HOHO “NORO DÖDÖ”

Hadia zalua khögu ba sabölö

Wa no tamanumanu manö

 

Lö famakhölö ba dakera kambölö

Lö famö’imö’i nono hörö

 

Sikhalagu no dambudambuanö manö

Bawagu no mufamutu manö

 

Utöngö dalu mbanua lö balö

Ufakhölö ba nasi lö siföfö

 

Börö sibai khögu noro dödö

Si lö aetu mangenangenanö

 

Lö sawai no tohare nönö

Lö sitoföfö no zumawili ba danö

 

Utaba mbalö no aröu ambö

Utohu dalu no aröu fabö’ö

 

Uwai ogö’ö no ilau molö

Uwai otufo no ifuli abasö

 

Uwaö nawö no simöi fonönö wökhö

Ufiza no si möi fonönö wo’ömö

 

Da’ö khögu noro bio aitö

Selezitö na muhawiaigö ba danö

 

He ulau me’e lö alua dawa hörö

He ulau mu’ao lö terongo ba mbö’ö

 

Ha khö Zo’aya ufuli utou’ö

Me ha Ya’ia dötönafö si’ogötö’ö

 

Ha fa’afökhö khögu wombase’ö

Inötö si no Ihonogöigö

 

Me oi sökhi fefu da’ö ba ginötö

Me noro-Nia andrö tola mufagaölö

 

Ha sanaögö dania zanau ölö

Ha solo’ö dania zohahau dödö

 

Böi ya’i tebulö ba wangandrö dödö

Ya’ia zangalui lala tanö bö’ö

 

Noro dödö sabua ni’angerangeraigö

Lö famaedonia ba röfa nilu’i-Nia me luo da’ö

 

Andrö uwaö khögu dödö

Lö guna uhöna wa’abu dödö

 

Ufuli ndra’o ba lala halöwö

Ba zimanö alö khögu mbusibusi dödö

 

HOHO “NORO DÖDÖ”

Nifa’anö Kat. Ingatan Sihura

Ba Gunungsitoli

Me fele önö mbawa si siwa döfi dua ngahönö a dua wulu a lima.