TAROMA LI LOWALANGI LUO MIGU SI – 19 DÖFI C

FOMBASO  I

Taroma Li Lowalangi nihalö moroi ba zura Wa'atuatua.-

Bongi andrö (ba wangefa'ö Iraono Gizara'eli moroi ba danö Mesirayi), no tohöna Ö'ombakha'ö khö ndra furugöma, he So'aya. Andrö wa tola lafa'anö dödöra ba faduhu dödöra ba gamabu'ula liMö. Faduhu sa'ae dödö soiMö andrö, wa Ya'ugö zangorifi niha solo'ö liMö ba sanehegö wa tekiko nudura. Me ba wanguhukuMö si fa'udu khöma, ba da'ö göi no Öfolakhömi ndra'aga, me no Ökaoniga ba khöU. Tobini ba nomora, nga'ötö ndra niha si sökhi wamasömba'ö fasömbata Paska khöU. Ba ha sara dödöra ba wamabu'u,  wa la'o'ö goroisa nibe'eU : Faoma mo'urakha niha samati andrö, he ba ngawalö zi sökhi, he göi bakha ba wangabu dödö. Börö da'ö wa oföna la'anunöisi zinunö fanuno andrö, ni'anunöisi ndra furugöma.- Fa’at 18:6-9

Simanö daroma li Lowalangi.-

 

Sinunö Fanema Li : Psallite No 33, 1+4+5+6                  (ma Laudate No 84)

 

FOMBASO  II

Taroma Li Lowalangi

nihalö moroi ba zura andrö ba hiha Heberai'o.-

He ya'ami ira talifusö !

Famati andrö, no tobali fangaro dödö ba nidönadönada ba we'ewe'e dödö ba ngawalö hadia ia zi lö oroma. Börö wamati andrö wa lasuno Lowalangi ira satua föna. Börö wamati, wa molo'ö Gaberahamo, me Ikaoni ia Lowalangi, isaŵa danö nibe'e Lowalangi dania khönia. Mofanö ia, he ŵa'ae lö i'ila hezo isaŵa. Börö wamati, wa i'iagö danö gamabu'ula li andrö, he ŵa'ae no tanö niha bö'ö nasa. I'iagö manö nose, simanö göi Giza'aki ba Yakobo, sanema ondröita gamabu'ula li andrö göi. Ibalobaloi sa mbanua saro danedane, nifa'anö ba ni'otomosi Lowalangi samösa dania. Börö wamati göi, wa lasöndra nga'ötö ira Aberahamo ba Sara, he ŵa'ae no numalö ndröfi Gaberahamo, ba Sara samösa lö mo'ono. Faduhu dödö Gaberahamo,  wa Ifatörö Lowalangi zi no Ifabu'u li. He ŵa'ae Aberahamo ba ginötö da'ö, no simane niha si lö hadöi tanömö niha sa'ae, ba moroi khönia samösa sa'atö no tumbu nga'ötö sato si tebai mu'erai wa'oyania, hulö simane fa'oya ndröfi ba mbanua si yaŵa wa'ato ba timba nene ba mbewe nasi, si tebai la'erai ngawua.- Heb 11:1-2.8-12

Simanö daroma li Lowalangi.-

 

Sinunö Föna Injil : Psallite No 266                               (ma Laudate No 92B)

 

INJIL

Turia Somuso Dödö khö Yesu Keriso nisura Luka.-

Me luo da'ö, Imane Yesu khö ndra nifahaöNia : "Böi mi'ata'ufi, ya'ami rorogöfö gubalo, si lö atoto. Noa sa fa'omasi Nama ba zorugo, wame'e khömi amatöröŵa andrö. Böi aefa'aefa mböbö talu ba löwilöwimi, ba böi matemate wandrumi. Ya hulö niha sombalombaloi sokhö ya'ira ami, na mangawuli ia moroi ba walöŵa. Na mangawuli zokhö ya'ira andrö ba itoko mbawandruhö, i'anemai'ö labokai khönia. Tefahowu'ö ndra enoni nisöndra zokhö ya'ira, si no mama'anö wombaloi ya'ia. Amen, Uŵa'ö khömi : Molembe ia dania, ifedadao ira ba möi ia ngoningonira ba wemanga. Ba na so ia, na no mörö niha fefu ba ma na no aefa talu mbongi, ba isöndra ira, no labaloi we'asonia, ba tefahowu'ö ira. Böi zi lö aboto ba dödömi da'ö : Na no i'ila ena'ö sokhö omo, ha wa'alaŵa mbongi so zanagö, tatu wa lö itehegö möi ba nomonia zanagö andrö. Börö da'ö, ya mama'anö ami ero inötö. Me tohare Nono Niha andrö, ba zi lö midönadöna."-   Luk 12:32.35-40

Simanö duria somuso dödö khö Zo'aya ya'ita, Yesu Keriso.-

Erönua:

FAMATI MBÖRÖTA WAMA’ANÖ BA WONDRUGI FANGÖHÖLI

Bakha ba wombaso siföföna nihalö moroi ba zura wa’atuatua, sindruhu te’oroma’ö khöda hewisa me aheta ndraono Gizara’eli andrö moroi ba danö ndrawa Misirayi. Fatua lö tebua ira moroi ba danö andrö, ba siföföna ifatunö khöra Lowalangi. Famatunö Lowalangi andrö ba latema’ö ia sifao famati ba folo’ö. Ba gafuriata aheta ira moroi ba danö ndrawa Misirayi andrö ba teheta ira moroi ba wangosawuyu. Ba da’e ta’ila, wa famati andrö khö Lowalangi no möi börö wangeheta moroi ba ngawalö wangabu dödö ba hiza no möi börö wa tola tasöndra wa’ohahau dödö.

Famaha’ö Waulo andrö ba niha Heberai’o, nirongoda ba wombaso sidua, sindruhu itugu ifaduhu’ö khöda wa famati andrö no tobali fangaro dödö ba nidönadöna ba we’ewe’e dödö ba ngawalö hadia ia zi lö oroma. Famaha’ö Waulo andrö nasa itugu ibe’e dumaduma ya’ia Gaberahamo nifotöi Ama Wamati. Hewa’ae lö aboto ba dödö Gaberahamo danö nifabu’u Lowalangi andrö khöniam, ba hiza I’o’ö manö. He wa’ae no numalö ndröfi wo’omo Gaberahamo andrö Sara, ba hiza tumbu sa’atö khönia samösa nono matua. Ba da’e ta’ila sindruhunia gamarahuta wamaha’ö Waulo andrö wa famati andrö ba no fombaloi sifao famati ba fanötöna saro.

Bakha ba duria somuso dödö andrö i'a’aro’ö dödöda Yesu ba böi so khöda wa’ata’u, ya’ita nikubaloiNia hewa’ae lö atoto. Hadia mbörö wa lö ata’u ita, ya’ia na so khöda wama’anö andrö. Fama’anö andrö ena’ö hulö simane niha sombalobaloi fe’aso zokhö ya’ia. Lö mamöbö talu ba lö ibunu wandru. Famöbö talu andre no tandra wa no mama’anö ba tehulu dödönia ba wohalöwö. Si lö mate fandru andrö ba ya’ia wa’aboto ba dödö ba fa’aro wanötöna ba gohitö dödönia andrö.

Sitölu ngawua wombaso nirongoda andre sindruhu ibe’e khöda sambua wurugö, ya’ia wamati andrö si no tobali böröta wama’anö ba niha samati ba wanöndra fangöhöli. Yesu zanga’aro’ö tödöda wa ena’ö böi aefa mböbö talu andrö khöda ba ena’ö göi böi mate wandru. Böbö talu ba fandru andrö ya’ia wamati saro ni’okhögö zi samösa enoni. Aberahamo no dumaduma ia khöda ba wamati saro andrö. Lö tebulö ia. Iraono Gizara’eli andrö teheta ira moroi ba wangosawuyu ndrawa Misirayi, no göi börö wa’aro dödöra ba khö Lowalangi. Ba gafuriata tola ta’erönusi wamaha’ö Gereja Katolik andrö sanguma’ö: “Famati andrö ba no fanema’ö niha ba wama’ele’öNia ya’ia Lowalangi” (Iman adalah tanggapan manusia atas wahyu diri Allah).

Ya lö mamalö sitehulu tödö ita ba wamati saro ba khö Lowalangi, irege isöndra dania ita no mama’anö ba ginötö mangawuli ia ba zi lö tadönadöna. Amen.

 

Nifa’anö Kat. Ingatan Sihura, S.Ag.

 

Umbu:

Biro Liturgi Keuskupan Sibolga, Liturgi Taroma Li Döfi A/B/C Buku Bacaan Untuk Upacara Hari Minggu dan Hari Raya dalam Bahasa Nias, Gunungsitoli, Keuskupan Sibolga, 2012

Dianne Bergant, CSA & Robert J. Karris, OFM (ed) Tafsir Alkitab Perjanjian Lama Yogyakarta Kanisius, 2002

Dianne Bergant, CSA & Robert J. Karris, OFM (ed) Tafsir Alkitab Perjanjian Baru Yogyakarta Kanisius, 2002

Martin Harun, OFM, Lukas Injil Kaum Marginal Yogyakarta: Kanisius, 2019

St. Eko Riyadi, Pr, Lukas “Sungguh Orang Ini Adalah Orang Benar” Yogyakarta: Kanisius, 2011