Simane sito’ölö ero röfi, tatörö tödö nifotöi inötö Adven. Ba wanörö tödö inötö adven andre, ero luo Migu, tefotandro ia sifao fanunu lilin adven si no mufa’anö ba zisambua nahia. Nahia lili andre, sito’ölönia muhaogö wama’anö ba mube’e göi khönia gabagaba simane bulu naru’u ma zauzau. Naha lili andre tefotöi ia Korona Adven.
 |
| Eluaha Korona Adven [Sumber: www.hidupkatolik.com] |
Ofanöwa Wangoguna’ö Korona Natal.
Korona adven andre no tobali ia sambua gamagama sito’ölö la’oguna’ö bakha ba Liturgi Gereja Katolik. Na ta’osisi’ö molo’ö ofanöwania, Amada Pastor Hadrian, Ketua Komili Liturgi Keuskupan Sibolga luo no, no irai idunödunö. Korona adven andre tebörögö ia moroi ba mbanua Hamburg, Jerman. Da’e sambua ndrela wangomuso dödö ba ndraono nifaeri, ena’ö omuso dödöra sagötö ginötö wa’ogömi ba fa’okasu, irugi dania ginötö wa’aukhu zino. Ero ma’ökhö, latunu sara lili, irege töra ambö, 23 rozi dania tetunu lili na irugi inötö wa’aukhu zino andrö. Ba danö Eropa, ero röfi larasoi dania ginötö wa’ogömi andrö, töra ambö 23 ngaluo.
Sito’ölö lafalua andre ba naha ndraono nifaeri, itugu ara, itugu larasoi wa sökhi geluahania. Lafalua wanunu lili andrö ba naha ndraono nifaeri ena’ö muhula omuso dödöra ba we’aso ba ginötö wa’ogömi ba lö mamalö aro wanötöna ba wogamö inötö wa’aukhu zino. Simanö göi murasoi ena’ö fanötöna adven andrö sindruhu so niha ba wehola wamati ba wombaloi we’aso zangorifi andrö ba ginötö natal. Moroi ba da’ö, Gereja I’oguna’ö wangahatö’ö andre tobali ndrotondroto wamahatö wamati ba khö ndra niha samati.
Lili Korona Natal.
So öfa rozi lili ni’oguna’ö ba korona natal andre. Lili si öfa rozi andrö, tölu rozi zobowo doru, ba sara zarakhagö oyo. Si’öfa rozi lili andre, manalahini si öfa Migu ginötö adven. Tölu rozi lili sobowo doru, tefo’eluaha ia tobali tandra wangandrö ma famoni, fangesa ma famalalini era’era, fame’e sumange, ba famalua buabua wa’omasi. Lili sarakhagö oyo andrö, tefo’eluaha tobali fa’omuso dödö. Fa’omuso dödö andrö mo.amakhaita ia wa inötö we’aso andrö, no ahatö. Da’e tefataro ia ba nahia nahete si tölu. Da’ö dania wa asese lawa’ö, wa luo migu adven sitölu andrö, no luo migu gaudete, ma lafotöi ia luo migu wa’omuso dödö.
Baero lili si öfa rozi andrö, fa’itaria göi lafaogö sara lili safusi. Lili safusi andrö no tobali tandra we’aso andrö. bazimanö, na mutunu lili safusi andrö, no irugi inötönia. Fehola lili ma holahola lili andrö göi no sambua tandra we’aso Zo’aya. Haga lili andrö no famaedo Keriso si no haga gulidanö, töratöra ba we’asonia simendrua dania.
Gabagaba ni’oguna’ö.
Ena’ö sökhi khalakhala naha korona natal andre, lö mamalö göi lafaedogö khönia gabagaba simane naru’u ma zauzau. Fame’e gabagaba simane mo’eluaha sibai. Eluaha mbulu geu sowuge’e andre, ya’ia da’ö fa’ataö ba fa’auri. Baero da’ö, naru’u andre ba danö Eropa, no sinanö sauri hewa’ae ba ninötö sokafu göi. Faehu ia moroi ba zinanö tanö bö’ö.
Tötönafö simane naru’u andrö, da’ö dötönafö sedöna mu’erönusi niha samati. Naru’u si lö mamalö auri ba ginötö wa’okafu andrö, simanö göi dötönafö ba niha samati andrö si lö mangiwa ba ginötö wanandraigö. Lö mufamalö wanötöna, lö aetu ba wamalua fa’omasi, da’ö dania wozu wanöndra Keriso andrö si no umbu wa’auri.
Nifa’anö Kat. Ingatan Sihura, S.Ag.
Umbu:
Bosco da Cunha O.Carm, Memahami Perayaan Liturgi Sepanjang Tahun Jakarta: Obor, 2011
C. H. Suryanugraha, OSC, Natal dan Paskah Perayaan Liturgis Dalam Dua Lingkaran Yogyakarta: Kanisius, 2021
Kongregasi Ibadat dan Tata Tertib Sakramen, Direktorium Tentang Kesalehan Umat Dan Liturgi Asas-Asas dan Pedoman Jakarta: Obor, 2011
http://gemaliturgi.blogspot.com/2014/11/sejarah-dan-makna-korona-adven.html
http://katolisitas-indonesia.blogspot.com/2013/12/tradisi-adven-sejarah-lingkaran-adven.html
https://ingatansihura.blogspot.com/2023/12/sejarah-dan-makna-korona-adven.html
0 comments:
Posting Komentar