TAROMA LI LOWALANGI LUO MIGU SI – 12 DÖFI A

Liturgi Taroma Li Döfi A/B/C hlm. 158.

FOMBASO I

Taroma Li Lowalangi nihalö moroi ba zura Yeremia, sama'ele'ö.

Imane sama'ele'ö andrö: "No ato nirongogu fehede zafökhö tödö, ameta'uö fasui, lamane: 'Adugö ia ba zanguhuku!'  ba: 'Data'ombakha'ö ia!' Dozi si fahuwu khögu na'i ladarodarogö ndra'odo, ma'atö alau tou ndra'o. Fangöngöngöngö ira, lamane: "Ma tola tafaelungu ia ba wehede, ena'ö so dali wolauda balöda khönia." Ba hiza, Ya'ugö, he So'aya, zabölö wango'awögö ya'o; ba salau ba sitebai zolohi ya'o. Lö alua nifakhoi dödöra, ba la'iki'iki'ö ira niha, tobali fa'aila si lö aetu, si lö taya ba dödö niha. Ba Ya'ugö, So'aya samatörö fefu hadia ia, sanandraigö niha satulö tödö, sangila buabua ba tödö: Oroma'ögö khögu wolau balöU khöra, si fa'udu khögu! Noa sa ube'e noro dödöU wa'aurigu. Mi'anunö khö Zo'aya, misuno Zo'aya, dozi soi, me I'efa'ö wa'auri niha si numana moroi ba danga zolau si lö sökhi!"  Yer 20:10-13

Simanö daroma li Lowalangi.-                    Sato : Ma'andrö …

 

Sinunö Fanema Li : Psallite No 69                                   (ma Laudate No 7)

 

FOMBASO II

Taroma Li Lowalangi nihalö moroi ba zura Waulo ba niha samati ba mbanua Roma.-

Ya'ami ira talifusö!

Börö niha si samösa, wa so horö ba gulidanö, ba moroi ba horö andrö tumbu wa'amate. Lualua, ikhamö niha fefu fa'amate andrö, börö me si so horö niha fefu. No so horö ba gulidanö, me lö oroisa khö Moze na. Ba lö mi'ila mu'etu'ö huku, börö me lö huku nisawö. No ifatörö fefu niha fa'amate andrö, i'otarai ginötö Gadamo irugi ginötö Moze, he ŵa'ae lö khöra horö simane nilau Gadamo. Adamo no tobali famaedo zi so dania. Ba hiza, lö fagölö zi darua andrö: No abölö ebua wa'ahakhö dödö awö mbuala Lowalangi, ha börö wa'asökhi Niha si samösa ba niha fefu, ya'ia Yesu Keriso. Abölö ebua wa'ahakhö dödö Lowalangi, moroi ba wa'ebua horö zi samösa andrö.- Rom 5:12-15

Simanö daroma li Lowalangi.-                    Sato : Ma'andrö …

 

Sinunö Föna Injil : Psallite No 258                   (ma Laudate No 72 ma 106)

 

INJIL

Turia Somuso Dödö khö Yesu Keriso nisura Matai'o.-

Me luo da'ö, Imane Yesu khö ndra nifahaöNia: "Böi mi'ata'ufi niha! Hadia zi tobini, lö tola lö'ö oroma dania. Ba hadia nibini'ö, lö tola lö'ö tefa'ele'ö dania. Hadia niŵa'öGu khömi ba zogömigömi, miŵa'ö ba zohaga. Hadia ningöngögöGu ba dalingami, mituriaigö ena'ö oi larongo niha. Böi mi'ata'ufi niha si ha tola mamunu boto. Lö khöra kuaso wamunu noso. Mi'ata'ufi Lowalangi, si tola manibo'ö he boto ba he noso ba narako si lö tebulö. Tola mu'öli dombua ziliwi, ha ha'uga rufia kefe. He ŵa'ae simanö, tebai atoru tou ba danö zambua wofo, na lö Itehegö Amami andrö. Ba ya'ami, no mu'erai wa'oya rozi mbu ba högömi. Andrö böi ata'u ami; abölö ebua mbölimi khö Lowalangi moroi ba mböli ziliwi andrö, he ŵa'ae oya sibai ira. Haniha zamaduhu'ö föna niha sato, wa nifahaöGu ia, da'ö göi nifaduhu'öGu föna NamaGu si so ba zorugo. Haniha zangosilö'ögö föna niha sato, wa nifahaöGu ia, U'osilö'ögö ia göi föna NamaGu si so ba zorugo." Mat 10:26-33

Simanö duria somuso dödö khö Zo'aya ya'ita, Yesu Keriso.-

 

FA’OMASI LOWALANGI SI LÖ TEBULÖ

Bakha ba wombaso siföföna nihalö moroi ba zura Yeremia sama’ele’ö, I’ombakha’ö khöda hewisa wa’auri niha si lö faröi ba khö Lowalangi andrö. Niha sombelegö satulö ma tana khö Zo’aya ba oroisaNia, asese tobali udu niha sabölö ba ni’iki’iki’ö niha sato. Famakao andrö tobali fanandraigö ba niha  satulö, ba hiza lö iröi niha satulö So’aya.

Bakha ba wombaso sidua nihalö moroi ba zura Waulo andrö, ituriaigö khöda hewisa wa’ebua wa’omasi Lowalangi andrö moroi ba horö nifazökhi niha. Adamo andrö niha siföföna zaekhu ba horö, no möi börö wa so horö ondröita ba niha. Ba hiza, börö we’amöi Keriso ba gulidanö, tasöndra wamokai lala si bohou. Ibe’e ginötö ba  wangefa’ö  sala ba  ba wanöndra  fangorifi. Börö me fa’amate nitaögö Yesu Keriso soguna ba niha ma’afefu. Ba da’e ta’ila wa’omasi Lowalangi si lö ola andrö.

Bakha ba wombaso Turia Somuso Dödö andrö tarongo hewisa wa’ebua wa’omasi Lowalangi ba niha gulidanö andrö. Hewa’ae toba ibunu mbota niha, ba hiza lö khöra kuaso ba noso andrö. Ha Lowalangi zi so kuaso. Ba zimanö wa ifo’amaedola ba ziliwi andrö, lö manö satoru na tenga nitehegöNia. Mendrua manö niha si no föfö hanuhanuNia.

Sitölu ngawua wombaso andre, edöna I’ombakha’ö khöda wa sindruhunia lö mamalö wa’omasi Lowalangi ba niha gulidanö andrö. Fozu wa’omasiNia andrö, ifatenge Yesu Keriso, OnoNia si hasamösa andrö ena’ö te’orifi dozi samati khöNia. Börö da’ö, moguna ine tabe’e ba mbrörö dödöda wehedeNia safuria andrö bakha ba Duria Somuso Dödö: “Haniha zamaduhu'ö föna niha sato, wa nifahaöGu ia, da'ö göi nifaduhu'öGu föna NamaGu si so ba zorugo. Haniha zangosilö'ögö föna niha sato, wa nifahaöGu ia, U'osilö'ögö ia göi föna NamaGu si so ba zorugo."

FehedeNia andrö ba mo’eluaha sibai. Eluahania, sindruhu no I’omasi’ö ita Lowalangi, ba no tarasoi mbua wa’omasiNia andrö. Iada’e, hewisa ita göi ba wangomasi’ö Ya’ia? Fangomasi’öda Lowalangi andrö, ya’ia na tola taturiagö ia ba niha sato. Fanuriaigöda famatida andrö ba khöNia, te’oroma’ö ia ba wehede, ba gamuata, ba ba ni’era’era dödöda. Amen.

 

Nifa’anö Kat. Ingatan Sihura, S.Ag.

Umbu:

Dianne Bergant, CSA & Robert J. Karris, OFM (ed) Tafsir Alkitab Perjanjian Lama Yogyakarta Kanisius, 2002

Dianne Bergant, CSA & Robert J. Karris, OFM (ed) Tafsir Alkitab Perjanjian Baru Yogyakarta Kanisius, 2002

Martin Harun, OFM, Matius Injil Segala Bangsa Yogyakarta: Kanisius, 2019

St. Eko Riyadi, Pr, Matius “Sungguh, Ia ini adalah Anak Allah” Yogyakarta: Kanisius, 2011