“… ba latörö lala bö’ö, wangawuli ba danöra” (Mataio 2:12)
Ya’ami ira talifusö ni’omasi’ö,
Fangowasaini Luo Wa’atumbu Zo’aya
asese molohe fa’omuso dödö ba fa’atulö si lö mo’aetufa ba wa’aurida, börö me
möi Yesu ba wangefa’ö ya’ita moroi ba mbilagu horö. Ba khöNia andrö situmbu ba
gandra gurifö, mate ba döla röfa, ba maoso moroi ba gotalua zimate, te’adonogö
ita mangawuli tobali omböita sibohou ba tasöndra wa’auri si lö aetu.
Ira niha satuatua andrö moroi ba
gatumbukha, sifao fanoloni ndröfi andrö tohare ba wanömba Ya’ia ba lafasömba’ö
khöNia gana’a, kumöyö ba emuri. Me no larasoi wa’omuso dödö ba walukhata sahöli
dödö andrö, ira niha satuatua andrö ba latörö lala bö’ö ba wangawuli ba danöra
simane niwa’ö Lowalangi khöra (fahela Mataio 2:12). Tola latalu’i ngawalö
dahataha, fanaisi, ba fa’afökhö ba lalara wangalui Yesu ba me no falukha khöNia
ba barani ira göi wanörö lala sibohou si lö tatu na abölö asai’ö moroi ba zi no
latalu’i.
“Lala bö’ö” tola göi ta’erönusi
ia ba lala wamati. Me no falukha khö Yesu, lö sa’ae la’o’aurifagö niha lala
wa’auri si no ara, ba hizasifao lala wa’auri sibohou, tobali niha sibohou. Ba
zimanö, Fa’atumbu Zo’aya idönia’ö ita ba wangalui lala sibohou ba sifao
fa’atuatua ba wanuriaigö fa’omasiNia ba nawö ba ba ngawalö zauri ni’a’asogö
Lowalangi.
Ya’ami ira talifusö ni’omasi’ö,
Ira niha satuatua moroi ba
gatumbukha sifao sato wofanö wangalui Yesu idönia’ö göi ita wofanö sifao sato,
ba wanöndra ohitö dödöNia “sitoröi ba gotaluada” (fahela Yohane 1:14) ba
wanga’a’aro’ö amatöröwa wa’omasiNia. Ya’ita si no ono mbanua soi ba ono mbagua
Gereja, hewa’ae ya’ita andre fabö’öbö’ö ba no ha sambua – faehu agama, gana,
owuloa, hada – si lö tola lö’ö mo’ofanöwa ita sifao sato, ena’ö ba wefao andrö
tola tatalu’i gofu hadia ia dahataha ba fanaisi wa’auri. Fa’afaehu no sambua
howuhowu Lowalangi si lö tola lö’ö ta’andrö saohagölö, tarorogö, ba ta’ebua’ö.
Fa’afabö’ö si no sa sambua si no tarasoi tobali sambua howuhowu Lowalangi,
sindruhunia no sambua ndrela sangabölö’ö ya’ita ena’ö faoma fagogohe tanga ba
wanga’a’azökhi lala wa’auri sifao sato ba si tola mamolakhömi.
Ba gofanöwa sifao sato te’abölö’ö
ita ena’ö tola “alio tefadöhö, ba maoso sifao fa’abölö:; ba wanga’a’azökhi
mangawuli wa’auri moroi ba wa’adudu ba ngawalö hadia ia börö wökhö sanönöi tanö
ya’ia Covid-19; mangotomosi mangawuli banua wa’omasi ba gotalua ngawalö wamakao
niha, manga’azökhi mangawuli amakhaita wamati ba gotalua wamakao niha bö’ö
sifabö’ö agama; mango’aurifagö ngawalö wanörö lala sindruhu ba gotalua
wakhögusa niha ba wangai sitenga tana khönia; manuriaigö famalalini era’era ba
wangobadödöi ulidanö ba gotalua wa’asese sibai oya zamakito gatua, ba
wangofönai’ö wefao ba foliti sifao fa’amo’adu föna wamalua famili sololohe
tanga ba wamareta ba ndröfi 2024. Ofanöwa sifao sato tola tasöndra wa’abölö sitebai
musu’a. Börö da’ö, ohitö dödö andrö no sinangea tetundreheni sifao buabua
wo’angeraigö, fanema’ö, famondrongo, ba wamosumange awö sifao ba lala ya’ia
fefu nono wobanua soida. Datatayaigö wangerangera sita’unö, töratöra nahönahö
dödö. Data’ebua’ö wa’auri satulö ba fa’atalifusöta.
Fa’omasi Lowalangi göi tola
laturiagö sifao fa’aterou dödöda wa’atobali awö ba sifahuwu ba khö dra
talifusöda sitobali sanaögö fa’aila börö wohorö, si göna daludalu sino
mutenawa, ni’etu’ö lala halöwö, nisafi’ö, sitosafi börö zalua ba danö, ba
tanöbö’öna sitobali fosafi’ö. Fa’omasi Lowalangi site’asogö börö wangowasaini
mbawa Wa’atumbu Zo’aya andre ikaoni ita ena’ö tabe’e dödvda wangobadödöi awö si
so ba wanandraigö, börö ma hadia ia nifaluada ba nawöda si so bakha ba
wanandraigö andrö ma si so ba wa’abu dödö, no göi tafalua ia khö Lowalangi
(fahela Mataio 25:40). Tefodanedane ba wamati saro ba fa’omasi sahele dödö,
yaita sifao sato tola tafatumbu’ö wanötöna ba fehi’a dödö khö ndra talifusöda
ena’ö tola labua’ö ira mangawuli ba la’abölö’ö ira ba wolohi hadia ia
ni’era’era dödöra si tola manö no taya. Fa’abarani wango’awögö niha sitefakao
no sambua lala wa’omasi si lö tola lö’ö tatörö iada’e, ba ginötö no oya nasa
niha samaigimaigi manö awönia sanaögö fa’afökhö, ma samakifu ya’ia ena’ö lö
gaunögaunö wa’aurinia. Buabua niha Zamaria sitehulu tödö ba wa’omasi wanoloni
niha nirabu (fahela Luka 10:25-37) sinagea ta’o’aurifagö ba taoroma’ö i aba
lala wa’auri sero ma’ökhö.
Ya’ami ira talifusö ni’omasi’ö,
Fe’aso zi no Fa’omasi Sindruhu
andrö sangöhöli ya’ita, no si lö tola lö’ö muturiaigö. Wa’oya ngawalö gamagama
sitola mu’oguna’ö ba wame’e turia si no bua halöwö danga niha, no sinangea tola
mu’oguna’ö ia ba wamolakhömi Lowalangi sifao fangotomosi lala wa’auri sifao
sato sifao fa’omasi. Gamagama sitola mamakhai fa’atalifusöta si no bua
wa’atedou wa’onekhe niha, ibe’e khöda sambua ndrela si sökhi ena’ö tola
taturiaigö wa’omasi Lowalangi. Datasura mbua wangerangera, erönua, ba ösi
wamoboto Duria Somuso Dödö, sangohahau’ö ba sangatulö’ö tödö niha sato.
Ta’oroma’ö gambara sangoroma’ö wa’asökhi lala wa’auri sifao sato ba gotalua
gamaehuta soya sibai ma mamazökhi ofanöwa gambara sadogodogo same’e bua zöndra
ba niha ena’ö la’obadödöi nawöra bas i so ba zifasuira. Datafo’ösi nahia niha
sato andre sifao fa’asökhi ba fa’atulö soguna ba wangebua’ö buabua wa’atulö,
fa’afagölötö, fa’ato’ölö, ba fefao sato. Databaranikö göi it aba wolawa ngawalö
zitaiu ba turia si lö atulö si tola mamakiko fa’asökhi lala wa’auri sifao sato.
Bakha ba haga Wa’atumbu Zo’aya
tedönia’ö ita ena’ö itugu atuatua ba onekhe ba wangoguna’ö gamagama sitola
mamakhai fa’atalifusöta, itugu atuatua ba wanuriaigö fa’omasi, itugu lö faröi
ba wamalua buabua si sökhi, irege fa’omasi Lowalangi itugu muhaga ba fa’atulö
si lö mo’aetufa itugu oroma. Lala sisökhi nifa’ema gamagama andrö sitola
mamakhai fa’atalifusöta, no sinangea ta’oguna’ö ia tobali ndrela wanuriaigö
irege tola tadönia’ö zato ba wa’atobali niha solohe fa’omasi, ba sondrönia’ö fa’atulö
ba gotalua wongambatö, Gereja, ba ba gotalua wobanua.
Ya börö wanema’öda ngaluo Wa’atumbu
Zo’aya andre, sindruhu tarasoi wa’omasiNia. Lowalangi si no fondrege wa’omasi lö
faröi khöda, Emanuel, awöda Lowalangi. Lö irai iröi ita gofu hadia ia ginötö
(fahela Heberai’o 13:5). Lö mamalö irorogö göi ita, irege lö irai manendre ita
(fahela Sinunö 121:3) ba wangalui ba ba wanöndra lala si sökhi ena’ö turia
wangefa andrö soroi Lowalangi tola laraoi nifa fondrege wa’ato.
Ba döi Konferensi Waligereja
Indonesia (KWI) ba Persekutuan Gereja-gereha di Indonesia (PGI), ma’owai ami Ya’ahowu
Wa’atumbu Zo’aya ba ndröfi 2022 ba Ya’ahowu wogamö döfi sibohou 2023. Ya’ifahowu’ö Lowalangi.
Jakarta, 21 November
2022
Ba döi KWI:
Mgr. Antonius Subianto
Bunjamin, OSC (Ketua)
Mgr. Paskalis Bruno
Syukur, OFM (Sekretaris Jenderal)
Ba döi PGI:
Pdt. Gomar Gultom
(Ketua Umum)
Pdt. Jacklevyn F. Manuputty (Sekretaris Umum)
Pesan Natal Versi Bahasa Indonesia:
0 comments:
Posting Komentar