HADIA NIFOTÖI INÖTÖ ADVEN?

Nifa’anö Kat. Ingatan Sihura, S.Ag.

Gambara Lili Adven [Dok. Pribadi]

Ero röfi, inötö adven andrö, no tobali sambua inötö si sökhi sitobali böröta wangombakha ginötö Natal ma fanunu fandru ba fanötöna ginötö ndröfi sibohou. Ba hiza, asese sibai ha da’ö ni’ilada wa inötö andrö no inötö si lö tola lö’ö ta’owasaini ero röfi. Ba zimanö, hadia ha simanö geluaha ginötö adven andrö?

Ngawua wehede “adven” tehalö ia moroi ba ngawua wehede Latin, ya’ia da’ö “adventus” eluahania “fa’atohare”. Moroi ba ngawua wehede andre oroma wa inötö adven andre no inötö wombalobaloi fa’atohare. Inötö adven faudu molo’ö döfi liturgi andre tola mufo’eluaha ia tobali sambua gofanöwa ginötö wombalobaloi fa’atohare wa’atumbu zangöhöli andrö sasese mutörö tödö ba ginötö natal ma fanunu fandru.

Inötö wanörö tödö wa’atumbu zangöhöli andre, tefotandro dania ia ba wombaso ero luo migu. Ösi wombaso Taroma Li Lowalango sagötö luo migu ginötö adven, tuhonia ya’ia wamadaya lala Zo’aya (fahela Luka 3:4-6). Famadaya lala khö Zo’aya andre tatu tenga möi manimbu lala saogo ba lala sebua. Ba hiza famadaya lala andre abölö tetahö ia ba wama’anö tödö zamati.

Ba wama’anö tödö zamati andre, famo’eluaha ginötö adven andre itugu abakha. Inötö adven andre tenga saae ha fombalobaloi inötö wa’atumbu, ba hiza fombalobaloi wa’atoharenia ba zimendrua. Fa’atohare Zo’aya ba zimendrua andrö, ya’ia ba wamöfö’ö niha samati ba we’amöi ba wa’auri si lö aetu. Da’e dania geluaha sitobini andrö sanandrösa ba wangowasainida ginötö adven andrö ero röfi. Ba wanörö tödö inötö adven andrö, sindruhunia tafasugi ba dödöda ba tagamögamö tödöda wama’anöda famatida ba wangöhönagö ya’ita wamaondragö fe’aso Zo’aya andrö ba khöda zamösana.

Moroi ba geluaha si no mubotokhi andre, ngawua wehede “adventus” itugu te’abakhai’ö geluahania na mufahela ia nasa ba wamo’eluaha Zura Ni’amoni’ö Amabu’ula Sibohou ni’ali ba li Latin ma sasese latötöi “vulgata”. Ba wo’ali ngawua wehede adven andrö, tehalö ia moroi ba ngawua li Yunani “parousia” eluahania “fa’aso”. Da’ö dania geluaha sitobini mege no wa, adven andrö no sambua inötö wombalobaloi we’aso Zo’aya ba niha samati.

Moroi ba wamo’eluaha da’e moroi yawa, tesöndra dobua gohitö dödö ba ginötö adven andrö, ya’ia da’ö:

a.       Adven no inötö wanörö tödö wa’atohare ma fa’atumbu Yesu Keriso ba gotalua niha;

b.      Adven no göi famasugi ba dödö niha ba wanötöna si lö tebulö we’aso Zo’aya ba luo safuria.

Börö da’ö, me inötö adven andre no inötö sisökhi ba wombalobaloi fa’atohare ba fa’aso zangöhöli andrö, no sinange na mufa’anö ia faoma fa’asökhi. Fama’anö nihalua ya’ia wama’anö tödö ba famalalini era’era. Fama’anö gabagaba ba gosali, ma ba nomo, ha sitobali ndrela wamahatö ena’ö itugu nasa saro dödö niha samati ba wombalobaloi fa’atohare ba fe’aso Zo’aya andrö. Amen.

Umbu:

Bosco da Cunha O.Carm, Memahami Perayaan Liturgi Sepanjang Tahun  Jakarta: Obor, 2011

C. H. Suryanugraha, OSC, Natal dan Paskah Perayaan Liturgis Dalam Dua Lingkaran Yogyakarta: Kanisius, 2021

Kongregasi Ibadat dan Tata Tertib Sakramen, Direktorium Tentang Kesalehan Umat Dan Liturgi Asas-Asas dan Pedoman Jakarta: Obor, 2011

Continue

Upacara Pembaptisan dalam Bahasa Nias

Continue

4 FAOSATÖ NÖSI WANGANDRÖ KATOLIK

Fangandrö, no sambua faosatö ba lala wa’auri niha samati si tebai mutalu’i manö. Silö’ölö’önia, mufalua wangandrö andre ero ma’ökhö ba ginötö moluo, bongi fatua lö mörö, ba ginötö wemanga, ba ginötö so gangandröwa sinangea mufa’ema khö Lowalangi. Fefu lala wangandrö andre, tola manö mufalua ia ba zi hasamösa ba tola göi sifao sato. 

Faosatö Wangandrö Katolik [Dok. Pribadi]

Moroi ba wamobörönia, fangandrö andre asese sibai lafo’eluaha ia tobali “fahuhuosa niha (he samösa ma ba gangowuloa zato) khö Lowalangi nifati”. Ba wamo’eluaha da’e, sindruhu te’oroma’ö khöda hewisa sindruhunia wamalua sambua fangandrö andrö. Ba wamalua sambua fangandrö andrö ena’ö hulö zi sambua fahuhuosa. Sisambua fahuhuosa andrö, si sökhinia na toföfö ia, i’otarai wamobörö irugi wangasiwai. Börö da’ö, so 4 (öfa) faosatö nösi wangandrö nifaha’ö Gereja Katolik; ya’ia da’ö:

1.      Fangowai.

Na omasi ita fahuhuo, siföföna sibai ua ena’ö aboto ba dödöda ha’ökhö fahuhuo ita. Börö da’ö, ena’ö tabörögö göi wangandrö andrö sifao fangowai Amada Lowalangi somasi ita tafa’ema gangandröwada andrö. Ba zimanö, sökhi na mangandrö andrö mutatugöi ha’ökhö mangandrö, ba ena’ö ha khönia gangandröwa andrö. Oroma da’e ba wamobörö fangandrö andrö wanguma’ö: “He Ama Lowalangima si so ba zorugo …” ma “He Yesus Keriso So’aya ya’aga …” ba tanöbö’önia na. Fangowai andre göi no tobali ia famörögö wangandrö.

2.      Fangandrö Saohagölö.

Na no aefa wangowai ba zi sambua fangandrö, ganetenia si sökhi ba ya’ia wangandrö saohagölö. Fangandrö saohagölö andrö sindruhunia zabölö ebua ba gotalua mbosi wangandrö. Hadia mbörö wa tobali ia sebua, börö me si lö mu’andrö niha nasa khö Nama, ba no tola I’amualagö Lowalangi. fangandrö saohagölö andre, tebörögö ia moroi ba wa’auri si so nasa ba mboto irugi ngawalö mbuala si no mutema. Fangandrö saohagölö göi andre no tobali ia tandra “wangobadödöida” Lowalangi ma tola tamane “fanulönida” mbuala si no tatema.

3.      Famaehagö Angandröwa.

Hadia gangandröwa sedöna mu’andrö ba wangandrö? Fanema li ba wanofu da’e  tola lö awai ba zima’öma’ökhö wangerai hadia manö zitobali angandröwa niha. Ba hiza moguna tafati wa’ahakhö dödö Lowalangi nösi gulidanö. Si lö irai ta’andrö na’I ba I’amualagö khöda. Ba zimanö hadia zi lö tola lö’ö ta’andrö ba wangandröda? Ba da’e sindruhu ena’ö tafosasi ia hadia gangandröwa sitobali ohitö dödöda ba hadia gangandröwa sitefaudu ba zoguna khöda. Oya sibai gohitö dödö, ba hiza sitefaudu ba zoguna, da’ö zinangea ni’olohesi ba wangandrö, faudu molo’ö inötö ba fa’amogunania.

4.      Fanuno ma Famolakhömi.

Sitobali fangasiwai ba zi sambua fangandrö andrö ba ya’ia wanuno ma famolakhömi. Fanuno ma famolakhömi andre no sambua famuli sumange ba wangandrö andrö, töratöra ba wanou’ö tanöföna Lowalangi fefu wangandrö andrö ena’ö ba wamatöröNia wa’alua fefu nösi wangandrö andrö. Dumadumania: “Ya’ugö nisunoma lö mamalö, iada’a ba irugi zi lö aetu. Amen” ma “Simanö gangandröwama, sifao fama’ema Keriso So’aya ya’aga. Amen” ba tanö bö’önia na.

Si öfa andre tefalua ia sifao fa’ahono dödö, ba mufalua ia ba musambuani. Tabaya göi ita tödöda na so göi niha sangandrö khöda. Na isambuania khöda wangandrö ba sifao fa’asinangea, tatu manö ahono dödöda wamondrongo, atöla ba dödöda hadia niwa’önia irege aboto ba dödöda, ba ba gafuriatania sifao fa’ahele dödö göi ita ba wanema’ö angandröwania andrö. Ba zimanö tenga mangiwa dödöda ba wa’atuatua Lowalangi wamondrongo fangandröda, ba hiza lö mamalö lö aröu fabö’ö göi wa’ahatöda khö Lowalangi andrö. Ba wangandrö andrö, tola göi ta’erönusi nasa ia sifao fo’eönusida taroma li Lowalangi nihalö moroi ba zura 1Moze 18:20-32 angandröwa Gaberahamo khö Lowalangi ba Luka 11:1-13 fangandrö Zo’aya. Ya lö mamalö sinura andre tobali fanolonida ba wamati ba ba wamalua fangandröda. Amen.

Nifa’anö Kat. Ingatan Sihura, S.Ag.

Umbu:

Felix Supranto SS.CC, Doa Yang Dikabulkan Memahami dan Menghayati Doa “Bapa Kami” Dengan Lebih Dalam Jakarta: Obor, 2013

Konferensi Waligereja Indonesia, Iman Katolik Yogyakarta: Kanisius, 1999

Petrus Danan Widharsana & RD. Victorius Rudy Hartono, Pengajaran Iman Katolik Yogyakarta: Kanisius, 2017

Prof. Dr. Tom Jacob, SJ, Teologi Doa Yogyakarta: Kanisius, 2010

T.J. van Bavel, Hatiku Merindukan Allah Ajaran Agustinus Tentang Doa Yogyakarta: Kanisius, 2011

Continue

Eluaha Wangoguna’ö Awu Bakha Ba Liturgi Gereja Katolik

 

Awu [Foto Dok. pribadi]

Awu no tenga gamagama si lö aboto ba dödö niha. Ero sambua nahia wondrino sangoguna’ö eu galitö, si lö tola lö’ö tesöndra nawu. Awu andrö ba no akhökhöla ma akhozila moroi ba ngawalö nitunu. He eu sabe’e ia, ba na no mutunu ba galitö ba si lö tola lö’ö tola tobali ia awu. Ba na no tobali awu, ba lö gunania sa’ae, ha tö nitibo’ö. Na ba zi to’ölö ndra ina’ina, awu andrö ha’awai la’oguna’ö tobali awö pupu gowi.

Ba wamörögö inötö wamoni ba fuasö sitefaudu baluo Rabu Awu, la’oguna’ö nawu nibe’e ba högö ma ba gangango dozi niha sifao ba wamörögö inötö wuasö ba famoni andrö. Awu ni’oguna’ö ba ginötö da’ö, ba lö amaehutara nawu si so ba naha wondrino sangoguna’ö eu galitö. Awu ni’oguna’ö andrö göi itugu abölö sökhi na tehalö ia moroi ba gakhozila mbulu nohi si no mufahowu’ö ba ginötö ngaluo Migu Mbulu Geu (Minggu Palma). Ha’awai ya’i, awu ni’oguna’ö ba ginötö da’ö no mufahowu’ö tobali sambua ndrela gerenua niha sanema ya’ia.

Fangoguna’ö awu andre no ibörögö ta’ila ia moroi ba Gamabu’ula Li Siföföna sitobali tandra ginötö wa’abu dödö ba inötö wangesa dödö moroi ba ngawalö golalöwa. Te’oguna’ö ba tobali goigoi wangoguna’ö awu andre bakha ba liturgy Gereja Katolik, tehohogöigö ia meluo döfi 1091, ba mbanua Benevento, nihonogöigö namada Paus Urbanus II. Ba ginötö da’ö, lala wamalua ya’ia da’ö; Ira Ere ba ira matua fefu, la torugö nawu andrö ba högöra. Na ira alawe, ba labe’e hulö dandra röfa ba gangangora. Wa fabö’ö wolau da’e börö me ira alawe meföna andrö ba lö mo’aetufa lafake nöu.

I’otarai meluo da’ö, lala wamalua da’e tefo’eluaha sitobali tandra wamalalini era’era moroi ba ngawalö golalöwa si no mufalua. Ba ginötö iada’e, fangoguna’ö awö andrö ba ginötö wamörögö fuasö ba famoni tefo’eluaha tobali böröta gofanöwa wamati ba ginötö föna paskah ba ena’ö sinangea dania fefu niha samati ba wangowasaini ngaluo ni’amoni’ö andrö ya’ia Paskah. Andrö dania ba gafuriatania lawa’ö: inötö wamalalini era’era andrö ba no inötö wamohouni famati.

Umbu:

Bosco da Cunha O. Carm, Memaknai Perayaan Liturgi Sepanjang Satu Tahun Jakarta: Obor, 2011

E. Martasudjita, Pr, Memahami Simbol-Simbol Dalam Liturgi Yogyakarta: Kanisius,

I. Marsana Windhu, Mengenal 30 Lambang atau Simbol Kristiani Yogyakarta: Kanisius, 

Continue