Liturgi Döfi A/B/C, hlm. 572
Fombaso I : Yesaya
6:1-2a.3-8
Fombaso II : 1Korindro 15:18.11
Injil : Luka 5:1-11
 |
| Dipanggil dan Diutus Sebagai Rasul Awam [Foto: Dok. Pribadi] |
FOGAONI BA FAMATENGE
KERISO ANDRÖ BA NO FANGAMONI’Ö
Bakha ba wombaso si sara tarongo wama’ele’ö Yesaya andrö ba wangi’ilania lakhömi Zo’aya
andrö. Ba wangi’ilania lakhömi Zo’aya andrö, aboto ba dödönia wa no tenga sinagea ia. Andrö dania wa möi khönia mala’ika ba wangehao ya’ia sifao kara ni’oyoni ba
galitö nibe’e ba mbawania. Angi’ilata andre khö Yesaya, moguna sibai göi ia khöda. Bakha ba lala wa’auri ba ba wangandrö itaria
olifu ita haniha Lowalangi ba haniha ita. Lowalangi ba no sanga’asogö ya’ita.
Ya’ia wondrege ni’amoni’ö, wondrege zabölö ba solomasi. Ya’ita, niha si tola tekiko, börö me niha si so
horö, tebai manaha tödö föna Lowalangi. Ba he ŵa’ae simanö, ba Ikaoni ita
Lowalangi ba khöNia. Lowalangi andrö si fahöna fa’ahakhö dödö, lö mamalö ikaoni ita moroi ba horö, I’ehao ita sifao EhehaNia, ba awena Ifatenge ita
mangawuli ba wanuriaigö fa’asökhi dödöNia andrö, ena’ö dozi samondrongo, tola lafalalini göi gera’erara.
Bakha ba wombaso sidua andrö nihalö moroi ba
zura Waulo andrö ba niha samati ba mbanua Gorindro, sindruhu wa no
famaduhu’ö Waulo sanandrösa ba wogaoninia göi. Sindruhu
wa no hulö zahou wa’atumbu ia na na fahela ba wa’aniha wanuriaigö turia somuso dödö andrö. Hewa’ae
simanö, fanuriaigönia Turia
Somuso Dödö andrö ba no fagölö simane Ira Rasul bö’ö. Faulo si
no solohi niha Keriso andrö ba ziföföna, no
I’ehao ia Lowalangi me tebalunö hörönia. Andrö sibai dania wa i’andrö ena’ö tabali’ö danedane wamatida Daroma Li andrö. Dae zi no tobali sabölö moguna ba
lala wa’aurida ya’ita niha samati, na tahaogö ta’erönusi, hadia geluaha Daroma Li andrö ba wa’aurida ba hewisa lala wama’ema
ba ndraonoda göi.
Ba Duria Somuso Dödö andrö, tarongo wogaoni Zimoni Fetero andrö. Ba mböröta no sama’u’u i'a ia. Me aboto ba dödö Zimoni Fetero wa no sebua horö ia, ba da’ö ikaoni ia Yesu ba wa’atobali sama’u’u niha. Fangalulunia föna Zo’aya no möi börö wangamoni’ö ba fangehaonia ba khö Zo’aya. Baero da’ö fangi’ilania Yesu andrö zabölö mame’e khönia fa’aboto ba dödö sanandrösa khö Yesu andrö.
Si tölu ngawua fombaso nirongoda ba zima’ökhö andre, idönia’ö ita ba zi sambua tuho ya’ia da’ö, wa fogaoni ba famatenge nifalua Yesu andrö me iwa’ö “Misola ba zabakha”, no sambua ndrela ba wangamoni’ö ya’ita ba he göi niha sifalukha khöda, samati börö wanuriaigöda turia somuso dödö andrö. Fogaoni ba famatengeda andrö, mobörö ia ba wangi’ilada hania Yesu andrö ba lala wa’aurida. Duhu tenga simane niha me ginötö so Yesu andrö ita, sangila Yesu andrö si sindro fönara. Ba hiza, Faulo andrö zanga’a’aro’ö tödöda wa ba wangi’ilada Taroma Li Lowalangi andrö, no ta’ila Yesu. faudu me iwa’ö Yohane andrö wa ba mböröta ba no Taroma Li, ba Taroma Li andrö ba no tobali ösi niha, ba toröi ia ba gotaluada (Yohane 1). Ba zimanö, andrö böi alawö ita wangandrö fa’ebolo dödö Lowalangi ba ngawalö zo’amböta ya’ita. No sifahöna fa’ahakhö dödö Lowalangi andrö, ba lö mo’aetufa wa’omasiNia. Ba gafuriata böi so dödö wondrönifuri göi na Ifatenge ita wanuriaigö Turia Somuso Dödö andrö. Fanuriaigöda Turia Somuso Dödö andrö, siföfönania, ba wehede, ba gamuata, ba ni’era’erada, ba wongambatöda, ba ba nahia gofu heza so ita. Ya lö mamalö itolo ita Lowalangi. Amen.
Nifa’anö Kat. Ingatan Sihura, S.Ag.
Umbu:
Biro Liturgi Keuskupan Sibolga, Liturgi Taroma Li Döfi A/B/C Buku Bacaan Untuk Upacara Hari Minggu dan Hari Raya dalam Bahasa Nias, Gunungsitoli, Keuskupan Sibolga, 2012
Dianne Bergant, CSA & Robert J. Karris, OFM (ed) Tafsir Alkitab Perjanjian Lama Yogyakarta Kanisius, 2002
Dianne Bergant, CSA & Robert J. Karris, OFM (ed) Tafsir Alkitab Perjanjian Baru Yogyakarta Kanisius, 2002
Martin Harun, OFM, Lukas Injil Kaum Marginal Yogyakarta: Kanisius, 2019
St. Eko Riyadi, Pr, Lukas “Sungguh, Orang ini adalah Orang Benar!” Yogyakarta: Kanisius, 2011
St. Sutopanitro, Pr, Pesan-Pesan Kurban Ekaristi Hari Minggu dan Hari Raya Tahun A-B-C Jakarta: Obor, 2013
.
0 comments:
Posting Komentar