TAROMA LI LOWALANGI LUO MIGU ADVEN SI – 3 DÖFI B

Liturgi Taroma Li Döfi A/B/C, hlm. 260.

FOMBASO  I

Taroma Li Lowalangi nihalö moroi ba zura Yesaya, sama'ele'ö.-

Imane enoni Zo'aya andrö: No ahono khögu Geheha Zo'aya, Eheha Yahwe. No Ibayoini ndra'o So'aya. No Ifatenge ndra'o ba wangombakha turia somuso dödö andrö ba niha nifakao, ba wodaludaluni niha si no arasa tödö, ba wangombakha fangefa ba niha nikuru,  ba wamolala tödö ba niha nifobilagu, ba ba wanuriaigö döfi wa'ebua dödö Zo'aya. Omuso dödögu ba khö Zo'aya, owuawua dödögu khö Lowalangigu. Ifasui ndra'o faoma fangorifiNia, amaedola nukha. I'olohuni ndra'o faoma fa'atulö, amaedola mbaru sebua, simane sangowalu sangehao nibe famoadu ba högö ba simane ono nihalö si no mufangehao. Simane sa'ae tanö sauri sinanö, simane kabu ba zolöndru tanömö zinanö, simanö wa'amolöndru wa'ohahau dödöda ba fa'ebua döida Ibe'e So'aya, Yahwe, ba zanehe soi niha fefu.- Yes 61:1-2a.10-11

Simanö daroma li Lowalangi.-

 

Sinunö Fanema Li : Psallite No 154                          (ma Laudate No 16, 1-2)

 

FOMBASO  II

Taroma Li Lowalangi nihalö moroi ba zura Waulo si föföna ba niha samati ba mbanua Desalonika.-

Ya'ami ira talifusö!

Ya lö mamalö wa'omuso dödömi. Böi mibatobato wangandrö. Ba fefu hadia ia, ba mi'andrö saohagölö, me da'ö zomasi Lowalangi ba niha si no ha sambua ba khö Yesu Keriso. Böi mibunu halöŵö Geheha Lowalangi ba dödömi. Böi mi'aohasi duria ni'ombakha'öNia. Mifareso fefu hadia ia. Ba ha si sökhi mihalö khömi. Si lö sökhi, hadia ia ngawalö, böi mibabaya. Lowalangi, same'e khöda fa'ohahau dödö andrö, ya mufaulugö wangehao ya'ami, ena'ö ha khöNia manö auri ami. Ya Irorogö ami ma'afefu, he ehehami, he nosomi ba he botomi, fa lö hadöi sinegu, na so Zo'aya ya'ita, Yesu Keriso! Lö faröi Lowalangi si no mogaoni ya'ami andrö. Ba Ya'ia göi zamalua dania da'ö fefu.- 1 Tes 5:16-24

Simanö daroma li Lowalangi.-

 

Sinunö Föna Injil : Psallite No 202                               (ma Laudate No 16,3)

INJIL

Turia Somuso Dödö khö Yesu Keriso nisura Yohane.-

Me luo da'ö, tohare niha nifatenge Lowalangi, - Yohane döinia. Da'ö zi möi ba wangombakha Haga andrö ba niha, ena'ö aboto ba dödöra Haga andrö ba latema. Tenga Yohane Haga andrö, ha ba wamaduhu'ö Haga andrö wa so ia. Da'ö wamaduhu'ö Yohane: Me lafatenge khönia ndra ere awö nono Lewi, ira salaŵa niha Yahudi, banua Yerusalema, ena'ö lasofu khö Yohane: "Haniha ndra'ugö?" Ba itema lira Yohane ba i'akui wanguma'ö "Tenga Keriso andrö ndra'o!" Lamane khönia: "Na simanö, haniha ndra'ugö andre? Hadia Elia ndra'ugö?"  Imane Yohane: "Tenga!" Latohugö wanofu, lamane: "Hadia sama'ele'ö ndra'ugö andre?" Itema lira, imane: "Tenga göi!" Lamane: "Na simanö, ombakha'ö khöma, haniha ndra'ugö andre? Niha samatenge ya'aga ba da'e la'andrö wanema li ba wanofu: Hadia niŵa'öu sanandrösa ba khöu andrö?" Ihalö wanema lira Yohane moroi ba zura Yesaya, sama'ele'ö, imane: "Ya'odo andre no li niha si'ao ba danö si mate, sanguma'ö: Mifadaya lala khö Zo'aya!" Niha sanofu andre tengetenge ndra Farizai'o. Börö da'ö lasofu khö Yohane, lamane: "Hana wa öbe'e wanasa ba niha, he ŵa'ae tenga Mesia ndra'ugö, tenga Elia, tenga göi sama'ele'ö andrö?" Itema lira Yohane, imane: "Faoma idanö ube'e wanasa. Ba hiza, ba gotaluami so Ia, si lö mi'ila. Ya'ia zi tohare furigu. Ba hiza, lö sinangea na'i ndra'o we'amöi enoni samokai böbö mbadagaheNia".- Fefu da'ö alua ba Mbetania, yefo Yoridano. Ba da'ö ibe'e wanasa Yohane.- Yoh 1:6-8.19-28

Simanö duria somuso dödö khö Zo'aya ya'ita, Yesu Keriso.-

Erönua:

TOBALI SAMADUHU’Ö, BA WEHEDE AWÖ GAMUATA

Taroma li Lowalangi nihalö moroi ba zura Yesaya sama’ele’ö andrö, no turia ni’ohe zi samösa enoni. Ba we’amöinia enoni andrö, lö mamalö i’olohuni ia Eheha Ni’amoni’ö. Eheha andrö zamofa’abölö ya’ia, irege fe’amöinia enoni andrö moguna ba niha. Turia ni’ohenia andrö no turia fangomuso dödö, töratöra ba niha si no ide’ide andrö. Ba gafuriata, töinia andrö oi sökhi ba zanehe fefu niha.

Bakha ba wombaso sidua andrö, ifa’ema menemenenia rasul Faulo ba niha samati ba Desalonika. Menemene si föföna, imane: “Mi’omusoi’ö dödömi ero inötö!” Fa’omuso dödö andrö ba wamati, siföföna i’oroma’ö Faulo, hewa’ae bakha ba gurunga so ia samösa. Hiza, i’omusoi’ö dödönia, börö me i’ila fao khönia Zo’aya. Hadia faduhu dödöda, wa fao khöda Zo’aya ero inötö?

Turia Somuso Dödö andrö nisura Yohane, no sambua ofanöwa wabu’asa li ba niha nifatenge ndra farizai’o. ba wabu’asa andrö oroma wa fe’aso Yesu andrö ba gotalua niha samati. Famatenge Yohane same fanasa andrö, moguna ba wama’anö Iraono Gizara’eli ba wanema Yesu Keriso. Ba zimanö, fe’amöi Yohane andrö ya’ia ba wamokai tödöda, era’erada ba fa’aurida ba wanema’ö fe’aso Yesu Keriso andrö ba wa’aurida. Fama’anönia andrö ya’ia sifao fame’e fanasa börö wangeta horö, ba fanasa nibe’e Yesu andrö dania ya’ia ba wangefa horö ba wa’auri si lö aetu.

Sitölu ngawua wombaso andre edöna idönisi ita ba wamaduhu’ö fe’aso zangöhöli andrö ba nahia si so ya’ita zamösana. Fanuriaigö Keriso andrö si no turia somuso dödö, tenga ha ba mbewe ma ha fehede. Ba hiza, fanuriaigö Keriso andrö, ena’ö si’olohia’ö boto. Da’e nifa’ele’ö Waulo andrö bakha ba wombaso simendrua. Hewa’ae ba gurunga so ia, fa’omuso dödö wanuriaigönia turia somuso dödö andrö, lö fo’amböta. Baero da’ö, fanuriaigö turia somuso dödö andrö, böi ha ba niha si sökhi ba si so okhöta. Ba hiza, fanuriagö turia somuso dödö andrö, siföfönania ba niha sigide’ide, niha nikuru, ba niha sinumana andrö. Da’e dania tuho nifa’ema Yesaya andrö ba wombaso siföföna.

Fanasa Ni’amoni’ö nitemada andrö moroi khö Yohane, no möi börö watatema mbuala-Nia andrö ya’ia: 1) fengefa horö, 2) tesou ita  tobali ono Lowalangi ba sanema ondröita-Nia, ba 3). Lö mamalö tobali ita ndrotondroto Gereja saro. Buala andre zedöna ta’ebua’ö, töratöra ba wa’atobalida ndrotondroto Gereja andrö. Bagafuriatania, ena’ö alua fefu da’ö, lö mamalö ta’andrö Geheha Ni’amoni’ö andrö, sanoloni ya’ita ba we’amöi samaduhu’ö andrö, he ba wehede ba mendrua manö ba gamuata si’ero ma’ökhö. Amen.

Nifa'anö: Kat. Ingatan Sihura, S.Ag.

Umbu:

Dianne Bergant, CSA & Robert J. Karris, OFM (ed) Tafsir Alkitab Perjanjian Lama Yogyakarta Kanisius, 2002

Dianne Bergant, CSA & Robert J. Karris, OFM (ed) Tafsir Alkitab Perjanjian Baru Yogyakarta Kanisius, 2002

Martin Harun, OFM, Yohanes Injil Cinta Kasih Yogyakarta: Kanisius, 2019

Petrus Danan Widharsana & R.D. Victorius Rudy Hartono, Pengajaran Iman Katolik Yogyakarta: Kanisius, 2017

St. Eko Riyadi, Pr, Yohanes “Firman Menjadi Manusia” Yogyakarta: Kanisius, 2011