TAROMA LI LOWALANGI LUO MIGU SI-20 DÖFI A

Liturgi Taroma Li Döfi A/B/C, hlm. 179.

FOMBASO I

Taroma Li Lowalangi nihalö moroi ba zura Yesaya, sama'ele'ö.-

Da'e niŵa'ö Zo'aya: Mitörö lala sindruhu ba mi'olembai wa'atulö. Awena Ufa'ema khömi wangorifi andrö si no Ufabu'u. Na so niha sifatewu, si olembai Ya'odo, So'aya, sangomasi'ö töiGu ba si möi enoniGu; niha sangamoni'ö luo wolombase ba si lö mamöhöi fawu'usa liGu, Ufasao ba hili ni'amoni'ö andrö khöGu ba Ube'e khöra wa'omuso dödö ba nomo wangandrö andrö khöGu. Itema sa'ae tödöGu wasömbata nitunura ba fasömbata nitabara ba naha wame'e fasömbata andrö khöGu. Me omoGu tetötöi omo wangandrö ba soi ma'afefu.- Yes 56:1.6-7

Simanö daroma li Lowalangi.-                    Sato : Ma'andrö …

 

Sinunö Fanema Li : Psallite No 67                    (ma Laudate No 87 ma 169)

 

FOMBASO II

Taroma Li Lowalangi nihalö moroi ba zura Waulo ba niha samati ba mbanua Roma.-

Ya'ami ira talifusö!

Dafahuhuo ndra'o khö ndra talifusö si tenga niha Yahudi. No u'odödögö sibai halöŵögu fe'amöi rasul ba soi si tenga niha Yahudi. Utötöna, wa so wa'afökhö dödö ba soigu samösa, ena'ö börö da'ö tola u'orifi ira ösa. Börö me no Itimba ira Lowalangi, andrö wa ifuli sökhi mangawuli gamakhaita niha gulidanö khö Lowalangi; mendrua manö sa'ae, na Itema ira Lowalangi : tatu hulö niha si mate si fuli auri zimanö. Börö na Ifili ba Ifahowu'ö niha Lowalangi, lö irai mangandrauli dödö Lowalangi ba zi no Ifalua. Si lö molo'ö li Lowalangi ami me föna. Si falukha fa'ahakhö dödö ami iada'e, börö wa-lö-folo'ö-li andrö khöra. Simanö göi ba niha Yahudi andrö: Lö molo'ö ira khö Lowalangi iada'e, ena'ö te'efa'ö ami moroi ba zala. Ba hiza, te'efa'ö ira moroi ba zala dania. No Itehegö Lowalangi ba niha fefu, ifatörö fa-lö-folo'ö andrö, ena'ö tola I'oroma'ö wa'ahakhö dödöNia khöra fefu.- Rom 11:13-15.29-32

Simanö daroma li Lowalangi.-                    Sato : Ma'andrö …

 

Sinunö Föna Injil : Psallite No 250                       (ma Laudate No 9 ma 10)

 

INJIL

 

Turia Somuso Dödö khö Yesu Keriso nisura Matai'o.-

Me luo da'ö Iheta Ia Yesu ba danö Galilaia, numalö Ia ba danö Diro ba ba danö Zidona. Ba tohare samösa ndra alawe moroi ba danö Gana'ana, i'ondrasi Yesu ba mu'ao ia: "He So'aya, ma'uwu Dawido, hakhösi tödö ndra'o. Ifakaokao sibai nonogu alawe bekhu!" Lö Itema linia Yesu, sambua li lö'ö. Awena la'ondrasi Ia ira nifahaöNia, la'andrö khöNia, lamane: "Fofanö manö ndra alawe andrö, me mu'ao'ao manö ia moroi furida!" Itema lira Yesu, Imane: "Sindruhu, no nifatenge Ndra'o ba Ndraono Gizara'eli, si lö mamalua somasi Lowalangi, si hulö mbiribiri si no elungu." Ba möi ndra alawe no mege, ihatö'ö ia khö Yesu ba ituhi danö fönaNia, imane: "He So'aya, tolodo!" Itema linia Yesu, Imane: "Lö sökhi, na lahalö gö ndraono ba labe'e ö nono nasu." Imane ira alawe: "Duhu da'ö, So'aya, ba la'a sa'atö ono nasu gakhökhöla saekhu tou, na manga zokhö ya'ira." Itema linia Yesu, Imane khönia: "He ina, ebua sibai wamatimö. Ya alua khöu zomasi ndra'ugö!" Ba döhö wökhö nononia alawe andrö, ba da'ö sibai.- Mat 15:21-28

Simanö duria somuso dödö khö Zo'aya ya'ita Yesu Keriso.-

Erönua:

FA’OMASI LOWALANGI SI LÖ OLA

Bakha ba wombaso siföföna nihalö moroi ba zura Yesaya sama’ele’ö, tarongo wehede Zo’aya nifa’ema Yesaya sanguma’ö: "OmoGu latötöi omo wangandrö ba soi ma'afefu". Omo Lowalangi andrö si so ba Yerusalema no ara me no tekiko. Ba hiza omo Lowalangi nifotöi Gereja no inönöi gulidanö ma'asagörö. Gereja andrö ba ya’ia mbotoda samösa ya’ita niha samati. Ya’ita andre zangomasi’ö Lowalangi ba simöi Enoni-Nia.

Bakha ba wombaso sidua andrö nihalö moroi ba zura Waulo ba niha samati ba mbanua Roma, ifaduhu’ö khöda wa lö mamalö so wa’ahakhö dödö Lowalangi göi ba niha si lö mangomasi’ö Ya’ia. Fe’amöi Waulo tobali Rasul ba gotalua niha si tenga niha Yahudi, no sambua ohitö dödö Lowalangi ena’ö teturiaigö khöra Duria Somuso Dödö ba tesöndra khöra wamalalini era’era. Ba da’e aboto ba dödöda wa Kharasi Lowalangi no sabölö moroi ba wa'abe'e dödö niha gulidanö. Si fao fa'ebolo dödö Ibaloi So'aya ha wa’ara tesöndra wamalalini era’era ba niha.

Bakha ba duria somuso dödö tarongo hewisa wa’aro dödö ba famati ndra’alawe andrö niwa’ö niha baero, sangandrö ena’ö tefadöhö nononia. Ba wa’aro dödö wa isöndra wa’ahakhö dödö, isekhegö si'ai Yesu wanandraigö ya'ia. Ba hiza, ira alawe andrö faduhu dödönia, börö wa'omasinia khö nononia. Ba wa’omasinia andrö khö nononia, hewa’ae tefo’amaedola nasu andrö, ba hiza ba gafuriata isöndra wa’ahakhö dödö Yesu irege tefadöhö nononia andrö.

Sitölu ngawua wombaso andre edöna ifaehagö khöda wa’omasi Lowalangi andrö si lö ola. Hewa’ae lö omasi niha khö Lowalangi, lö omasi sa’atö Lowalangi wondröi soi-Nia. Gereja si no boto niha samati, lö mamalö ihakhösi tödö Lowalangi. Ifatenge ndra rasul ena’ö tarongo duria somuso dödö andrö, ba tola tesöndra khöda wamalalini era’era. Ba da’e dania ta’ila hawa’ebua wa’omasi Lowalangi andrö. Na samösa nina si lö fa'aboto ba dödö Lowalangi so khönia wa'omasi ba ndraononia, ba fa'aduhu dödö khö Yesu, mendrua manö Lowalangi ba soi niha baero, ba ba khöda ero zamösana si so fa’aboto ba dödö Lowalangi. Data’omasi’ö Lowalangi andrö ena’ö lö mamalö I’omasi’ö göi ita. Amen.

 

Nifa’anö Kat. Ingatan Sihura, S.Ag.

Umbu:

Dianne Bergant, CSA & Robert J. Karris, OFM (ed) Tafsir Alkitab Perjanjian Lama Yogyakarta Kanisius, 2002

Dianne Bergant, CSA & Robert J. Karris, OFM (ed) Tafsir Alkitab Perjanjian Baru Yogyakarta Kanisius, 2002

Martin Harun, OFM, Matius Injil Segala Bangsa Yogyakarta: Kanisius, 2019

St. Eko Riyadi, Pr, Matius “Sungguh, Ia ini adalah Anak Allah” Yogyakarta: Kanisius, 2011