YESU: RAZO SAMELEGÖ NOSO BA WANGÖHÖLI BA BA WANGEFA’Ö HORÖ NIHA

Taroma Li Lowalangi Luo Migu Wa’arazo Zo’aya Ya’ita Yesu Keriso

Fombaso Si-1           : 2Samueli 5:1-3

Fombaso Si-2           : Kolose 1:12-20

Injil                            : Luka 23:35-43

YESU: RAZO SAMELEGÖ NOSO

BA WANGÖHÖLI BA BA WANGEFA’Ö HORÖ NIHA

Me föna ba nono niha, so sambua gamaedola sasese labe’e degudegu ira satua, yaia da’ö: “Haniha nawö si tola mufarisayo, ya’ia nawö sifahuwu me iraono”. Degudegu amaedola andre, sindruhu I’okhögö geluaha sabakha sibai. Fa’abakha geluaha degudegu amaedola andre tefobörö ia ba mbosi wa’a’iraono. Ba zi samösa iraono, tola tasöndra khöra dödö satulö ba si lö fawini. Baero da’ö lö khöra nahönahö dödö sombali’ö tekiko wahuwusara. Hewa’ae asese fa’udu ndraono ba wamadöni öra ma gamagama omasiöra, ba zi lö ara dania no ifulu zui fahuwu ira. Buabua wa’a’iraono andre ba gafuriata tobali ia degudegu ba niha sato sangoroma’ö bua wa’omasi andrö tenga börö wa so hadia ia gohitö dödö, ba hiza fa’omasi andrö alua ia ba wa’ahele dödö ba wahuwusa.

Fa’amate Yesu andrö ba döla röfa, tenga siföföna börö me labunu Ia, ba hiza i, no börö wa’ahele dödö ba fanou’öNia fa’auri wa’anihaNia khö Nama, me Ya’ia zafönu kuaso ba wa’auri andrö. Razo Dawido andrö nifili Ndraono Gizara’eli tobali razo, no famaedo Yesu Keriso si so kuaso ba gulidanö ma’afefu. Kuaso si so ba dangaNia andrö, lö I’oguna’ö ba wamadaö, ba hiza lö mamalö tobali foluluNia fa’auriNia ba gamatöröwa Nama. Andrö dania wa Itehe te’o’aya Ia, teforöfa mbotoNia irege mate ba döla röfa.

FoluluNia Ya’ia irege mate ba döla röfa, no möi börö wangöhölida ya’ita niha samati khöNia. Ba zimanö tobali ia khöda famaedo ba wanema’ö fanandraigö ba fa’afökhö andrö; me fefu da’ö tobali ndrela ia khöda ba wanöndrada fa’auri si lö aetu. Andrö te’andrö khöda ena’ö lö mo’aetufa göi ta’erönusi lala wa’aurida, aboto ba dödöda nifaluada, ba lö aetu monoro tödö ita ba wamalua si sökhi ba mbotoda samösa, ba nawöda niha ba ba zifasui ya’ita. Da’e gohitö dödö Waulo andrö nifa’emania ba mbanua Golose; no tobali sia’a khöda Keriso andrö wame’e dumaduma, ba zimanö mo’ömö dödöda ba wangolohia’ö wolauNia.

Na ta’ila ta’olohia’ö wolau simanö, no enahöi wamaedo khöda niha niforöfa andrö si so ba gambölö Yesu; saboto ba dödö horö ba nifaluania. Hiza börö me anehe ia wamakao Yesu andrö, faduhu dödönia khö Yesu, ba i’andrö wa’ahakhö dödö khö Yesu. Saluania, isöndra wa’ahakhö dödö Yesu, irege tobali ia awöNia ba waradaiso andrö.

Ba gafuriata, aboto ba dödöda wa fa’arazo Keriso andrö tenga ena’ö ba wangalui fangebua’ö töiNia, ba hiza no folulunia fa’auriNia ba danga Nama, ba wangöhöli ya’ita niha gulidanö. Simane buabua ndraono andrö, lö khöra fawinisa tödö, ba hiza ha fa’ahele dödö ba wariawösa. Bua wa’ahele dödö si no i’oroma’ö Yesu andrö, no sinangea ta’olohia’ö ia ba lala wa’aurida irege ba gafuriata sowulo göi ita ba gamatöröwa wa’arazoNia andrö irugi zi lö aetu. Amen.