Sakramen [Katekese Bahasa Nias]

 SAKRAMEN

 

Ilustrasi Sakramen [Dok. Pribadi]

A.      ELUAHA SAKRAMEN

Fehede “Sakramen“ tehalõ moroi ba li Latin, “Sacramentum“, eluahania “fefu ngawalõ zo’amakhaita ba ni’amoni’õ ma fa’a Lowalangi”. Bõrõ da’õ, sakramen tola mufo’eluaha ia “tandra ba fakake wangorifi”. Bakha ba Sakramen, te’oroma’õ wangorifi  Lowalangi ba niha gulidanõ, tola irasoi we’aso Lowalangi awõ halõwõ halõwõ wangorifi-Nia.

B.      YESU KERISO BA NO DANEDANE SAKRAMEN

No Faduhu dõdõ Gereja wa halõwõ wangorifi moroi khõ Lowalangi, teforoma’õ ba tefalua bakha ba khõ Yesu Keriso (Hal.Zin 1 : 36 ; Rom 10 : 9). Fefu nifalua Yesu awõ zalua ba wa’auri-Nia, no fangoroma’õ fangorifi Lowalangi. Ba zi sambua ngasi, Yesu samõsa zangombakha’õ amatõrõwa Lowalangi, bahiza ba zi tambai da’õ, amatõrõwa Lowalangi andrõ, no so ba khõ Yesu samõsa (Mat 11 : 4 – 5 ; Luk 10 : 23). Moroi ba da’õ, Yesu andrõ no sakramen fangorofi moroi khõ Lowalangi, si no danedane zi 7 sakramen bakha ba Gereja. Bõrõ da’õ wa lafotõi Ia “Sakramen Danedane.”

C.      GEREJA BA NO SAKRAMEN YESU KERISO

Gereja tobali sakramen Keriso, bõrõ wahasambuania ba khõ Keriso. Yesu Keriso no so bakha ba Gereja ba ifalua halõwõ wangorifi bakha ba Gereja, irege Gereja andrõ tobali fakake wangorifi. Moguna sibai aboto ba dõdõda wa gereja andrõ tenga ha sitobali fakake wangorifi, bahiza tobali gõi tandra wangorifi; bõrõ me bakha ba gereja te’owuloi niha somasi manema’õ fangorifi moroi khõ Lowalangi. Ba gulidanõ andre, Gereja tobali samaduhu’õ fangorifi moroi khõ Lowalangi si no itema Gereja. Gereja tobali tandra sangohalõwõgõi fangorifi Lowalangi bakha ba khõ Yesu Keriso.

D.      FITU SAKRAMEN BAKHA BA GEREJA KATOLIK

Irugi ma’õkhõ andre, ba Gereja Protestan ha dombua Sakramen ni’akuira ma nitemara bakha ba Gereja, ya’ia da’õ Sakramen Fanasa Ni’amoni’õ ba Sakramen Ekaristi (Femanga gõ Ni’amoni’õ).  Bahiza ba Gereja Katolik, ya’ia da’õ me Rafe Sebua ba Trente 1545-1563, no tehonogõi wa so 7 (fitu) Sakramen. Eluahania, Gereja si no tobali sakramen fangorifi andrõ la’oroma’õ ia bakha ba zi 7(fitu) sakramen: sakramen Fanasa Ni’amoni’õ, sakramen Krisma, sakramen Ekaristi, sakramen Fangaku Horõ, sakramen Fombayaoini Ni’amoni’õ, sakramen Fa’a’ere, ba sakramen Fangowalu. Bakha  ba ngawalõ sakramen andrõ laforoma’õ ba mufalua wangorifi moroi khõ Lowalangi. Bakha ba sakramen, i’oro’õ danga-Nia Lowalangi ba niha gulidanõ, irege falukha ba te’oroma’õ wahasambua Yesu ba niha sanema Ya’ia.

Si 7 (fitu) sakramen andrõ no moroi khõ Yesu Keriso. Bakha ba Mbuku Gamabu’ula Li Sibohou, tesõndra zi tobali danedane moroi ba sakramen. Sura so’amakhaita ba sakramen andre, ya’iada’õ:

1. Sakramen Fanasa Ni’amoni’õ (Mat 28 : 18 – 20 ‘ Hal.Zin 2 : 38)
2. Sakramen Krisma (Hal.Zin 8 – 17)
3. Sakramen Ekaristi (Mat 26 :26 – 29 ; Mrk 14 :22 – 25 ; Luk 22 : 15 – 20)
4. Sakramen Fangaku Horõ (Yoh 20 : 23)
5. SakramenFombayoini NI’amoni’õ (Yak 5 : 14)
6. Sakramen Fa’a’ere (I Tim 4 : 14)
7. Sakramen Fangowalu (Ef 5 : 31 – 32)

Sakramen Fanasa Ni’amoni’õ, Krisma ba Ekaristi, lafotõi ia sakaramen “Inisiasi“. Fehede inisiasi tehalõ ia moroi ba li Latina; “inire”, eluahania “mõi bakha” ma “fabõbõ/tobali/te’osambua’õ.” Si 3 sakramen andre, zombali’õ zi samõsa niha tobali ndrotondroto Gereja Yesu Keriso ma zui sakramen sangosambua’õ niha ba wahasambua khõ Gereja Yesu Keriso.

 So 3 (tõlu) Sakramen si ha sakali latema sandrohu fa’auri ya’ia da’õ, Sakramen Fanasa Ni’amoni’õ, Krisma, ba sakramen Fa’a’ere. 3 (tõlu) sakramen da’e ifatumbu’õ fetaro sibohou khõ niha samati: Sakramen Fanasa Ni’amoni’õ mombali’õ niha tobali ono Lowalangi, Sakramen Krisma mombali’õ niha tobali samaduhu’õ Yesu Keriso ba Sakaramen Fa’a’ere mombali’õ niha mangai tanakhõ bakha ba wa’a’ere Yesu Keriso. Halõwõ Lowalangi ba fa’abõlõ Lowalangi si so bakha ba zi 3 (tõlu) sakramen andre, lõ tebulõbulõ ba tebai mutayaigõ.

Sakramen tanõ bõ’õ, baero zi tõlu moroi yawa andrõ, tola mutema mato ha’uga kali, dumadumania: Sakramen Fangowalu, tola zui itema niha si no mangowalu na fasamõsa moroi bagotalua zi darua niha andrõ, mate. Si torõi moroi furi tola zui itema sakramen Fangowalu na omasi ia mangowalu. Simanõ gõi sakramen Fombayoini Ni’amoni’õ si no irai itema niha sofõkhõ. Na no itema sakramen da’a, dõhõ wõkhõnia, tola zui itema na ifuli mofõkhõ ia. Sakramen Ekaristi tola itama niha ero ma’õkhõ, bõrõ me sakramen da’e no amaedola mbalazo noso niha samati. Sakramen Fangaku Horõ, tola itema niha gofu ha’uga kali manõ sifao famalalini era’era.

Lõ gõi tola lõ’õ ta’ila wanumero 7(fitu) no numero sofetua molo’õ Buku Ni’amoni’õ. Na latõtõi numero 7(fitu)  bakha ba Mbuku  Ni’amoni’õ, eluahania no afõnu, lõ so’ambõta sa’ae. Na ta’olohesi ia ba zi 7 (fitu) sakramen, eluahania 7 (fitu) sakramen andrõ no fakake ba tandra safõnu ni’oguna’õ Lowalangi ba wangorifi niha bakha ba khõ Yesu Keriso.

E.       FAOSATÕ SAKRAMEN

Famalua wame’e kharasi ni’amoni’õ ba ni’ila hõrõ, no asese i’oguna’õ Yesu, ya’ia da’õ bakha ba ngawalõ zalua ba wa’auri niha ero ma’õkhõ. Fehede, amuata niha  ba fefu ngawalõ zalua ba wa’auri niha ero ma’õkhõ. Fehede, amuata niha ba fefu ngawalõ zi so ba gulidanõ andre, sitobali samasaohowuhowu fangorifi Lowalangi ba niha gulidanõ. Ngawalõ faosatõ sakramen andrõ, ya’ia da’õ:

1. Fakake ma Gamagama Ni'oguna'õ (=Materia)

a.       Ngawalõ ni’oguna’õ ba ginõtõ wame’e sakramen, dumadumania: idanõ, fanikha, roti, agu, btn.

b.    Amuata nifalua gere sifao ba wangoguna’õ fakake/gamagama andrõ, dumadumania: manuwagõ idanõ, mombayoini fanikha, btn.

2. Fehede ni'oguna'õ (Forma)

Fehede ni’oguna’õ ba wamo’eluaha amuata nifalua gere, dumadumania: Ba ginõtõ wame’e sakramen Krisma imane ere: “Ya’õtema dandra kharasi moroi khõ Geheha Ni’amoni’õ”. Ba ginõtõ wame’e sakramen Fanasa Ni’amoni’õ imane ere: “Usasai ndraugõ ba dõi Nama, ba Ono, ba Eheha Ni’amoni’õ”.

F.       HOWU-HOWU/KHARASI MOROI BA SAKRAMEN

Bakha ba zi sambua sakramen, ibe’e howu-howu kharasi Lowalangi ba niha. Na mutema sakramen moroi sibai ba dõdõ faudu molo’õ ohitõ dõdõ Gereja, tatu manõ mowua ia  bua si sõkhi. Moguna sibai aboto ba dõdõda howu-howu/kharasi nitema moroi ba sakramen, lõ mo’amakhaita hadia sinangea mazui tenga sinangea niha same’e sakramen andrõ, bahiza ha modanedane moroi ba wa’omasi Lowalangi manõ ba fanema’õ moroi ba khõ zanema sakramen andrõ.