Liturgi Taroma Li Döfi A/B/C, hlm. 211.
FOMBASO I
Taroma Li Lowalangi nihalö moroi ba zura Wa'atuatua.-
Mohaga wa'atuatua ba si lö amozua ia. Sangomasi'ö ba sangalui ya'ia, alio isöndra ia. Alio Iforoma'ö ia ba niha sogamögamö ya'ia. Niha si maoso ba zihulöwongi sibai ba wangalui ya'ia, lö moguna i'eregesi dödönia, me föna mbawandruhö so so ia. Famatomatou fa'atuatua andrö, ba no fa'aboto ba dödö so'ahonoa. Niha si lö mörö börö wa'atuatua andrö, alio aefa ia moroi ba wa'abu dödö. Börö me fa'atuatua samösa zanöröi ba wamalukhaisi ya'ira sinangea khönia Iforoma'ö ia khöra, gofu heza so ira ba ba ngawalö gohitö dödöra. Fa'atuatua andrö tebörögö i'oroi me so wa'edöna sindruhu ba niha ba wamomaha. Sedöna möi nifahaö, ba i'omasi'ö wa'atuatua. Mangomasi'ö, eluahania molo'ö goigoi awö goroisa. Folo'ö oroisa andrö zolohe ba wa'auri sindruhu.- Fa'at 6:12-18
Simanö daroma li Lowalangi.- Sato : Ma'andrö ...
Sinunö Fanema Li : Psallite No 63 ma 130 (ma Laudate No 20 ma 78)
FOMBASO II
Taroma Li Lowalangi nihalö moroi ba zura Waulo si föföna ba niha samati ba mbanua Desalonika.-
Ya'ami ira talifusö!
Omasiga, ena'ö aboto ba dödömi zindruhunia sanandrösa ba niha si no mate, fa böi abu dödömi, simane niha bö'ö andrö si lö fanötöna. Mamati ita, wa no mate Yesu awö wa no ifuli auri. Andrö wa mamati göi ita, wa Lowalangi dania zangorifi fefu niha si no mate samati khö Yesu, ena'ö so ira ba zi so Lowalangi. Andrö faoma mibe'e fondrara dödö nawömi daroma li andre. 1 Tes 4:13-14.18
Simanö daroma li Lowalangi.- Sato : Ma'andrö ...
Sinunö Föna Injil : Psallite No 265 (ma Laudate No 61)
INJIL
Turia Somuso Dödö khö Yesu Keriso nisura Matai'o.-
Me luo da'ö, humede Yesu khö ndra nifahaöNia, Imane: "Na tohare Nono Niha andrö dania, ba hulö gamaedola da'e: Dafulu nono alawe samaondragö sangowalu sangai fandrura, möi ira ba wamaondragö sangowalu. Dalima ba gotaluara zambö tödö ba dalima danö bö'ö zatuatua. Ono alawe sambö tödö andrö la'ohe wandru ba lö la'ohe wanikha. Ono alawe satuatua andrö la'ohe wandru awö wanikha. Ba me ara tohare zangowalu, ba manuköu ira fefu ba alau höröra. Ba zi talu mbongi, awena terongo li zi'ao: Hiza zangowalu! Mi'ae'e mifaondragö ia !" Awena maoso nono alawe andrö fefu, latunu wandrura. Lamane ono alawe sambö tödö andrö ba nono alawe satuatua: "Mibe'e fanikhama wanikhami ma'ifu, no ibörögö mate wandruma." Latema lira ono alawe satuatua: "Ma dania faoma ambö khöda wanikha. Sökhi na möi ami ba lafo, ba da'ö mi'öli khömi." Gasagasa we'amöira wowöli fanikha, tohare zangowalu. Ira ono alawe, si no tefa'anö, fao ira khö zangowalu yomo ba nomo, ba nahia walöŵa, ba lakusi mbawandruhö. Lö ara aefa da'ö, tohare göi ndra ono alawe sambö tödö no mege, lamane: "He ama, bokai khöma mbawandruhö!" Ba itema lira, imane: "Sindruhu niŵa'ögu khömi, lö u'ila haniha ami!" I'etu'ö gamaedola Yesu, Imane: "Andrö böi miförö, me lö mi'ila mbaŵa awö ginötö (we'aso Zo'aya.)!"- Mat 25:1-13
Simanö duria somuso dödö khö Zo'aya ya'ita, Yesu Keriso.-
Erönua:
MANGALUI FA’ATUATUA
Bakha ba wombaso siföföna nihalö moroi ba zura Wa’atuatua, sindruhu I’oroma’ö khöda hewisa niha si so fa’atuatua andrö. Niha si lö fa’atuatua andrö ba timba niha si tosasa fa'auri. Haniha zangalui fa'atuatua ba sangandrö, ena'ö tobali niha satuatua, na sindruhundruhu moroi ba dödönia ba ha sambalö wa itema. Fa'atuatua, ya'ia niha somasi mangi'ila goigoi wamatörö fa'auri ba solo'ö oroisa Zo'aya. Fa'atuatua zamasao ya'ia khö Lowalangi ba sanehegö khöda mamatörö si fao Lowalangi.-
Sura Waulo andrö ba Niha samati ba Desalanika no sambua fanofu niha samati sanandrösa ba lualua niha si no mate. Hadia tekiko ba hadia lö te'orifi ira, na mangawuli Zo'aya ba luo safuria? Faulo zanema li, wa ba niha si no mate andrö, lö moguna abu dödö. Fa’abu dödö andrö ha ba niha si lö famati. Ba niha si so famati, fa’amate andrö moguna ba wa’auri si lö aetu. Börö da’ö, na so zigöna fa’abu dödö, moguna labe’e wondrara dödö, ya’ia daroma li Lowalangi andrö.
Ba duria somuso dödö andrö tarongo hewisa na alua wangowalu. Fangowalu si so ba duria somuso dödö andrö, no hulö wangowalu hada khöda. Asese na so wangowalu, fangerai böwö i'oguna'ö ginötö sara, irege si fahuwu khö nono nihalö ikhamö ira fanuköu, ba so zalau hörö, irege lö lakhamö gowasa wangowalu. Simanö göi ba ginötö Yesu. Lö ta'ila hadia ginötö, na mangawuli Keriso, si no sangowalu khö Gereja, bakha ba wa'aurida samösana. Ba tola göi alau höröda bakha ba wamati ba bakha ba wa'omasi. Fa’alau hörö andre zombali’ö ya’ita hulö ndra’alawe si lö fanikha andrö.
Sitölu ngawua wombaso andre edöna idönia’ö ita ba wangalui fa’atuatua ba wamati. Fa’atuatua ba wamati andrö, siföföna sibai na faoma ta’ila manötöna khö Lowalangi, he ba wa’auri, he dania ba wa’amate. Ba wanötöna andrö si lö tola lö’ö ta’okhögö wa’atuatua si lö tegilo ba ngawalö wanandraigo. Fombalo-baloi inötö andrö, no möi sambua fangareu ba wamati. Fa’atuatua da’ö zanoloni niha ba wamalua famati ba fanötöna saro andrö. Amen.
Nifa’anö Kat. Ingatan Sihura, S.Ag.
Umbu:
Dianne Bergant, CSA & Robert J. Karris, OFM (ed) Tafsir Alkitab Perjanjian Lama Yogyakarta Kanisius, 2002
Dianne Bergant, CSA & Robert J. Karris, OFM (ed) Tafsir Alkitab Perjanjian Baru Yogyakarta Kanisius, 2002
Liturgi Taroma Li Döfi A/B/C Gunungsitoli, Keuskupan Sibolga, 2019
Martin Harun, OFM, Matius Injil Segala Bangsa Yogyakarta: Kanisius, 2019
St. Eko Riyadi, Pr, Matius “Sungguh, Ia ini adalah Anak Allah” Yogyakarta: Kanisius, 2011
0 comments:
Posting Komentar