Liturgi Taroma Li Döfi A/B/C, hlm. 254.
FOMBASO I
Taroma Li Lowalangi nihalö moroi ba zura Yesaya, sama'ele'ö.-
He So'aya, Ya'ugö Namama. Götögötö wa'ara döiMö: Sangorifi ya'aga. Hana wa Ötehe elungu ndra'aga, irege maröi lala andrö khöU, he So'aya? Hana wa Ötehe abe'e dödöma, fa lö i'ata'ufi Ndra'ugö? Fuli'ö, börö me enoniU ndra'aga, mado si no tana khöU! Ya Öfabali mbanua si yaŵa ba we'amöi mitou, irege humisi hili fönaU. I'otarai föna sa'ae, ba lö murongo, lö si möi ba dögi dalinga, lö irai i'ila hörö niha Lowalangi baero Ndra'ugö, solaulau si sökhi khö zanötöna khöU. Öfaondragö zomasi molau satulö awö zamatomatou lala andrö khöU. Ba hiza, no mofönu Ndra'ugö ba ya'aga zolu'i, me no faröi ndra'aga, ba te'etu'ö hukuma. Ba tobali amaedola zi ta'unö ndra'aga fefu, ba fefu mbuabuama ba no hulö nukha si no göna do. Dozi ndra'aga, ba saleu, hulö mbulu zinanö. I'oloi'ö ndra'aga lalöma andrö, timba ni'oloi'ö nangi. Samösa lö'ö sa'ae si'angaröfi li töiMö, si maoso ba wangolembai Ya'ugö. Noa sa Öbini'ö khöma Ndra'ugö ba Ölulu ndra'aga ba wa'abölö horöma. Ba hiza, Ya'ugö, he So'aya, no Ama sa'atö Ndra'ugö khöma. Tambu ndra'aga, ba Ya'ugö zamöbözi, omböila dangaU ndra'aga fefu.- Yes 63:16-17; 64:1-8
Simanö daroma li Lowalangi.-
Sinunö Fanema Li : Psallite No 80A ma 180 (ma Laudate No 21)
FOMBASO II
Taroma Li Lowalangi nihalö moroi ba zura Waulo si föföna ba niha samati ba mbanua Gorindro.-
Ya'ami ira talifusö!
Ya falukha ami wa'ebua dödö ba fa'ohahau dödö khö Namada Lowalangi, ba khö Zo'aya, Yesu Keriso. Lö mamalömalö u'andrö saohagölö khö Lowalangigu, börö me no Ibe'e khömi wa'omasiNia si fao fama'ema Keriso Yesu, me no fahöna khömi fefu hadia ia, ba khöNia andrö, he ba ngawalö huhuo, ba he ba ngawalö wa'aboto ba dödö fefu, simane si no mu'a'aro'ö ba dödömi wamaduhu'ö Keriso andrö. Tobali lö ambö ami buala fa'ebua dödö andrö fefu, hadia ia. Iada'e mibalobaloi wa'ato'ele Zo'aya ya'ita, Yesu Keriso. I'a'aro'ö göi ami irugi gamozua, fa lö sinegu ba ngaluo, na mangawuli Zo'aya ya'ita, Yesu Keriso. Lö faröi Lowalangi, si no mamakaoni'ö ya'ami ba wa'awösa khö NonoNia, Yesu Keriso, So'aya ya'ita.- 1 Kor 1:3-9
Simanö daroma li Lowalangi.-
Sinunö Föna Injil : Psallite No 200 (ma Laudate No 21, 4)
INJIL
Turia Somuso Dödö khö Yesu Keriso nisura Mareko.-
Me luo da'ö, Imane Yesu khö ndra nifahaöNia: "Taya mbanua si yaŵa dania awö danö, ba lö awu'a liGu. Ba baŵa andrö ba inötö, samösa göi lö sangila, mala'ika ba zorugo lö'ö, Ono göi lö'ö, ha Ama zangila. Andrö, böi miförö; börö me lö mi'ila ha wa'ara ginötönia. Salua andrö hulö niha sondröi omonia ba sofanö ba danö saröu, same'e ba danga ndra enoninia hadia ia khönia, samakhoi halöŵö zamösana. Ba sanaro ba mbawandruhö mangoroi ia, ena'ö lahaogö wanaro. Börö da'ö, böi miförö, lö'ö sa mi'ila ginötö we'aso zokhö omo andrö, na tanö owi ba ma na talu mbongi ba ma na miwo manu ba ma na moluo. Na tohare ia lö mudönadöna, böi ya i'ila ami no mörö. Hadia niŵa'öGu andre khömi, Uŵa'ö göi ba niha fefu : Böi miförö !".- Mrk 13:31-37
Simanö duria somuso dödö khö Zo'aya ya'ita, Yesu Keriso.
Ilustrasi Adven - I
[Sumber: Dok. Pribadi]
Erönua:
BÖI MIFÖRÖ!
Bakha ba wombaso siföföna andre nihalö moroi ba zura Yesaya sama’ele’ö, I’oroma’ö khöda ndraono Gizara’eli andrö si so ba wa’ogömigömi dödö. Bakha ba wa’ogömigömi dödö andrö, mangandrö Yesaya khö Lowalangi. Ba wangandrönia andrö, ikaoni Lowalangi andrö simane Ama. Ba da’e dania oroma wa’ahatö niha ba wangandrö andrö. Bakha ba wangandrö, Lowalangi andrö no Ama ba ndraononia. Ba zimanö, fangandrö Yesaya andrö itema Lowalangi sifao famatenge Ono-Nia.Fehede Waulo andre, sindruhu no sambua fangaro dödö ba niha samati ba mbanua Gorindro. Fangaro dödö nibe’e Waulo andre sindruhu oroma wa no fangandrö saohagölö khö Lowalangi. Ba wangandrönia saohagölö khö Lowalangi andrö, I’oroma’ö Faulo hewisa wa’ahatönia khö Lowalangi. Fogaoninia Lowalangi andrö no hulö nama. I’andrö saohagölö Faulo börö wa’omasi si no ibe’e Lowalangi ba niha samati. Fa’omasi andrö, ya’ia Yesu Keriso, ba börö Keriso andrö, lö mamalö lasöndra wa’omasi niha gulidanö. Andrö dania wa lö mamalö i’a’aro’ö dödö niha samati andrö Faulo ena’ö böi mamalö ba wamati irugi mangawuli Yesu Keriso andrö.
Bakha ba Duria Somuso Dödö andrö tarongo wehede wanguma’ö: “Böi Miförö!” fehede andre tefarongogö börö me zamösa lö sangila bawa awö ginötö. Ifo’amaedola ia ba wofanö niha sokhö omo si lö tatu ginötö wangawuli. Ba hiza, lö mamalö ifataro fefu zohalöwö khönia. Famataro zohalöwö andrö no sihulö wamataro zi samösa ama ba nomo. Na isöndra dania ama nifataronia andrö ba mbalö halöwönia ba ginötö mangawuli ia, tatu manö I’omasi’ö ia awö wa ibe’e khönia wangomuso dödö. Ba hiza silö isöndra ba mbalö halöwöna na mangawuli ia, ba lö moguna khönia genoni andrö.
Sitölu ngawua wombaso andre, sindruhu idönia’ö niha samati wo’erönusi fa’aurinia ba wamati khö Lowalangi. Ba wamati khö Lowalangi andrö, otalua niha samati ba khö Lowalangi ha ba wa’aröu wogaoni Ama. Ba wogaoni Ama andrö, lö hadöi otalua. Ama göi ba khö ndraononia, lö mamalö i’omasi’ö, ba na mosinegu, lö mamalö i'otu’ö. Ha awai zi lö ifatunö ama ba ndraononia, ha inötö andrö. Da’ö dania wa iwa’ö “böi miförö!” Famini’önia inötö andrö tenga zi lö eluaha.
Eluaha wamini’önia inötö andrö ena’ö: (1) Lö mamalö so niha samati bakha ba wama’anö si lö mo’aetufa. Fama’anö andrö ya’ia wamati. Baero da’ö, famini’ö inötö andrö, i’andrö ena’ö (2) lö mamalö so niha samati bakha ba wanötöna saro. Safuriania, famini’önia inötö andrö moguna (3) ena’ö lö mo’aetufa niha samati ba wamalua fa’omasi. Adven göi andre sino inötö wombaloi fe’aso zangöhöli andrö, moguna mufa’anö ia sifao famati, fanötöna ba fa’omasi. Amen.
Nifa’anö Kat. Ingatan Sihura, S.Ag.
Umbu:
Dianne Bergant, CSA & Robert J. Karris, OFM (ed) Tafsir Alkitab Perjanjian Lama Yogyakarta Kanisius, 2002
Dianne Bergant, CSA & Robert J. Karris, OFM (ed) Tafsir Alkitab Perjanjian Baru Yogyakarta Kanisius, 2002
Martin Harun, OFM, Markus Injil yang Belum Selesai Yogyakarta: Kanisius, 2019
St. Eko Riyadi, Pr, Markus “Engkau adalah Mesias!” Yogyakarta: Kanisius, 2011
0 comments:
Posting Komentar