Liturgi Taroma Li Döfi A/B/C, hlm. 257.
FOMBASO I
Taroma Li Lowalangi nihalö moroi ba zura Yesaya, sama'ele'ö.
Imane So'aya: "Mirara dödö, mirara dödö soiGu andrö. Mihede ba mbanua Yerusalema si göna ba dödö. Mi'ao khöra, mifarongogö, wa no awai ginötö wanguhuku andrö khöra, wa no dua winaeta latema zulö horöra fefu, nibe'e Zo'aya. Mifondrondrongo! So niha si'ao, sanguma'ö: Ba danö si mate mihaogö lala khö Zo'aya. Mifadaya ba mbenua lala khö Lowalangida. Fefu zobawa danö, mifo'ösi; fefu hili fabaya hilihili fefu, mihöndrögö. Sobu'ubu'u, mibali'ö salo'o; tanö sohilihili, mibali'ö daso. To'ele dania lakhömi Zo'aya, ba endronga la'ila dozi niha. Noa sa So'aya zanguma'ö. Ae yaŵa ba hili salaŵa, ya'ugö banua Ziona, sanuriaigö turia somuso dödö! Ebua'ö liu, ya'ugö banua Yerusalema, böi ata'u! Ömane ba mbanua Ndraono Yuda andrö: Hiza Lowalangimi! So Zo'aya, Lowalangi. No möna Ia ba Iforoma'ö wa'abölöNia. Mowaöwaö fönaNia soiNia si no Ihöli khöNia. Timba kubalo Ifasao zi tobali sulö andrö khöNia. Si no tana khöNia, I'owuloi faoma tanga sabölö. Ihagi nono mbirimbiri andrö, I'ohe ba dotoNia. Ihaogöhaogö wamasao sigelo samaenu ono."- Yes 40:1-5.9-11
Simanö daroma li Lowalangi.-
Sinunö Fanema Li : Psallite No 23 (ma Laudate No 23)
FOMBASO II
Taroma Li Lowalangi nihalö moroi ba zura Wetero si mendrua.-
Ya'ami ni'omasi'ö!
Böi ya olifu ami zi sambalö andrö: Ba wamaigi Zo'aya, no timba zi hönö fakhe zi ma'ökhö, ba timba zi ha ma'öma'ökhö zi hönö fakhe. Lö arörö dödö Zo'aya ba gamabu'ula liNia, simane niŵa'ö niha ösa. Ba hiza, ebolo dödöNia khömi, börö me lö omasi Ia tekiko samösa göi. Omasi Ia, ena'ö fefu niha mamalalini era'era moroi ba horöra. Hulö we'aso zanagö, na irugi dania luo Zo'aya andrö. Ba luo da'ö taya dania mbanua si yaŵa si fao si'ugu'ugu, ba fefu zi so ba mbanua si yaŵa ba tekiko ba wa'akhozi. Ulidanö awö nösinia fefu si taya dania. Na mi'angeraigö, wa fefu hadia ia adudu dania, hadia, tenga moguna na miforege wanörö lala satulö, sedöna Lowalangi? Ba tadönadöna hadia ia zi no Ifabu'u li Lowalangi, ya'ia mbanua si bohou ba tanö si bohou. Ba da'ö so wa'atulö irugi zi lö aetu. Andrö, ya'ami ira talifusö ni'omasi'ö, me midönadöna zimanö, mi'oigö dödömi ba wangamoni'ö fa'aurimi ba si lö sinegu fönaNia, ena'ö ba wa'atulö so ami, na tohare Ia.- 2 Fet 3:8-14
Simanö daroma li Lowalangi.-
Sinunö Föna Injil : Psallite No 201 (ma Laudate No 21)
INJIL
Turia Somuso Dödö khö Yesu Keriso nisura Mareko.-
Böröta duria somuso dödö andrö khö Yesu Keriso, Ono Lowalangi, no faudu ba niŵa'ö Lowalangi ba zura Yesaya, sama'ele'ö andrö, me imane: Hiza, Ufatenge zinengeGu, ena'ö idaridari fönaU, ba ena'ö ihaogö lala khöU. So niha si'ao ba danö si mate: "Mihaogö lala khö Zo'aya, mifadaya lala nitöröNia!" Simanö alua, me tohare Yohane same fanasa ba danö si mate: Ikaoni niha, ena'ö labohouni wa'aurira ba latema wanasa ba wangefa'ö horö. La'ondrasi ia fefu niha ba danö Yudaia ba banua Yerusalema, la'akui horöra ba latema wanasa ba nungo nidanö Yoridano moroi khönia. Nukha Yohane moroi ba guli gondra, uli zaŵi mböbö talunia. Tamo, awö ŵe ŵani ba gatua, gönia. Iŵa'ö ba niha sato: "So furigu Niha sabölö ebua moroi khögu. Tenga sinangea ndra'o we'amöi enoniNia ba wamokai böbö mbadagaheNia. Ya'o zame'e fanasa khömi faoma idanö; ya'ia dania faoma Eheha Ni'amoni'ö".- Mrk 1:1-8
Simanö duria somuso dödö khö Zo'aya ya'ita, Yesu Keriso.
 |
| Ilustrasi. Sumber Dok. Pribadi. |
Erönua:
MIHAOGÖ LALA ZO’AYA!
Bakha ba wombaso siföföna andre nihalö moroi ba zura Yesaya sama’ele’ö, ta’ila hewisa zalua ba ndraono Gizara’eli. Ngaotu fakhe föna wa’atumbu Yesu, me no adudu mbanua Yerusalema ba me no tefakiko nomo Lowalangi, ba amatöröŵa ndra razo moroi ba nga’ötö Dawido lö te’ozui. Aetu wanötöna Ndraono Gizara’eli, börö me aboto ba dödöra horö si no lafalua, irege tehuku ira. Ba hiza, Ifatenge So’aya samösa zama’ele’ö ba wondrara tödö soi-Nia awö ba wanuriaigö fe’aso-Nia. Fe’aso-Nia andrö no fondrara dödö. Andrö ba wondrara dödö andrö te’andrö khöra ena’ö lafalalini gera’erara. Famalalini andrö tefo’amaedola ia ba wamadaya lala; sobawa danö nifo’ösi; hilihili muhöndrögö; sobu’ubu’u mufalo’o; sohilihili mubali’ö daso.
Bakha ba wombasi sidua andrö, tarongo hewisa wamae’e rasul wanga’aro’ö tödö niha samati ena’ö böi tebulö ba wamati. Ato niha safatö tödö, börö me lö na mangawuli Zo’aya simane niŵa’öNia, ba ibörögö alö wehulu dödöra bakha ba wamati ba ba wa’omasi. Menemene rasul andre moguna ena’ö böi aleu niha samati bakha ba wamati ba ena’ö lö mamalö mulaŵaini zi lö sökhi, börö me ero zamösana, tola Ikaoni So’aya ero inötö. Ba zimanö, fehulu dödö ba wamalalini era’era andrö no tobali börö ndrelania.
Bakha ba Duria Somuso Dödö andrö tarongo hewisa wama’anö fe’aso Keriso andrö ba gulidanö. Ba we’amöi Zo’aya, Yesu Keriso, ba wanuriaigö amatöröŵa Lowalangi, Yohane same fanasa tefatenge ba wowaöwaö fönaNia ba wama’anö niha samati ba wanema’ö fe’aso Keriso. Fanema’ö fe’aso Zo’aya andrö, moguna mufa’anö ia sifao famalalini era’era. Da’e dania zui wa ifaduhu’ö wehede Yesaya andrö ba ngehaogö lala khö Zo’aya ba wamadala lala-Nia.
Sitölu ngawua fombaso andre, idönia’ö ita ba zi sambua tuho, ya’ia wangehao lala Zo’aya. Fangehao lala andrö, ya’ia dödö niha samati. Gereja ma’asambua, töratöra ndra sohalöŵö ba Gereja, tefataro ba wama’anö niha samati khö Lowalangi, ba wanema’ö fe’aso Keriso ba ginötö iada’a. fanema’ö Keriso andrö ena’ö si fao fangesa dödö ba era’era si bohou si faudu ba zomasi Zo’aya. Famalalini andrö tefo’amaedola ia ba wamadaya lala; sobawa danö nifo’ösi; hilihili muhöndrögö; sobu’ubu’u mufalo’o; sohilihili mubali’ö daso. Fefu lala niwa’ö andre, no tödöda, buabuada, fehededa, ba amuatada. Databohouni fefu da’ö, ena’ö sinangea ita ba wanema’ö fe’asonia andrö. Amen.
Nifa’anö Kat. Ingatan Sihura, S.Ag.
Umbu:
Dianne Bergant, CSA & Robert J. Karris, OFM (ed) Tafsir Alkitab Perjanjian Lama Yogyakarta Kanisius, 2002
Dianne Bergant, CSA & Robert J. Karris, OFM (ed) Tafsir Alkitab Perjanjian Baru Yogyakarta Kanisius, 2002
Martin Harun, OFM, Markus Injil yang Belum Selesai Yogyakarta: Kanisius, 2019
St. Eko Riyadi, Pr, Markus “Engkau adalah Mesias!” Yogyakarta: Kanisius, 2011
0 comments:
Posting Komentar