira talifusõ andrõ ya’ia zame’e fanolo (faigi Luka 10:36-37). Mbongi Natal ba zi samuza andre I’andrõ khõda nifehi’a moroi ba wa’omasi Keriso ba wa’atobali talifusõ khõra ya’ira si so bakha ba wa’abu dõdõ. Soi Indonesia ba no niha sololohe lakhõmi wa’atalifusõta. Simane niha samati sanema sura Wetero sifõfõna andre, ya’ita sifao ono mbanua sato no sinangea ta’o’aurifagõ wa’atalifusõta sitõra moroi ba gamakhaita ndro ma tõi tanõbõ’õnia sifao fangobadõdõi awõda, tõratõra ndra talifusõda sabõlõ mangoguna’õ. Fangobadõdõi awõ tenga ha ba mbewe, ba hiza sifao fa’asinangea si moumbu moroi ba wamati  ba sowua ba mbuabua, tõratõra ba wamalua fanoloni si tola oroma. Dumaduma wamati andrõ tola tasõndra ia moroi ba lala wa’auri Yesu samosa. No sifakhili Ia khõda (faehusi. Filifi 2:7). Lõ mamalõ so khõnia wehulu dõdõ ba wamalua fa’omasi na I’ila niha si so ba wa’abu dõdõ (Mareko 8:2). No iwa’õ khõndra nifaha’õ-Nia “Ya sahakhõ tõdõ ami, simane fa’ahakhõ dõdõ Namami andrõ (Luka 6:36). No gõi Iwa’õ: “… ndrege nilaumi ba dalifusõ-Gu andrõ, fondrege zinumana, ha niha ia, ba khõgu no milau da’õ (Matai’o 25:40). Me no tobali nifaha’õ Yesu, ba lala wa’aurida fefu, lõ mamalõ tekaoni ita ena’õ “tabe’e ba wangerangerada ba ba dõdõda gõi zi so bakha ba dõdõ Yesu” (Filifi 2:5).

Fõkhõ covid-19 zamasugi ba dõdõda wa ya’ita andre no sifatalifusõ ba si sambua nahia ba gulidanõ andre sangotahõgõ we’aso wõkhõ covid-19. Ba zimane inõtõ, lala wa’auri wa’atalifusõta si no lala wa’aurida soi Indonesia tobali itugu mo’eluaha ba itugu I’andrõ ena’õ tabe’e ba mbõrõ dõdõda ba tafalua ia. Fa’atalifusõta sindruhu zame’e khõda fehuludõdõ ba wangobadõdõi awõ. Fangobadõdõi awõ si no buabua wa’asinangea soumbu moroi ba wamati niha Keriso, ibe’e khõda wanofu si lõ tola lõ’õ tabe’e wanema li me no ya’ita andre sifatalifusõ: “hadia zi lõ tola lõ’õ tafalua, ena’õ sõkhi nahia si so ba zi fasui ya’ita tola sõkhõ ba sinangea?”. Ba ginõtõ tola tabe’e wanema li ba wanofu andrõ – ba wa’ahonodõdõ ba ba wohaogõ wo’angeraigõ – ta’oguna’õ mbuabua wa’asinangea simendrua, ya’ia walulusa fohalõwõ ba gotaluada. Moroi ba gofanõwa simane da’e tola tefatumbu’õ mbuabua sibohou saoha bas i sõkhi ba wanema’õ fanandraigõ si so bõrõ wõkhõ covid-19 so’amakhaita ba ngawalõ gofanõwa lala wa’auri niha.

Bõrõ mbuabua sifaoma manoloni si no tandra wangobadõdõi awõ faoma fatambai, tefa’aso wa’omasi Keriso ba oroma ba tarasoi. Datahalõ sambua ginõtõ si sõkhi ba we’amõi tobali talifusõ ba niha sangoguna’õ fanoloda, ne gofu hadia ia nifaluada khõ ndra talifusõ fondrege zangoguna’õ andrõ, no tafalua ia gõi khõ Keriso (Matai’o 25:31-46). Ya’ifahowu’õ ita Lowalangi.

Ya’ahowu wanunu fandru 2021

Ba

Ya’ahowu ndrõfi sibohou 2022

 

Jakarta, 1 Desember 2021

Ba dõi

PERSEKUTUAN GEREJA-GEREJA DI INDONESIA (PGI)

Pdt. Gomar Gultom/Ketua Umum

Pdt. Jacklevyn F. Manuputty/Sekretaris Umum

 

KONFERENSI WALIGEREJA INDONESIA (KWI)

Ignatius Kardinal Suharyo/kETUA

Mgr. Antonius S. Bunjamin, OSC/Sekretaris Jendral