Taroma Li Lowalangi nihalö moroi ba zura Wama'ele'ö.-
Ya'odo andre, Yohane, u'ila ba gangilata : Labokai mbawandruhö nomo Lowalangi andrö ba zorugo, ba oroma dawöla gamabu'ula li andrö khöNia ba nomoNia andrö. Ba oroma dandra sebua ba mbanua si yaŵa : Samösa ndra alawe sonukha luo, no muzizio yaŵa ba mbaŵa. Ba högönia so sambua mbala högö, ya'ia zi felendrua ndröfi. Ba oroma dandra bö'ö ba mbanua si yaŵa : So sageu naga sebua, so'alitö, fitu högö ba fulu rozi dandru. Ero sambua högönia no mamake takula. Faoma i'onia ibözini zi sambua ni'otölu ndröfi ba mbanua si yaŵa, itibo'ö tou ba gulidanö. Naga andrö, ba i'agö föna ndra alawe no mege, sadono. Ohitö dödönia ba wanölö Ono andrö, na tumbu dania. Madono ndra alawe andrö samösa nono, ono matua, samatörö dania fefu soi si'o si'öli. Te'oloi'ö Nono andrö khö Lowalangi, föna dadaomaNia. Ba moloi ndra alawe andrö, isaŵa danö si mate, ba naha si no Ihönagö Lowalangi khönia.- Awena urongo li sebua ba zorugo, sanguma'ö : Iada'e no alua : No möna Lowalangida. No Iforoma'ö wa'abölöNia andrö, no Ibörögö wamatörö. No Itou'ö kuasoNia ba danga Razo, nibayoiniNia.- Fam 11:19a;12:1.3-6a.10ab
Simanö daroma li Lowalangi.- Sato : Ma'andrö …
Sinunö Fanema Li : Psallite No 45 (Ant. 2) (ma Ld No 118 ma 126)
FOMBASO II
Taroma Li Lowalangi nihalö moroi ba zura Waulo si föföna ba niha samati ba mbanua Gorindro.-
Ya'ami ira talifusö !
No te'orifi mangawuli Keriso moroi ba wa'amate. Da'e zi tobali lohelohe, wa te'orifi mangawuli dania niha si no mate. Me no moroi ba zi samösa niha sa wa'amate andrö, moroi ba zi samösa niha göi wemaoso zi mate andrö. Fefu niha no barö wa'amate, börö me farahu khö Gadamo, ba simanö göi tola te'orifi fefu, börö me farahu khö Keriso. Ba hiza, te'orifi ira molo'ö ngenolinia : Si föföna Keriso, ba fanetenia, - na tohare Ia mangawuli, niha si no tana khöNia. Ba awena gamozua andrö, na no Iheta wamatörö fefu ba fa'asalaŵa fefu ba fa'abölö fefu ba na Ibe'e ba danga Lowalangi Ama wamatörö andrö. Lö sa tola lö'ö salaŵa Keriso, irugi Ibe'e Lowalangi barö gaheNia nudu fefu. Udu safuria nihetaNia, ya'ia wa'amate andrö.- 1 Kor 15:20-26
Simanö daroma li Lowalangi.- Sato : Ma'andrö ...
Sinunö Föna Injil : Psallite No 264 (ma Laudate No 68)
INJIL
Turia Somuso Dödö khö Yesu Keriso nisura Luka.-
Me luo da'ö, maoso Maria, i'alio'ö we'amöi ba zi sambua banua ba Yudea, tanö ba hili möi ia ba nomo Zakharia, ba i'owai Gelisabe. Me irongo Elisabe wangowai Maria andrö, maliŵa nono andrö si so ba dabina Gelisabe. Ba Ifatörö Gelizabe Eheha Ni'amoni'ö. Humede ia, ebua li, imane : "Nifahowu'ö ndra'ugö, töra moroi ba ndra alawe bö'ö fefu, ba nifahowu'ö Nono andrö ni'adonogöu dania. Haniha ndra'o, wa möi khögu nina Zo'aya ya'o ? Hiza sa, me urungo wangowaimö andrö, maliŵa nono andre ba dabinagu börö ŵa'omuso dödö. Tefahowu'ö ndra'ugö,me faduhu dödöu, wa alua niŵa'ö Zo' aya khöu."
Imane Maria : "Isuno Zo'aya tödögu, owuawua dödögu börö Lowalangi sangorifi ya'o, me no Inehegö ndra'o, enoniNia side'ide andre : Hiza sa, i'otarai da'e, lafahowuhowu'ö ndra'o dozi nga'ötö. Börö me Lowalangi si lö ambö fa'abölö zamalua sahölihöli dödö khögu. Ni'amoni'ö döiNia. Ihakhösi tödö dozi niha sangata'ufi Ya'ia götögötö wa'ara. Iforoma'ö wa'abölö dangaNia, Ifazaewe niha si fayaŵa tödö. Itimba ndra salaŵa moroi ba dadaomara ba I'alaŵa'ö niha side'ide. I'abusoi'ö si sökhi niha solofo ba Ifofanö niha si kayo, lö noro dangara. No Itolo genoniNia, Izara'eli, me no itörö tödöNia wa'ahakhö dödöNia andrö, faudu si no Iŵa'ö khö ndra tuada, khö Gaberahamo ba ba ma'uwunia, irugi zi lö aetu."
Luk 1:39-55
Simanö duria somuso dödö khö Zo'aya ya'ita, Yesu Keriso.-
 |
| Ilustrasi Gambar dari MIRIFICA News. |
HOMILI
Ba wombaso sifõfõna nihalõ moroi ba zura Wama’ele’õ andrõ tarongo; sifõfõna ya’ia famokai mbawandruhõ nomo Lowalangi irege oroma dawõla gamabu’ula li andrõ. Angi’ilata simendrua ya’ia samosa ndra’alawe sonukha luo, sizizio yawa ba mbawa, si so bala hõgõ si felendrua ndrõfi. Angi’ilata simedõlu ya’ia naga andrõ sebua sifitu hõgõ ba sifulu rozi dandru. Balazi wa’ebuania andrõ ba tola ibõzini zisambua ni’otõlu ndrõfi ba itibo’õ tou ba gulidanõ. Ba gangi’ilata andrõ edõna naga andrõ itõlõ nono ndra’alawe andrõ na tumbu. Ba hiza memadono ndra’alawe andrõ ono matua, ono andrõ te’oloi’õ fõna Lowalangi ba ira’alawe andrõ isawa danõ simate ba naha sino ihõnagõ Lowalangi khõnia. Bagafuriata terongo li sebua sanguma’õ: Iada’e no alua: No mõna Lowalangida. No iforoma’õ wa’abõlõNia andrõ, -no Ibõrõgõ wamatõrõ. No Itou’õ kuasoNia ba danga Razo, nibayoiniNia.-
Ba wombaso sifõfõna andre tola manofu ita hadia geluaha dawõla gamabu’ula li, ira alawe, ba naga andrõ. Ira alawe andrõ ba no Inada Maria sangadonogõ Yesu. Maria andrõ tetõtõi ia tobali tawõla Lowalangi sibohou bõrõ me ya’ia zo’adonogõ Ono Lowalangi andrõ ba we’amõiNia tobali õsi niha. Naga andrõ ba no famaedo mbaua tou andrõ, ya’ia zifatiu ba khõ Keriso andrõ. Da’e dania wamõi tou ba gulidanõ Yesu andrõ, ba wangõhõli dozi niha samati moroi ba huku horõ fa’amate. Ba meno itõrõ wa’amate Yesu ba dõla rõfa andrõ, ba da’õ mõna Ia ba wangalaini fa’amate andrõ. FemaosoNia moroi ba gotalua zimate ba fanahaeNia ba zorugo ba we’amõi ba gambõlõ Nama, no tandra wemõna Lowalangida ba no gõi bõrõta wamatõrõNia andrõ. Razo nibayoini andrõ ya’ia Yesu Keriso nifatida. Baero da’õ fe’amõi ndra’alawe andrõ ba danõ simate ba nahia si no ihõnagõ Lowalangi, no sambua tandra wamolakhõmi Maria ba we’amõinia enoni Lowalangi wangadonogõ OnoNia andrõ.
Ba wombaso sidua ifaduhu’õ khõda Faulo wa Keriso andrõ zifõfõna zauri moroi ba gotalua zimate. Simanõ gõi ita andrõ wa no barõ wa’amate so ita. Bõrõ me farahu ita moroi khõ Gadamo andrõ no mate ita bõrõ horõ. Bõrõ me no farahu ita gõi ba wamati khõ Keriso, ba da’õ tefarahu ita gõi bawa’auri si lõ aetu. Yesu simõna andrõ ba no salawa ia, irege barõ mbawaNia so fefu niduNia ba safuria nuduNia andrõ ba yaia wa’amate andrõ.
Ba wombaso sidua andre sindru ifangõhõsi khõda wa bõrõ me nga’õtõ Gadamo ita andre, ba no fao khõda horõ ondrõita andrõ. Ba hiza Adamo sibohou andrõ ba ya’ia Yesu Keriso, da’õ zangeheta ya’ita moroi ba huku horõ fa’amate. Baero da’õ gõi, ba wa’afarahuda ba wamatida ba khõ Keriso andrõ, tasõndra gõi wa’auri si lõ aetu.
Bakha ba injil sindruhu tarongo hewisa me mõi Maria wamaigõ talifusõnia Elisabe. Eheha Ni’amoni’õ zamatõrõ Elisabe wanifahowu’õ Maria andrõ moroi ba gotalua ndra’alawe ba nifahowu’õ gõi dabinania andrõ, Yesu Keriso. Aefa’ irongo wehede Gelisabe andrõ Maria, ibõrõgõ gõi isuno Lowalangi ba nitemania andrõ.
Ba wombaso injil andre ifa’ele’õ khõda hewisa walukhata zifatalifusõ andrõ. Ba wamatõrõ Geheha Lowalangi andrõ teturiaigõ wa Maria andrõ gõi no samõsa ina Zo’aya. Fehede Gelisabe andrõ ba no bõrõta wangandrõ sasese talau ya’ia ba wangandrõ Rosario. Baero da’õ, sinunõ Maria andrõ Gõi ba no sinunõ wamolakhõmi Lowalangi si’oroi siai ba dõdõ.
Nata’angeraigõ tõdõda ba zitõlu ngawua wombaso andre, so mato ha’uga faosatõ zedõna ta’erõnusi. Sinangea ta’erõnusi ya’ia da’õ:
1. Ba ngalua andre ta’owasaini Wamazawa Santa Maria ba Zorugo. Moguna tabotokhi ba dõdõda fe’amõi ninada Maria ba zorugo tenga simane fanahae Yesu. Fanahae Yesu ba zorugo, da’e bõrõ wa’abõlõ wa’a-Lowalangi-Nia. Na inada Maria, ya’ia andrõ nifazawa ba zorugo. Ba zimane da’e, asese sibai oya ganofula ba niha wanguma’õ: “Heza lahalõ wamati andrõ niha katolik wa lafazawa Maria ba zorugo. Lõ bakha ba Zura Ni’amoni’õ!” Sindruhu niwa’õra andrõ wa bakha ba Zura Ni’amoni’õ lõ sambua ayati zanguma’õ wa lafazawa Maria andrõ ba Zorugo. Ba hiza ba Zura Ni’amoni’õ gõi tesõndra ayati so’amakhaita ba wamazawa Maria andrõ ba zorugo. Nata’angeraigõ tõdõda, na Gelia ba Henok andrõ tefazawa ba zorugo (I Moze 5:24, Heberai’o 11:5, 2 Razo 2:11-12), hadia tebai ilau Lowalangi andrõ; ifazawa gõi Maria andrõ si no ina NonoNia? Ba hadia lõ edõna gõi Yesu andrõ si no razo andrõ ibe’e ba gambõlõNia NinaNia? Razo Slaomo dumadumania si so ba zura ni’amoni’õ, lõ mamalõ ifedadao ninania andrõ ba gambõlõ nahia dadaoma wa’arazonia.
2. Inada Maria andrõ ba no ina Zo’aya ya’ita Yesu Keriso, Ono Lowalangi fondrege Ni’amoni’õ. Bakha ba Zura Ni’amoni’õ ibe’e khalakhala wa Maria andrõ no samõsa razo (ratu) sanema famolakhõmi moroi khõ nononia Yesu Keriso. Ba da’e edõna ifangõhõsi gõi khõda wa, Maria andrõ tefolakhõmi ba wahasambuania ba khõ Keriso. Da’e nikhalaigõ ba wombaso sifõfõna megeno wanguma’õ: “Ba moloi ndra’alawe andrõ isawa danõ simate ba nahia si no ihõnagõ Lowalangi khõnia”.
3. Tefazawa Ninada Maria andrõ ba Zorugo, bõrõ me te’otabinagõ ia lõ faruka khõnia horõ ba sagõtõ fa’aurinia ba gulidanõ lõ nifaluania horõ. Faulo zangobakha ba wombaso sidua wa ya’ita andre tatõrõ wa’amate bõrõ horõ ondrõita ba horõda samõsa si’oroi khõ Gadamo. Ba hiza, Inada Maria andrõ te’efa’õ ia moroi ba wa’amate andrõ ba fa’obou mboto. Na ta’angeraigõ tõdõda, ira niha Ni’amoni’õ nifatida andrõ wa sõkhi lala wa’aurira, lõ latõrõ wa’obou mboto andrõ. Hadia tebai alua da’õ khõ Maria si no ina ni’amoni’õ andrõ khõ Nama?
4. Inada Maria no tawõla gamabu’ula li sibohou ia khõ Lowalangi bakha ba wahasambuania ba khõ Yesu Keriso. Bakha ba zura Wama’ele’õ nirongoda ba wombaso sifõfõna, ifo’amaedola samõsa ira alawe sangadonogõ ono matua.
5. Famazawa Inada Maria ba Zorugo, no famõnui gamabu’ula Li Lowalangi andrõ. Bakha ba Zura Ni’amoni’õ tarongo wa “So samõ ndra’alawe (Maria) ba Nga’õtõnia andrõ zangalaini afõkha ba kuasonia andrõ ya’ia wa’amate bõrõ horõ (I Moze 3:15). Bazimanõ famezawa inada Maria ba zorugo, no fa’amõna moroi ba horõ ba fa’amate. Bazimanõ dania tefõnui niwa’õ Waulo ba wombaso sidua wa Keriso zia’a moroi ba wa’amate andrõ, ba da’e zitobali loheloheda wa te’orifi dania mangawuli niha si no mate andrõ.
6. Famolakhõmi ba Famazawa Inada Maria ba zorugo, no sambua fa’omuso dõdõ ba zi dozi niha samati. Elisabe ba wombaso injil zosalahini ya’ita ba walukhatania khõ ninada Maria, isuno Lowalangi ba isuno dabina Maria andrõ ya’ia Yesu Keriso. Famolakhõmi ninada Maria andrõ tola tafalua gõi ia tõratõra ba wamaluada fangandrõ Rosario andrõ.
Fangowasainida Luo Wamazawa Santa Maria andre, edõna I’a’aro’õ dõdõda ba wamatida khõ Lowalangi ba wefao khõ ninada Maria. Baero da’õ gõi, I’a’aro’õ nasa wamatida wa tasõndra dania wa’auri si lõ aetu andrõ. Bagafuriata, famolakhõmida Maria andrõ no sambua ndrela wangahatõ’õda khõ Lowalangi ba khõ NonoNia Yesu Keriso. Yalõmamalõ tahatõ’õ ita khõ Maria andrõ ena’õ sinangea gõi ita wanema amabu’ula li Nama andrõ. Yafaoma itolo ita Lowalangi. Amen.
versi video dapat dilihat di: https://youtu.be/9_hf7xJacYk
0 comments:
Posting Komentar