TAROMA LI LOWALANGI LUO MIGU PASKA SI – 5 DÖFI B.

Liturgi Taroma Li Döfi A/B/C, hlm. 329.

FOMBASO  I

Taroma Li Lowalangi nihalö moroi ba zura "Halöŵö ndra Rasul".-

Me luo da'ö, me no irugi Yerusalema Faulo, ba itandraigö ifaogö ia khö ndra solo'ö khö Yesu. Ba hiza, a'oi ata'u ira khönia, lö faduhu dödöra wa no nifahaö ia göi. Itolo ia Baranaba. Möi ia khönia ba ifasao ia khö ndra rasul. Itunötunö khöra, hewisa wangila Waulo So'aya ba dalu lala ba hewisa wehede Zo'aya khönia. I'ombakha'ö göi Baranaba, hewisa wa'abarani Waulo ba mbanua Ndramaseko wamahaö ba döi Yesu. Awena latehegö faofao Waulo khöra ba Yerusalema, ba lö aiŵö ia wamahaö wangombakha töi Zo'aya. Fahuhuo ia ba ifadaö li ndra niha Yahudi samake li Yunani, ba hiza, ya'ira la'alui lala wamunu ya'ia. Me larongo da'ö niha samati tanö bö'ö, la'ohe ia misi tou ba Kaizaria. Awena lafatenge ia ba Dareso. Tobali ahono Gereja Zo'aya ba danö Yudaia ma'asagörö, ba danö Galilaia ba ba Zamaria. Ba watolosa Geheha Lowalangi, itugu abölö ba itugu monönö ndrotondroto Gereja, börö me latörö lala Zo'aya niha samati ba la'ata'ufi Ia.- HalRas 9:26-31

Simanö daroma li Lowalangi.-

 

Sinunö Fanema Li : Psallite No 22 B           (ma Laudate No 9, 1-2 ma 62, 1)

 

FOMBASO  II

Taroma Li Lowalangi nihalö moroi ba zura Yohane si föföna.-

He ya'ami iraonogu !

Böi ha ba wehede si lö ösi ta'omasi'ö nawöda, ya ta'omasi'ö faoma fa'omasi sindruhu, nifotandra ba nilauda. Da'e nilauda ba wangi'ila wa ya'ita farahu ba niha si'otarai Lowalangi, irege sahono ita tanö föna Lowalangi. Na i'adugö ita tödöda, lö tola lö'ö aboto ba dödöda, wa abölö ebua Lowalangi moroi ba dödöda andrö, ba oi I'ila ma'afefu. Ba hiza, ya'ami ira talifusögu ni'omasi'ö, na lö iŵa'ö sala ita tödöda, ba lö ata'u ita wangondrasi Lowalangi. Ibe'e khöda, hadia ia ni'andröda moroi khöNia, börö me ta'o'ö goroisaNia ba tafalua hadia ia zomasi dödöNia. Da'ö goroisaNia, ena'ö faduhu dödöda khö NonoNia, Yesu Keriso, ba lö tola lö'ö faoma ta'omasi'ö nawöda si faudu ba goroisa Yesu Keriso. Fefu niha solo'ö oroisa Lowalangi, auri ha sambua awö Lowalangi ba Lowalangi ha sambua awö ira. No ta'ila, wa Lowalangi ha sambua awö ita, börö Geheha andrö, nibe'e Lowalangi khöda, samaduhu'ö ba dödöda da'ö.- 1 Yoh 3:18-24

Simanö daroma li Lowalangi.-

 

Sinunö Föna Injil : Psallite No 232                  (ma Laudate No 9, 3 ma 62, 2)

 

INJIL

Turia Somuso Dödö khö Yesu Keriso nisura Yohane.-

Me luo da'ö, Imane Yesu khö ndra nifahaöNia: "Ya'odo döla nagu sowua andrö, ba AmaGu zondrorogö ya'ia. I'eŵa dozi ndraha si so khöGu si lö mowua. Ba dozi daha sowua Ihaogö, ena'ö itugu oya mbuania. Si no muhaogö ami, börö daroma li andrö, niŵa'öGu khömi. Mi'iagö Ndra'o, ba U'iagö ami. Tebai sa mowua ndraha, na ha ya'ia. Awena tola mowua ndraha, na auri ia ba döla. Simanö göi ami : Awena tola mowua ami, na aro ami khöGu. Ya'odo döla nagu andrö, daha ami. Sangiagö Ya'o, ba U'iagö ia göi, da'ö zoya bua, börö lö mofozu ami, na lö Ya'o. Niha si lö aro fa'auri khöGu, tetibo'ö, hulö ndraha, ba tobali dania oköli. La'ozaragö ba latibo'ö ba galitö, ba akhozi. Na mi'iagö Ndra'o ba na lö aefa ba dödömi daroma liGu, tola mi'andrö hadia zomasi ami, ba tebe'e khömi ni'andrömi andrö. Na oya mbuami, mi'oroma'ö wa sindruhu nifahaöGu ami. Ba da'ö tefolakhömi NamaGu."- Yoh 15:1-8

Simanö duria somuso dödö khö Zo'aya ya'ita, Yesu Keriso.-

 

Ilustrasi Tanaman yang menempel membuat dia bisa tumbuh. [Sumber Foto: Dok. Pribadi]

Erönua:

YESU: BUA WA’OMASI NI’OLOHI’Ö

Ba wombaso siföföna tarongo hewisa gofanöwa Waulo andrö nifotöi Saulo ba mböröta, sabölö mamakao niha samati, me no tobali nifahaö Keriso. Ba mbörötania fatuwu niha Keriso wanema ya’ia, börö wa’ata’u me la’ila wa ya’ia andrö no solohilohi niha samati khö Keriso. Ba zitambai da’ö göi, omasi göi niha Yahudi ba wamunu ya’ia, börö me no no moloi ia moroi ba goigoi niha Yahudi laŵa’ö. Ba wangiwa tödö simanö, Baranaba andrö, samösa niha safönu Eheha Ni’amoni’ö, zanolo bakha ba wame’e fa’aboto ba dödö, irege tola tetehögö khö Waulo ba we’aso ba gotalua nifaha’ö ba niha samati.

Taroma li Lowalangi nirongoda ba wombaso sidua nihalö moroi ba zura Yohane siföföna, no hulö sambua menemene zatua ba ndraononia. Menemenenia andrö mo’amakhaita ba wehede si’olohia’ö boto. Fehede wanguma’ö fa’omasi andrö, lö mamalö göi te’oroma’ö ia sifao buabua wa’omasi. Fa’omasi ba no tandra si föföna ba niha samati sindruhu.

Turia somuso dödö andrö nisura Yohane, sindruhu mangoroma’ö khöda gamakhaitada andrö ya’ita niha samati ba khö Yesu Keriso. Ifo’amaedola sihulö döla nagu ba ndrahania. Ndraha si sokhi ba sowua, lö mo’atufa lahaogö ba la’ofösi. Ndraha si lö mowua, ba lataba, latunu ba galitö. Amaedola andre no niha samati samösa, na mowua ba wa’omasi, lö mamalö tatema howuhowu. Ba hiza, si lö mowua, ba nitibo’ö ba nahia sogömigömi andrö.

Sitölu ngawua wombaso andre, edöna idönisi ita ba wo’erönusi lala wa’aurida ba we’asoda ba ngai Keriso andrö. Börö sakramen fanasa tefaböbö ita khö Keriso, simane daha ba döla geu. Ba zimanö, mo’ömö ita ba wa’amowua. Fa’atosasa ba famakao zangehaogö ya’ita moroi ba wo’amböta fa’abiha wangerangera ba fakhögusa. Fanema’öda ngawalö sakramen ba famondrondrongoda taroma li Zo’aya zangaro’ö faböbösada khö Keriso.

Fowuada andrö wefao ba khö Keriso, ya’ia ba wamaluada bua wa’omasi. No Itehegö wa’auriNia Yesu Keriso börö wa’omasiNia khöda. Ibe’e ia khöda dumaduma ba wamalua fa’omasi andrö, ya’ia ba wamelegö nosonia ena’ö tehöli ita. Hewisa ita göi ba wamalua fa’omasi ba nawöda? Famaluada fa’omasi andrö tebörögö ia moroi ba wehededa, ba tola teforoma’ö ia göi ba mbuabua salua baeha. Fanoloni niha so’amböta, sinumana, ba nibaerogö, no sambua bua soroma ia. Ba zinanö fefu, böi tafamalömalö ta’andrö wanolo Lowalangi ena’ö sabölö ba sitehulu tödö ita. Amen.

 

Nifa’anö Kat. Ingatan Sihura, S.Ag.

 

Umbu:

Biro Liturgi Keuskupan Sibolga, Liturgi Taroma Li Döfi A/B/C Buku Bacaan Untuk Upacara Hari Minggu dan Hari Raya dalam Bahasa Nias, Gunungsitoli, Keuskupan Sibolga, 2012

Dianne Bergant, CSA & Robert J. Karris, OFM (ed) Tafsir Alkitab Perjanjian Lama Yogyakarta Kanisius, 2002

Dianne Bergant, CSA & Robert J. Karris, OFM (ed) Tafsir Alkitab Perjanjian Baru Yogyakarta Kanisius, 2002

Martin Harun, OFM, Yohanes Injil Cinta Kasih Yogyakarta: Kanisius, 2015

St. Eko Riyadi, Pr, Yohanes “Firman Menjadi Manusia” Yogyakarta: Kanisius, 2011

Continue

TAROMA LI LOWALANGI LUO MIGU PASKA SI – 4 DÖFI B

Liturgi Taroma Li Döfi A/B/C hlm. 327.

FOMBASO  I

Taroma Li Lowalangi nihalö moroi ba zura "Halöŵö ndra Rasul".-

Me luo da'ö, nifatörö Geheha Ni'amoni'ö muhede Wetero, imane: "He ya'ami, sololohe soida, ba he ya'ami, satua mbanua! Na lafareso ndra'aga, ma'ökhö andre, börö me no malau zi sökhi wamadöhö niha sombuyumbuyu ba na omasi ami mi'ila, hewisa lala wamadöhö ya'ia, ya aboto ba dödömi awö fefu Ndraono Gizara'eli: Börö wa'abölö ba kuaso Yesu Keriso, banua Nazareta, niforöfami, ba no ni'orifi Lowalangi mangawuli ba gotalua zi mate. Ba döiNia andrö, wa muzizio fönami niha da'e, si no döhö fökhö. Da'ö Yesu andrö niŵa'ö ba zura ni'amoni'ö: Kara nitibo'ömi, ya'ami sotomo, no tobali kara sabölö moguna. Ha khö Yesu tola te'orifi niha. Börö ba zi sagörö ulidanö, lö niha bö'ö si no manema kuaso moroi khö Lowalangi ba wangorifi ya'ita."- HalRas 4:8-12

Simanö daroma li Lowalangi.-

Sinunö Fanema Li : Psallite No 118, 1+3+6             (ma Laudate No 97, 1-2)

FOMBASO  II

Taroma Li Lowalangi nihalö moroi ba zura Yohane si föföna.-

He ya'ami ira talifusö!

Mifaigi, ha wa'ebua wa'omasi Nama khöda, irege tebe'e töida ono Lowalangi. Ba duhu simanö: No ono Lowalangi ita. Da'ö mbörö, wa lö aboto ba dödö niha gulidanö ita, börö me lö saboto ba dödöra Lowalangi. He ya'ami ni'omasi'ö! Ono Lowalangi ita iada'e, ba lö'ö na mu'oroma'ö khöda, hewisa ita dania zindruhunia. No ta'ila: Na so Keriso dania, tobali ita simane Ya'ia, börö me tanehegö dania Ia, hewisa Ia zindruhunia.- 1 Yoh 3:1-2

Simanö daroma li Lowalangi.-

Sinunö Föna Injil : Psallite No 239                              (ma Laudate No 97, 3)

INJIL

Turia Somuso Dödö khö Yesu Keriso nisura Yohane.-

Me luo da'ö, Imane Yesu : "Ya'odo gubalo si sökhi. Itehegö mate ia föna mbiribiri kubalo si sökhi. Enoni nibu'a gazi, tenga kubalo ia, ba tenga göi sokhö biribiri. Na i'ila tohare nasu gatua, ilau moloi ba iröi mbiribiri andrö. Ira'u mbiribiri andrö asu gatua ba ifazawili. Moloi genoni nigazi andrö, börö me mohalöŵö ia börö gazi. Lö ba dödönia biribiri andrö.Ya'odo gubalo si sökhi. Simane fangila Nama Ya'o awö wangilaGu Ama simanö göi wangilaGu biribiriGu, ba la'ila göi Ndra'o. Utehegö nosoGu khöra.So nasa mbiribiri khöGu tanö bö'ö, si tenga moroi ba kandra andre. Lö tola lö'ö Uhalö ira göi, ba lafondrondrongo liGu dania, ba tobali ha sambua ngawawa ira ba ha samösa gubalo. Andrö I'omasi'ö Ndra'o AmaGu, börö me Utehegö nosoGu ba wanema Ya'ia mangawuli. Samösa lö si tola morabu fa'auri moroi khöGu, ba hiza, ba wa'aohagölö Utehegö nosoGu. Tola Ube'e wa'auriGu ba tola Ufuli Uhalö; kuaso andrö no Utema khö NamaGu".- Yoh 10:11-18

Simanö duria somuso dödö khö Zo'aya ya'ita, Yesu Keriso.-

Ilustrasi Gembala [Sumber Foto: https://news.ddtc.co.id/]

YESU KUBALO SISÖKHI

Bakha ba wombaso siföföna tarongo hewisa wamaduhu’ö Wetero andrö ba wamadöhönia niha sombuyumbuyu. Ba wamaduhu’önia andrö oroma ba niha Yahudi wa Yesu andrö si no laforöfa, no tobali sangorifi nösi gulidanö ba sanguhuku dozi soi. Lö te’orifi nösi gulidanö, na lö Ya’ia. Simanö göi lala wa’aurida andre. Na lö Yesu, lö tasöndra wangefa horöda ba lö tasöndra wa’auri si lö aetu.

Bakha ba wombaso sidua andrö nihalö moroi ba zura Yohane andrö siföföna, sindruhu te’a’aro’ö dödöda, wa ya’ita andre niha samati, no Ono Lowalangi ita. Bakha ba sakramen fanasa nitemada me luo no, ba börö wa’abölö Geheha Ni’amoni’ö, no tobali ita ono Lowalangi. Eheha Ni’amoni’ö zamarou ya’ita fa’ama khö Lowalangi. Omuso sa dödöda ba da’ö, ba hiza i, fa’aurida lö tola lö’ö faudu ba döi solakhömi andrö. Da’e mbua nitemada moroi ba wa’amate Yesu andrö. Ba wa’amateNia andrö tehöli ita ba tesou tobali Ono Lowalangi.

Bakha ba Duria Somuso Dödö andrö tarongo, wamaduhu’ö Yesu samösa. Famaduhu’öNia andrö tenga ha “lela ilo” ba hiza ifatörö’ö boto. Yesu sa gubalo si sökhi, me no auri ba mate Ia soguna khöda. Fe’amöiNia kubolo andrö, itehe mate, irege mate ba döla röfa. Ba wanehegöNia Ya’ia andrö, Isusugi göi ia Lowalangi Ama, si no sitobali sia’a moroi ba gotalua zimate fefu. I’otarai da’ö tobali Ia su’asu’a ba niha fefu si so kuaso ba danga ba wamatörö niha bö’ö.

Sitölu ngawua wombaso andre, sindruhu ibotokhi ba dödöda hewisa we’amöi kubalo andrö. Ato niha iada’a, ira sondrönia’ö ba famareta ba ma samatörö soi ba gulidanö, laŵa’ö ba khöra samösa wa ya’ira andrö kubalo ma enoni. Itaria sindruhu kubalo si sökhi ira, ba itaria lakubaloi ira samösa, ba ono mbanua ma niha sato tobali femangamangara. Lawa’ö enoni niha soya ira, ba hiza na möi ira gofu heza, na tola ena’ö lö manö itörö dangara hadia ia. Dae gafuriatania nifotöi dania kubalo nigazi simane niwa’ö Yesu ba wombaso Injil mege no.

Afuriatania, hadia zedöna tabali’ö erönuada ba wamondrongo taroma li andre? Siföföna ba ya’ia da’ö fangi’ilada kubaloda ba fangi’ilada nikubaloi andrö. Na aboto ba dödöda gubaloda ba ta’olohia’ö wolaunia. Na’aboto ba dödöda nikubaloida, ba ta’ila tabelegö ita fönania. Simendrua ba ya’ia da’ö, fe’amöi kubalo andrö ena’ö sahele dödö. Ba wa’ahele dödö we’amöi, lö mamalö tatema zulö fa’auri si lö aetu andrö. Amen.

Nifa’anö Kat. Ingatan Sihura, S.Ag.

 

Umbu:

Biro Liturgi Keuskupan Sibolga, Liturgi Taroma Li Döfi A/B/C Buku Bacaan Untuk Upacara Hari Minggu dan Hari Raya dalam Bahasa Nias, Gunungsitoli, Keuskupan Sibolga, 2012

Dianne Bergant, CSA & Robert J. Karris, OFM (ed) Tafsir Alkitab Perjanjian Lama Yogyakarta Kanisius, 2002

Dianne Bergant, CSA & Robert J. Karris, OFM (ed) Tafsir Alkitab Perjanjian Baru Yogyakarta Kanisius, 2002

Martin Harun, OFM, Yohanes Injil Cinta Kasih Yogyakarta: Kanisius, 2015

St. Eko Riyadi, Pr, Yohanes “Firman Menjadi Manusia” Yogyakarta: Kanisius, 2011

Continue

Hoho Wa'atalifusöta Ba Geheha

Akhötö likhe na ha sara

Lö aöndrö na fao awönia zoya

Aoha ba dödö niha na ha samösa

Totaö ba dödö na so niha soya

Oha gafasi na zumawili moroi ba döwa

Abu'a sibai na owulo ba mbolabola

Aboto ita na faguagua

A'ozu gohitö dödöda na so wahasara

Alösö gara na no fadekha

Azizi zi'öli na lafazibo lafaondra

Na so i zifatimba la'ohe ba lala

Ena'ö a'ozu faofao ita ba khö Zo'aya

Hadia wa abua gara wa manambua

Börö khönia hunö sabe'e si no fa'a

Hadia wangabölö niha samati ba khö Zo'aya

Ha Eheha Ni'amoni'ö nitema'öda ma'ökhö da'a

Nifa'anö Kat. Ingatan Sihura, S.Ag.

Continue

Hoho Pentakosta

Hadia zalua ba wombaso si sara

Ya'ia wanema Eheha Ni'amoni'ö buala Zo'aya

Idozigö niha samati si ha sambua

Si lö faröi ba Yerusalema

Buala Geheha Ni'amoni'ö no oya

Simöi ba niha samati ero zamösana

So mbuala-Nia wahuhuosa ba ngawalö li niha

Ba wanuriaigö turia somuso dödö sioroi Zo'aya

Famaduhu'ö Waulo ba wombaso si dua

Eheha Ni'amoni'ö zangabölö'ö niha samati ba khö Zo'aya

Lö oto'oto zamati ba khö Zo'aya

Le Dawa Heleni ba lö niha Yehuda

Yesu So'aya zamatenge ya'ita

Ba wanuriaigö turia fangöhöli ba zinemama

Lö sa iröi ita ba lala gofanöwada

Eheha-Nia zi lö faröi wangosisi'ö ya'ita

Nifa'anö Kat. Ingatan Sihura, S.Ag.

Continue

TAROMA LI LOWALANGI LUO MIGU PENTAKOSTA DÖFI A

Liturgi Taroma Li Döfi A/B/C, hlm. 116.

FOMBASO I

Taroma Li Lowalangi nihalö moroi ba zura "Halöŵö ndra Rasul".-

Me no irugi luo Pentakosta (= ngaluo si lima wulu aefa luo Paska), no owulo fefu ndra nifahaö Yesu ba zi ha sambua naha. I'anema'ö terongo zihöngö si otarai mbanua si yaŵa, hulö na itörö angi sabölöbölö, ba ifönui nomo andrö ma'asambua, ba zi dadao ira. Oroma khöra dalinga wandru si hulö galitö so'anönöi fefu, awö wa möi khöra dozi ira, ahono ba högöra. Ifatörö ira Eheha Ni'amoni'ö, irege labörögö lalau li bö'ö, simane nibe'e Geheha khöra fanötöi. Me luo da'ö, ato niha Yahudi, awö niha satulö tödö si'otarai soi fefu ba gulidanö, si toröi ba Yerusalema. Me so zihöngö andrö, ato sibai niha sangondrasi ba tobali dödöra, me larongo fahuhuo ndra nifahaö Yesu ba lira zamösana, ba lasofu: "Faigi sa'atö ! Tenga niha Galilaia ira, dozi sihede andrö? Hewisa wa tola tarongo fahuhuo ira, dozi ita, ba li ni'oguna'ö ba danöda, ba zi tumbu ita? Ya'ita niha Waretia ba niha Media ba niha Gelama, awö zi so ba Mesopotamia, moroi ba Yudaia ba ba Gafadokia, moroi ba Wondro ba ba Asia, moroi ba Frigia ba ba Pamfilia, moroi ba danö Misirayi ba ba danö Libia, tanö ba Girene. So ba gotaluada niha Roma, he niha Yahudi ba he göi proselita, ba he göi niha Gereta ba Ara. Tarongo, lalau lida, wangombakha segebua andrö, nilau Lowalangi."- HalRas 2:1-11

Simanö daroma li Lowalangi.-      Sato : Ma'andrö …

 

Sinunö Föna Injil : Psallite No 104 (Cara B) ma 122                (ma Laudate No 74)

 

FOMBASO II

Taroma Li Lowalangi nihalö moroi ba zura Waulo si föföna ba niha samati ba mbanua Gorindro.-

Ya'ami ira talifusö!

U'ombakha'ö khömi: Tebai laŵa'ö niha: Yesu no So'aya! na tenga nifarou Geheha Ni'amoni'ö. Oya ngawalö mbuala fa'ebua dödö, ba ha sambua Geheha zame'e da'ö. Oya ngawalö halöŵö ba we'amöi enoni Zo'aya, ba ha samösa Zo'aya, si möi ita enoni andrö. Oya ngawalö wa'abölö awö wa'onekhe, ba ha samösa Lowalangi, sanga'asogö fefu hadia ia ba dödö zi no ato andrö fefu. Fefu hadia ia nibe'e Geheha ba dödö zamösana, no Ibe'e soguna ba zato. Hulö mbotoda andrö si ha sambua, ba no oya ndrotondroto. Simane göi Gereja si no boto Keriso si ha sambua, he ŵa'ae no oya ndrotondroto ita. Ya'ita fefu, he niha Yahudi ba he si tenga niha Yahudi, he sawuyu ba ma si tenga sawuyu, me tatema wanasa ni'amoni'ö, no tobali ndrotondroto mboto Keriso, si fao fama'ema Geheha si ha sambua andrö. Ya'ita fefu, no tatema Geheha si ha sambua.- 1 Kor 12:3b-7.12-13

Simanö daroma li Lowalangi.-             Sato : Ma'andrö …

 

Sinunö föna Injil : Psallite No  234                                  (ma Laudate No 9)

 

INJIL

Turia Somuso Dödö khö Yesu Keriso nisura Yohane.-

Me luo si föföna aefa Sabato, me tanö owi, no so ndra nifahaö Yesu ba zi sambua omo, si no mukusi fefu bawandruhö, börö me no ata'u ira niha Yahudi. I'anema tohare Yesu. Muzizio Ia ba gotaluara ba Imane: "Ya so khömi wa'atulö!" Me no Iŵa'ö da'ö, Iforoma'ö khöra dangaNia awö ngaiNia. Awena omuso sibai dödöra, me la'ila Zo'aya. Ifuli Imane khöra: "Ya so khömi wa'atulö! Hulö simane famatenge Nama Ya'o, simanö göi wamatengeGu ya'ami." Me no Iŵa'ö da'ö, Ihehaini ira ba Imane: "Mitema Geheha Ni'amoni'ö! Na so ni'efa'ömi horö, aefa khöra. Ba zi lö mi'efa'ö ia, lö aefa."- Yoh 20:19-23

Simanö duria somuso dödö khö Zo'aya ita, Yesu Keriso.-

Erönua:

EHEHA NI’AMONI’Ö ZA MO FA’ABÖLÖ NIHA SAMATI

Bakha ba wombaso siföföna, tarongo hewisa duria sahölihöli dödö andrö nirasoi ndra nifaha’ö. Sahölihöli dödö salua ba Yerusalema me luo si lima wulu, ya’ia we’amöi Geheha Ni’amoni’ö andrö sihulö lela galitö ba högö ndra nifaha’ö. Ba zimanö tefönui ira Eheha Ni’amoni’ö irege so khöra mbua Geheha Ni’amoni’ö; siföfönania ya’ia wahuhuosa ba ngawalö li. Fehuhuosa ba ngawalö li andre edöna ifahatö ba niha turia andrö siföföna teturiaigö ia ba wehede nirongo ba saboto ba dödö niha samondrongo ya’ia. Angandröwada göi ya itörö ba gotaluada, wa tefönui ita Eheha Zo’aya ero zamösana, ena’ö si ha sara tödö ita wanuno So’aya ba si faoma so wangomasi’ö.

Bakha ba wombaso sidua andrö nihalö moroi ba zura Waulo ba niha samati ba mbanua Gorindro, no sambua fangaro dödö niha samati ba wangai lala halöwö zamösana. Lö mamalö auri Yesu Keriso bakha ba Gereja, ba gotalua niha samati khö Lowalangi. Eheha Zo’aya zangorifi Gereja: simane hanuhanu sangorifi boto. Simane ba mboto, fefu ndrotondroto  dozi so  wa’amoguna, simanö  göi ita  fefu dozi so halöŵö bakha ba Gereja ba ba gulidanö. Ero zamösana umat, tola ifalua lala halöwö wanuriaigö andrö sifaudu molo’ö fa’abölönia zamösana. Fefu da’ö no buala nitemada me tatema wanasa ni’amoni’ö. Ba zimanö Eheha Ni’amoni’ö andrö zi lö mamalö mangabölö’ö ya’ita.

Bakha ba duria somuso dödö andrö tarongo hewisa wamatenge Yesu ndra nifaha’öNia ba wanuriaigö turia somuso dödö. I'owai ndra nifahaöNia Yesu ba wama’ema khöra fa’atulö. FamatengeNia ira nifaha’ö, ba siföföna ihehaini ira sifao Eheha Ni’amoni’ö. Eheha Ni’amoni’ö andrö ba no fa’atulö. Fa’atulö, ba fa’omuso dödö andrö ba no bua Geheha Ni’amoni’ö. Eheha Ni’amoni’ö, ba no sia’a mbuala nibe’e Yesu. Eheha  andrö  zame’e  fangefa horö, fahasambua  niha  samati, fa’abölö  ba  wa’auri niha Keriso.

Sitölu ngawua wombaso andre edöna ituriaigö wa Eheha Ni’amoni’ö andrö no buala Yesu siföföna sibai khödra Nifaha’ö me no maoso ia moroi ba gotalua zimate. Eheha Ni’amoni’ö andre göi zangabölö’ö niha samati ba wanuriagö fa’atulö andrö I’otarai wehede irugi mbuabua. Baero da’ö, Eheha Ni’amoni’ö zamatumbu’ö ba sangosambua’ö niha samati ba zisagörö ulidanö. Eheha Ni’amoni’ö andrö göi zangeheta otalua ba niha samati, irege lö Ndrawa Heleni ba lö niha Yehuda. Fefu ita no samati ba khö Keriso börö wanasa sihasambua andrö nitemada. Amen.

Nifa’anö Kat. Ingatan Sihura, S.Ag.

Umbu:

Dianne Bergant, CSA & Robert J. Karris, OFM (ed) Tafsir Alkitab Perjanjian Lama Yogyakarta Kanisius, 2002

Dianne Bergant, CSA & Robert J. Karris, OFM (ed) Tafsir Alkitab Perjanjian Baru Yogyakarta Kanisius, 2002

Martin Harun, OFM, Yohanes Injil Cinta Kasih Yogyakarta: Kanisius, 2019

St. Eko Riyadi, Pr, Yohanes “Firman Menjadi Manusia” Yogyakarta: Kanisius, 2011

 

Continue