OROISA NATAL PGI DAN KWI TAHUN 2025

OROISA NATAL

PGI DAN KWI

TAHUN 2025

FE’ASO LOWALANGI MÖI MANGORIFI DOZI NGAMBATÖ

(fahela ba Matai’o 1:21-24)

Ya’ami ira talifusö ni’omasi’ö,

1. Inötö wanunu fandru, no sambua inötö wangowasaini fe’aso Lowalangi bakha ba mboto Yesu Keriso si tumbu ba gotalua soi niha, simanö göi bakha ba wongambatösada zamösana. Faduhu dödöda wa lala halöwö fangorifi andrö khö Lowalangi, alua ba tarasoi bakha gotalua wongambatösada zamösana.
2. Molo’ö Matai’o 1:21-24, ifönui wawu’usa li fangorifi andrö Lowalangi, ya’ia ba wa’atumbu Yesu, Emanu’eli - awöda Lowalangi, ba gotalua wongambatösa Maria ba Yosefo. Töi Yesu andrö tenga ha ba wangoroma’ö haniha Ia ba hewisa mbuambua zi samösa niha, ba hiza siföföna sibai ba wangoroma’ö lala halöwöNia, si no samösa sangorifi soi sifaduhu tödö, moroi ba horöra. Ifangöhösi Matai’o wa fa’atumbu Yesu andrö si no mesia, moroi ba dabina Maria, ono alawe, no famönui fama’ele’ö andrö ba Gamabu’ula Li Siföföna (fahela Yesaya 7:14).
3. I’oguna’ö Lowalangi wongambatösa Maria ba Yosefo bakha ba lala halöwö fangöhöli andrö khöNia, soguna ba soi niha ma’afefu, hewa’ae lö afönu mo’ofanöwa. Ba wamobörö so wa’edöna khö Yosefo ba wondröi Maria ba zi lö nininini, ba hiza iwuwu gohitö dödönia andrö me no irongo wehede mala’ika andrö ba wangifi (Matai’o 1:20 ba 24). Fa’edöna Yosefo wangai Maria andrö tobali fo’omonia, no tandra wanema’ö niha sifaduhu tödö ba mbu’u li fangorifi andrö khö Lowalangi ba fanötöna we’aso Emanu’eli andrö. Faduhu dödö Yosefo ba wehede mala’ika andrö ba wangifi, wa sindruhu ifalua Lowalangi lala halöwö fangorifi andrö khöNia, sifao fongambatösania. Ba zimanö, sifao Maria andrö i’oroma’ö wa dozi ngambatö si lö faröi khö Lowalangi, tola tobali ndrela howuhowu ba fangorifi ba gulidanö (Matai’o 1:19-20).
4. Fa’atumbu Yesu Keriso ba gotalua wongambatösa awö lala wanema’ö Maria ba Yosefo, zamohouni amakhaita ba wongambatösara bakha ba haga gohitö dödö Lowalangi, mondrege fagöna sibai ba wamo’eluaha ngawalö zalua ni’otahögö wongambatösa ba ginötö andre. Wa’oya zalua ba wongambatösa, zasese mamoto fahasara dödö, bagotaluania: famasafi ba fabalisa wongambatö, faudusa ba wongambatö, fa’ambö lala wangalui, mai online (judol), famiza online (pinjol), daludalu famakiko (narkoba), faya’osa ba fangerangera dali gefe. Menemene si so bakh aba zura Matai’o 1:21-24 ifehulu dödöda ena’ö sifao ba sihulu tödö ita ba wombali’ö fongambatösa tobali nahia we’aso Lowalangi ba nahia wamalua lala halöwö fangorifi andrö khöNia soguna ba niha. Fongambatösa ba no nahia nama ba ina wangai lala halöwö sifagölötö, awö wangonorogö tödö soguna ba ngambatönia, iraono, ba gofu haniha nifataro Lowalangi bakha ba ngambatö. Fongambatösa ba no Gereja side’ide, nahia siföföna sibai ba wa’omasi andrö la’o’aurifagö.
5. Fangowasaini fanunu fandru tobali inötö sifagöna sibai ba khöda ba wo’erönusi awö worasoi lala halöwö Lowalangi si so ba wangorifi, sifao famadöhö ba fangabölö’ö lala wa’auri wongambatösa. Ba zimanö, no sinangea wa fongambatösa niha Keriso tobali nahia wamondrondrongo ohitö dödö Lowalangi ba ba wamalua ya’ia. Sökhi sibai göi na buabua wa’aniha Keriso la’o’aurifagö ero zamösana ndrotondroto wongambatösa. Salua andrö ba tola möi fangehao ba Gereja, ba soi, ba ba gulidanö.
6. Iada’e, Gereja ba Indonesia ba fefu niha larasoi göi ngawalö wangiwa dödö so’amakhaita ba soi Indonesia, ngawalö wasosota ba niha, ba zinanö si so ba zifasui, sekola, ba ba hada. Sambua mbörö watola alua fefu zalua andrö ya’ia wa’akharikhari dödö niha ba wolo’ö isö dödö moroi ba gohitö dödö Lowalangi. Ba zimanö, dozi fongambatösa moguna owölö’ölö ba osili wamondrondrongo ba fangofönai’ö Lowalangi, irege sindruhu tola tarasoi lala halöwö fangorifi andrö khö Lowalangi, so khöda wa’abölö ba wanaögö, ba tobali göi dela howuhowu ba gotalua wangiwa dödö si so andrö. Me moguna sibai wongambatösa sitobali nahia we’aso Lowalangi ba ba wamalua lala halöwö fangorifi niha andrö, ba zimanö moguna mube’e dödö ba wamaha’ö fongambatösa niha Keriso andrö i’otarai ginötö famobörö wamasindro ya’ia, inötö wangowalu, ba sagötö gofanöwa wongambatösa.
7. Madönisi göi dozi wongambatösa niha Keriso ba worasoi fe’aso Lowalangi ba wamohouni mangawuli amakhaita ba khö Lowalangi ba ba nawö, simane si no ifodumaduma fongambatösa Nazareta. Moroi ba wanörö tödö fanunu fandru andre, fe’aso Keriso ba wangorifi fongambatösada zamösana. Ba zimanö ero fongambatösa niha Keriso tola tobali ndrela wa’omasi Lowalangi sangorifi ösi gulidanö.
8. Ya börö wangowasaini fanunu fandru andre, tola tarasoi mangawuli we’aso Lowalangi sangorifi andrö. Ya lö mamalö omoda, fongambatöda, tobali nahia wamohouni amakhaita ba khö Lowalangi ba ba khö nawöda, tesusugi mangawuli wanötöna, te’abölö’ö wa’omasi, ba famati ni’a’aro’ö. Ya ero zamösana ösi wongambatösada larasoi wa sindruhu we’aso Lowalangi, si lö faröi, samohouni, ba sangorifi ya’ita.
9. Ba gafuriata, ba döi PGI ba KWI, ma’owai ami; Ya’ahowu Wanunu Fandru ba ndröfi 2025 andre ba Ya’ahowu Ndröfi Sibohou ba Ndröfi 2026.

 

Ba döi

 

                                  PGI                                                                         KWI

 

 

           Pdt. Jacklevyn F. Manuputty                Mgr. Antonius Subianto Bunjamin, OSC

                         (Ketua Umum)                                                   (Ketua Presidium)

 

 

                Pdt. Darwin Darmawan                               Mgr. Adrianus Sunarko, OFM

                     (Sekretaris Umum)                                             (Sekretaris Jenderal)

 

So’ali ba li Nono Niha: Kat. Ingatan Sihura, S.Ag.

Continue

TAROMA LI LOWALANGI LUO MIGU WANEMA ZO'AYA FANASA DÖFI C

Liturgi Taroma Li Döfi A/B/C, hlm. 487.

FOMBASO  I

Taroma Li Lowalangi nihalö moroi ba zura Yesaya, sama'ele'ö.-

Imane Lowalangi So'aya: Hiza genoniGu andrö, ni'a'aro'öGu, nituyuGu, ni'omasi'öGu. KhöNia no Ube GehehaGu, ena'ö I'ohe huku ba soi niha fefu. Tenga si'ao'ao Ia, tenga sebua li. Lö Ifarongogö liNia ba newali. Sukhu si no mufatö'ö, lö alua Ifatö. Fandru sanimbonimbo, lö Ibunu. Sindruhu lala Itörö wangombakha huku. Lö erege dödöNia, ba lö atage Ia, irege no Ifodanedane huku ba gulidanö ma'asagörö. Ladönadöna goroisaNia andrö niha si so ba hulo misa.-

Ya'odo, So'aya, zi no mogaoni ya'ugö, tobali enoniGu, satulö lala Utörö. U'ohe dangau ba Urorogö Ndra'ugö. Ube'e fawu'usa li ba soiGu Ndra'ugö ba Ubali'ögö haga soi niha: Ba wamokai hörö niha sau'a, ba wangefa'ö ba gurunga niha nikuru, ba wolohe baero nikuru ba zogömigömi. Ya'o Yahwe – Si So andre, da'ö döiGu.- Yes 42:1-4.6-8a

Simanö daroma li Lowalangi.-

 

Sinunö Fanema Li : Psallite No 29                         (ma Laudate No 37 ma 97)

 

FOMBASO  II

Taroma Li Lowalangi nihalö moroi ba zura Waulo khö Dito.-

Talifusö ni'omasi'ö!

No to'ele wa'asökhi dödö Lowalangi, sangorifi ya'ita, awö wa'omasiNia niha. I'orifi ita sa, tenga börö me no talau zambalö si sökhi, ba hiza, moroi khöNia samösa wangomasi'öNia ya'ita. Ya'ia zangorifi ya'ita bakha ba wanasa ni'amoni'ö ba samohouni ya'ita ba wa'abölö Geheha Ni'amoni'ö. Eheha andrö zamatumbu'ö ya'ita mangawuli ba same'e fa'auri si bohou. Lowalangi zangöhöna EhehaNia khöda nifa'ema Yesu Keriso, sangorifi ya'ita, ena'ö börö kharasiNia, amakhaitada khö Lowalangi tobali sökhi mangawuli, ba ena'ö tatema wa'auri si lö aetu, si no tadönadöna.- Tito 3:4-7

Simanö daroma li Lowalangi.-

 

Sinunö Föna Injil : Psallite No 218                                 (ma Laudate No 104)

 

INJIL

Turia Somuso Dödö khö Yesu Keriso nisura Luka.-

Me luo da'ö, ibörögö manofunofu dödö niha sato, hadia Yohane Mesia andrö nibalobaloira. Da'ö mbörö, wa imane khöra fefu Yohane: "Faoma idanö ube'e khömi wanasa. So dania Zabölö ebua moroi khögu. Lö sinangea ndra'o wanoto'ö böbö mbadagaheNia. Faoma Eheha Ni'amoni'ö ba faoma alitö (wanguhuku) Ibe'e khömi wanasa dania". Me latema wanasa niha sato, fao göi Yesu ba wanema fanasa. Me no aefa da'ö, ba me mangandrö Ia, ba teboka mbanua si yaŵa, ba möi mitou khöNia Geheha Ni'amoni'ö moboto wamaigira, hulö marafadi. Terongo li moroi ba mbanua si yaŵa sanguma'ö: "OnoGu Ndra'ugö, Ono ni'omasi'öGu, nituyuGu andrö." Luk 3:15-16.21-22

Simanö duria somuso dödö khö Zo'aya ya'ita, Yesu Keriso.-

 

FA’OMASI : BUA WANASA NI’AMONI’Ö

Taroma Li Lowalangi nirongoda ba wombaso si sara andre nihalö moroi ba zura Yesaya sama’ele’ö, no sambua fama’ele’ö sanandrösa khö Yesu. Fama’ele’ö andrö, no ngaotu fakhe föna we’aso Yesu. No ifokhalakhla Ia andrö si no Enoni Lowalangi, si no tebayoini Eheha Lowalangi, ba fondrege ni’omasi’ö Lowalangi. HalöŵöNia, ya’ia ba wolohe huku satulö, ba wanuwuni niha si lö fa’abölö, ba tobali haga ba soi ma’afefu, ba samasao ya’ita, ena’ö aheta ita moroi ba wangosawuyu ba moroi ba mböbö samesu fa’auri si lö enahöi.

Ba wombaso si dua nihalö moroi ba zura Waulo andrö khö Dito, i'ombakha’ö khöda sambua dumaduma nifalua Yesu ba wanema fanasa ni’amoni’ö. Yesu Keriso, enoni Lowalangi andrö, no Itema wanasa wamalalini era’era, ena’ö tesasai ita ba nidanö fanasa ba ba Geheha Ni’amoni’ö andrö. Ba da’e tatema mbua wanasa andrö 1). Sangeheta ya’ita moroi ba horö ondröita, 2). Sanou ya’ita tobali sanema ondröita andrö khö Nama, ba 3). Tebali’ö ita tobali ndrotondroto gerejania ni’amoni’ö. Aandrö akha auri ita simane niha si bohou ba simane niha ni’amoni’ö.

Bakha ba Duria Somuso Dödö andrö tarongo hewisa ia dötönafö niha andrö khö Yohane. Ba hiza ifaduhu’ö wa tenga ya’ia. Yesu sa si no I’olohuni Eheha Ni’amoni’ö andrö Ia. Me föna muhede Geheha Ni’amoni’ö si fao fama’ema ndra sama’ele’ö. Ba hiza, I’otarai me no Itema wanasa Yesu ba nidanö Yoridano, muhede Geheha Ni’amoni’ö andrö si fao fama’ema Yesu Keriso, Ono Lowalangi ni’omasi’ö. Me so Ia ba wangandrö Itema Geheha Lowalangi Yesu. No ifabu’u khöda Yesu: Na moroi ba dödö mangandrö ita khö Nama, ba Ibe’e khöda GehehaNia göi.

Fefu wombaso nirongoda andre, edöna idönia’ö ita ba wamati wa no itema wanasa Yesu andrö ba so khöNia Geheha Ni’amoni’ö sanolo ya’ia wamodanedane huku ba gulidanö, ya’ia wa’omasi. Khöda göi te’anofuli, hadia göi zi so khöda me no tatema wanasa sihasambua andrö? Hadia ha asala no tatema zitölu ngawua mbua wanasa ni’amoni’ö andrö? Tatu tenga ha asala tatema. Ena’ö mowua zi no tatema, moguna tabagisi ia. Fombagisida mbua wanasa ni;amoni’ö nitemada andrö, ya’ia wamaluada buabua wa’omasi andrö si no ibörögö Yesu. Ya’itolo ita Lowalangi. Amen.

Nifa’anö Kat. Ingatan Sihura, S.Ag.

Umbu:

Biro Liturgi Keuskupan Sibolga, Liturgi Taroma Li Döfi A/B/C Buku Bacaan Untuk Upacara Hari Minggu dan Hari Raya dalam Bahasa Nias, Gunungsitoli, Keuskupan Sibolga, 2012

Dianne Bergant, CSA & Robert J. Karris, OFM (ed) Tafsir Alkitab Perjanjian Lama Yogyakarta Kanisius, 2002

Dianne Bergant, CSA & Robert J. Karris, OFM (ed) Tafsir Alkitab Perjanjian Baru Yogyakarta Kanisius, 2002

Martin Harun, OFM, Lukas Injil Kaum Marginal Yogyakarta: Kanisius, 2019

St. Eko Riyadi, Pr, Lukas “Sungguh, Orang ini adalah Orang Benar!” Yogyakarta: Kanisius, 2011

.

Continue

TAROMA LI LOWALANGI LUO WA'ATUMBU ZO'AYA BA ZI MA’ÖKHÖ DÖFI C

Liturgi Taroma Li Döfi A/B/C hlm. 475.

FOMBASO  I

Taroma Li Lowalangi nihalö moroi ba zura Yesaya.-

Ha wa'ebua wa'omuso dödö, na tohare niha ba hili yaŵa sanuriaigö wa so wa'atulö, solohe turia somuso dödö, sangombakha wa te'orifi ita, sanguma'ö ba mbanua Yerusalema: Razo gulidanö ma'asagörö Lowalangiu andrö! No Ibörögö mamatörö. Fondrondrongo, ya'ugö Yerusalema! Mu'ao ndra sanaro andrö khöu fefu ba owuawua dödöra, börö me i'ila höröra, wa mangawuli Zo'aya ba hili Ziona, anehe ira. Mifehi'a si fao fa'omuso dödö, ya'ami adudula Yerusalema! Irara sa'ae dödö soiNia So'aya ba Ihöli ira. I'oroma'ö wa'abölö dangaNia ni'amoni'ö andrö, ba zanehe soi niha fefu. Ba la'ila wangorifi andrö si oroi khö Lowalangi dozi wondrege danö.- Yes 52:7-10

Simanö daroma li Lowalangi.-

 

Sinunö Fanema Li : Psallite No 98, 1-3 (Ant 2)      (ma Laudate No 41, 1+2)

 

FOMBASO  II

Taroma Li Lowalangi nihalö moroi ba zura ba Niha Heberai'o.-

 

Ya'ami ira ni'omasi'ö Zo'aya!

Me föna, no asese muhede Lowalangi khö ndra furugöda si fao fama'ema ndra sama'ele'ö. Ba ginötö safuria andre, muhede Ia khöda si fao fama'ema NonoNia, si no tehonogöi ba wanema fefu hadia ia tobali ondröitaNia. Si fao fama'emaNia göi wa no I'a'asogö gulidanö ma'asagörö. Ya'ia haga lakhömiNia ba famaedo wa'asoNia. Faoma taroma liNia sabölö I'a'aro'ö gölia ulidanö andre. Me no aefa ifalua wangehaogö niha moroi ba horö, dumadao Ia ba gambölö Lowalangi si lö ambö fa'abölö ba nahia fondrege zalaŵa, si no alaŵa moroi ba wetaro ndra mala'ika; simane töiNia andrö, si no Itema tobali ondröitaNia, no aröu tohude moroi ba wa'amolakhömi döira. Ha'ökhö sa ba gotalua ndra mala'ika no irai Iŵa'ö Lowalangi: "OnoGu Ndra'ugö; ma'ökhö andre no U'adonogö Ndra'ugö." Ma imane zui: "Tobali dania Ndra'o Ama khöNia; ba Ya'ia tobali Ono khöGu?" Ba me inötö Ifa'ele'ö NonoNia sia'a andrö ba gulidanö andre,

Imane zui: "Akha fefu ndra mala'ika Lowalangi mangalulu khöNia." Heb  1:1-6

Simanö daroma li Lowalangi.-

 

Sinunö Föna Injil : Psallite No 212                                  (ma Laudate No 35)

 

INJIL

Turia Somuso Dödö khö Yesu Keriso nisura Yohane.-

Ba mböröta, fatua lö mu'a'asogö gulidanö, no so Ia, si no Taroma Li andrö. Fao Ia khö Lowalangi, ba no fagölö Ia khö Lowalangi. Khö Lowalangi so Ia ba mböröta. Ba fefu hadia ia te'a'asogö si fao fama'emaNia. Sambalö lö'ö si so, si tenga khöNia mböröta. Fefu hadia ia auri börö Ia, ba Ya'ia haga ba niha fefu. Ba humaga haga andrö ba zogömigömi, ba lö ikhamö itayaigö haga andrö sogömigömi. Ya'ia, si no Taroma Li andrö, ba no haga sindruhu. Möi Ia ba gulidanö ba no so Ia ba gulidanö ba wohagaini niha fefu. He ŵa'ae te'a'asogö fefu hadia ia si fao fama'emaNia, ba lö sa'atö aboto ba dödö niha gulidanö Ia. Möi Ia ba soiNia, ba hiza, lö lafonaha Ia khöra tana khöNia. Ba ha wa'ato zamonaha Ya'ia ba samati ba döiNia, khöra Itehe tobali ono Lowalangi ira. Tobali ira ono Lowalangi, tenga börö wa tumbu ira moroi khö ninara ma börö wa'edöna nösi niha ma börö wa'edöna ndra matua, ba hiza, börö me Ibe'e khöra wa'auri si bohou Lowalangi. Ya'ia, si no Taroma Li andrö, ba no tobali ösi niha ba no I'iagö khöda. No anehega lakhömiNia, si no lakhömi Nono si ha samösa, nibe'e Nama khöNia, ba zi no a'oi oroma wa'ebua dödö Lowalangi, awö wa'aduhuNia.- Yoh 1:1-5.9-14

Simanö duria somuso dödö khö Zo'aya ya'ita, Yesu Keriso.-

 

Kandang Natal [Sumber foto: detik.com]

Erönua:

Fombaso nirongoda nihalö moroi ba zura Yesaya Sama’ele’ö ba no fehede Zo’aya ba Ndraono Gizara’eli si so ba gurunga ba Mbabilonia. No tohare ginötö ba wangawuli ba danö gamabu’ula, ba wangotomosi mangawuli banua Yerusalema, banua razo sebua, ya’ia Lowalangi. Dafao ita khö Zo’aya ba wangotomosi Gerejada ba ba wondrou’ö fa’auri nösi mbanua, ena’ö tobali ono mbanua satulö ba safönu fa’omasi.

Ösi zura andrö niha Heberai’o, ifaehagö khöda Yesu sangorifi andrö no so Ia ba gotalua niha. La odumadumaigö Ia “ono” ba “sanema ondröita”. Tobali Ia sangorifi ösi gulidanö si otarai Lowalangi. Alaŵa dadaomaNia moroi khö ndra Mala’ika. Ba hiza, no I’ide’ide’ö Ia simane niha. Börö da’ö, tekaoni ita ba wanema’ö Ya’ia ba wanga’asogö fangorifiNia ba gulidanö.

Injil göi zamotokhi ba dödöda, wa no so Keriso ba gulidanö andre i’otarai föna wanga’asogö ulidanö, ba hagaNia Ihagaini göi niha si tenga niha Keriso. Ba hiza börö wa’atumbuNia ba Mbetilekhema ba fa’amateNia awö wemaosoNia, wa oroma Daroma Li andrö khö Nama. Da’ö mbörö, wa mohare ita, niha samati. Ba da’ö göi wa te’andrö moroi khöda wolo’ö.

Fanörö tödö fa’atumbu Zo’aya ni’owasainida andre, sindruhunia idönia’ö ita wo’erönusi wa fa’atumbu Zo’aya zangabölö’ö famatida ba walukhata khö Yesu ba ba wamaduhu’ö Ya’ia si no Ono Lowalangi, simane nifaduhu’ö, “No I’oroi ba mböröta, asese sibai ba sifao ngawalö lala I’oguna’ö Lowalangi wahuhuosa khöndra furugöda sifao ira sama’ele’ö, ba hiza ba zafuria andre fahuhuo ia khöda sifao fama’ema Nono-Nia.”

Mangowasaini fa’atumbu Zo’aya idönia’ö ita wanöndra sambua lala wanga’aro’ö wamatida ya’ia wa’atobali ösi niha Lowalangi andrö. Bakha ba duria somuso dödö andrö nisura Yohane iwa’ö: “Ba mböröta ba no taroma li, taroma li andrö ba no tobali niha ba so ia ba gotaluada.” Lowalangi zanga’asogö banua siyawa awö danö ba fefu nösinia ma’afefu, ba ya’ia göi zanga’azökhi ya’ita, niha. Iada’a tobali göi ia niha ba toröi ia ba gotaluada. Bazimanö niha andrö no sambua boto niha andrö no sambua nahia fondrege zisökhi ba dödö Lowalangi. Ba da’e ta’ila wa Lowalangi andrö so ia ba mboto nawöda niha ba mboto niha fefu. Ba da’e ta’ila hewisa wa’ahatö Lowalangi ba mboto wa’aniha andrö, ni’a’azökhi-Nia sifakhilikhili khönia. Lowalangi fondrege ni’amoni’ö andrö ba no tobali ia Lowalangi sifahuwu, sahatö, sanandra lahe wa’anihada. Lowalangi andrö göi tenga ha toröi ia ba gotaluada, ba hiza ibokai wa’auri-Nia ba wangomasi’ö, auri ba mate soguna ba niha. Fahuhuo khöda Lowalangi andrö sifao fama’ema nono-Nia Yesu si no ono sawuyu situmbu andrö. Ya’ia Imanuel, awöda Lowalangi. Ba zimanö ba wa’atumbu-Nia andrö tasöndra wanötöna sibohou, fanötöna wa tasöndra wa’omuso dödö  ba fangöhöli ba wefao khö-Nia. Ya’ia andrö no haga sindruhu simöi ba gulidanöda.

Yesaya zamasugi ba dödö ba dödö ba sanuriaigö turia somuso dödö ba niha saetu fanötöna, wa “Lowalangimö andrö ba no Razo”. No ifuli so Lowalangi, tumbu ba gotalua soi andre. Börö da’ö mi’omusoi’ö dödömi, me no so Zo’aya wondrara tödö soi-Nia. No ihöli Lowalangi Yerusalema, ba no I’oroma’ö danga-Nia sabölö andrö föna fefu soi. Fe’aso Lowalangi andrö sitobali niha lo mamalö fao ia ba lala wa’aurida. Fahuhuo Lowalangi andrö sifao fama’ema Nono-Nia sihasamösa andrö. Fe’aso-Nia andrö ba no danedane wanötönada ba ziso miföna, wa börö Yesu Keriso andrö tasöndra wa’auri si lö aetu ba Zorugo.

Fa’atumbu Zo’aya zamohouni ya’ita tobali ono haga, börö me haga sindruhu no tumbu bakha ba dödöda ba ba wa’aurida, sangalaini fa’ogömigömi ba wa’aurida. Böi ta famalömalö ta’o’aurifagö haga razo wa’atulö andrö, ya’ia andrö no taromali si tobali ösi niha ba so ia ba gotaluada. Ba yaita göi ba gafuriatania tobali ita haga ba nawöda niha. Amen.

 

Nifa’anö Kat. Ingatan Sihura, S.Ag.

Umbu Wangerangera:

Biro Liturgi Keuskupan Sibolga, Liturgi Taroma Li Döfi A/B/C Buku Bacaan Untuk Upacara Hari Minggu dan Hari Raya dalam Bahasa Nias, Gunungsitoli, Keuskupan Sibolga, 2012

Dianne Bergant, CSA & Robert J. Karris, OFM (ed) Tafsir Alkitab Perjanjian Lama Yogyakarta Kanisius, 2002

Dianne Bergant, CSA & Robert J. Karris, OFM (ed) Tafsir Alkitab Perjanjian Baru Yogyakarta Kanisius, 2002

Martin Harun, OFM, Yohanes Injil Cinta Kasih Yogyakarta: Kanisius, 2015

St. Eko Riyadi, Pr, Yohanes “Firman Menjadi Manusia” Yogyakarta: Kanisius, 2011

St. Sutopanitro, Pr, Pesan-Pesan Kurban Ekaristi Hari Minggu dan Hari Raya Tahun A-B-C Jakarta: Obor, 2013

.

 

Continue