OROISA NATAL KWI AWÖ PGI BA NDRÖFI 2023

“LAKHÖMI KHÖ LOWALANGI BA FA’ATULÖ BA GULIDANÖ”

(Luka 2:14)

Ilustrasi Natal
[Sumber: Dok. Pribadi]

Ya’ami ira talifusö ni’omasi’ö.

Natal no sambua fangowasaini fa’omuso dodo me edöna Lowalangi ba wamalukhaisi fefu ni’a’azökhi-Nia ba ginötö wa’atumbu Yesu Keriso. Fa’omuso dödö andrö te’oroma’ö dumadumania bakha ba zinunö ndra mala’ika awö ndra mala’ika sato andrö soroi zorugo: “Lakhömi khö Lowalangi si yawa, ba fa’atulö ba gulidanö ba niha ni’omasi’ö-Nia andrö” (Luka 2:14).

Turia somuso dödö so’amakhaita ba wa’atumbu Yesu ba mbanua Mbetilekhema no fangomuso dödö ndra kubalo. “Böi mi’ata’ufi. Hiza sa, uturiaigö khömi wa’omuso dödö sabölöbölö, sirugi niha fefu dania. Ma'ökhö andre no tumbu khömi zangorifi andrö, Keriso, So’aya, ba mbanua Dawido” (Luka 2:10-11). Ira kubalo andrö ba no niha sito’ölö manö, si so fanötöna sebua khö Mesia sitobali solohe fa’ohahau dödö.

Natal idönia’ö dozi niha samati fao bakha ba lala halöwö wangöhöli khö Lowalangi ba falukha khö Zangöhöli andrö ena’ö larasoi wa’atulö. “Yamufatörö dödömi fa’ohahau dödö andrö khö Keriso, ba nikaoni ya’ami ha sambua boto ba mi’andrö saohagölö” (Kolose 3:15). Fa’ohahau dödö (shalom) no sambua lala wa’auri satulö, si lö fasosota, ba so’ahonoa, tenga ha ba mo’amakhaita ba khö Lowalangi, ba hiza ba fo’amakhaita ba gotalua niha göi, ba fo’amakhaita ba niwöwöi tanöbö’ö ba gölia ulidanö.

Ya’ami ira talifusö ni’omasi’ö.

Fa’atumbu Yesu si tobali fozu lala wangöhöli andrö khö Lowalangi, no i'ohe wa’omuso dödö ba gotalua niha samati. Fe’aso-Nia, ibohouni wa’auri awö wa idönisi ita afu lö mamalöfao ba wangotomosi Amatöröwa Wa’omasi ba gotalua wo’amaehuta agama, gana, hada, sito’ölö ba wa’aniha, ba si sambua owuloa.

Sifao fangowasaini Natal andre, ta’ofanöi göi ginötö wama’anö ba wamalua Famili ba ndröfi 2024. Khöda ya’ita si no ono wobanua soi, tafalua wamili ira sondrönia’ö ba sitobali salahi nono wobanua. Ba gofanöwa foliti andrö si tola molohe fa’omuso dödö, tola göi I’ohe wangabu dödö, simane fatötöisa ba fa’aboto si lö mo’aetufa ba nono wobanua. Ba zimanö, si lö tola lö’ö si so fa’atuatua ba sibiha fangerangera ba wotatugöi ha niha zedöna mufili ba gotalua zoya sibai, awö wa mangelama göi moroi ba zamazaewe tanömö wamadiwa bakha ba dödö niha ena’ö lasöndra wa’amöna.

Sifao fololohe tandro wa Lowalangi zi lö tola lö’ö mufolakhömi, ba zimanö, foliti ni’odela faoma fetaro haniha ia ba nifodanedane ba gefe, lö la’oguna’ö ba gofanöwa foliti niha Keriso. Tatimbagö göi foliti ni’odanedane börö kuaso si no so ba danga, sangoguna’ö fefu hadia ia, simane fombali’ö ono mbanua tobali sanema tahi, ba mondröni tou wetaro wa’auri wa’aniha. Fa’omuso dödö natal zamehi’a dödö niha Keriso ba wefao sindruhundruhu ba wama’anö lala wa’auri soi sifao fa’asinangea ba wogamö fa’ohahau dödö sifao sato. Börö da’ö, sifao saae ita ba wanundreheni ofanöwa foliti sangofönai’ö fa’atulö ba nono wobanua si sambua soi.

Ya’ami ira talifusö ni’omasi’ö.

Lala halöwöda ba wamolakhömi Lowalangi, tefalua tenga ha ba wangotomosi amakhaita si lö nendreö ba gotalua wa’aniha, ba hiza moguna göi wangalui lala ba wondrorogö awö wamaeri gulidanö ba zifasui. Fa’omuso dödö andrö tenga ha ba niha moguna ba hiza moguna göi fefu ba niwöwöi tanö bö’ö ba ya’ita niha tekaoni ba wanga’aso wa’omuso dödö andrö ba gotalua fefu zauri.

So’amakhaita ba da’ö, Fangowasaini Natal no sinangea tobali samehi’a  ya’ita ena’ö itugu tabe’e dödöda, ta’ila ta’osisi’ö, ba barani ba wanimbagö fefu hadia ia zitobali famakiko danö ba zifasui, simane fangoguna’ö mbua danö ba zi lö wangehao mangawuli, fana’unöi ungo nidanö, tanö, angi, sombali’ö tola tekiko gofanöwa wa’auri fefu zonoso. Lala halöwö wondrorogö tanö ba zifasui andre no fogaoni ba famatenge moroi khö Lowalangi samösa soguna ba niha samati fefu (fahela 1Moze 2:15). Fa’omuso dödö ba soi fefu awena tola alua na fefu danö ni’asogö-Nia andrö terorogö. Ba zimanö da’ö, manunö dania fefu danö ba wanuno Lowalangi: "Omuso dödö mbanua si yawa ba ma'iki gulidanö, mu'ugu'ugu nasi ba ösinia andrö" (Sinunö 96:11).

Ya’ami ira talifusö ni’omasi’ö,

Ba ginötö iada’e, tedönia’ö ita ba wa molakhömi Lowalangi awö ba wamalua fa’owuawua dödö i’otarai gamagama ni’oguna’ö ba walukhata ba zato (media sosial) sifao fanuriaigö fa’asökhi, fa’atulö, fa lö ebua dödö zambua na, fa lö faröi ba nawö, ba fangobadödöi awö. Moguna sibai da’e, börö me fa’owuawua dödö ba wefao zato, tola tekiko börö duria fayafaya, ba fehede same’e afatö ma afökhö dödö niha, soya sibai zumawili ba gamagama ni’oguna’ö ba walukhata ba zato andre. Te’andrö sibai khöda ena’ö atuatua ita ba wanema’ö mendrua manö ba wombagisi turia si so.

Möi ndra kubalo ba lasöndra wa sindruhu duria andrö nitemara moroi khö ndra mala’ika, me falukha ira khö Yesu andrö si so ba luha, ba laturiaigö göi ba niha bö’ö. Natal ifasugi ba dödöda wa fahuhuosa ba falukhata ba ginötö iada’e, moguna sibai mufagamöi ena’ö tola la’oguna’ö ia sitobali ndrela ba wanuriaigö Turia Somuso Dödö. Ba ginötö wa’atedou teknologi salio sibai, sirami, ba saföli ita, lö mamalö tahalö göi ginötö ba walukhata khö Lowalangi, irege fahuhuosa ba falukhasatada khö nawöda niha, tola simöi fangomuso dödö.

Ya börö wangowasaini Natal, fefu ita tarasoi wa’omasi Lowalangi, si lö faröi mongoawögö fa’aurida. Lowalangi si lö ambö fa’omasi andrö, lö sifaröi ia khöda. Imanu'eli, awöda Lowalangi. lö irai Iröi ita, gofu hadia ia zalua (fahela Heberai’o 13:5). Ba zimanö da’ö, böi aetu ita wamolakhömi Lowalangi gofu hadia ia ndrela ni’oguna’ö ba wangotomosi fa’ohahau dödö ba gotalua wa’auri wongambatö, Gereja, ono wobanua, ba soi. Töratöra, damangandrö ita soguna wa’atulö banua si so bakha ba wasuwöta ba famakao andrö.

Bagafuriatania, ba döi Persekutuan Gereja-Gereja di Indonesia (PGI) awö Konferensi Waligereja Indonesia (KWI), ma’owai, Ya’ahowu Natal 2023 ba Ya’ahowu ndröfi sibohou 2024. Ya’ifahowu’ö Lowalangi.

 

Jakarta, 13 November 2023

Konferensi Waligereja Indonesia	Persekutuan Gereja-Gereja di Indonesia
Mgr. Antonius S. Bunjamin, OSC	Pdt. Gomar Gultom
Ketua	Ketua Umum
Mgr. Paskalis Bruno Syukur, OFM	Pdt. Jacklevyn F. Manuputty
Sekretaris Jenderal	Sekretaris Umum