TAROMA LI LOWALANGI BA WANÖRÖ TÖDÖ NGALUO KEMERDEKAAN SOI INDONESIA

Liturgi Taromali Döfi A/B/C, hlm. 237.

Bacaan I: Sirakh 10:1-8.

Bacaan II: 1Petrus 2:13-17.

Injil: Matius 17:24-27.

Ilustrasi [Sumber Foto: SesawiNet].

NIHA SAMATI NO NIHA SOLO’Ö

Bakha ba zura Zirakhi tarongo hadia sindruhunia lala halöwö zondrönia’ö wobanua. Ömö zondrönia’ö banua ya’ia ba wamaigi lala ena’ö sökhi lala wa’auri nono wobanua. Ba hiza, asese sibai; ha börö wayawasa, börö watiusa dödö, börö wangisö kefe, lafalua lala halöwö si lö atulö. Ba wamalua lala halöwö si lö atulö andrö, no möi börö wa’aheta ba dangara lala halöwö andrö.

Ba zura wetero göi tarongo, hewisa sindruhunia mbua wamati niha Keriso andrö. Sambua mbua wamati niha Kersio andrö ba ya’ia wolo’ö. Niha samati ba khö Keriso, I’o’ö wehede ba famarou Keriso samösa. Ba zimanö göi ifowua wamatinia niha Keriso andrö ya’ia ba wolo’ö li zamatörö ba wobanua andrö. Moguna tatögöni wa niha si no tana khö Keriso, lö mamalö so khönia wamosumange awönia niha, töratöra zololohe ya’ia ba wobanua.

Bakha ba Duria Somuso Dödö andrö, ifaha’ö ita Yesu samösa ba wolo’ö oroisa zamatörö andrö. Ifo’amaedola ba wamu’a be’elö andrö. Niha saboto ba dödö wa ya’ia ono mbanua zamatörö, lö mamalö ibu’a mbe’elönia ba zamatörö ya’ia. Ba zimanö, ba wame’e be’elö andrö, duhu te’oroma’ö wa niha si so fa’aboto ba dödö ita.

Fanörö tödö luo wa’aheta ita moroi ba mbawa zangosawuyu soi Indonesia andre, no sambua lala halöwö nifalua zamatörö soi Indonesia andre. Ba zimanö ya’ita ono wobanua mo’ömö göi ita ba wangoroma’ö famatida. Famati si no tatema moroi khö Keriso andrö si lö tola lö’ö ta’oroma’ö ia ba wolo’öda fareta zamatörö andrö.

Amada Uskup Albertus Sugiyo Pranoto zi no irai mondrönia’ö ya’ita wanguma’ö: “Ya’ita andre 100 % niha Katolik, ba 100 % göi ono wobanua soi Indonesia”. Fehedenia andre sindruhu mondrönia’ö ya’ita wa ya’ita niha Katolik, niha samati andrö, böi so khöda wamabörö we’amöida göi ono wobanua.

Ba gafuriata, ya’ita niha samati mo’ömö ita ena’ö lö mamalö sifahulötö ita ba wolo’ö fareta zamatörö andrö. Böi ha ta’ila tawa’ö hadia zoguna khöda. Ba hiza ena’ö göi sifahulötö ita ba wolo’ö oroisa andrö. Ba zimanö oroma dania ita wa ya’ita andrö no niha samati si no tehöli; niha samati si no aefa moroi barö mbawa wangosawuyu. Merdeka!

Nifa’anö Kat. Ingatan Sihura, S.Ag.

Umbu:

Dianne Bergant, CSA & Robert J. Karris, OFM (ed) Tafsir Alkitab Perjanjian Lama Yogyakarta Kanisius, 2002

Dianne Bergant, CSA & Robert J. Karris, OFM (ed) Tafsir Alkitab Perjanjian Baru Yogyakarta Kanisius, 2002

Martin Harun, OFM, Matius Injil Segala Bangsa Yogyakarta: Kanisius, 2019

St. Eko Riyadi, Pr, Matius “Sungguh, Ia ini adalah Anak Allah” Yogyakarta: Kanisius, 2011