Liturgi Taroma Li Döfi A/B/C hlm. 565.
FOMBASO
I
Taroma Li Lowalangi nihalö moroi ba zura
Nehemia.
Ba mbaŵa si
fitu, ba zi sambua desa'a, owulo niha sato, ha sara dödö, ba golayama sebolo,
föna mbawa göli ba nidanö. La'andrö
khö Gesera sangila amakhoita, ena'ö ihalö zura goroisa andrö khö Moze, sura niŵa'ö
Lowalangi ba Ndraono Gizara'eli. I'ohe zura
goroisa Esera, ere andrö, föna niha samati fefu, he ira matua, he ira alawe ba he göi iraono si no biha tödö,
ba wamondrondrongo. Ba ibaso goroisa
andrö i'otarai zihulöwongi irugi laluo ba naha wombaso eu nifazökhira andrö, ba
lafondrondrongo Iraono Gizara'eli fefu. Me ibokai zura
Esera, muzizio niha sato fefu. Ba isuno
Zo'aya, Lowalangi sebua, Esera, ba latema li niha sato, lamane : "Amen,
amen." Ba lafazaŵa dangara; awena lafaöndrö ira ba lafalögu tou ira ba
danö ba wanömba So'aya. Awena lahaogö
wombaso sura goroisa Lowalangi. Iraono Lewi zamotokhi eluaha goroisa andrö,
irege tola aboto ba dödö niha sato. Ba Nehemia
kumandru ba Esera ere, sangila amakhoita, ba Ono Lewi andrö, samahaö niha, ba
lamane ba niha sato fefu: "Ngaluo ni'amoni'ö khö Lowalangi So'aya ma'ökhö;
böi mi'angaröngarö ba böi mi'ege'ege!" Noa
sa mege'ege niha sato fefu, me larongo daroma li, oroisa andrö. Lamanö
khöra: "Mi'angawuli ba nomomi ba milau manga ö si sökhi ba mibadu zami
sibai, ba mi fo'urakha niha si lö hadia ia khöra, me no ngaluo ni'amoni'ö khö
Zo'aya ya'ita ma'ökhö. Andrö böi abu dödömi, me no fangabölöda wa'omuso dödöda
andrö ba khö Zo'aya !"- Neh 8:2-4a.5-6.8-10
Simanö daroma li Lowalangi.-
Sinunö
Fanema Li :
Psallite No 19B (ma
Laudate No 152)
FOMBASO
II
Taroma Li Lowalangi nihalö moroi ba zura
Waulo si föföna ba niha samati ba mbanua Gorindro.-
Ya'ami ira talifusö!
Gereja
ma'asambua, ya'ia niha khö Keriso, tola mufagölösi ia ba mboto
niha si ha sambua, ba hiza oya ndrotondroto si so khönia. Fefu
ngandroto andrö, he ŵa'ae oya, no ha sambua boto. Simanö
göi ita fefu, he niha Yahudi, he niha si tenga niha Yahudi, he sawuyu, ba he
sitenga sawuyu, me no tatema wanasa ni'amoni'ö, Eheha si fagölö andrö Ibali'ö
ita ha sambua ba mboto Keriso. Ba no mo'urakha
ita moroi ba Geheha si fagölö. Botoda
andrö sa göi tenga ha sambua ndrotondroto, no oya. Na
iŵa'ö ahe: "Tenga tanga ndra'o. Börö da'ö
tenga si faböbö ba mboto ndra'odo", hadia sindruhu börö da'ö, wa tenga si
faböbö ba mboto ia? Na iŵa'ö talinga: "Me tenga hörö ndra'o, ba tenga si
faböbö ba mboto ndra'o", hadia sindruhu börö da'ö, wa tenga si faböbö ba
mboto ia? Hadia, na ha sambalö hörö mboto, ba heza
dögi dalinga? Ba na sambalö tögi dalinga, hewisa wa tola
i'ila hadia ia boto andrö? Noa sa Ifonaha ndrotondroto andrö Lowalangi, no
Ifasambua ba mboto, molo'ö somasi Ia. Na ha sambua ndrotondroto ena'ö, heza so
mboto ma'asambua? Noa sa oya ndrotondroto, ba ha sambua mboto. Börö
da'ö, tebai iŵa'ö hörö ba danga: Lö gunau khögu. Ba tebai göi iŵa'ö högö ba
gahe: Lö gunami khögu. Noa sa ifa'anö
mbotoda andrö Lowalangi, ena'ö lö fa'afabali ba mboto andrö, ba hiza, ena'ö
faoma larorogö nawöra ndrotondroto andrö. Na so zafökhö ba zi sambua ndrotondroto,
oi afökhö ba ndrotondroto fefu. Na so ndrotondroto nifosumange, oi zara omuso
dödö ndrotondroto bö'ö andrö göi. Fefu ami no boto Keriso, ba dozi ami no
ndrotondroto ba mboto andrö.- 1 Kor 12:12-21.25-27
Simanö daroma li Lowalangi.-
Sinunö
Föna Injil :
Psallite No 261 (ma
Laudate No 9)
INJIL
Turia Somuso Dödö khö Yesu Keriso nisura
Luka.-
No ato niha
sanandraigö manura si fao famöfö'ö waöwaö zi no alua ba khöda. No lasura molo'ö
fanutunö niha si no mangila samösa waöwaö zalua i'otarai mböröta, ba aefa da'ö
lafazaewe duria andrö. Ba iada'e, ya'ugö
Teofilo nifosumange, börö me no uhaogö wamareso ba uzofuzofu i'otarai mböröta,
andrö uŵa'ö tödögu, sökhi na usura göi sambua wamoturia si toföfö khöu. Ulau
zimanö, ena'ö faduhu dödöu, duhu nirongou andrö, ni'ombakha'ö khöu, wamahaö
ya'ugö. Moroi ba danö si mate mangawuli Yesu ba
danö Galilaia. Eheha Lowalangi andrö zamatörö Ya'ia, irege
tehöngö duriaNia ba danö si fasui andrö fefu. Mamahaö
Ia ba nomo wangandrö khöra, ba oi dozi niha lasuno Ia. Irugi
Nazareta, ba zebua Ia. Me luo Sabato,
molo'ö si to'ölö Ia, möi Ia ba nomo wangandrö. Ba
muzizio Ia, ba wombaso sura ni'amoni'ö. Labe'e
khöNia zura Yesaya, sama'ele'ö andrö. Ibokai zura
si no mufagaölö andrö ba isöndra ayati andre:
No so khöGu
Geheha Zo'aya, me no Ibayoini Ndra'o
ba wangombakha
turia somuso dödö soroi Lowalangi
ba niha si
numana. Ifatenge Ndra'o ba wanuriaigö fangefa'ö
ba niha
nikuru, awö wangila niha ba niha sagau'a,
ba famolala
dödö ba niha nifakao
ba
wanuriaigö döfi wa'ebua dödö andrö khö Zo'aya.
Ifuli
Igölugö zura andrö ba Ifangawuli ba zangai halöŵö, ba Ilau mudadao. Fefu niha
si so ba nomo wangandrö andrö lafaigi Ia. Ba Ibörögö fahuhuo khöra, Imane: "Ma'ökhö
andre no itörö zi so ba zura andrö, faudu sibai ba nirongomi no mege".- Luk 1:1-4;4:14-21
Simanö duria somuso dödö khö Zo'aya ya'ita,
Yesu Keriso.-
 |
| Ilustrasi membaca Kitab Suci. |
TAROMA LI LOWALANGI ANDRÖ
NO FA’AURI NIHA SAMATI
Ba wombaso si sara andre nihalö moroi ba zura Nehemia sama’ele’ö, no turia Ndraono Gizara’eli. Me no mangawuli
Ndraono Gizara’eli, soi Lowalangi andrö, moroi ba naha wanibo’ö, so khöra wa’owökhi dödö
ba Daroma Li Lowalangi. Balazi wa’owökhi dödöra andrö, lö fa’atagera, ba wamondrondrongo Taroma Li andrö. Salua ba Ndraono Gizara’eli andre, no sambua famaedo si sökhi ia khöda. Hadia simane
Iraono Gizara’eli andre göi wa’akhari
dödöda ba Daroma
Li Lowalangi andrö? Moguna aboto ba dödöda wa fa’asöndru dödö, fa’owökhi dödö ba fa’olofo ba Daroma LiNia andrö, no sambua ndrela wa
humaga
wa’aurida.
Bakha ba wombaso si dua andre, ba no famaha’ö Waulo ba niha samati ba mbanua Gorindro. Ba wamaha’önia andrö i'ombakha’ö wa Gereja andrö no orahua niha samati, si no hulö zi sambua boto nifa’anö moroi ba ngawalö ndrotondroto. Orahua niha samati andrö si lö tola lö’ö faoma
manundreheni awö, he ba ginötö wa’omuso dödö, mendrua manö na ba ginötö wa’abu dödö. Baero da’ö, ba gorahua niha samati andrö lö famaehusi
ngasi ma gana, mendrua manö na so
wamaehusi wa so gokhöta ba sinumana. Hadia
no ta’o’aurifagö zimane da’e, side’idenia, bakha ba wongambatöda?
Ba Duria Somuso Dödö andrö nisura Luka, no sambua fangombakha salua ba khö Yesu me so Ia ba nomo wangandrö. Oi ahöli höli dödö niha me larongi Ia ba wombaso Taroma Li Lowalangi
andrö, töratöra me mamaha’ö Ia. Ba wamaha’öNia mo’amakhaita ba
nösi zura Yesaya andrö, ifaduhu’ö wa no alua
da’ö fefu, me larongo sibai nösi zura andrö. Ösi zura andrö sindruhunia no lala wa’auriNia samösa. Moroi ba Duria Somuso Dödö andre göi tarongo hewisa waöwaö Yesu andrö, same’e khöda fa’ahölihöli dödö, mendrua
manö ba wanuriaigö ya’ia.
Sitölu ngawua
wombaso andre edöna idönisi ita ba
zisambua duho ya’ia wa Taroma Li Lowalangi andrö no fa’auri niha samati. Taroma Li andrö ya’ia Yesu samösa si no nifatenge nama sitobali duma duma ba niha samati. Ba niha
samati, famondrongo Taroma Li Lowalangi andrö no sambua fa’akhari dödö mane niha
sowökhi tödö ba nidanö. Baero da’ö, niha samati andrö lö toröi ha ba wamondrongo Taroma Li Lowalangi. Taroma Li
Lowalangi si no murongo andrö, mu’o’aurifagö ia ba lala wa’auri sero ma’ökhö. Ba gafuriatania,
fango’aurifagö Taroma Li andrö möi dania famosumange Lowalangi, ba famönui wa’asökhi lala wa’auri
niha gulidanö. Amen.
Nifa’anö Kat. Ingatan
Sihura, S.Ag.
Umbu:
Biro Liturgi Keuskupan Sibolga, Liturgi
Taroma Li Döfi A/B/C Buku Bacaan Untuk Upacara Hari Minggu dan Hari Raya dalam
Bahasa Nias, Gunungsitoli, Keuskupan Sibolga, 2012
Dianne Bergant, CSA & Robert J.
Karris, OFM (ed) Tafsir Alkitab Perjanjian Lama Yogyakarta
Kanisius, 2002
Dianne Bergant, CSA & Robert J.
Karris, OFM (ed) Tafsir Alkitab Perjanjian Baru Yogyakarta
Kanisius, 2002
Martin Harun, OFM, Lukas Injil
Kaum Marginal Yogyakarta: Kanisius, 2019
St. Eko Riyadi, Pr, Lukas
“Sungguh, Orang ini adalah Orang Benar!” Yogyakarta: Kanisius, 2011
.
0 comments:
Posting Komentar