TAROMA LI LOWALANGI LUO MIGU SITO’ÖLÖ SI – 28

Liturgi Taroma Li Döfi A/B/C, hlm. 200.

FOMBASO I

Taroma Li Lowalangi nihalö moroi ba zura Yesaya, sama'ele'ö.-

Ba ngaluo si so fönada, Ilau gowasa So'aya samatörö fefu hadia ia, ba hili Ziona. Fefu soi ba gulidanö Ikaoni. Ifa'oli ngawalö gö si sökhi sibai, agu sami Ibe'e nibadu, sotawö gö, nilau uto döla, agu si no arara, nihaogö. Nukha fa'abu dödö andrö, sombalugö bawa soi fefu, Itika si sa ba da'ö, ba muko safusi, si so yaŵa soi niha fefu, Iheta So'aya. Ifakiko wa'amate, irege lö sa'ae tesöndra. So'aya Yahwe samösa zolosi taŵa hörö ba mbawa niha fefu. Awena lheta wa'aila soiNia, ya'ia wamakaora ba gulidanö ma'asagörö. Noa sa So'aya zamabu'u. Na luo da'ö dania lamane niha: Hiza Lowalangida, sabe'e dödöda wa I'orifi ita! Hiza Yahwe nidönadönada fanolo, lö Itehe aila ita! Data'owuawua'ö dödöda ba somuso tödö ita ba wangorifi andrö khöNia.- Yes 25:6-10a

Simanö daroma li Lowalangi.-                    Sato : Ma'andrö …

 

Sinunö Fanema Li : Psallite No 23                    (ma Laudate No 59 ma 105)

 

FOMBASO II

Taroma Li Lowalangi nihalö moroi ba zura Waulo ba niha samati ba mbanua Wilifi.-

Ya'ami ira talifusö!

No tola utaögö wa'anumana ba tola utema wa'afahöna. No tefamaha ndra'o, gofu hewisa ba gofu hadia ia, he sabuso ndra'odo, ba he solofo, he fahöna khögu ba he ambö. Ulaŵa da'ö fefu, börö wa'abölö andrö si no Ibe'e khögu Keriso. He ŵa'ae simanö, no mitolo ndra'odo bakha ba wamakao andrö khögu. Fefu hadia ia nilaumi andrö, no si sökhi. Lowalangigu andrö, si falawu fa'amokhö, zamönökhi fefu zoguna khömi si fao fama'ema Keriso Yesu. Ya nisuno Lowalangi, Amada, götögötö wa'ara. Amen.- Flf 4:12-14.19-20

Simanö daroma li Lowalangi.-                       Sato : Ma'andrö...

 

Sinunö Föna Injil : Psallite No 268                                (ma Laudate No 94)

 

INJIL

Turia Somuso Dödö khö Yesu Keriso nisura Matai'o.-

Me luo da'ö, Ifuli Ilau gamaedola Yesu, Imane: "Na Ibörögö mamatörö Lowalangi, no si hulö gamaedola andre: Samösa razo samalua falöŵa khö nononia. Ifatenge ndra enoninia ba wamaondragö niha nikaoni ba walöŵa andrö. Ba hiza, lö edöna möi ira. Ifuli ifatenge ndra enononi bö'ö, imane: Miŵa'ö ba niha nikaoni andrö: Hiza, no ufa'anö zoguna ba walöŵa andrö. Saŵi simatua ba saŵi sagatabö no utaba. No awai fefu hadia ia, mitabu ba walöŵa. Ba lö ba dödö nikaoni andrö. Numalö ira ba halöŵö zamösana: Si samösa möi ba nowinia, si samösa möi ba waniaga, ba tanö bö'ö lara'u ndra enoni razo andrö, laböbözi ba labunu ira. Me irongo razo da'ö, mofönu sibai ia. Ifatenge ndra saradadunia, ena'ö lafakiko niha sange'e andrö ba latunu mbanuara. Awena imane khö ndra enoninia: No te'asiwai walöŵa, ba tenga sinangea ya'ira nikaoni andrö. Mi'ae'e iada'e ba wabaIiŵa lala misa. Ba gofu ha wa'ato zi falukha khömi, mikaoni ba walöŵa andre. Mofanö ndra enoni, möi ira ba wabaliŵa lala ba la'owuloi niha si falukha ira, he niha si sökhi ba he göi niha si lö sökhi. Ba afönu nahia walöŵa andrö faoma tome si tohare. Möi razo andrö wamaigi si möi ba walöŵa. I'ila samösa ba gotalua zi möi ba walöŵa zi lö monukha nukha ba walöŵa. Isofu razo ba niha andrö: He talifusö, hewisa wa möi'ö ba da'e, lö öfake nukha ba walöŵa ? Tebai itema linia niha andrö. Imane razo khö ndra enoninia: Miböbö gahenia awö danga ba mitibo'ö ia ba nahia sogömigömi. Ba da'ö dania fege'ege ba fa'afökhö." Mat 22:1-14

Simanö duria somuso dödö khö Zo'aya ya'ita,Yesu Keriso.-

Erönua:

 FAMAKAO BA FAMA’ANÖ, NDRELA WOGAMÖ AMATÖRÖWA LOWALANGI

Fomabaso siföföna nirongoda ma'ökhö andre, tefofamaedo wangorifi andrö moroi khö Zo'aya ba zi sambua fatomesa sebua. Ba watomesa andrö tenga ha ö sami ba agu nifa'oli, ba hiza fa'abu dödö börö wa'amate, taŵa hörö moroi ba mbawa zabu tödö, ba fa'amate andrö edöna mufakiko. Ba zimanö da’ö, lö mamalö tetötöna ba niha sifao ba watomesa andrö ena’ö lö mamalö sowuawua tödö ba khö Zo’aya.

Sura Waulo andrö ba wombaso si dua, edöna ifaduhu’ö hewisa wanaögönia famakao andrö ba wolo’ö somasi Lowalangi. Ba wolo’ö somasi Lowalangi andrö, lö mamalö hulö zi so ba wa’abu dödö so ita. Faehu sibai ira na lakaoni ita wefao ba gowasa sebua, si so gö sami, solili ba fanari. Ba zimanö oroma wa abölö aro gamakhaita rasul Faulo ba khö Zo'aya, irege ba fa'afalawu ba fo'amböta zoguna ba mboto si lö sa'ae eluaha khönia, ba hiza abölö ebua dödönia ba wa'a'oi so khö Zo'aya.

Turia Somuso Dödö andrö nisura Matai’o, no famatunö wa’alua mbanua Lowalangi andrö. Amatöröwa Lowalangi andrö, no hulö zamalua fatomesa. Ato sibai niha nikaoni, ba hiza ato na sa niha si lö mangobadödöi fogaoni andrö. Baero da’ö fa’itaria nasa tesöndra niha samati si lö mama’anö. Ba zimanö dania, niha si lö mama’anö, hulö niha si lö mamake nukha we’amöi ba watomesa andrö.

Ba wangalui amatöröwa Lowalangi andrö, no hulö zimöi ba watomesa sebua. Ba watomesa andrö lö manö falukha wa’abu dödö, ha fa’omuso dödö zi falukha. Ba hiza, forasoi simanö awena alua ia na no mangawuli ita ba nomo nama ba zorugo. Sagötö wanörö ulidanö andre, moguna mama’anö nasa ita. Niha si lö nukha andrö no famaedo niha si lö mama’anö. Ba wama’anö andrö, Faulo zanga’aro’ö tödö wa ba wanaögö fa’afökhö andrö wolo’ö somasi Lowalangi no tobali ndrela ba wama’anö tödö irege sinangea saae ita we’amöi ba nomo Nama andrö ba luo safuria. Amen.

Nifa’anö Kat. Ingatan Sihura, S.Ag.

Umbu:

Dianne Bergant, CSA & Robert J. Karris, OFM (ed) Tafsir Alkitab Perjanjian Lama Yogyakarta Kanisius, 2002

Dianne Bergant, CSA & Robert J. Karris, OFM (ed) Tafsir Alkitab Perjanjian Baru Yogyakarta Kanisius, 2002

Martin Harun, OFM, Matius Injil Segala Bangsa Yogyakarta: Kanisius, 2019

St. Eko Riyadi, Pr, Matius “Sungguh, Ia ini adalah Anak Allah” Yogyakarta: Kanisius, 2011