FANGOBADÖDÖI AWÖ NO BUA WAMADUHU’Ö FAMATI (Minggu Biasa - 18)

Luo Migu Biasa – 18

Fombaso I      : Amosi 6:1a.4-7

Fombaso II    : 1Timoteo 6:11-16

Injil                 : Lukas 16:19–31

 

Turia Somuso Dödö khö Yesu Keriso nisura Yohane.-

 

Me luo da'ö, Ilau gamaedola andre Yesu, Imane: "So samösa niha sikayo, sonukha si sökhi sibai. Ba ero ma'ökhö i'omusoi'ö manö dödönia, lö ambö'ambö hadia ia. So göi samösa zi numana, Lazaro döi, safönu gimögimö zi sageu botonia. Sito'ölönia i'iagö gahe nora niha si kayo no mege, ena'ö tola ifo'ösi dalunia faoma akhökhöla gö satoru moroi ba meza niha si kayo andrö. Ba so göi nasu, lafelafelai gigimönia andrö.

Samuza ma'ökhö, mate zi numana andrö, ba la'ohe ia ira mala'ika ba gaheta Gaberahamo. Ba mate göi niha si kayo andrö, ba lako'o ia. Itaögö sibai wa'amarase ba nahia zi mate andrö. Me ifaöga hörönia, i'ila Gaberahamo ba zaröu awö Lazaro, ba gahetania. Mu'ao niha sikayo andrö: "He amagu Aberahamo, hakhösi tödö ndra'o. Fatenge Lazaro andrö, ena'ö i'ungugö zara nuwu durunia ba nidanö, ba wangokafui lelagu. Marase sibai ndra'o ba holahola galitö andre."

Imane Aberahamo : "He onogu, törötörö tödöu, wa no ötema zi sökhi andrö, tana khöu, götö we'asomö ba gulidanö, ba no itema zi lö sökhi Lazaro. Iada'e terara dödönia ba da'e; ba ya'ugö zi marase. Baero da'ö, no so mbaho sabakha ba gotaluada, ena'ö böi möi niha moroi ba da'e numalö ba khömi, ba si otarai khömi, böi möi ba da'e." Imane niha si kayo andrö: "Na simanö, ama, u'andrö sibai khöu, ena'ö öfatenge Lazaro andrö we'amöi ba nomogu, ba zi so nasa dalima tö ndra talifusögu, ena'ö ifangelama ira, fa böi möi ira göi ba naha wa'amarase andre." Imane Aberahamo: "No so khöra mbuku Moze awö mbuku ndra sama'ele'ö; akha lafondrondrongo da'ö." Imane niha si kayo andrö: "Ai, lö'ö, amagu Aberahamo, ha na möi khöra niha si otarai zi no mate, awena lafalalini gera'erara." Imane khönia Aberahamo: "Na lö ba dödöra Moze, awö ndra sama'ele'ö, lö göi mamati ira, na so niha si maoso moroi ba zi no mate".-                                                         

 

Simanö duria somuso dödö khö Zo'aya ya'ita, Yesu Keriso.-

 

FANGOBADÖDÖI AWÖ NO BUA WAMADUHU’Ö FAMATI

Ba zi sambua banua, so samösa niha si kayo ba sowölö’ölö sibai möi ba gereja ero luo migu, sotöi Ama Warisa. Ba dödönia omasi sibai falukha ia khö Yesu, irege i’ohe ba wangifinia. Ba wangifinia, Iwa’ö khönia Yesu, wa möi Ia tomenia ba nomo mahemolu. Me giarö ia moroi ba wemörö andrö, i'anema’ö isusugi wo’omonia ba wangehao omo ba ba wondrino gö sami.

Fatutu fa’amoluo me no awai lafa’anö ira, ilau teu toho. So samösa nono sekola sanörö föna nomonia si no abasöbasö. Me i’ila da’ö Ama Warisa, ahakhö sibai dödönia irege ibe’e wayo ba sambua nukha khö nono andrö ena’ö tola möi ia sekola mangawuli. Ba dalu laluo, so göi samösa nina sedöna tetabi ba hiza lö la’ila la’ohe ba nomo zofökhö me abölö sibai deu. La’andrö tolo khö Nama Warisa wamesao faoma motonia. Sifao fa’abua gölönia börö wombalobaloi Yesu, tomenia, i’alio’ö wamesao. Hiza me mangawuli ia, so samösa ndra’alawe nifofanö namania, me no mohorö ia. I’andrö ena’ö tola toröi ia ba nomo nama Warisa gasagasa wombase’ö ono matua sohoröni ya’ia andrö wamaondragö ya’ia.

Me arakhagö aekhu luo, ibörögö afatö dödö Nama Warisa me lö manö tohare Yesu, tomenia. Andrö tehasu ia ba gurusi, alau hörönia, ba mangifi ia. Ba wangifinia andrö falukha ia khö Yesu ba ilua’ö wa’afatö dödönia; “He tua, ma’öma’ökhö ubaloi’Ö ba lö manö so’Ö”. Itema linia Yesu; “Alai ndra’o ndra’ugö le. No medölu ötema’ö ndra’o ma’ökhö”. Tokea Nama Warisa, ba omuso dödönia.

Salua khö Nama Warisa andre, no möi famokai dödöda ba wo’erönusi Taroma li Lowalangi nifarongogö ba luo migu si 26 andre, ena’ö satuatua ba wangoguna’ö harato gulidanö andrö. Harato andrö göi moguna ba lala wa’auri niha, me da’ö göi zanundreheni lala wangalui ba lala wa’auri. Hiza i, ena’ö siföfönania, harato andrö tobali dela ba wamolakhömi Lowalangi ba ba wangobadödöi awö.

Bakha ba duria somuso dödö andrö oroma sibai hadia mbörö wa’itaögö wa’amarase ba galitö andrö niha sikayo, ba te’ohe göi ba gaheta Gaberahamo, Lazaro andrö. Alaua da’ö ba niha sikayo, börö me so nasa ia ba gulidanö, lö i’oguna’ö gokhötania andrö ba wangobadödöi awö ya’ia Lazaro andrö. No ihalö sahono dödönia gokhöta andrö, irege lö sa’ae tödönia ba niha sangandrö tolo. Ba gafuriata, alai niha simanö iwa’ö Amosi sama’ele’ö (fahela ba wombaso si sara).

Ena’ö tola atuatua ba wangoguna’ö okhöta gulidanö andrö, moguna so wamati saro ba khö Keriso. Menemene waulo andrö khö Dimoteo (fahela ba wombaso si dua) moguna ta’okhögö; “Aröu’ö fefu zi lö sökhi, gohi wa’atulö, fa’alöfaröi, famati, fa’omasi, fa’ebolo dödö ba fa’asökhi dödö”. Ba zimanö oroma niha samati andrö; tenga ha me no so ia ba gotalua nono wobanua, ba hiza oroma göi ia wa no ono Lowalangi, sangoroma’ö bua wamatinia khö Yesu Keriso. Amen.