TAROMA LI LOWALANGI LUO MIGU SI – 25 DÖFI B

Liturgi Taroma Li Dofi A/B/C, Hlm. 422.

FOMBASO  I

Taroma Li Lowalangi nihalö moroi ba zura Wa′atuatua.-

Lamane khö nawöra niha samini tödö: Datatabigö niha satulö andrö, me no tobali samawukaisi ba si fatuwu ba halöŵöda. Ifobahulu ita wanawö oroisa ba itahigö wamahaöda. Datafaigi ua, hadia atulö niŵa'önia, ba datatandraigö hadia zalua, ba ginötö wa'amatenia dania. Na sindruhu ono Lowalangi niha satulö andrö, (molo'ö fehedenia) tatu lö zi lö Ihakhösi tödö ia Lowalangi, awö wa I'efa'ö ia ba danga zi fa'udu khönia. Datatandraigö ia, tafakao ba ta'o'aya ia. Awena ta'ila, he irugi wolo'ö awö wa'ebolo dödönia andrö. Data'etu'ö wanguhuku ya'ia, huku famunu safaito tabe'e khönia, börö me no iŵa'ö, wa lö zi lö Itolo ia Lowalangi.- Fa’at 2:12.17-20

Simanö daroma li Lowalangi.-

 

Sinunö Fanema Li : Psallite No 54 ma 3                     (ma Laudate No 7, 1-2)

 

FOMBASO  II

Taroma Li Lowalangi nihalö moroi ba zura Yakobo.-

Ya'ami ira talifusö !

Ba zi so fa'afökhö dödö ba fakhögusa, ba da'ö so göi wamakuyu awö ngawalö wolau si lö sökhi soya ngawalö. Niha si no mangokhögö fa'atuatua si otarai si yaŵa, si otarai Lowalangi, si oföna sibai khönia fa'ohauhau, ba fanete da'ö omasi mangatulö, sökhi na humede ia ba molo'ö. Fahöna khönia wa'ahakhö dödö, i'owua si sökhi. Lö i'ebua'ö dödönia zambuana ba lö mamini tödö. Duhu wa fa'asökhi andrö no bua moroi ba danömö wa'atulö nifazaewe niha somasi atulö. Heza i'otarai fefu fa'udusa ba fasosota ba gotaluami? Tenga no moroi ba wangisömi andrö si lö mo'aetufa fasöndra bakha ba mbotomi ba wanöndra fa'ohauhau dödö dali gulidanö? Mangisö ami, ba lö misöndra, andrö omasi ami mamunu. No afökhö dödömi, ba lö mikhamö hadia ia ni'aluimi. Börö da'ö fasoso ami ba fa'udu. Lö manö misöndra hadia ia, börö me lö mi'andrö khö Lowalangi. Ba he na'i no mi'andrö, ba lö sa'atö misöndra, börö me si lö sökhi gohitö dödömi, na mangandrö ami. Hadia ia ni'andrömi andrö, ba no ba wangohauhau'ö tödömi samösa.- Yak 3:16-4:3

Simanö daroma li Lowalangi.-

 

Sinunö Föna Injil : Psallite No 255                                 (ma Laudate No 7, 3)

 

INJIL

Turia Somuso Dödö khö Yesu Keriso nisura Mareko.-

Me luo da'ö, latörö danö Galilaia Yesu awö ndra nifahaöNia. Lö omasi Yesu, la'ila niha sato, heza so Ia, börö me mamahaö ira nifahaöNia Ia. Imane khöra: "Tetou'ö dania Nono Niha andrö ba danga niha, labunu Ia. Na no labunu, ba ngaluo si tölu, ifuli auri Ia." Ba lö aboto ba dödö ndra nifahaöNia niŵa'öNia andrö, ba hiza, ata'u ira wanofu khöNia. Larugi Gafanauma. Me larugi nomo, Isofu khöra: "Hadia nifadönimi ba lala mege?" Lö latema li, börö me ba lala mege fa'udu ira ba wamadöni, haniha zabölö ebua ba gotaluara. Mudadao Ia ba Ikaoni ndra nifahaö si felendrua ba Imane khöra: "Niha somasi tobali si föföna ia, lö tola lö tobali safuria ia ba tobali enoni nawönia fefu." Ihalö samösa ndraono, Ifa'aso ia ba gotaluara, Italagui nono andrö ba Imane: "Haniha zanema iraono andre börö Ndra'o, no itema Ndra'o niha andrö. Ba haniha zanema Ya'o, tenga ha Ya'o nitemania, noa göi itema Lowalangi samatenge Ya'o."  Mrk 9:30-39

Simanö duria somuso dödö khö Zo'aya ya'ita, Yesu Keriso.-

Erönua:

Rupa Anak Kecil [Sumber Foto: Dok. Pribadi]

ENONI SATULÖ

Taroma li Lowalangi nihalö moroi ba zura Wa’atuatua andre, duhu no fangoroma’ö khöda hewisa lala wa’auri niha sanörö satulö. Na tahaogö ta’osisi’ö nösi zura wa’atuatua andre, da’e no salua khö Yesu nifalua ndra niha farizai’o ba sangila amakhoita. Ba da’e göi itugu te’a’aro’ö dödöda wa niha sanörö satulö andrö asese sibai göna ia fanandraigö. Fanörö lala satulö tola tobali famakao, si lö aröu fabö’ö moroi ba lala nitörö Yesu Keriso. Ba da’e göi ta’ila wa awena aboto ba dödöda wa awena oroma zatulö andrö na so wanandraigö ba famakao. Ba zimanö lawaö ba khöda “He ana’a he suasö, na lö itörö galitö ba lö tedou wa’a’usö. Andrö oroma gana’a andrö oroma suasö, na itörö galitö tedou sibai wa’alösö.”

Ena’ö mo’ofanöwa lala wa’auri niha satulö andrö, moguna göi itete ia bua bua wa’atuatua. Fa’atuatua sindruhu zomasi mangila lala Zo’aya ba somasi mangirö’ö ngawalö nirasoi  ba nitörö ba wa’auri. Bua wa’atuatua nirongoda ba wombaso sidua andre (fa'ohauhau, omasi mangatulö, sökhi na humede ia, molo'ö, fahöna khönia wa'ahakhö dödö, lö i'ebua'ö dödönia zambuana ba lö mamini tödö), ba no göi su’asu’a ba tekhe ba wolo’ö somasi Lowalangi. Ba hiza, na so wabalisa dödö ma fayaŵasa dödö, lö tesöndra wa’auri wa’aniha Keriso ba lö molualua wangandrö niha samati. Ba da’e faudu na lawa’ö “He zo mufaigi nono alawe buruti, ha bagamuatania si sökhi, ha ba mbuabuania wamalua fa’omasi”.

Ba zitambai da’ö göi, moguna aboto ba dödöda heza i’otarai fa’udusa ba fasosota ba gotalua wa’atalifusöta? Fefu da’ö i’otarai wangisö. Heza göi i’otarai fangisö andrö? Fangisö andrö no moroi ba wa’omasi si lö mu’angenanöi ba nösi wa’aniha. Buania tenga fa’ohahau dödö, ba hiza no fa’omuso dödö ba zi ha mamö’i hörö ba nirasoi ha ba mbewe samösa.

Bakha ba Duria Somuso Dödö andre nirongoda, duhu no furugö moroi ba wombaso nirongoda ba ngaluo migu andre. Hadia da’ö fa’omasi ba we’amöi enoni si sökhi. Oya niha somasimasi mamatörö, omasi so ba dadaoma salaŵa, omasi motöi ma mufosumange, ba hiza lö omasi tefakao. Yesu zame’e famaha’ö sanandrösa ba genoni si sökhi andrö: Samösa zondrönia’ö lö tola lö’ö i’ila halöŵönia ba i’ila lala si sökhi, so wa’omasi ba nawö, afönu wangonorogö tödö lala halöwönia ba lö fakhögusa. Ba ero da’ö, i’o’awögö niha side’ide, niha nifakao, niha si toröi furi, ena’ö tedou ba to’ese wa’aurira göi.

Da’e ia wangisö mege no, ya’ia wa lö manörö sindruhu, so dödö sitobini. Ira nifaha’ö manö ba wamadönira andrö lö latörö zindruhu wangombakha khö Yesu hadia nifadönira. Andrö dania wa ibe’e khöra famaedo nono side’ide andrö Yesu. Ba ndraono andrö, siföföna sibai lagunia ya’ia wa lö khöra fawinisa. Ba zi so fawinisa, oya manö zitobini zitola ifalua. Ba hiza ba zanörö sindruhu, he afökhö, lö mamalö isöndra dania mbua sindruhu andrö. Da’e dania sambua geluaha wehede Yesu andrö sanandrösa khö-Nia. Satulö nilaunia, labe’e börö wamunu Ya’ia. Ba hiza sindruhu ba satulö andrö nilaunia, lö mamalö isöndra wa’auri si lö aetu. Amen.

Nifa’anö Kat. Ingatan Sihura, S.Ag.

 

Umbu:

Biro Liturgi Keuskupan Sibolga, Liturgi Taroma Li Döfi A/B/C Buku Bacaan Untuk Upacara Hari Minggu dan Hari Raya dalam Bahasa Nias, Gunungsitoli, Keuskupan Sibolga, 2012

Dianne Bergant, CSA & Robert J. Karris, OFM (ed) Tafsir Alkitab Perjanjian Lama Yogyakarta Kanisius, 2002

Dianne Bergant, CSA & Robert J. Karris, OFM (ed) Tafsir Alkitab Perjanjian Baru Yogyakarta Kanisius, 2002

Martin Harun, OFM, Markus Injil yang belum selesai Yogyakarta: Kanisius, 2015

St. Eko Riyadi, Pr, Markus “Engkau adalah Mesias” Yogyakarta: Kanisius, 2011