Taroma Li Lowalangi Luo Migu Wamasömba’ö So’aya Döfi C

Liturgi Taroma Li Döfi A/B/C, hlm. 657.

Fombaso I      : Maleakhi 3:1-4

Fombaso II    : Heberai’o 2:14-18

Injil                 : Luka 2:22-44

 

Misa yang dipimpin oleh Mgr. Adrianus Sunarko, OFM
dalam rangka pembukaan pertemuan Kolit Regio Sumatra
di gereja St. Petrus Batam

YESU ERE SEBUA SI NO DUMADUMA NIHA SAMATI

 

Bakha ba wombaso si sara andrö nihalö moroi ba zura Maleakhi, no sambua famatunö hadia zalua ba ginötö da’ö, hiwa ia ndra ere samasömba’ö fasömbata andrö khö Lowalangi. Famaluara liturgi andrö ba nomo Lowalangi lö nihaogö, ba amuata niha samati göi no hulö gamuata niha baero, amuata sobou ba lö khöra fa'omasi ba fa'atulö. Andrö wa Ituriaigö Maleakhi we'aso Zo’aya awö wanguhuku andrö khöNia. Fanguhuku andrö Ibörögö ba nomo Lowalangi, si oföna khö ndra ere ba ira sohalöŵö ba nomo Zo'aya, si no kubalo niha samati. Andrö moguna mu’anofu li, hadia, no sinangea wamaluada liturgi khöda ba atulö gera'erada ba amuatada ba mbanuada?

Bakha ba wombaso si dua nihalö moroi ba zura Heberai’o andrö, no sambua famaha’ö ba fangombakha wa Yesu andrö nifatenge Nama, no ere sebua Ia ba niha samati. Ono Lowalangi andrö, no tobali Ia niha simane ya'ita, ena'ö botoNia andrö tola Ifasömba'ö tobali fasömbata fangöhöli soi niha. Ba wa'anihaNia, Itehegö itandraigö Ia afökha, irege lö fa'abölöNia, erege dödöNia ba ata'u Ia, hulö simane ya'ita, awai i, Ya'ia lö horö.

Bakha ba Duria Somuso Dödö tarongo hewisa me la'ohe Yesu ba nomo Lowalangi faudu ba gamakhoita. Lö ato niha sanema'ö ba sangila Ya'ia. Ba hiza, Simeoni andrö niha satulö tödö föna Lowalangi, omuso sibai dödönia wangi’ila we’aso zangorifi andrö. Andrö dania wa ifatörö ia Eheha Ni’amoni’ö ba wanuno Lowalangi. Ba zitambai da’ö, I’ombakha’ö göi wa Ono andrö (Yesu) dania  “tobali tandra ia khö Lowalangi”, ya’ia dandra wangöhöli. Inönö nasa Ana, ira alawe sama’ale’ö andrö wangombakha salua na Nono andrö.

Si tölu ngawua wombaso andre, edöna idönisi ita ba zi sambua tuho wa, Yesu andrö no ere sebua ia ba niha samati. Ba wa’atobaliNia ere sebua, siföföna ihaogö ia ua, ifasömba’ö ia samösa föna Lowalangi tobali höli ba niha samati. Böi simane salua ba wombaso si sara mege. Fe’amöi ere andrö, ena’ö lö mamalö tobali ia dumaduma si sökhi ba wa masömba’ö fasömbata föna Lowalangi, simane ba fombaso si dua mege. Ya’ita göi si no tobali ere, börö wanasa ni’amoni’ö si no tatema andrö, moguna tafasömba’ö ita tobali fasömbata samohua tanö föna Lowalangi.  Famasömba’öda ya’ita andrö tabörögö ia sifao folo’ö oroisa Lowalangi, folulu fa’auri ba we’amöi enoniNia, ba fanaha tödö ba ngawalö wanandraigö salua ba lala wa’auri si’ero ma’ökhö. Amen.

Nifa’anö Kat. Ingatan Sihura, S.Ag.

Umbu:

Biro Liturgi Keuskupan Sibolga, Liturgi Taroma Li Döfi A/B/C Buku Bacaan Untuk Upacara Hari Minggu dan Hari Raya dalam Bahasa Nias, Gunungsitoli, Keuskupan Sibolga, 2012

Dianne Bergant, CSA & Robert J. Karris, OFM (ed) Tafsir Alkitab Perjanjian Lama Yogyakarta Kanisius, 2002

Dianne Bergant, CSA & Robert J. Karris, OFM (ed) Tafsir Alkitab Perjanjian Baru Yogyakarta Kanisius, 2002

Martin Harun, OFM, Lukas Injil Kaum Marginal Yogyakarta: Kanisius, 2019

St. Eko Riyadi, Pr, Lukas “Sungguh, Orang ini adalah Orang Benar!” Yogyakarta: Kanisius, 2011

St. Sutopanitro, Pr, Pesan-Pesan Kurban Ekaristi Hari Minggu dan Hari Raya Tahun A-B-C Jakarta: Obor, 2013

.