TAROMA LI LOWALANGI LUO MIGU ADVEN SI – 4 DӦFI C

Liturgi Dӧfi A/B/C hlm. 473.

FOMBASO  I

Taroma Li Lowalangi nihalö moroi ba zura Mikha.-

Da'ö niŵa'ö Zo'aya: "Ya'ugö, banua Mbetilekhema ba danö Eferata, he ŵa'ae ide'ide sibai ndra'ugö ba gotalua mbanua mado Yuda; ba khöu sa'atö i'otarai khöGu samösa, si möi samatörö Iraono Gizara'eli dania. Me föna sa mbörötania, ba götö föna sibai sa. Ilulu soiNia So'aya ba danga nudura, irugi luo na madono ndra alawe andrö, ba ira talifusö si tosai ba danö zotanö, mangawuli ira ba danöra, tanö Ndraono Gizara'eli. Ba da'ö dania so Ia, ba Ikubaloi ira, Ilumö'ö ira si fao fa'abölö Zo'aya, ba döi Zo'aya LowalangiNia. Auri ira ba wa'ahono dödö, börö la'akui gamatöröŵaNia soi niha fefu. Ya'ia dania wa'atulö andrö ba zamati khöNia".- Mi 5:2-5a

Simanö daroma li Lowalangi.-

 

Sinunö Fanema Li : Psallite No 80A                              (ma Laudate No 21B)

FOMBASO  II

Taroma Li Lowalangi nihalö moroi ba zura ba niha samati ba mbanua Heberai'o.-

Ya'ami ira talifusö!

Ba ginötö me möi Keriso ba gulidanö, Iŵa'ö khö Lowalangi (ba wehede si so ba zinunö Dawido): "Lö omasi'Ö wasömbata nitaba ba fasömbata ni'a, ba no Öhönagö khöGu sambua mboto. Fasömbata nitunu ba fasömbata fameta horö, ba lö omasi'Ö. Börö da'ö Umane: "Hiza, so Ndra'o, he Lowalangi, ba wamalua somasi'Ö, simane si no musura sanandrösa khöGu bakha ba zura ni'amoni'ö."

Ya'ami ira talifusö!

Ba mböröta Iŵa'ö Keriso: "Lö omasi'Ö wasömbata nitaba ba fasömbata ni'a. Lö Ö'andrö wasömbata nitunu ba fasömbata fameta horö." Iŵa'ö da'ö, he ŵa'ae fefu wasömbata andrö mube'e molo'ö oroisa Moze. Aefa da'ö Iŵa'ö: "Hiza, soDo, he Lowalangi, ba wamalua somasi'Ö." Eluaha: Fasömbata si no tohöna Itayaigö Keriso ba I'angaligö faoma fasömbata si bohou, ya'ia: No Ifalua Keriso hadia ia zomasi Lowalangi Ifalua. Da'ö mbörö wa te'amoni'ö ita fefu ba wasömbata mboto Yesu Keriso, nifasömba'ö si ha samuza ba si sagötö fa'ara.- Heb 10:5-10

Simanö daroma li Lowalangi.-

 

Sinunö Föna Injil : Psallite No 203C                       (ma Laudate No 106,1- 2)

INJIL

Turia Somuso Dödö khö Yesu Keriso nisura Luka.-

Me luo da'ö, maoso Maria, i'alio'ö we'amöi ba sambua mbanua mado Yuda, tanö ba hili. Möi ia yomo ba nomo Zakharia ba i'owai Gelisabe. Me irongo Elisabe wangowai Maria andrö, maliŵa nono si so ba dabina Gelisabe. Ba ifatörö Gelisabe andrö Eheha Ni'amoni'ö, irege mu'ao ia, ebua li, imane: "No nifahowu'ö ndra'ugö moroi ba gotalua ndra alawe fefu; ba nifahowu'ö Nono andrö si so ba dabinau. Haniha ndra'odo andre, irege möi khögu nina Zo'aya ya'o? Hiza sa, me irugi dögi dalingagu wehede wangowaimö andrö, maliŵa nono andre ba dabinagu, börö wa'omuso dödö. Ya ohahau dödöu, me faduhu dödöu, wa alua niŵa'ö Zo'aya andrö khöu".- Luk 1:39-45

Simanö duria somuso dödö khö Zo'aya ya'ita, Yesu Keriso.-

 

Perjumpaan Maria dan Elisabet.

Erönua:

TOBALI SOROSO SIDE’IDE

Bakha ba wombaso siföföna tarongo wama’ele’ö Mikha sanandrösa ba Ndraono Gizara’eli. Fitu ngaotu fakhe föna wa’atumbu Yesu, me auri Mikha, sama’ele’ö andrö, so wabalisa ba Ndraono Gizara’eli, irege tobali dombua soi ira, börö gamuata ndra razo ba he göi soi ma’afefu, si lö faudu ba goroisa Lowalangi. Ba döi Lowalangi, ifa’ele’ö Mikha, wa samösa razo si bohou tumbu dania ba mbanua Dawido ba moroi ba nga’ötönia, ba hiza göi si’oroi gaheta Nama si so ba zorugo. Ya’ia sa razo ba kubalo si sökhi, si fatema ba dödö Nama ba solohe fa’atulö irugi gamozua danö.

Bakha ba wombaso sidua nihalö moroi ba zura ba niha Heberai’o, te’ombakha’ö wa Yesu andrö no Ere Sebua. Ya’ia no ere ba  fasömbata göi, börö me lö si faröi Ia irugi mate Ia ba röfa, simane si no teturiaigö ba zinunö Dawido. Wa tobali Ia niha, ya’ia ba wamalua halöŵö fangöhöli andrö ba döla röfa. Haga Paska andrö, ihagaini göi Natal. Börö wolo’öda ba na lö faröi ita ba Daroma li Lowalangi, wa fao ita bakha ba wasömbata Keriso.

Bakha ba Duria Somuso Dödö andrö tarongo; Maria, Ina Zo’aya, falukha khö Gelisabe talifusönia. Yohane Same Fanasa falukha khö Keriso, he ŵa’ae faoma ba dabina ninara nasa so ira. Falukhasata zidarua andrö i’owua wa’omuso dödö, fanuno So’aya ba fangamoni’ö si’oroi Zo’aya.

Sitölu ngawua wombaso nirongoda ba zi ma’ökhö andre, edöna ifaehagö khöda hewisa Maria andrö sitobali dela ba wa’atobali niha Yesu Keriso andrö. Ngaotu fakhe föna no muturiaigö we’asonia, awö wa tetunö hadia guna we’amöiNia ba gulidanö. Fetaro Maria andrö, no tobali ia soroso side’ide ba niha samati. Maria zanema’ö ba sifaduhu tödö ba niwa’ö khönia andrö, sindruhu no möi dela wangöhöli ba niha gulidanö. Ba zimanö göi edöna te’andrö khöda, hadia no göi möi ita soroso side’ide solohe fa’ohahau dödö ba nawöda niha? Ya itolo ita Lowalangi. Amen.

Nifa’anö Kat. Ingatan Sihura, S.Ag.

 

Umbu Wangerangera:

Biro Liturgi Keuskupan Sibolga, Liturgi Taroma Li Döfi A/B/C Buku Bacaan Untuk Upacara Hari Minggu dan Hari Raya dalam Bahasa Nias, Gunungsitoli, Keuskupan Sibolga, 2012

Dianne Bergant, CSA & Robert J. Karris, OFM (ed) Tafsir Alkitab Perjanjian Lama Yogyakarta Kanisius, 2002

Dianne Bergant, CSA & Robert J. Karris, OFM (ed) Tafsir Alkitab Perjanjian Baru Yogyakarta Kanisius, 2002

Martin Harun, OFM, Lukas Injil Kaum Marginal Yogyakarta: Kanisius, 2015

St. Eko Riyadi, Pr, Lukas “Sungguh Orang ini adalah Orang Benar!” Yogyakarta: Kanisius, 2011

St. Sutopanitro, Pr, Pesan-Pesan Kurban Ekaristi Hari Minggu dan Hari Raya Tahun A-B-C Jakarta: Obor, 2013

.

 

 

Continue

TAROMA LI LOWALANGI LUO MIGU ADVEN SI – 3 DӦFI C

Liturgi Taroma Li Dӧfi A/B/C hlm. 470.

FOMBASO  I

Taroma Li Lowalangi nihalö moroi ba zura Zefania.-

Omusoi'ö dödöu, ya'ugö ono alawe Ziona! Mi'owuawua'ö dödömi, ya'ami Iraono Gizara'eli! Omusoi'ö dödöu ba a'iki moroi si'aikö ba dödöu, ya'ugö ono alawe Yerusalema! No Iböda wangotu'ö ya'ugö So'aya, ba udumö no Ifaso, ena'ö mangawuli ira ba khöra! So'aya samösa, no razo Ia ba gotaluami, ya'ami Iraono Gizara'eli. Börö da'ö lö moguna sa'ae ata'u ami.

Na luo da'ö, lamane niha ba mbanua Yerusalema: Böi busi dödömi! Böi adada dangami, ya'ami banua Ziona! Noa sa ba gotaluami Zo'aya, Lowalangimi. Abölö Ia ba möna ami Ibe'e. Omuso dödöNia khöu ba lö sa'ae Itegu ndra'ugö, me I'omasi'ö ndra'ugö. Owuawua dödöNia ba khöu, na falukha Ia khöu.-  Zef 3:14-18a

Simanö daroma li Lowalangi.-

 

Sinunö Fanema Li : Psallite No 153                            (ma Laudate No 59, 1-2)

 

FOMBASO  II

Taroma Li Lowalangi nihalö moroi ba zura Waulo ba niha samati ba mbanua Wilifi.-

Ya'ami ira talifusö !

Ya böi mamalö wa'omuso dödömi, me no tefaböbö ami ba khö Zo'aya! Ufuli uŵa'ö: Mi'omusoi'ö dödömi! Ya aboto ba dödö niha fefu wa'asökhi dödömi andrö. No ahatö we'aso Zo'aya. Böi mibusi tödö hadia ia. Fefu hadia ia mitou'ö khö Lowalangi bakha ba wangandrö. Hadia zoguna khömi, mi'ombakha'ö manö khö Lowalangi. Ba wolau simanö, böi olifu ami wangandrö saohagölö, börö mbuala Lowalangi si no mitema. Ba fa'ohahau dödö si'oroi khö Lowalangi, si lö ikhamö fa'abölö gera'era niha, zondrorogö tödömi ba era'erami, börö me no tefaböbö ami ba khö Yesu Keriso.- Flp 4:4-7

Simanö daroma li Lowalangi.-

 

Sinunö Föna Injil : Psallite No 202                                  (ma Laudate No 59, 3)

 

INJIL

Turia Somuso Dödö khö Yesu Keriso nisura Luka.-

Me luo da'ö, ato niha si möi khö Yohane ba wanema fanasa khönia. Lasofu khönia: "Hadia zi lö tola lö'ö malau?" Itema li Yohane: "Niha si so baru dua görö, akha ibe'e sagörö ba niha si lö baru, ba si so balazo, akha ibagi ba niha si lö balazo." Tohare göi zanema beo ba wangandrö, ena'ö tebe'e khöra wanasa. Lasofu khö Yohane, lamane: "He guru, hadia nilauma?" Imane Yohane khöra: "Böi misugi zi töra moroi ba zi no muhonogöi!" Ba lasofu göi khönia ira saradadu ba folisi, lamane: "Hewisa göi ndra'aga? Hadia nilauma?" Imane Yohane khöra: "Böi mifakao niha! Böi mifaso niha wame'e kefe khömi gofu haniha ia! Ya abönö khömi gazimi!"

Ibörögö manofunofu dödö niha sato, wanguma'ö: "Hadia Mesia Yohane andrö?" Börö da'ö wa imane khöra Yohane: "Ya'odo, faoma nidanö ube'e khömi wanasa. So dania Zabölö ebua moroi khögu. Ya'o samösa na'i tenga sinangea ba wamokai böbö mbadagaheNia. Ya'ia dania zame'e khömi fanasa faoma Eheha Ni'amoni'ö ba alitö. So ba dangania niru ba wanafi'ö fakhe andrö khöNia, irege sökhi. Fakhe I'owuloi ba halasa; adaya Itunu ba galitö si lö matemate." Oya nasa menemene Yohane ba niha sato

ba wangombakha turia fangorifi andrö si'oroi Lowalangi.- Luk 3:7a.10-18

Simanö duria somuso dödö khö Zo'aya ya'ita, Yesu Keriso.-

 

Yohanes Pembaptis dan Yesus. [Sumber Foto Komik.APP]

Erönua:

FA’OMUSO DӦDӦ WANEMA’Ӧ SANGӦHӦLI

Bakha ba wombaso siföföna andre tarongo, hewisa wehede Zefania andrö ba Ndraono Gizara’eli. Iraono Gizara’eli andrö si so ba naha wanibo’ö ba Mbabilonia, te’a’aro’ö dödöra ba wawu’usa li Lowalangi nifarongogö Zefania. Omusoi'ö dödöu, ya'ugö ono alawe Ziona! Mi'owuawua'ö dödömi, ya'ami Iraono Gizara'eli! Omusoi'ö dödöu ba a'iki moroi si'aikö ba dödöu, ya'ugö ono alawe Yerusalema! No Iböda wangotu'ö ya'ugö So'aya, ba udumö no Ifaso, ena'ö mangawuli ira ba khöra! So'aya samösa, no razo Ia ba gotaluami, ya'ami Iraono Gizara'eli. Börö da'ö lö moguna sa'ae ata'u ami.

Fa’owuawua dödö nitema Ndraono Gizara’eli andre sindruhu no si’oroi Lowalangi. Ifalua da’e fefu Lowalangi börö wa’omasi-Nia ba fa’owuawua dödö-Nia falukha ba Ndraono Gizara’eli. Nifalua Lowalangi andre timba wa’omasi zatua ba ndraononia. I’out’ö ndraononia satua, tenga börö wönunia, ba hiza sindruhunia börö wa’omasinia, ba ena’ö so wa’aboto ba dödö ba ndraono andrö. Andrö lö moguna ata’u na mofönu zatua.

Ba wombaso sidua andre, sindruhu göi wa böi tafamalö wa’omuso dödö andrö börö wa’omasi Zo’aya si no tetama. Faulo zanga’aro’ö tödöda ena’ö böi mamalö ita ba wa’omuso dödö andrö. Hiza i, ifasugi göi ba dödöda Faulo wa böi olifu ita wangandrö saohagölö. Fa’itaria göi börö wa’omuso dödö ba mbuala si no mutema, olifu wangandrö saohagölö. Fehede Waulo andre moguna sibai ta’a’aro’ö ia ba dödöda ena’ö siföföna ta’andrö saohagölö ba ngawalö mbuala nibe’e Lowalangi andrö.

Bakha ba Duria Somuso Dödö andrö tarongo dombua faosatö. Siföföna ya’ia da’ö fanofu khö  Yohane “Hadia zedöna mafalua?” Fanofu andre no sambua fanofu si’oroi dödö ena’ö tesöndra sambua ndrela howuhowu. Sidua ya’ia da’ö fangombakha fe’aso Zangöhöli andrö ba halöwö-Nia. Ba we’aso-nia andrö, iwa’ö Yohane, "Ya'odo, faoma nidanö ube'e khömi wanasa. So dania Zabölö ebua moroi khögu. Ya'o samösa na'i tenga sinangea ba wamokai böbö mbadagaheNia. Ya'ia dania zame'e khömi fanasa faoma Eheha Ni'amoni'ö ba alitö. So ba dangania niru ba wanafi'ö fakhe andrö khöNia, irege sökhi. Fakhe I'owuloi ba halasa; adaya Itunu ba galitö si lö matemate."

Ösi Duria Somuso Dödö andre, ba no sambua amarahuta wa’omuso dödö ba Adven sitölu andre, me luo migu andre tetötöi ia luo migu gaudete ma luo migu duria somuso dödö. Dua migu Adven silalö no fanörö tödö ngaluo safuria ba hiza ba ngaluo migu andre tarongo wa’atohare zangöhöli andrö ba wa’omuso dödö. Ba no sinangea ita wa’omuso dödö ba da’ö simane niwa’ö Zefania andrö ba wombaso si sara. Hewa’ae simanö, ifasugö göi ba dödöda Faulo ba wombaso sidua, ena’ö böi böi arörö dödöda ba wa’omuso dödö andrö data’andrö saohagölö göi ba wa’omuso dödö andrö. Fangandröda saohagölö andrö, ya’ia wanofuda hadia zedöna tafalua. Sedöna tafalua ya’ia wame’e faomuso dödö ba nawöda sifalukha ya’ita bongi ba ma’ökhö, ba wongambatöda, ba lala halöwöda, ba ba nahia si so ya’ita. Amen.

 

Nifa’anö Kat. Ingatan Sihura, S.Ag.

Umbu Wangerangera:

Biro Liturgi Keuskupan Sibolga, Liturgi Taroma Li Döfi A/B/C Buku Bacaan Untuk Upacara Hari Minggu dan Hari Raya dalam Bahasa Nias, Gunungsitoli, Keuskupan Sibolga, 2012

Dianne Bergant, CSA & Robert J. Karris, OFM (ed) Tafsir Alkitab Perjanjian Lama Yogyakarta Kanisius, 2002

Dianne Bergant, CSA & Robert J. Karris, OFM (ed) Tafsir Alkitab Perjanjian Baru Yogyakarta Kanisius, 2002

Martin Harun, OFM, Lukas Injil Kaum Marginal Yogyakarta: Kanisius, 2015

St. Eko Riyadi, Pr, Lukas “Sungguh Orang ini adalah Orang Benar!” Yogyakarta: Kanisius, 2011

St. Sutopanitro, Pr, Pesan-Pesan Kurban Ekaristi Hari Minggu dan Hari Raya Tahun A-B-C Jakarta: Obor, 2013

.

 

Continue