TAROMA LI LOWALANGI LUO MIGU ADVEN SI – 4 DÖFI B

Liturgi Taroma Li Döfi A/B/C, hlm. 263.

FOMBASO  I

Taroma Li Lowalangi nihalö moroi ba zura Zamueli, si dua.-

Me luo da'ö, me no ahono razo Dawido ba nomonia, lö'ö sa'ae ameta'uö udunia Ibe'e So'aya, fasui manö, imane razo khö zama'ele'ö andrö, Natano: "Hiza sa ba nomo eu eresi so ndra'o, ba nahia dawöla Lowalangi andrö, ba nose tufo." Imane Natano khö razo: "Faoso, lau zi so ba dödöu. Fao khöu Zo'aya." Ba hiza, ba zi bongi andrö, so niŵa'ö Zo'aya khö Natano, Imane: "Ae khö genoniGu, Dawido, ömane khönia:  Da'ö niŵa'ö Zo'aya: Hadia khöGu ölau nomo, nahiaGu? Hiza, no Uhalö ndra'ugö, me kubalo mbiribiri ndra'ugö nasa, ena'ö razo soiGu, Iraono Gizara'eli, ndra'ugö. No fao khöu Ndra'o gofu heza möi'ö ba no U'a'asogö khöu döi si falaŵalaŵa ba döi wondrege zebua ba gulidanö. No Ufonaha soiGu, Iraono Gizara'eli, ba no Utanö ira ba da'e, ena'ö la'iagö danö andre ba ena'ö lö sa'ae ata'u ira ba ena'ö lö sa'ae lafakao ira niha si lö sökhi, simane salua ba mböröta ba he göi nasa ba ginötö, me Ufataro ndra sanguhuku andrö ba soiGu, Iraono Gizara'eli. Sahono ndra'ugö göi Ube'e, Utimba nudumö fefu. Ba hiza, iada'a I'ombakha'ö khöu So'aya, wa Ya'ia zolau omo khöu. Na no irugi baŵau dania. Na no öleagö ndra'ugö ba ngai ndra tuau, awena dania Uhonogöi fangaliu ma'uwumö andrö, nga'ötöu ba U'aro'ö wa'asalaŵania. Da'ö dania zolau omo ba döiGu ba si lö tebulö dadaoma wa'asalaŵania, Ube'e, irugi zi lö aetu. Amania Ndra'o ba onoGu ia. Si lö tebulö fönaGu nga'ötöu razo, irugi zi lö aetu; dadaomania andrö, ba si lö awu'a, götögötö wa'ara."- 2 Sam 7:1-5.8b-12.14a.16

Simanö daroma li Lowalangi.-

 

Sinunö Fanema Li : Psallite No 89                                   (ma Laudate No 98)

 

FOMBASO II

Taroma Li Lowalangi nihalö moroi ba zura Waulo ba niha samati ba mbanua Roma.-

Ya'ami ira talifusö!

Data'andrö saohagölö khö Lowalangi! Khö-Nia sa wa'abölö ba wangaro'ö famatimi.  Ilau da'ö si fao fama'ema duria somuso dödö sanandrösa ba khö Yesu Keriso. No u'ombakha'ö duria andrö, molo'ö niforoma'ö Lowalangi khögu. Ya'ia ba ni'era'era dödö Lowalangi si lö irai aboto ba dödö niha me föna. Ba hiza, iada'e, börö goroisa Lowalangi si lö aetu, no teforoma'ö ni'era'era dödö andrö. ba te'ombakha'ö ba soi fefu ba zinura ndra sama'ele'ö, ena'ö fefu oi faduhu dödö ba la'o'ö li Lowalangi. Ha Ya'ia Lowalangi fondrege zatuatua. Ya'ia ni'alaŵa'ö irugi zi lö aetu ba khö Yesu Keriso. Amen.- Rom 16:25-27

Simanö daroma li Lowalangi.-

 

Sinunö Föna Injil : Psallite No 203                              (ma Laudate No 98, 3)

 

INJIL

Turia Somuso Dödö khö Yesu Keriso nisura Luka.-

Me luo da'ö, Ifatenge Lowalangi mala'ika Gaberi'eli ba mbanua Nazareta ba danö Galilaia, khö nono alawe, si no fatunanga khö ndra matua, sotöi Yosefo, nga'ötö razo Dawido. Töi nono alawe andrö, ba Maria. Möi mala'ika andrö khö Maria, imane: "Ya'ahowu Maria, ni'omasi'ö Lowalangi! Fao khöu Zo'aya." Tokea Maria ba niŵa'ö mala'ika andrö, imane dödönia: "Hadia geluaha wangowai da'ö?" Imane mala'ika andrö khönia: "Böi ata'ufi, Maria! Hiza, no falukha'ö wa'ebua dödö khö Lowalangi. Manabina ndra'ugö dania ba mo'ono, Ono matua, ba öbe'e töiNia Yesu. Solakhömi dania Ia, ba labe'e töiNia Nono Lowalangi fondrege zalaŵa. Ibe'e khöNia Lowalangi So'aya dadaoma duaNia Dawido. Ifatörö dania ndra ma'uwu Yakobo, irugi zi lö aetu. Ba si lö tebulöbulö wa'arazoNia." Imane Maria khö mala'ika andrö: "Hewisa wa tola alua zimanö? Ono alawe ndra'o." Itema linia mala'ika, imane: "Möi tou dania Geheha Ni'amoni'ö yaŵamö, ba ilumö'ö ndra'ugö fa'abölö Lowalangi fondrege zalaŵa. Da'ö mbörö, wa labe'e töi Nono si tumbu andrö Ni'amoni'ö ba Ono Lowalangi. Hiza, Elisabe andrö, talifusöu, no manabina göi, ono matua, he ŵa'ae lamane niha si lö ono ia, awö wa no atua ia. No arakhagö önö waŵania iya'e, me manabina ia. Lö'ö sa hadia ia zi tebai khö Lowalangi." Imane Maria: "Hiza, enoni Zo'aya ndra'odo andre. Ya itörö khögu niŵa'öu." Ba iröi Maria mala'ika andrö.- Luk 1:26-38

Simanö duria somuso dödö khö Zo'aya ya'ita, Yesu Keriso.-

Erönua:

“ENONI ZO’AYA NDRA’O”

Taroma li Lowalangi nihalö moroi ba zura Zamu’eli andrö, no turia we’aso Keriso samösa. Turia-Nia andrö, tebörögö ba wa’omasi razo Dawido wamesindro sambua nomo khö Lowalangi ba Yerusalema. Anehe Zo’aya ba gohitö dödö Dawido andrö, irege si fao fama’ema Natano sama’ele’ö, Ifabu’u Lowalangi gamatöröŵa si lö aetu ba nga’ötö Dawido. Amabu’ula li Lowalangi andrö awena tefatörö’ö bakha ba khö Yesu Keriso. Tobali Ia razo sagötö fa’ara, razo niforöfa. Ba tobali Ia samatörö ulidanö ma’asagörö.

Ba wombaso sidua andrö tarongo wamaduhu’ö Waulo sanandrösa ba we’aso Keriso andrö. no tobini Turia Somuso Dödö me ginötö wanuriaigö ndra sama’ele’ö. Ba hiza, Yesu si no Turia Somuso Dödö andrö, tefa’ele’ö sifao boto wa’aniha Ia ba gotalua niha gulidanö. Te’oroma’ö Ia andrö, moguna ba manandrösa ba wangorifi niha samati moroi ba huku horö fa’amate. Börö da’ö dania wa I’andrö Faulo ba niha samati ba mbanua Roma ena’ö si lö mamalö ta’andrö saohagölö ba wa’omasi Lowalangi andrö.

Bakha ba Duria Somuso Dödö andrö, so dombua ngawalö zomasi ifa’ema khöda. Siföföna ya’ia halöŵö fangorifi andrö nibörögö Lowalangi bakha ba nösi zisamösa ono alawe ba mbanua side’ide. Da’e sa halöŵö fangorifi andrö khö Lowalangi irugi iada’a. Sidua ya’ia  dadaoma Dawido. Dadaoma Dawido me föna ya’ia dadaoma wa’arazo ba wa’aniha, iada’a nahia wa’arazo Yesu andrö ya’ia röfa. Röfa andrö dania ba no tandra wa’afatö dödö ba niha si lö omasi faduhu tödö, ba tandra wa’omasi Lowalangi ba niha si faduhu tödö.

Sitölu ngawua wombaso andre, sindruhu idönia’ö niha samati ba we’amöi Yesu andrö ba gulidanö. Fe’amöi-Nia andrö ba gulidanö, tenga ba we’amö tobali razo nisuno ba nifosumange niha. Ba hiza, fe’amöi-Nia andrö no ba we’amöi enoni Lowalangi ba wangöhöli ösi gulidanö. Da’e zitobini ba niha na momöi ia sondrönia’ö ma samatörö. Oya zamatörö ma sondrönia’ö sombali’ö ya’ia salawa nizunozuno niha, ba hiza olifu ia wa ya’ia zindruhunia zimöi enoni zato. Da’e nidönia’ö Waulo andrö wangandrö saohagölö, ya’ia ea’ö so ba niha wa’atuatua we’amöi enoni andrö. Maria andrö no dumaduma ia ba we’amöi enoni andrö, lö khönia famatimba, ba famada’ö. Hewisa ita göi wanema’ö Ya’ia andrö, ba we’amö enoni? Ya Eheha Lowalangi zanoloni ya’ita. Amen.

Nifa'anö: Kat. Ingatan Sihura, S.Ag.

Umbu:

Dianne Bergant, CSA & Robert J. Karris, OFM (ed) Tafsir Alkitab Perjanjian Lama Yogyakarta Kanisius, 2002

Dianne Bergant, CSA & Robert J. Karris, OFM (ed) Tafsir Alkitab Perjanjian Baru Yogyakarta Kanisius, 2002

Martin Harun, OFM, Lukas Injil Kaum Marginal Yogyakarta: Kanisius, 2019

Petrus Danan Widharsana & R.D. Victorius Rudy Hartono, Pengajaran Iman Katolik Yogyakarta: Kanisius, 2017

St. Eko Riyadi, Pr, Lukas “Sungguh, Orang ini adalah Orang Benar!” Yogyakarta: Kanisius, 2011