Liturgi Döfi A/B/C, hlm. 189.
FOMBASO I
Taroma Li Lowalangi nihalö moroi ba zura Nono Zirakhi.-
Fönu awö wahö'ösa, faoma manö no sinangea ni'ogorofi. Ha manö niha si so horö zi möi amatöröŵania. Dozi haniha zanulöni si lö sökhi, Isulöni khönia So'aya. Ifonoro'ögö khönia horönia So'aya, ba lö I'efa'ö khönia. Efa'ö zala nawöu si fasala khöu, ena'ö te'efa'ö göi horöu na mangandrö'ö. Hewisa wa tola i'andrö niha khö Lowalangi wamadöhö fökhönia, na no i'irö'ö mbao dödö ba nawönia niha? Hadia tola mangandrö ia, fa te'efa'ö horönia, ba ya'ia samösa lö khönia fa'ahakhö dödö ba nawönia niha? Niha manö ia, ba itanö ba dödönia wahö'ösa. Haniha zame'e höli ba horönia dania? Törötörö tödöu lualua wa'auriu ba bato sa'ae wa'udusa. Törötörö tödöu, wa mate ndra'ugö dania ba obou ba lewatö ba böhöli watiusa dödö ba o'ö goroisa Lowalangi andrö fefu. Törötörö tödöu gamabu'ula li si no Ifabu'u Lowalangi fondrege zalaŵa khöda, ba efa'ö lalö nawöu! Aröu'ögö moroi ba wasosota, ba zimanö no ö'alösi wa'oya horöu; Börö me niha si fönutö zamobörö fa'udusa. Niha si lö sökhi zamawukaisi fahuwusa, ba samazaumba danömö wabagosa ba gotalua niha si so fahasara dödö. Sir 27:30-28:7
Simanö daroma li Lowalangi.- Sato : Ma'andrö ...
Sinunö Fanema Li : Psallite No 103 (ma Laudate No 72 ma 73)
FOMBASO II
Taroma Li Lowalangi nihalö moroi ba zura Waulo ba niha samati ba mbanua Roma.-
Ya'ami ira talifusö!
Lö samösa moroi ba gotaluada zauri ba khönia samösa. Ba lö samösa göi zimate ba khönia samösa. Tobali: Na auri ita, ba khö Zo'aya auri ita. Ba na mate ita, ba khö Zo'aya mate ita. He sauri ita, he simate ita, lö tebulöbulö tana khö Zo'aya ita. Da'ö ae mbörö, wa no mate Keriso ba no ifuli auri, ena'ö tobali Ia samatörö niha fefu, he si no mate ba he göi sauri.- Rom 14:7-9
Simanö daroma li Lowalangi.- Sato: Ma'andrö ...
Sinunö Föna Injil : Psallite No 103, 1-3 (ma Laudate No 107)
INJIL
Turia Somuso Dödö khö Yesu Keriso nisura Matai'o.-
Me luo da'ö, i'ondrasi Yesu Fetero ba isofu khöNia: "He So'aya, ha me'uga kali lö tola lö'ö u'efa'ö zala dalifusögu, na mosala ia khögu ? Hadia irugi fitu kali?" Itema liniaYesu, Imane: "Uŵa'ö khöu: Tenga ha fitu kali, hiza sa fitu ngafulu kali fitu! Börö na mamatörö Lowalangi, hulö gamaedola da'e: So samösa razo somasi mangerai fo'ömö zangai halöŵö khönia. Me ibörögö wamareso, te'ohe khönia zamösa, so'ömö si fulu ribu balaki. Me tebai ibu'a gömönia, iŵa'ö razo, akha la'amawa ia, awö wo'omonia, awö nononia, awö fefu hadia ia zi so khönia, ba wamu'a ömönia andrö. Ituhi danö sangai halöŵö andrö, mangalulu ia khö razo, imane: Bologö dödöu khögu! Ahori ubu'a wo'ömögu khöu dania. Ba ahakhö dödö razo andrö ia. Iheta fefu wo'ömö zangai halöŵö andrö. Me möi baero zangai halöŵö andrö, falukha ia nawönia sangai halöŵö. So gömö nawönia andrö khönia mato otu rufia firö. Ira'u nawönia andrö, itögi mbagi ba imane: Bu'a fefu gömöu khögu! Ituhi danö awönia sangai halöŵö andrö ba i'andrö khönia, imane: Bologö dödöu khögu! Ubu'a fefu gömögu andrö dania. Ba lö itema da'ö awönia sangai halöŵö. I'anema'ö ifakuru'ö ia, irege ibu'a gömönia fefu mena'ö. Me la'ila da'ö awönia sangai halöŵö tanö bö'ö, abu sibai dödöra. La'ondrasi razo ba la'ombakha'ö khönia zalua andrö fefu. Ifakaoni'ö niha andrö razo, imane khönia: He enoni si lö sökhi! No uheta gömöu andrö fefu, me ö'andrö khögu. Hadia, lö öhakhösi tödö göi mena'ö nawöu sangai halöŵö, simane ya'o, me no uhakhösi tödö ndra'ugö? Ba mofönu razo andrö ba ibe'e ia ba danga zamakao ba wanguhuku ya'ia, irege ibu'a gömönia khönia fefu." Ba Imane Yesu: "Simanö göi Ilau khömi dania AmaGu andrö ba zorugo, na tenga moroi ba dödömi mi'efa'ö zala, dozi ami, ba dalifusömi." Mat 18:21-35
Simanö duria somuso dödö khö Zo'aya ya'ita, Yesu Keriso.-
Erönua:
FANGEFA'Ö SALA
Bakha ba wombaso siföföna nihalö moroi ba Nono Zirakhi, sindruhu i'oroma’ö khöda hewisa mbuabuada bongi ma’ökhö. Somasi ita, ena’ö olalöŵada alio alio te'efa'ö. Na olalöwa nawöda, abua sibai wangefa’ö. Ba hiza, sinangea i'andrö khöda ba zura Nono Zirakhi andre, ena’ö ua oföna tabe’e aefa zala niha si fasala khöda, awena ta’andrö wangefa horöda. Ba zimanö dania, börö wangefa’ö sala andrö wa tatema dania wangefa ba zalada.
Ba wombaso sidua tarongo wamaduhu’ö Waulo andrö sanandrösa ba wa’aurida. Fa’aurida andre, tenga ha soguna khöda. Fa’aurida andre göi moguna ia ba nawöda niha. Yesu si no Ono Lowalangi samösa, no itehegö wa’auriNia, tenga soguna khöNia, ba hiza soguna ba niha gulidanö. Fefu lala wa’aurida ya’ita niha samati andre, ena’ö khö Lowalangi fefu da’ö. Ba zimanö, dumaduma si no ibe’e Yesu andrö, sökhi sibai na ta’o’ö.
Bakha ba Duria Somuso Dödö tarongo hewisa huhuo Yesu khö Wetero. Fanofu Wetero, ha'uga kali zi lö tola lö'ö mu'efa'ö zala niha bö'ö ba Itema li Yesu: Si lö mamalö! Da'ö geluaha: 70 kali 7. Andrö dania, inönö nasa gamaedola niha so’ömö andrö, ena’ö itugu aboto ba dödöda wa fangefa’ö sala andrö, böi ha soguna khöda. Ba hiza soguna ba nawö ia göi. Ba gafuriata te’oroma’ö khöda wa börö me lö mamalö I'efa'ö horöda Lowalangi, andrö wa lö tola lö'ö simanö göi ita, na omasi ita lö teduhö gumbu kharasi Lowalangi khöda.
Sitölu ngawua wombaso andre, tedönia’ö ba wamalua fa’omasi andrö, ya’ia wangefa’ö sala. Niha samati khö Lowalangi, no soi Lowalangi. Ba wa’atobali soi andrö, no dela ba wolo’ö oroisaNia göi. Yesu zame’e dumaduma ba wangefa’ö sala andrö. Fangefa’ö sala andrö ba tebai mu’erai, si lö mamalö wamalua ya’ia. Ba gamaedola zo’ömö andrö sindruhu oroma khöda hewisa fangefa’ö sala andrö. Moguna göi me no ihakhösi tödö ita Lowalangi moroi ba horöda, ba zimanö göi böi tafamalö wame’e aefa zala niha si fasala khöda. Amen.
Nifa’anö Kat. Ingatan Sihura, S.Ag.
Umbu:
Dianne Bergant, CSA & Robert J. Karris, OFM (ed) Tafsir Alkitab Perjanjian Lama Yogyakarta Kanisius, 2002
Dianne Bergant, CSA & Robert J. Karris, OFM (ed) Tafsir Alkitab Perjanjian Baru Yogyakarta Kanisius, 2002
Martin Harun, OFM, Matius Injil Segala Bangsa Yogyakarta: Kanisius, 2019
St. Eko Riyadi, Pr, Matius “Sungguh, Ia ini adalah Anak Allah” Yogyakarta: Kanisius, 2011
1 comments:
Tengqiuu senior...
Posting Komentar