ANGETULA SENAHÖI ; Taroma Li Lowalangi Luo Migu si-16 Dofi C

Fombaso I      : 1 Moz 18:1-10a;;

Fombaso II    : Kol 1:24-28

Injil                 : Luk 10:38-42

Turia Somuso Dödö khö Yesu Keriso nisura Yohane.-

Me luo da'ö, möi Yesu ba zi sambua banua side'ide. So ba da'ö samösa ndra alawe, Marata döi, ikaoni Yesu ba nomonia. Ba so dalifusönia, Maria döi. Dumadao Maria föna Zo'aya mamondrongo famahaöNia. Ba no owölö'ölö Marata ba wangai hadia ia zoguna khö Yesu. Möi Ia khö Yesu, imane : "He So'aya, hadia lö ba dödöU, wa ibe'e manö sangai halöŵö ndra'o Maria, ha ya'oya'o ? Ŵa'ö khönia, akha itolodo." Itema linia So'aya, Imane : "He Marata, he Marata, wa'oya manö wangabu dödöu ba oya ngawalö wa lö ahono'ö. ha sambalö zoguna. No ituyu khönia zi sökhi Maria, ba lö aheta khönia da'ö."-

Simanö duria somuso dödö khö Zo'aya ya'ita, Yesu Keriso.-

Jalan Lingkar Pantai Utara Ke Barat. Dok. Pribadi.

ANGETULA SENAHÖI

Samuza ma’ökhö manofu Sokrates khö gurunia Plato imane, “He guru handia nifotöi fa’omasi ba hadöia göi geluahania wangowalu?”. Lö itema li ba wanofu andrö Plato, ba hiza ifatenge Sokrates imane: “Ae halö khögu sara mbunga andrö ba newali sebolo. Faigi zabölö sökhi molo’ö ya’ugö. Ba na no ötalu’I nahia andrö ba tebai öfuli’ö furi wangai bunga andrö.” Mofanö Sokrates ba hiza me i’ila mbunga si sökhi ba mbörö lala, iwaö tödönia “Miföna dania so zabölö sökhi”. Ha börö wehede dödönia da’ö, sifalukha ia ba mbalö lala, hatö bunga soköli irege mangawuli ia khö gurunia ba lö ba dangania bunga. Me mangawuli ia, iwa’ö khönia gurunia “Da’ö ia wa’omasi”. Imane khö gurunia, aboto ba dödögu sa’ae hadia nifotöi fa’omasi, iada’e hadia nifotöi fangowalu? Ifuli ifatenge ia Plato simane megeno. I’anema’ö momöi Sokrates wangai bunga si sökhi andrö si so ba mbörö lala. Me mangawuli ia, iwa’ö khönia gurunia “Da’ö ia wangowalu”. Ba gafuriata awena aboto ba dödö Sokrates wa fa’omasi andrö ha inötö ba wamili, na fagowalu ba no fangai angetula.

Maria, bakha ba turia somuso dödö andrö, sindruhu i’oroma’ö wangainia angetula senahöi ba wamondrondrongo Yesu. Angetulania andrö wamondrondrongo Yesu andrö, ba no sambua angetula si sökhi ba lö niha sitola mangeheta khönia da’ö. Angetula ba wolo’ö Yesu ba no sambua angetula sabua na dali wa’aniha, ba hiza na börö wehulu dödö, he abua röfa andrö, ba lö tobali tahataha.

Ba wangai sambua angetula, asese sibai arörö ba wamahemahela. Hadia tola ma lö’ö? Hadia abua ma aoha? Hadia mohare ma lö’ö? Famahemahela simane da’e, aekhu manö italu’i inötö b aba gafuriata hatö faniasa zalua. “Alai ndra’o” da’e zalua khö Sokrates ba we’amöinia siföföna wangai bunga. Safuriania, maniasa ia wa hatö soköli zifalukha ia.

Angetula ba wolo’ö Yesu andrö tebai mufahelahela. Fangai angetula ba wolo’ö Yesu andrö mu’anemai’ö, fatua Ibe’e nasa khöda ginötö. Aberahamo andrö ba wombaso siföföna ibe’e khöda dumaduma ba wangai angetula ba wanoloni niha sikoli. Hewa’ae lö aboto ba dödö Gaberahamo heza la’otarai ba heza lasawa, lö mamalö i’andrö ena’ö molombase ira. Ba gafuriatania, fanema’ö Gaberahamo niha sidatölu andrö no möi börö wangandrö howuhowu Zo’aya sifalawu moroi ba zanehe niha, ya’ia wa so dania khönia nono matua moroi khö wo’omonia, Sara.

Simanö göi gangetula Waulo andrö wolo’ö Yesu. Fanögö fa’afökhö ba we’amöi enoni Lowalangi andrö, tenga simöi fombuwu gohitö dödö, ba hiza simöi famehi’a dödö. Moroi ba da’e tola tahalö wangaro dödö wa fa’atosasa nitaögöda ya’ita niha samati ba we’amöi enoni Lowalangi andrö, no sitobali ndrela howuhowu ba niha bö’ö, ba ba Gereja ma’asambua.

No ituyu khönia zi sökhi Maria, ba lö aheta khönia da'ö. Simanö göi ita ba we’amöida enoni Lowalangi; datatuyu khöda zisökhi ya’ia wanaögöda wolu’i rofada zamösana, ba wanoloni awöda niha, töratöra zinumana andrö, me lö dania sitola mangeheta khöda howuhowu andrö. Amen.