TAROMA LI LOWALANGI LUO WA'ATUMBU ZO'AYA BA ZI MA’ÖKHÖ DÖFI C

Liturgi Taroma Li Döfi A/B/C hlm. 475.

FOMBASO  I

Taroma Li Lowalangi nihalö moroi ba zura Yesaya.-

Ha wa'ebua wa'omuso dödö, na tohare niha ba hili yaŵa sanuriaigö wa so wa'atulö, solohe turia somuso dödö, sangombakha wa te'orifi ita, sanguma'ö ba mbanua Yerusalema: Razo gulidanö ma'asagörö Lowalangiu andrö! No Ibörögö mamatörö. Fondrondrongo, ya'ugö Yerusalema! Mu'ao ndra sanaro andrö khöu fefu ba owuawua dödöra, börö me i'ila höröra, wa mangawuli Zo'aya ba hili Ziona, anehe ira. Mifehi'a si fao fa'omuso dödö, ya'ami adudula Yerusalema! Irara sa'ae dödö soiNia So'aya ba Ihöli ira. I'oroma'ö wa'abölö dangaNia ni'amoni'ö andrö, ba zanehe soi niha fefu. Ba la'ila wangorifi andrö si oroi khö Lowalangi dozi wondrege danö.- Yes 52:7-10

Simanö daroma li Lowalangi.-

 

Sinunö Fanema Li : Psallite No 98, 1-3 (Ant 2)      (ma Laudate No 41, 1+2)

 

FOMBASO  II

Taroma Li Lowalangi nihalö moroi ba zura ba Niha Heberai'o.-

 

Ya'ami ira ni'omasi'ö Zo'aya!

Me föna, no asese muhede Lowalangi khö ndra furugöda si fao fama'ema ndra sama'ele'ö. Ba ginötö safuria andre, muhede Ia khöda si fao fama'ema NonoNia, si no tehonogöi ba wanema fefu hadia ia tobali ondröitaNia. Si fao fama'emaNia göi wa no I'a'asogö gulidanö ma'asagörö. Ya'ia haga lakhömiNia ba famaedo wa'asoNia. Faoma taroma liNia sabölö I'a'aro'ö gölia ulidanö andre. Me no aefa ifalua wangehaogö niha moroi ba horö, dumadao Ia ba gambölö Lowalangi si lö ambö fa'abölö ba nahia fondrege zalaŵa, si no alaŵa moroi ba wetaro ndra mala'ika; simane töiNia andrö, si no Itema tobali ondröitaNia, no aröu tohude moroi ba wa'amolakhömi döira. Ha'ökhö sa ba gotalua ndra mala'ika no irai Iŵa'ö Lowalangi: "OnoGu Ndra'ugö; ma'ökhö andre no U'adonogö Ndra'ugö." Ma imane zui: "Tobali dania Ndra'o Ama khöNia; ba Ya'ia tobali Ono khöGu?" Ba me inötö Ifa'ele'ö NonoNia sia'a andrö ba gulidanö andre,

Imane zui: "Akha fefu ndra mala'ika Lowalangi mangalulu khöNia." Heb  1:1-6

Simanö daroma li Lowalangi.-

 

Sinunö Föna Injil : Psallite No 212                                  (ma Laudate No 35)

 

INJIL

Turia Somuso Dödö khö Yesu Keriso nisura Yohane.-

Ba mböröta, fatua lö mu'a'asogö gulidanö, no so Ia, si no Taroma Li andrö. Fao Ia khö Lowalangi, ba no fagölö Ia khö Lowalangi. Khö Lowalangi so Ia ba mböröta. Ba fefu hadia ia te'a'asogö si fao fama'emaNia. Sambalö lö'ö si so, si tenga khöNia mböröta. Fefu hadia ia auri börö Ia, ba Ya'ia haga ba niha fefu. Ba humaga haga andrö ba zogömigömi, ba lö ikhamö itayaigö haga andrö sogömigömi. Ya'ia, si no Taroma Li andrö, ba no haga sindruhu. Möi Ia ba gulidanö ba no so Ia ba gulidanö ba wohagaini niha fefu. He ŵa'ae te'a'asogö fefu hadia ia si fao fama'emaNia, ba lö sa'atö aboto ba dödö niha gulidanö Ia. Möi Ia ba soiNia, ba hiza, lö lafonaha Ia khöra tana khöNia. Ba ha wa'ato zamonaha Ya'ia ba samati ba döiNia, khöra Itehe tobali ono Lowalangi ira. Tobali ira ono Lowalangi, tenga börö wa tumbu ira moroi khö ninara ma börö wa'edöna nösi niha ma börö wa'edöna ndra matua, ba hiza, börö me Ibe'e khöra wa'auri si bohou Lowalangi. Ya'ia, si no Taroma Li andrö, ba no tobali ösi niha ba no I'iagö khöda. No anehega lakhömiNia, si no lakhömi Nono si ha samösa, nibe'e Nama khöNia, ba zi no a'oi oroma wa'ebua dödö Lowalangi, awö wa'aduhuNia.- Yoh 1:1-5.9-14

Simanö duria somuso dödö khö Zo'aya ya'ita, Yesu Keriso.-

 

Kandang Natal [Sumber foto: detik.com]

Erönua:

Fombaso nirongoda nihalö moroi ba zura Yesaya Sama’ele’ö ba no fehede Zo’aya ba Ndraono Gizara’eli si so ba gurunga ba Mbabilonia. No tohare ginötö ba wangawuli ba danö gamabu’ula, ba wangotomosi mangawuli banua Yerusalema, banua razo sebua, ya’ia Lowalangi. Dafao ita khö Zo’aya ba wangotomosi Gerejada ba ba wondrou’ö fa’auri nösi mbanua, ena’ö tobali ono mbanua satulö ba safönu fa’omasi.

Ösi zura andrö niha Heberai’o, ifaehagö khöda Yesu sangorifi andrö no so Ia ba gotalua niha. La odumadumaigö Ia “ono” ba “sanema ondröita”. Tobali Ia sangorifi ösi gulidanö si otarai Lowalangi. Alaŵa dadaomaNia moroi khö ndra Mala’ika. Ba hiza, no I’ide’ide’ö Ia simane niha. Börö da’ö, tekaoni ita ba wanema’ö Ya’ia ba wanga’asogö fangorifiNia ba gulidanö.

Injil göi zamotokhi ba dödöda, wa no so Keriso ba gulidanö andre i’otarai föna wanga’asogö ulidanö, ba hagaNia Ihagaini göi niha si tenga niha Keriso. Ba hiza börö wa’atumbuNia ba Mbetilekhema ba fa’amateNia awö wemaosoNia, wa oroma Daroma Li andrö khö Nama. Da’ö mbörö, wa mohare ita, niha samati. Ba da’ö göi wa te’andrö moroi khöda wolo’ö.

Fanörö tödö fa’atumbu Zo’aya ni’owasainida andre, sindruhunia idönia’ö ita wo’erönusi wa fa’atumbu Zo’aya zangabölö’ö famatida ba walukhata khö Yesu ba ba wamaduhu’ö Ya’ia si no Ono Lowalangi, simane nifaduhu’ö, “No I’oroi ba mböröta, asese sibai ba sifao ngawalö lala I’oguna’ö Lowalangi wahuhuosa khöndra furugöda sifao ira sama’ele’ö, ba hiza ba zafuria andre fahuhuo ia khöda sifao fama’ema Nono-Nia.”

Mangowasaini fa’atumbu Zo’aya idönia’ö ita wanöndra sambua lala wanga’aro’ö wamatida ya’ia wa’atobali ösi niha Lowalangi andrö. Bakha ba duria somuso dödö andrö nisura Yohane iwa’ö: “Ba mböröta ba no taroma li, taroma li andrö ba no tobali niha ba so ia ba gotaluada.” Lowalangi zanga’asogö banua siyawa awö danö ba fefu nösinia ma’afefu, ba ya’ia göi zanga’azökhi ya’ita, niha. Iada’a tobali göi ia niha ba toröi ia ba gotaluada. Bazimanö niha andrö no sambua boto niha andrö no sambua nahia fondrege zisökhi ba dödö Lowalangi. Ba da’e ta’ila wa Lowalangi andrö so ia ba mboto nawöda niha ba mboto niha fefu. Ba da’e ta’ila hewisa wa’ahatö Lowalangi ba mboto wa’aniha andrö, ni’a’azökhi-Nia sifakhilikhili khönia. Lowalangi fondrege ni’amoni’ö andrö ba no tobali ia Lowalangi sifahuwu, sahatö, sanandra lahe wa’anihada. Lowalangi andrö göi tenga ha toröi ia ba gotaluada, ba hiza ibokai wa’auri-Nia ba wangomasi’ö, auri ba mate soguna ba niha. Fahuhuo khöda Lowalangi andrö sifao fama’ema nono-Nia Yesu si no ono sawuyu situmbu andrö. Ya’ia Imanuel, awöda Lowalangi. Ba zimanö ba wa’atumbu-Nia andrö tasöndra wanötöna sibohou, fanötöna wa tasöndra wa’omuso dödö  ba fangöhöli ba wefao khö-Nia. Ya’ia andrö no haga sindruhu simöi ba gulidanöda.

Yesaya zamasugi ba dödö ba dödö ba sanuriaigö turia somuso dödö ba niha saetu fanötöna, wa “Lowalangimö andrö ba no Razo”. No ifuli so Lowalangi, tumbu ba gotalua soi andre. Börö da’ö mi’omusoi’ö dödömi, me no so Zo’aya wondrara tödö soi-Nia. No ihöli Lowalangi Yerusalema, ba no I’oroma’ö danga-Nia sabölö andrö föna fefu soi. Fe’aso Lowalangi andrö sitobali niha lo mamalö fao ia ba lala wa’aurida. Fahuhuo Lowalangi andrö sifao fama’ema Nono-Nia sihasamösa andrö. Fe’aso-Nia andrö ba no danedane wanötönada ba ziso miföna, wa börö Yesu Keriso andrö tasöndra wa’auri si lö aetu ba Zorugo.

Fa’atumbu Zo’aya zamohouni ya’ita tobali ono haga, börö me haga sindruhu no tumbu bakha ba dödöda ba ba wa’aurida, sangalaini fa’ogömigömi ba wa’aurida. Böi ta famalömalö ta’o’aurifagö haga razo wa’atulö andrö, ya’ia andrö no taromali si tobali ösi niha ba so ia ba gotaluada. Ba yaita göi ba gafuriatania tobali ita haga ba nawöda niha. Amen.

 

Nifa’anö Kat. Ingatan Sihura, S.Ag.

Umbu Wangerangera:

Biro Liturgi Keuskupan Sibolga, Liturgi Taroma Li Döfi A/B/C Buku Bacaan Untuk Upacara Hari Minggu dan Hari Raya dalam Bahasa Nias, Gunungsitoli, Keuskupan Sibolga, 2012

Dianne Bergant, CSA & Robert J. Karris, OFM (ed) Tafsir Alkitab Perjanjian Lama Yogyakarta Kanisius, 2002

Dianne Bergant, CSA & Robert J. Karris, OFM (ed) Tafsir Alkitab Perjanjian Baru Yogyakarta Kanisius, 2002

Martin Harun, OFM, Yohanes Injil Cinta Kasih Yogyakarta: Kanisius, 2015

St. Eko Riyadi, Pr, Yohanes “Firman Menjadi Manusia” Yogyakarta: Kanisius, 2011

St. Sutopanitro, Pr, Pesan-Pesan Kurban Ekaristi Hari Minggu dan Hari Raya Tahun A-B-C Jakarta: Obor, 2013

.