Liturgi Taroma Li Döfi A/B/C, hlm. 191.
FOMBASO I
Taroma Li Lowalangi nihalö moroi ba zura Yesaya, sama'ele'ö.-
Mi'alui Zo'aya, fatua I'oro'ö Ia. Mi'angaröfi li Ia, fatua ahatö Ia. Niha samadamadaö khö Zo'aya, niha sanörö lala nifakhoi dödönia samösa, ya muröi lalania andrö ba ya mufuli ia khö Zo'aya. Ifuli Itema ia So'aya, me safönu fa'asökhi dödö ba fa' ahakhö dödö Ia. Imane So'aya: "FangerangeraGu tenga simane fangerangerami. LalaGu tenga simane lalami. Fa'alaŵa mbanua si yaŵa yaŵa danö wa'alaŵa lalaGu moroi ba lalami, ba simanö wa'alaŵa gera'eraGu moroi ba gera'erami."- Yes 55:6-9
Simanö daroma li Lowalangi.- Sato : Ma'andrö...
Sinunö Fanema Li : Psallite No 145, 1-3 (ma Laudate No 158)
FOMBASO II
Taroma Li Lowalangi nihalö moroi ba zura Waulo ba niha samati ba mbanua Wilifi.-
Ya'ami ira talifusö !
Somasi dödögu ba nitötönagu, ya'ia ena'ö böi falukha ndra'o wa'aila ba halöŵögu. Ba zi tambai da'ö, utötöna, ena'ö ero inötö, he göi iada'e, lö manö fa'aiwö khögu, irege fefu wa'aurigu, he sauri ndra'o ba he si mate ndra'o, Keriso nifolakhömi. Fa'auri sa khögu Keriso, ba hare khögu wa'amate. Ba na ba wa'auri ba gulidanö andre usöndra halöŵö sabölö moguna, ba lö u'ila hezo nihalögu. Tosasa wangerangeragu ba zi dua mbalö andrö: Omasido uröi gulidanö andre ba sodo khö Keriso, me da'ö zabölö sökhi. Ba abölö moguna, na so ndra'o ba da'e, soguna khömi. Soguna iada'e, ya'ia ena'ö mihaogö mbuabuami si faudu ba duria somuso dödö andrö khö Keriso.- Flf 1:20-24.27
Simanö daroma li Lowalangi.- Sato : Ma'andrö...
Sinunö Föna Injil : Psallite No 266 (ma Laudate No 23)
INJIL
Turia Somuso Dödö khö Yesu Keriso nisura Matai'o.-
Me luo da'ö, Imane Yesu khö ndra nifahaöNia: "Na mamatörö Lowalangi andrö, hulö gamaedola da'e: so samösa niha sokhö kabu nagu, sofanö sahulö wongi ba wangalui niha sohalöŵö ba kabu nagu khönia. Me no fao dödöra wame'e gazira sambua rufia firö ma'ökhö, ifatenge ira wohalöŵö ba kabu nagu khönia. Bözi siŵa mofanö zui zokhö kabu andrö, i'ila niha si lö halöŵö ba fasa. Imane khöra: Mi'ae'e mohalöŵö ba kabu nagu khögu. Ube'e zinangea gazimi. Ba möi göi ira. Bözi felendrua ba zi laluo ba bözi tölu tanö owi, möi baero zui ia ba wangalui sohalöŵö ba kabu nagunia. Ba me möi ia bözi lima, i'ila zui niha si lö halöŵö. Isofu khöra: Hana wa muzizio manö ami ma'öma'ökhö ba da'e, lö halöŵö? Lamane khönia: Lö same'e halöŵö khöma. Imane khöra: Na simanö, mi'ae'e göi mohalöŵö ba kabu nagu khögu! Me arakhagö bongi, muhede zokhö kabu nagu andrö khö mandru sohalöŵö khönia, imane: Kaoni ndra sohalöŵö andrö ba be'e gazira zamösana. Börögö ba zafuria, möi numalö ba zi föföna andrö, Tohare ndra sohalöŵö, si so me bözi lima tanö owi. Latema gazira sambua rufia firö. Tohare göi zohalöŵö i'otarai zahulö wongi. Lamane dödöra, nitemada töra moroi andrö. Ba hiza sa, tebe'e khöra sambua rufia firö göi. Me latema gefe andrö, kumökökökö ira khö zokhö kabu nagu andrö, lamane: Ha sambua za wohalöŵö zafuria andrö, ba ma'öma'ökhö mohalöŵö ndra'aga ba zino siriririri, ba hiza fagölö zinemama. Itema lira sokhö kabu andrö: He talifusö, lö nilaugu si lö sökhi khömi. Hadia, lö si fao dödömi ba wanema gazi sambua rufia firö ma'ökhö? Mihalö gazimi andre ba mi'ofanö. Nilau dödögu wame'e gazi zafuria so andrö fagölögölö ba gazimi. Hadia, tebai ufalua zomasi dödögu ba zi so khögu? Ma afökhö dödömi, na uhakhösi tödö niha bö'ö?" Itohugö Yesu wanguma'ö: "Simanö göi safuria tobali siföföna, ba siföföna tabali safuria dania."- Mat 20:1-16
Simanö duria somuso dödö khö Zo'aya ya'ita, Yesu Keriso.-
Erönua Ba Nösi Wombaso:
FAMALALINI ERA’ERA BA FOLO’Ö
Taroma Li Lowalangi nihalö moroi ba zura Yesa sama’ele’ö andre, sindruhu ibe’e khöda sambua degudegu sabe’e. Degudegu sabe’e andrö sindruhu ena’ö so wamalalini era’era fatua so nasa ginötö. Degudegu da’e modanedane ia me lala wangerangera Lowalangi andrö tenga simane lala wangerangera niha.
Sura Waulo andrö ba niha samati ba mbanua Wilifi, sindruhu wangombakha’ö hewisa dödönia ba wolo’ö khö Lowalangi andrö. Bakha ba gurunga so ia, me isura zurania ba niha samati ba Wilifi. Fe’asonia ba gurunga andrö, lö i'ila, hadia mu'efa'ö ia ma muhuku mate ia börö wanuriaigönia Taroma Li Lowalangi andrö. Ba hiza, börö wamati ba folo’önia, lö khönia fa'amangiwa dödö, me ha khö Yesu So'aya falemba wamatinia. I'ila sa So'aya hadia ia zabölö sökhi. Hatö sa sombaloi si fao fa'ebolo dödö ia.
Bakha ba Duria Somuso Dödö tarongo gamaedola Yesu andrö sanandrösa ba niha sohalöwö. No itatugöi ha’uaga mböligölö niha sohalöwö khönia, sambua rofia firö, he sohalöwö I’oroi zihulö wongi, he göi sawena mohalöwö ba zi tanö owi. No ifagölögölö dödönia wa’ahakhö dödö ba niha samati khöNia Lowalangi. lö amaehuta.
Sitölu ngawua wobaso andre edöna idönia’ö dödöda ba wamalalini era’era andrö fatua so nasa ginötö. Böi tawa’ö tödöda, so nasa ginötö. Lö lai na simane sohalöwö andrö, ta’ila ginötö wa’aekhu luo. Ba hiza inötöda zamösana khö Lowalangi andrö ba lö manö sangila. Satulö sa Lowalangi. Ba hiza, fa'atulöNia tenga simane fa'atulöda ya'ita niha. Börö me fa'atulöda asese simane niha sangerai böli gölö. Lowalangi ba no fondrege wa'ahakhö dödö, sebua tödö ba safönu fa'omasi. Ena’ö tasöndra wa’ahakhö dödö, fa’ebua dödö ba fa’omasi Lowalangi andrö, no ibe’e khöda dumaduma Faulo, ya’ia wolulu fa’auri andrö si’oroi ba dödö ba sifao famati. He simate ita, he göi sauri, lö mamalö ena’ö ba khö Lowalangi wa’aurida. Amen.
Nifa’anö Kat. Ingatan Sihura, S.Ag.
Umbu:
Biro Liturgi Keuskupan Sibolga, Liturgi Taroma Li Döfi A/B/C Buku Bacaan Untuk Upacara Hari Minggu dan Hari Raya dalam Bahasa Nias, Gunungsitoli, Keuskupan Sibolga, 2012
Dianne Bergant, CSA & Robert J. Karris, OFM (ed) Tafsir Alkitab Perjanjian Lama Yogyakarta Kanisius, 2002
Dianne Bergant, CSA & Robert J. Karris, OFM (ed) Tafsir Alkitab Perjanjian Baru Yogyakarta Kanisius, 2002
Martin Harun, OFM, Matius, Injil Segala Bangsa Yogyakarta: Kanisius, 2019
St. Eko Riyadi, Pr, Matius “Sungguh Ia Ini Adalah Anak Allah” Yogyakarta: Kanisius, 2011
0 comments:
Posting Komentar