TAROMA LI LOWALANGI LUO MIGU FAMOLAKHÖMI SO'AYA BA HILI (06 Agustus)

Liturgi Taroma Li Dofi A/B/C hlm. 231.

FOMBASO  I

Taroma Li Lowalangi nihalö moroi ba zura Danieli, sama'ele'ö.-

So khögu gangilata, ba ufaigi: Tetaru'ö dadaoma wa'arazo ba dumadao Zatua andrö si no arara. Baru-Nia, ba si takile, afusi fa'afusi mbetua. ba buNia ba no timba zindruhu mbu mbiribiri. Dadaoma-Nia, ba holahola galitö, ba no moroda alitö siholahola. Ba hulö zahele misa galitö, sebua, si otarai Ia. Me hönö wa hönö ngoningoni-Nia, ba mewulu ngahönö wa fulu ngahönö zi so ba ngai-Nia. Dumadao göi ndra sanguhuku ba labokai mbukura. Aefa da'ö, ba gangilata andrö ba zi bongi, u'ila: Tohare moroi sa ba dete lawuo ba mbanua si yaŵa, Samösa si hulö nono niha, ba tefasao Ia khö Zatua no mege. Satua andrö zame'e khö-Nia fa'abölö, fa'ebua döi ba fa'asalaŵa: Enoni-Nia niha fefu, gofu ha soi ira ba hadia ngawalö lira. Ba fa'abölö-Nia andrö, ba sirugi zi lö aetu ba si lö tebulö, ba amatöröŵaNia andrö, ba lö'ö manö adudu.-  Dan 7:9-10.13-14

Simanö daroma li Lowalangi.-                    Sato : Ma'andrö …

 

Sinunö Fanema Li : Psallite No 97                       (ma Laudate No 106, 1+4)

 

FOMBASO  II

Taroma Li Lowalangi nihalö moroi ba zura Wetero, si dua.-

Ya'ami ira talifusö!

Ba ginötö ma'ombakha'ö khömi ha wa'amolakhömi we'aso Zo'aya ya'ita, Yesu Keriso, lö ma'o'ö hikaya fayafaya nifakhai dödö niha. Fa'amolakhömi Keriso andrö no ma'ila faoma höröma samösa. So ndra'aga ba da'ö, me Ifosumange ba Ifolakhömi Ia Lowalangi Ama. Ba Ba ginötö da'ö terongo li si oroi Wondrege Zolakhömi andrö, sanguma'ö khöNia: "OnoGu omasiö da'ö, wa'omasiGu Ia." No marongo li andrö si'otarai mbanua si yaŵa, me so ndra'aga awöNia yaŵa ba hili ni'amoni'ö andrö. Da'ö mbörö, wa abölö faduhu sa'ae dödöma duria Lowalangi andrö, ni'ombakha'ö ndra sama'ele'ö andrö. Ha wa'asakhönia, na mitöngöni duria andrö, börö me turia andrö hulö wandru sohagaini naha si no ogömigömi, irugi tohare wa'amoluo, ba irugi tumbu madala andrö ba dödömi.- 2 Fet 1:16-19

Simanö daroma li Lowalangi.-                    Sato : Ma'andrö ...

 

Sinunö Föna Injil : Psallite No 218                              (ma Laudate No 104)

 

INJIL

Turia Somuso dödö khö Yesu Keriso nisura Matai'o.-

Me luo da'ö, Iŵa'ö awöNia Yesu Wetero ba Yakobo ba Yohane, talifusö Yakobo, ba I'ohe ira ba hili salaŵa. Ha ya'ira zi so ba da'ö. Ba tobali Ia fönara : Humaga mbawaNia hulö haga luo, ba nukhaNia no takilekile. Awena oroma khöra Moze ba Eliya, fahuhuo ira khö Yesu. Imane Fetero khö Yesu: "He So'aya, wa'asökhi nahia da'e. Na omasi Ndra'ugö, da'ufasindro tölu nose ba da'e: sambua khöU, sambua khö Moze ba sambua khö Geliya". Me muhede na Wetero, ifasui ira lawuo sihaga sibai, si lumö'ö ya'ira. Ba moroi ba lawuo andrö terongo li, sanguma'ö: "OnoGu da'e, Ono omasi'ö. Wa'omasiGu Ia. Mifondrondrongo liNia!" Me larongo li andrö ira nifahaö Yesu, ata'u sibai ira, irege tegaölö tou ira ba danö. Möi khöra Yesu, Itufa ira tangaNia, Imane: "Mifaoso! Böi mi'ata'ufi!" Me lafakhölö ira, ba lö hadia ni'ilara niha, ha Yesu. Ba me möi ira tou moroi ba hili, Ifangelama ira Yesu, akha böi la'ombakha'ö gangilata andrö, gofu ha'ökhö, fatua lö te'orifi mangawuli Nono Niha andrö moroi ba wa'amate. Mat 17:1-9

Simanö duria somuso dödö khö Zo'aya ya'ita, Yesu Keriso.-

Erönua:

FAMOLAKHÖMI YESU

Bakha ba wombaso siföföna nihalö moroi ba zura Danieli sama’ele’ö, tegambaraini wa sadudu ba si tekiko fefu gamatöröŵa niha ba gulidanö, me föna ba he göi dania. Ba sindruhu itörö, me lö si'ogötö'ö ba gulidanö andre. Amatöröŵa nibe'e ba danga Nono Niha andrö lö mamalö irugi zi lö aetu. Yesu Keriso sa Nono Niha andrö.

Bakha ba wombaso sidua tarongo wamaduhu’ö Wetero sanandrösa khö Yesu andrö. ba mböröta latuwuni yaŵa huku Moze awö gamakhoita andrö ira rasul. Ba hiza, i'otarai me no larango li Sihede sanguma'ö: "Da'e NonoGu, mifondrondrongo Ia", ba tobali tuho nituriaigö ba tobali fa'auri ndra nifahaö Yesu Keriso. Bakha ba lala wa’aurida, tola göi ta’anofu li, hadia, no tobali Ia  khöda nizunozuno, ba tuho ba wa'aurida?

Bakha ba Duria Somuso Dödö tarongo hewisa me tefolakhömi Yesu andrö ba hili. Ba zi ha mamö'i hörö I'oroma'ö lakhömiNia Yesu ba hili, fa böi aetu wanötöna ndra nifahaö ba ena'ö böi taya wamatira dania na te'adawadaŵa’ö Yesu bakha ba  wamakaoNia. Bakha ba wemaosoNia awena tefolakhömi Ia irugi zi lö aetu. Ira nifahaö zi tobali samaduhu'ö Ya'ia.

Sitölu ngawua wombaso andre edöna ifaduhu’ö khöda hewisa sindruhunia wamolakhömi Ono Niha andrö ya’ia Yesu. Famolakhömi Ya’ia andrö ba no famaduhu’ö gamatöröwa-Nia andrö ba luo safuria. Ölö simane da’ö, famaduhu’ö lakhömi-Nia andrö, tenga ha ba luo safuria ba hiza i’onarai da’e göi tafaduhu’ö. Famaduhu’öda Yesu andrö moguna göi ia khöda. Fefu da’ö moguna göi ia khöda ena’ö ba ginötönia tefolakhömi göi ita awö-Nia. Ba gafuriata, hewisa ita göi wanuriaigö turia lakhömi-Nia andrö? Ya lö mamalö te’abölö’ö ita, Amen.

 

Nifa’anö Kat. Ingatan Sihura, S.Ag.

Umbu:

Dianne Bergant, CSA & Robert J. Karris, OFM (ed) Tafsir Alkitab Perjanjian Lama Yogyakarta Kanisius, 2002

Dianne Bergant, CSA & Robert J. Karris, OFM (ed) Tafsir Alkitab Perjanjian Baru Yogyakarta Kanisius, 2002

Martin Harun, OFM, Matius Injil Segala Bangsa Yogyakarta: Kanisius, 2019

St. Eko Riyadi, Pr, Matius “Sungguh, Ia ini adalah Anak Allah” Yogyakarta: Kanisius, 2011