TAROMA LI LOWALANGI LUO MIGU SI – 21 DÖFI A

Liturgi Taroma Li Döfi A/B/C, hlm. 181.

FOMBASO I

Taroma Li Lowalangi nihalö moroi ba zura Yesaya, sama'ele'ö.-

Simane niŵa'ö Yahwe, So'aya samatörö fefu hadia ia: Labu, ae yomo ba nomo razo khö mandru andrö, Sebena, ba ömane khönia: Ya'ugö, fangaila yomo ba nomo zokhö ya'ugö. Utimba ndraugö ba naha nifataro ya'ugö andrö. Lasöbi ndra'ugö, laheta'ö ba nahau.- Na luo da'ö, Ukaoni genoniGu, Eliaki andrö, ono Hilikia. Ba Ube'e khönia mbaru sebua andrö khöu, awö mböbö talumö. Famatörömö mege, ba Ube'e ba dangania, ena'ö amaedola nama ia ba mbanua Yerusalema ba ba ma'uwu Yuda. Uhare'ö ba galisinia nono kusi mbawandruhö nomo Dawido andrö, ena'ö lö sokusi, na ibokai, - ba lö samokai, na ikusi. U'aro'ö wamatörönia, amaedola la'osö zaita ba naha saro, nahiania dania molakhömi bakha ba nomo namania.- Yes 22:19-23

Simanö daroma li Lowalangi.-                    Sato : Ma'andrö ...

 

Sinunö Fanema Li : Psallite No 138                               (ma Laudate No 90)

 

FOMBASO II

Taroma Li Lowalangi nihalö moroi ba zura Waulo ba niha samati ba mbanua Roma.-

Ya'ami ira talifusö!

Ha lö abakha wa no a'oi so khö Lowalangi. No fondrege wa'atuatua awö wangi'ilaNia. Si lö aboto ba dödö niha gangetulaNia ba si lö i'ila niha lala andrö khöNia. Haniha zangila era'era dödö Zo'aya ba haniha zi no mamolala tödöNia? Ma haniha zi no mangöhönagö fame'e khöNia hadia ia, nisulöni dania? Moroi khöNia sa fefu hadia ia, börö Ia wa so fefu hadia ia, ba ba khöNia lualua hadia ia fefu. KhöNia lakhömi götögötö wa'ara ! Amen.- Rom 11:33-36

Simanö daroma li Lowalangi.-                    Sato : Ma'andrö  …

 

Sinunö Föna Injil : Psallite No 261                     (ma Laudate No 82 ma 83)

 

INJIL

Turia Somuso Dödö khö Yesu Keriso nisura Matai'o.-

Me luo da'ö, Irugi Yesu danö ahatö mbanua Kaisaria Wilifi. Ba da'ö Isofu khö ndra nifahaöNia, Imane: "Molo'ö fanguma'ö niha, haniha Nono Niha andrö?" Latema li ira nifahaö Yesu, lamane: "So zanguma'ö Yohane same fanasa; so zanguma'ö Eliya; ba so göi zanguma'ö Yeremia ma zui samösa ba gotalua ndra sama'ele'ö." Isofu khöra Yesu: "Molo'ö ya ami, haniha Ndra'odo andre?" Itema li Simoni Fetero, imane: "Keriso Nibayoini andrö sa Ndra'ugö, Ono Lowalangi sauri." Itema linia Yesu, Imane khönia: "Tefahowu'ö ndra'ugö, Simoni ono Yona, me tenga niha zama'ele'ö khöu da'ö, no AmaGu andrö si so ba zorugo.- Ba Ya'odo göi Uwa'ö khöu: Fetero - Gowe saro ndra'ugö. Yaŵa ba dete gowe andrö Ufasindro GerejaGu andrö dania. Gowe andrö, ba tebai ni'alaini, he fa'amate, he narako. Ube'e dania khöu nono kusi gamatöröŵa Lowalangi andrö. Hadia nitenaŵau ba gulidanö, no nitenaŵa göi ba zorugo. Ba hadia ni'atulö'ö ba gulidanö, no ni'atulö'ö göi ba zorugo." Aefa da'ö Ifangelama ndra nifahaöNia, ena'ö böi la'ombakha'ö gofu ha'ökhö, wa Ya'ia Keriso.- Mat 16:13-19

Simanö duria somuso dödö khö Zo'aya ya'ita, Yesu Keriso.-

Erönua:

NORO DÖDÖ WE’AMÖI ENONI

Bakha ba wombaso siföföna andrö tarongo wama’ele’ö Yesaya andrö sanandrösa khö Zebena. Sebena, no kafalo nomo yomo ba nomo razo ba Yerusalema, sangoguna’ö kefe ba zi lö atulö ba si  lö faduhu tödö ba daroma li Zo'aya. Andrö dania wa edöna muheta ia ba dadaomania andrö ba mu’angali’ö ia niha bö'ö. Ono kusi sebua nihare'ö yaŵa ba galisi niha, no tandra wamatörö, ba hiza fonoro-halöŵö göi. Andrö ba lala halöwö andrö si no tetou’ö ba zi samösamösa, moguna sibai murorogö ba mufalua ia sifao fa’asinangea.

Faulo, bakha ba wombaso sidua andre, si fao fanuno isuno Lowalangi börö wa’atuatuaNia. No latimbagö Yesu ira niha Yahudi ba laforöfa Ia, irege fefu soi ba gulidanö ma'asagörö lasalahini ira ba wanema fangorifi andrö moroi ba röfa Keriso. Me i'erönusi da'ö rasul Faulo, aboto ba dödönia wa Yesu andrö no fa’atuatua Lowalangi sasmösa. Lö ikhamö tödö niha wa’itehe mate nononia andrö, börö wangöhöli soi niha nifilinia. Da’e dania wa somuso tödö ita niha samati si no tehöli andrö.

Bakha ba duria somuso dödö tarongo hewisa Zimoni ono Yona, samösa nifahaö Yesu nibe'eNia töi Kefa, Fetero (ba li Yunani), eluahania gowe ma hoi. Famati khö Yesu Keriso, Ono Lowalangi no möi börö wango'onorogö tödö Gereja. Halöŵö Zimoni andrö lö mamalö terorogö bakha ba Gereja Katolik. Fondrorogö lala halöwö andrö, ba no sambua ndrela ba wangebua’ö amatöröwa Lowalangi.

Ösi zi tölu ngawua wombaso andre edöna idönia’ö ita ba noro dödö we’amöi enoni. Ba we’amöi enoni Lowalangi andrö, siföföna ena’ö lö mamalö mu’okhögö wamati saro ba khö Lowalangi. Famati saro andrö mowua ia ba wehulu dödö ba we’amöi enoni andrö. Ba gafuriatania, famati saro andrö, no tobali ia famolakhömi Lowalangi. Moguna mu’erönusi ba lala wa’auri si’ero ma’ökhö: hadia fe’amöida enoni Lowalangi andrö, no so khöda wamati saro? Ba na no ta’okhögö ia, ba hadia no mowua ia ba wamolakhömi Lowalangi? Ya lö mamalö itolo ita Eheha-Nia ba we’amöi enoni-Nia. Amin.

Nifa’anö Kat. Ingatan Sihura, S.Ag.

Umbu:

Dianne Bergant, CSA & Robert J. Karris, OFM (ed) Tafsir Alkitab Perjanjian Lama Yogyakarta Kanisius, 2002

Dianne Bergant, CSA & Robert J. Karris, OFM (ed) Tafsir Alkitab Perjanjian Baru Yogyakarta Kanisius, 2002

Martin Harun, OFM, Matius Injil Segala Bangsa Yogyakarta: Kanisius, 2019

St. Eko Riyadi, Pr, Matius “Sungguh, Ia ini adalah Anak Allah” Yogyakarta: Kanisius, 2011