TAROMA LI LOWALANGI LUO MIGU SITO’ÖLÖ SI – 30 DÖFI A

Liturgi Taroma Li Döfi A/B/C, hlm. 206-208.

FOMBASO I

Taroma Li Lowalangi nihalö moroi ba zura Moze, si dua.-

Da'e niŵa'ö Zo'aya: Niha si fatewu, böi mifakao ba böi mifalangögö. Böi olifu ami, wa niha si fatewu göi ami ba danö Mesirayi, me luo no. Lakha mbanua, si lö sanolo, ba iraono si lö ama si lö ina, böi mifakao. Na mifakao ira ba na mu'ao'ao ira wangandrö fanoloGu, tatu Ufondrondrongo we'aora. Awena tesao wönuGu ba Ubunu ami faoma föda nudumi. Ba tobali lakha mbanua ngambatömi ba si lö ama si lö ina ndraonomi. Na öbe'e nifalali gefe ba niha si numana, si so ba ngaimö, böi sangebua hare ndra'ugö khönia; böi mifohare khönia. Na öhalö gade mbaru sebua khö nawöu, ya öfuli khönia fatua lö aekhu luo. Awai sa gambala mbotonia, ha barunia andrö. Hadia sa'ae ibe'e ambalania, na mörö ia? Na mangaröngarö ia tanö fönaGu, Ufondrondrongo ngaröngarö dödönia, me no sahakhö tödö Ndra'odo. 2 Moz 22:21-27

Simanö daroma li Lowalangi.-                    Sato : Ma'andrö …

 

Sinunö Fanema Li : Psallite No 15                               (ma Laudate No 164)

 

FOMBASO II

Taroma Li Lowalangi nihalö moroi ba zura Waulo si föföna ba niha samati ba mbanua Desalonika.-

Ya'ami ira talifusö !

Lö olifu ami, hewisa ndra'aga ba khömi, me soga nasa ba gotaluami. Ba no tobali solo'ö khöma ami, eluaha solo'ö khö Zo'aya samösa. No mifonaha daroma li andrö; he ŵa'ae göna ami ngawalö wamakao. Ba no so khömi wa'omuso dödö nibe'e Geheha Ni'amoni'ö. Andrö no tobali famaedo ami ba niha keriso fefu, he si so ba Makedonia ba he ba Nakhaya. Moroi ba khömi sa terongo daroma li Zo'aya andrö, tenga ha ba Makedonia ba ba Nakhaya, gofu heza teturia wamatimi andrö khö Lowalangi, irege lö moguna sa'ae itörö lima. Gofu heza ladunödunö niha sanandrösa ba mbua si falawu moroi ba we'asoma ba gotaluami. Oi ladunödunö hewisa wondröimi adu andrö ba fangondrasimi Lowalangi sauri ba sindruhu ba we'amöi ngoningoniNia. Ladunödunö göi hewisa ami ba wodönadöna fa'ato'ele Nono Lowalangi andrö moroi ba zorugo, ya'ia Yesu, si no I'orifi Lowalangi mangawuli, me no mate Ia. Ya'ia göi zangorifi ya'ita moroi ba wanguhuku si so dania. 1Tes 1:5c-10

Simanö daroma li Lowalangi.-                    Sato : Ma'andrö...

 

Sinunö Föna Injil : Psallite No 267                                  (ma Laudate No 98)

 

INJIL

Turia Somuso Dödö khö Yesu Keriso nisura Matai'o.-

Me luo da'ö, so samösa ba gotalua ndra farizai'o, sangila amakhoita, ifesu li Yesu ba wanofu, imane: "He Guru, hezo goroisa sabölö ebua ba zura goroisa andrö?" Itema linia Yesu, Imane: "Omasi'ö Zo'aya, Lowalangiu, moroi si'aikö ba dödöu, si fao fa'edöna dödöu ba si fao era'erau ma'asambua. Da'ö goroisa sabölö ebua ba sabölö moguna. Oroisa si dua si fagölö andrö: Omasi'ö nawöu, simane fangomasi'öu ya'ugö. Fefu huku nibe'e Moze awö wamahaö ndra sama'ele'ö modanedane ba goroisa si dombua andrö!" Mat 22:34-40

Simanö duria somuso dödö khö Zo'aya ya'ita, Yesu Keriso.-

 

Erönua:

FANGOMASI’Ö LOWALANGI BA AWÖ

Bakha ba wombaso siföföna nihalö moroi ba zura Moze si dua, te'andrö sibai ena'ö tawu'ai ba tabohouni gera'erada. Era’era nibohouni andrö ya’ia wamakao ba famalangögö niha sifatewu. Famalangögö ba famakao, no amuata sasese tafalua; he ba wehede, ba gamuata, ba mendrua manö ba ni’era’era dödö. Niha sifatewu andrö, ya’ia niha side’ide mbosi, si lö okhöta, niha sofökhö ba tanö bö’önia. Ira niha simane da’e zasese sibai göna famakao ba famalangögö ba niha so’okhöta ba sagalawa bosi. Börö da’ö, andrö wa I’andrö ena’ö muwu'ai hada simanö, na lö’ö, tehuku ba tefakao ita. Fefu da’ö tenga börö Lowalangi ba hiza börö ita samösa.

Bakha ba wombaso sidua tarongo hewisa wamaduhu’ö Waulo sanandrösa ba mbanua niha samati si no ifobörö. Börö wanuriaigöra turia Yesu andrö, so wamalalini era’era ba niha samati andrö ba mbanua Desalonika, laröi wanömba adu. Omuso sibai dödö Waulo, me irongo ba niha, wa aro wamati niha Desalonika ba sökhi wangomasi'öra awöra faoma fatambai. Ba wa’omuso dödö Waulo andrö, itugu nasa i'a’aro’ö dödö niha samati wa, tenga zayazaya gölö wamati andrö, me isulöni dania Lowalangi ba niha samati mbua wa’erege dödöra andrö ya’ia wangeheta moroi ba wanguhuku safuria ba buala wa’auri si lö aetu.

Bakha ba duria somuso dödö tarongo hewisa wanandraigö niha farizai’o ba fanema Yesu ba wanofu warizai’o andrö. He ngaotu goroisa ba amakhoita bakha ba huku Moze, ba hiza ösi goroisa sabölö moguna ma furugunia, ha fangomasi’ö Lowalangi ba fangomasi’ö awö. Fangomasi’ö Lowalangi andrö ena’ö si’oroi ba dödö, ba fangomasi’ö awö andrö, ena’ö hulö zimane fangomasi’ö boto samösa.

Sitölu ngawua wombaso andre edöna idönia’ö ita ba wangomasi’ö Lowalangi ba fangomasi’ö awö. Ba wangomasi’ö Lowalangi andrö, ena’ö moroi si'aikö ba dödö, si fao fa'edöna dödö ba si fao era'era ma'asambua. Ba wangomasi’ö Lowalangi andrö, lö mangalui Lowalangi tanö bö’ö, simane adu ba tanöbö’önia na. Na alua zimanö da’ö, tatema dania zulö fa’auri si lö aetu, simane nifaduhu’ö Waulo megeno ba wombaso sidua.

Fangomasi’ö Lowalangi andrö ba si lö tola lö’ö te’oroma’ö ia ba wangomasi’ö awöda niha. Ba wangomasi’ö awöda niha andrö, ena’ö simane fangomasi’ö botoda samösa. Ba wangomasi’ö awö andrö, lö famakao ba lö famalangögö. Amen.

 

Nifa’anö Kat. Ingatan Sihura, S.Ag.

Umbu:

Dianne Bergant, CSA & Robert J. Karris, OFM (ed) Tafsir Alkitab Perjanjian Lama Yogyakarta Kanisius, 2002

Dianne Bergant, CSA & Robert J. Karris, OFM (ed) Tafsir Alkitab Perjanjian Baru Yogyakarta Kanisius, 2002

Liturgi Taroma Li Döfi A/B/C Gunungsitoli, Keuskupan Sibolga, 2019

Martin Harun, OFM, Matius Injil Segala Bangsa Yogyakarta: Kanisius, 2019

St. Eko Riyadi, Pr, Matius “Sungguh, Ia ini adalah Anak Allah” Yogyakarta: Kanisius, 2011