TAROMA LI LOWALANGI LUO MIGU SI – 17 DÖFI A

LITURGI TAROMA LI DÖFI A/B/C, hlm. 171.

FOMBASO I

Taroma Li Lowalangi nihalö moroi ba zura Razo, si föföna.-

Me luo da'ö, I'oroma'ö Ia So'aya khö Zelomo ba zi bongi ba wangifi ba Imane: "Ae andrö, hadia nibe'eGu khöu!" Imane Salomo: "He So'aya, LowalangiGu, no Öbali'ö razo genoniU andre, fangali namagu Dawido. Ba hiza, awuyu nasa ndra'o, lö u'ila hewisa wamatörö soiMö andrö, nifiliMö, soi sebua si tebai mu'erai ba wa'ato. Ya Öbe'e khö genoniMö andre dödö samondrondrongo liU, ena'ö tola ufatörö soiMö andrö ba ena'ö ufa'ema gangetula satulö. Haniha sa zangila mamatörö soiMö andrö, si no ato sibai?" Itema tödö Zo'aya gangandröŵa Zelomo ba Imane khönia: "Me no ö'andrö wa'atuatua ba wamatörö soiGu ba wa'atulö, ba tenga fa'anau noso, tenga fa'ebua gokhöta, ba tenga göi fa'amate zi fa'udu khöu, U'o'ö ni'andröu andrö. Ube'e khöu dödö satuatua si so era'era, ena'ö lö famaedou, he ba götö si no numalö ba he ba götö dania."- 1 Raz 3:5.7-12

Simanö daroma li Lowalangi.-                    Sato : Ma'andrö …

 

Sinunö Fanema Li : Psallite No 119B                        (ma Laudate No 72-79)

 

FOMBASO II

Taroma Li Lowalangi nihalö moroi ba zura Waulo ba niha samati ba mbanua Roma.-

Ya'ami ira talifusö!

No ta'ila: Lowalangi zamöfö'ö fefu ngawalö hadia ia, irege alua zi sökhi ba niha ni'omasi'öNia ba nikaoniNia fao bakha ba ni'era'eraNia. Ya'ira si no Ifili Lowalangi, no Ihonogöi moroi ba mböröta, ena'ö tobali ira hulö simane OnoNia, ya'ia Yesu Keriso. Ba zimanö, OnoNia andrö tobali si föföna ba gotalua ndra talifusö sato. Ikaoni Lowalangi zi no Ihonogöi ba mböröta. Ba haniha nikaoniNia, te'efa'ö moroi ba horö. Ba ya'ira si no te'atulö'ö khö Lowalangi, Ifolakhömi göi.-   Rom 8:28-30

Simanö daroma li Lowalangi.-                    Sato : Ma'andrö …

 

Sinunö Föna Injil : Psallite No 259                              (ma Laudate No 107)

 

INJIL

Turia Somuso Dödö khö Yesu Keriso nisura Matai'o.-

Me luo da'ö, Imane Yesu ba niha sato: "Amatöröŵa Lowalangi andrö hulö gana'a sebua böli si no teko'o ba danö, nisöndra niha. Ba ifuli zui iko'o ba danö niha andrö. Börö wa'omuso dödönia, andrö wa maoso ia, i'amawa fefu hadia ia zi so khönia ba ifuli ia wowöli tanö andrö.

Amatöröŵa Lowalangi andrö hulö niha saniaga, Sangalungalui manimani sebua böli. Me no isöndra sambua manimani si sökhi sibai, maoso ia, möi mu'amawa manimani si so khönia fefu ba i'öli manimani no mege.

Amatöröŵa Lowalangi andrö hulö ndriala, nilau ba nasi, ba musöndra oya ngawalö gi'a. Me no afönu ndriala andrö, ladöni ba nene ndriala andrö ira sifandriala, mudadao ira ba wamöfö'ö i'a andrö. Si sökhi lalau ba nahia; ba si lö sökhi latibo'ö. Simanö göi ba ngaluo safuria andrö, möi baero ndra mala'ika ba wamöfö'ö niha si lö sökhi ba niha samalua somasi Lowalangi. Niha si lö sökhi, latibo'ö ba mbaho galitö. Ba da'ö dania mege'ege ira ba lataögö wa'afökhö."- Mat 13:44-50

Simanö duria somuso dödö khö Zo'aya ya'ita, Yesu Keriso.-

 

Erönua:

HARE BA WOLO’Ö LOWALANGI

Bakha ba wombaso siföföna, tarongo hewisa me ibörögö mamatörö razo Selomo. Ba wangifinia Itehegö khönia Lowalangi ba wame’ema sambua gangandröŵania, ya’ia “fa'anau noso, fa'ebua gokhöta, ba fa'amate nudunia”. Ba hiza lö ni’andrö Zelomo moroi ba gotalua zi tölu andrö. Ni’andrö razo Selomo khö Lowalangi soguna ba wamaluania halöŵö fa’arazo ya’ia wa’atuatua ba wamatörö soi Lowalangi ba ba wama'ema gangetula satulö.

Ba wombaso sidua tarongo hewisa wamaha’ö Waulo andrö ba mbanua Roma sanandrösa ba lala wa’auri niha samati si no tana khö Lowalangi. Hewa’ae no iföfö’ö i’onarai wamobörö Lowalangi niha samati khö-Nia, ba hiza lö göi tebulö latema gondröita zorugo ira niha tanö bö’ö börö wangöhöli Nono-Nia andrö Yesu Keriso.  Ba wangöhöli Yesu Keriso andrö tekaoni ita, irege te’efa’ö ita moroi ba horö ba te’atulö’ö ita khö Lowalangi. Ba gafuriata tefolakhömi ita ya’ita niha samati andrö sifao fa’omuso dödö.

Bakha ba duria somuso dödö andrö nisura Matai’o, sindruhu wa amatöröwa Lowalangi andrö hulö niha sanöndra somasi dödönia. Na no isöndra tola i’amawa hadia zi so khönia ba wangai somasi ia andrö. Simanö göi niha zanema Keriso awö InjilNia ba wa’aurinia, na iröi fefu gisö’isö dödö andrö, ba tenga ha fa’ohahau dödö andrö hare si falukha ia, ba hiza atuatua ia göi ba wamaehusi hadia ia zabölö moguna ba sambö moguna, he ŵa’ae nituwuni yaŵa mena’ö da’ö ba wobanua.

Sitölu ngawua wombaso andre, sindruhu ibe’e khöda wangaboto ba dödö wa ba wamati andrö moguna so khöda wa’atuatua ba fa’aboto ba dödö. Börö wa’aboto ba dödö wanema Keriso awö Injil-Nia tenga simöi zayazaya gölö ba hiza no möi fe'efa'ö moroi ba horö, te'atulö'ö khö Lowalangi ba tefolakhömi awö Keriso. Amin.

 

Nifa’anö Kat. Ingatan Sihura, S.Ag.

Umbu:

Dianne Bergant, CSA & Robert J. Karris, OFM (ed) Tafsir Alkitab Perjanjian Lama Yogyakarta Kanisius, 2002

Dianne Bergant, CSA & Robert J. Karris, OFM (ed) Tafsir Alkitab Perjanjian Baru Yogyakarta Kanisius, 2002

Martin Harun, OFM, Matius Injil Segala Bangsa Yogyakarta: Kanisius, 2019

St. Eko Riyadi, Pr, Matius “Sungguh, Ia ini adalah Anak Allah” Yogyakarta: Kanisius, 2011