TAROMA LI LOWALANGI LUO MIGU SITO’ÖLÖ SI - 23

Liturgi Taromali Döfi A/B/C, hlm. 186.

FOMBASO  I

Taroma Li Lowalangi nihalö moroi ba zura Hezeki'eli, sama'ele'ö.-

Da'e niŵa'ö Zo'aya: He ya'ugö, ono niha! No Ufataro ndra'ugö, tobali sanaro ba ma'uwu Gizara'eli, ena'ö Öfangelama ira. Lö tola lö'ö öfa'ema niŵa'öGu, na no örongo daroma li moroi khöGu, ena'ö aboto ba dödöra, hadia noro dödöra. Na Uwaö khöu, wa si mate samösa niha börö gamuatania si lö sökhi, ba na lö hedehedeu ba wangelama ya'ia andrö, ba si mate zebua horö andrö, börö lalönia. Ba hiza, Uhuku ndra'ugö si hulö samunu niha. Na no öfangelama niha si no mangerogö Ya'o, börö gamuatania andrö, ena'ö ifalalini gera'erania, ba na lö iböhöli gamuatania si lö sökhi, si mate sa ia, börö lalönia andrö, ba ya'ugö, ba no Ö'orifi wa'auriu.- Hez 33:7-9

Simanö daroma li Iowalangi.-              Sato : Ma'andrö ...

 

Sinunö Fanema Li : Psallite No 95,1+2+4 ma 32          (ma Laudate No 101,1-2)

 

FOMBASO  II

Taroma Li Lowalangi nihalö moroi ba zura Waulo ba niha samati ba mbanua Roma.-

Ya'ami ira talifusö !

Böi mo'ömö ami hadia ia gofu ha'ökhö, baero wa'omasi faoma fatambai. Gofu haniha zangomasi'ö awönia niha, no ifönui fefu goroisa Lowalangi. Börö me oroisa andrö: Böi ohorö! - Böi amunu niha! - Böi anagö! - Böi angisö! - ba fefu ngawalö goroisa tanö bö'ö no tefarahugö bakha ba daroma li andrö: Omasi'ö nawöu niha simane fangomasi'öu ya'ugö! Sangomasi'ö niha bö'ö, lö ilau zi lö sökhi khö nawönia niha. Andrö wa famo'ahonoa, goroisa wa'omasi andrö.- Rom 13:8-10

Simanö daroma li Lowalangi.-             Sato : Ma'andrö ...

 

Sinunö Föna Injil : Psallite No 260                           (ma Laudate No 101,3)

 

INJIL

Turia Somuso Dödö khö Yesu Keriso nisura Matai'o.-

Imane Yesu khö ndra nifahaöNia: "Na mosala khöu dalifusöu, ombakha'ö khönia zalania andrö. Lau zimanö ba zi ha darua ami! Na i'o'ö niŵa'öu, no ösöndra mangawuli dalifusöu. Ba na lö'ö, ohe zamösa tö ma darua tö nawöu. Börö me no tesura ba zura ni'amoni'ö: Dozi sangadu lö tola lö'ö darua ma datölu sasi sanga'aro'ö ya'ia. Ba na lö itema menemene niha andrö, mi'ombakha'ö ba gowuloa niha samati. Ba na lö'ö göi itema niŵa'ö gowuloa niha samati, akha hulö niha si lö Lowalangi ia ma hulö niha si lö sökhi. Amen, Uŵa'ö khömi: Hadia nitegumi ba gulidanö andre, tetegu göi ba zorugo. Ba hadia nitehegömi ba gulidanö andre, tetehegö göi ba zorugo. Ba Uŵa'ö göi khömi: Na darua ba khömi zi fao tödö ba wangandrö hadia ia ba gulidanö andre, Ibe'e khöra ni'andröra AmaGu andrö si so ba zorugo. Börö me gofu heza so darua ma datölu zowulo börö Ndra'o, so Ndra'odo ba gotaluara."- Mat 18:15-20

Simanö duria somuso dödö khö Zo'aya ya'ita, Yesu Keriso.-

 

Erönua:

FA’OMASI BA GOTALUA WA’ATALIFUSÖTA

Bakha ba wombaso siföföna andre tarongo hewisa wehede Lowalangi andrö khö Hezeki’eli sama’ele’ö. So’aya samösa zanguma’ö khö Hezeki’eli wa si lö tola lö’ö ituriaigö daroma Li Lowalangi ba ma’uwu Gizara’eli andrö. Na lö ituriaigö daroma li andrö Hezeki’eli, ba ya’ia sa’ae zimate solu’I horö ma’uwu Gizara’eli. Ba hiza na no ituriaigö daromali andrö, ba zimanö no I’orifi nosonia ba ma’uwu Gizara’eli andrö sa’ae zimate wolu’i horöra.

Famaha’ö Waulo andre ba niha samati ba mbanua Roma, no sambua famaha’ö ba wamalua fa’omasi. Na duhu i’omasi’ö nawönia niha, sisamösa niha, ba lö sa’ae khönia fohorö, fange’e ma famunu niha, fanagö, ba fangisö. Ba wamalua fa’omasi andrö, sisamösa niha moguna ua ibaya ia tödönia, hewisa na khönia lalau zimanö. Ba da’ö dania aboto ba dödö, wa fefu nifalua so’amakhaita ba wa’omasi andrö, hulö na ba mbotonia samösa ilau ia.

Bakha ba Duria Somuso Dödö andre tarongo, hewisa wehede Yesu andrö ba gotalua zi fatalifusö. Na so zifasala dalifusö, moguna ua mu’amatunösi sifao fa’omasi ba zihadarua. Ba na lö’ö, tola mu’ohe nawö, ba mu’ohe ba gangowuloa niha samati. Ba na mondrege sa’ae lö i'o’ö, ba mubali’ö ia niha si lö famati. Ba da’e sindruhunia oroma wa böi mangai ba hulu hadia ia nifalua ba gotalua wa’atalifusöta andrö. Na no mutegu ia sifao fa’asökhi, ba no abu’a gömö. Akha ya’ia samösa sa’ae zangobadödöi hadia ia danö bö’ö.

Sitölu ngawua fombaso andre, sindruhu idönia’ö ba zisambua tuho ya’ia fanuriagö fa’omasi. Fanuriaigö fa’omasi andrö, ya’ia nifo’amaedola ia hulö wanegu talifusö si so sala. Na no mutegu ia sifao fa’omasi andrö, ba olalöwania sa’ae na lö i'o’ö. Fanegu andrö ba no sambua tandra wa’omasi, me aboto ba dödöda wa tola göi tabaya ita tödöda hadia nifaluania andrö na sökhi ba na lö’ö. Fefu niha si sambua ba wamati no ifataro Lowalangi ba wanegu awönia samati. Lö möi Lowalangi ba wanegu niha sisamösamösa, ba hiza Lowalangida mbawa nawöda andrö. Da’e dania wa’omasi andrö ba gotalua wa’atalifusöta. Amen.

Nifa’anö Kat. Ingatan Sihura, S.Ag.

Umbu:

Biro Liturgi Keuskupan Sibolga, Liturgi Taroma Li Döfi A/B/C Buku Bacaan Untuk Upacara Hari Minggu dan Hari Raya dalam Bahasa Nias, Gunungsitoli, Keuskupan Sibolga, 2012

Dianne Bergant, CSA & Robert J. Karris, OFM (ed) Tafsir Alkitab Perjanjian Lama Yogyakarta Kanisius, 2002

Dianne Bergant, CSA & Robert J. Karris, OFM (ed) Tafsir Alkitab Perjanjian Baru Yogyakarta Kanisius, 2002

Martin Harun, OFM, Matius, Injil Segala Bangsa Yogyakarta: Kanisius, 2019

St. Eko Riyadi, Pr, Matius “Sungguh Ia Ini Adalah Anak Allah” Yogyakarta: Kanisius, 2011