TAROMA LI LOWALANGI LUO MIGU SITO’ÖLÖ SI - 22

Liturgi Taroma Li Döfi A/B/C, hlm 184.

FOMBASO  I

Taroma Li Lowalangi nihalö moroi ba zura Yeremia, sama'ele'ö.-

Imane sama'ele'ö andrö: "Ya'ugö, he So'aya, no Öfelungu ndra'o, ba no ube'e nifelungu ndra'odo. No Öra'udo ba no Ö'alaini ndra'o. No tobali fama'iki niha ndra'o, ero ma'ökhö. Dozi niha la'o'aya ndra'o. Ero na muhede ndra'o ba döiMö, mangaröngarödo börö zi lö atulö ba mu'ao ndra'o börö wamalangögö niha! No tobali börö wama'iki niha khögu daroma liMö, he So'aya ba börö wango'aya ya'odo, ero ma'ökhö. Ba hiza, na umane: Akha lö sa'ae ba dödögu So'aya ma lö sa'ae ufa'ema niŵa'öNia, ba tobali hulö galitö si holahola daromaliU ba dödögu bakha, si no te'u'u ba nösigu. U'eregesi tödö wanaögö ya'ia, ba tebai."- Yer 20:7-9

Simanö daroma li Lowalangi.-                    Sato : Ma'andrö ...

 

Sinunö Fanema Li : Psallite No 63 ma 17        (ma Laudate No 151 ma 88)

 

FOMBASO II

Taroma Li Lowalangi nihalö moroi ba zura Waulo ba niha samati ba mbanua Roma.-

Ya'ami ira talifusö!

No fondrege wa'asökhi Lowalangi khöda. Da'ö mbörö, wa u'andrö sibai khömi, ena'ö mifasömba'ö wa'aurimi tobali fasömbata sauri, ni'oniagö khö Lowalangi ba sangomusoi'ö tödöNia. Simanö zi lö tola lö'ö wamosumangemi Lowalangi. Böi hulö wa'auri niha gulidanö andre wa'aurimi, ba hiza: Mitehegö Ibohouni wa'aurimi ma'asambua Lowalangi, ena'ö sindruhu tehaogö ami ba ena'ö tobali ami niha si bohou fangerangera, irege tola mitimba tödömi hadia wa'edöna Lowalangi, hadia zi fatehe dödöNia, hadia zi sökhi ba hadia zo'ahonoa.- Rom 12:1-2

Simanö daroma li Lowalangi.-                    Sato : Ma'andrö ...

 

Sinunö Föna Injil : Psallite No 263                                (ma Laudate No 76)

 

INJIL

Turia Somuso Dödö khö Yesu Keriso nisura Matai'o.-

Me luo da'ö, Ibörögö Yesu wangombakha khö ndra nifahaöNia, wa lö tola lö'ö möi Ia ba Yerusalema, awö wa la'oya'ö dania wamakao Ya'ia ira satua mbanua ba ira ere sebua ba ira sangila amakhoita. Wa nibunu dania Ia, awö wa ba ngaluo si tölu ni'orifi Ia mangawuli. Isöbi Yesu khönia Fetero, ibörögö ifangelama Ia, imane: "He So'aya, ya I'aröu'ö Lowalangi da'ö. Böi ya alua zimanö khöU!" Ibali'ö Ia Yesu khö Wetero, Imane : "Ae furiGu, satana! Hana wa ötaha Ndra'o. Fangerangera niha wangerangerau, tenga fangerangera Lowalangi." Aefa da'ö, Imane Yesu khö ndra nifahaöNia: "Na so niha sedöna molo'ö Ya'o, ya mu'ositengagö wa'aurinia samösa, ya mulu'i röfania ba ya mu'o'ö Ndra'o. Niha sobelegö fa'aurinia, da'ö dania zi taya fa'auri. Ba niha sanehegö fa'aurinia khöGu, da'ö dania zanöndra fa'auri sindruhu. Hadia hare niha, na i'okhögö fefu hadia ia zi so ba gulidanö andre, ba na te'ala ia fa'aurinia sindruhu? Tatu lö harenia. Fa'auri niha tebai mube'e fangalinia hadia ia. Tohare dania Nono Niha andrö bakha ba lakhömi NamaNia, si fao ira mala'ikaNia. Awena Isulöni ba zamösana nilaunia."- Mat 16:21-27

Simanö duria somuso dödö khö Zo'aya ya'ita, Yesu Keriso.-

 

P. Rudy sedang mendaki menjuju stasi St. Faustinus Fulölö Bayo.

Erönua:

FOLO’Ö SI’OROI DÖDÖ NO SAMBUA FASÖMBATA SAMOHUA TANÖFÖNA LOWALANGI

Bakha ba wombaso siföföna, tarongo hewisa wamaduhu’ö Yeremia andrö ba we’amöinia enoni Lowalangi. Saekhu ölö ia ba wa'atobalinia sama'ele'ö ba khö Zo'aya. No Ikaoni ia So'aya tobali sama'ele'ö ba wangorifi Iraono Gizara'eli moroi ba mbaho wa'atekiko. Turia nifa’emania andrö oi latimbagö ba lafakao nasa ia. Ba hiza, börö me ba döi Lowalangi, ba ba wa'atulö,  ba lö khönia lala bö'ö ba wanimbagö fogaoni Lowalngi andrö.

Bakha ba wombaso sidua andre nihalö moroi ba zura Waulo na niha samati ba mbanua Roma, sindruhu wa fa’aurida andre no sambua fasömbata tanöföna Lowalangi. Ba wamasömba’ö boto andre, mu’oniagö ia ba simöi göi fangomuso dödö. Fasömbata ni’oniagö eluahania fasömbata si lö tola lö’ö mufasömba’ö. Ba zimanö sa dania Iwu’ai wangerangerada Lowalangi tobali bohou; ba ba wa’abohou andrö dania ta’ila tatimba ba döda heza zedöna Lowangi ba hadia ia manö zifaehe dödöNia.

Bakha ba Duria Somuso Dödö andrö tarongo, hewisa göi me I’ombakha’ö Yesu we’amöiNia ba Yerusalema andrö, irege tefakao dania Ia. Fetero si no tödö wa’aniha, itimbagö Yesu, ena’ö böi alua zimanö. Ba hiza, itugu ifangöhösi Yesu khö ndra nifaha’öNia andrö wanguma’ö: "Na so niha sedöna molo'ö Ya'o, ya mu'ositengagö wa'aurinia samösa, ya mulu'i röfania ba ya mu'o'ö Ndra'o”.

Sitölu ngawua wombaso andre, sindruhu idönia’ö ba wo’erönusi, hewisa we’amöi enoni andrö. Ba we’amöi enoni andrö, sindruhu afökhö ba akao. Hewa’ae sisökhi nituriaigö ma nifalua, ba tola manö möi fango’aya ba fanandrawaisi. Ba hiza, fe’amöi enoni andrö ena’ö simane wasömbata si no mu’oniagö ia. Mufalua ia sifao fa’ahele dödö ba folo’ö. Ba zimanö, na mangawuli Nono Niha andrö dania, itema dania zulö enoni andrö, ya’ia wa’auri si lö aetu ba ngai Nama ba zorugo. Amen.

 

Nifa’anö Kat. Ingatan Sihura, S.Ag.

Umbu:

Biro Liturgi Keuskupan Sibolga, Liturgi Taroma Li Döfi A/B/C Buku Bacaan Untuk Upacara Hari Minggu dan Hari Raya dalam Bahasa Nias, Gunungsitoli, Keuskupan Sibolga, 2012

Dianne Bergant, CSA & Robert J. Karris, OFM (ed) Tafsir Alkitab Perjanjian Lama Yogyakarta Kanisius, 2002

Dianne Bergant, CSA & Robert J. Karris, OFM (ed) Tafsir Alkitab Perjanjian Baru Yogyakarta Kanisius, 2002

Martin Harun, OFM, Matius, Injil Segala Bangsa Yogyakarta: Kanisius, 2019

St. Eko Riyadi, Pr, Matius “Sungguh Ia Ini Adalah Anak Allah” Yogyakarta: Kanisius, 2011