Liturgi Taroma Li Döfi A/B/C, hlm. 161.
FOMBASO I
Taroma Li Lowalangi nihalö moroi ba zura Razo, si dua.-
Samuza ma'ökhö, numalö ba mbanua Sunema Gelisa, sama'ele'ö andrö. So ba da'ö ndra alawe si kayo. Ikaoni Gelisa ba wemanga. I'otarai ginötö da'ö, ero'ero na itörö, möi ia yomo ba da'ö manga. Ba imane ira alawe andrö khö wo'omonia: "Hiza, aboto sa'ae ba dödögu, wa enoni Lowalangi, niha ni'amoni'ö, niha andrö, sanörönörö ya'ita. Hewisa na talau mbate'e side'ide, nibagolöi, yaŵa ba zi sagötö, ba na tabe'e bakha khönia warate ba meza ba kurusi, awö naha wandru,- ena'ö na ba da'ö idölö ia, na möi ia khöda." Samuza ma'ökhö, ifuli so Gelisa ba mbanua Sunema. Möi ia ba mbate'e andrö ba wolombase. Isofu Elisa khö Genoninia, Gehasi, imane: "Heza tola tatolo ndra alawe andrö ena'ö?" Imane Gehasi: "Da'ö i, lö khönia ono matua, ba no niha satua wo'omonia!" Imane Elisa khö Gehasi : "Kaoni ia!" Ba ikaoni ndra alawe andrö Gehasi, ba i'agö mbawandruhö. Imane Elisa : "Ba ndröfia mane furi, öhagi nono matua!" Imane ira alawe: "Böi ö'o'aya genonimö andre ira alawe; enoni Lowalangi sa ndra'ugö." Ba hiza, manabina ndra alawe andrö ba mo'ono ia, me no alua ndröfi, faudu ba nifabu'u Gelisa.- 2 Raz 4:14-17
Simanö daroma li Lowalangi.- Sato : Ma'andrö …
Sinunö Fanema Li : Psallite No 89 ma 36 (ma Laudate No 86)
FOMBASO II
Taroma Li Lowalangi nihalö moroi ba zura Waulo ba niha samati ba mbanua Roma.-
Ya'ami ira talifusö!
Hadia lö mi'ila, wa ya'ita fefu no tatema wanasa ba wa'amate Keriso Yesu? No teko'o ita awöNia ba wa'amateNia börö sakramen fanasa andrö, ena'ö ya'ita göi, hulö simane Keriso si no mu'orifi mangawuli moroi ba gotalua zi mate, börö wa'abölö Lowalangi solakhömi andrö, manörö lala wa'auri si bohou. Na no mate ita awö Keriso, faduhu dödöda, wa auri ita awöNia göi. Ta'ila sa, lö'ö sa'ae mate Keriso, me no aefa ilaŵa Ia fa'amate. Lö'ö sa'ae mofa'abölö wa'amate khöNia. Fa'amate nitörö Keriso, no fa'amate börö horö andrö. Alua da'ö samuza irugi zi lö aetu. Ba fa'auriNia iada'e, no fa'auri khö Lowalangi. Simanö göi ami, lö tola lö'ö miŵa'ö tödömi, mate ami ba horö, ba auri ami ba gamakhaita saro khö Lowalangi, börö Keriso Yesu.- Rom 6:3-4.8-11
Simanö daroma li Lowalangi.- Sato : Ma'andrö …
Sinunö Föna Injil : Psallite No 250 (ma Laudate No 60 ma 66)
INJIL
Turia Somuso Dödö khö Yesu Keriso nisura Matai'o.-
Me luo da'ö, Imane Yesu khö ndra nifahaöNia: "Niha sangomasi'ö amania ba inania töra moroi ba wangomasi'önia Ya'o, ba tenga sinangea nifahaöGu niha da'ö. Simanö göi zangomasi'ö ononia matua ma ononia alawe töra moroi ba wangomasi'önia Ya'o, tenga sinangea nifahaöGu ia. Si lö omasi molu'i röfania ba wolo'ö Ya'o, tenga sinangea tobali nifahaöGu. Niha sedöna manaha fa'aurinia, khönia dania taya wa'auri. Na so niha, ba khönia taya wa'auri, börö Ndra'o, isöndra wa'auri dania. Haniha zanema ya'ami yomo ba nomo, itema Ndra'o. Ba haniha zanema Ya'o, noa göi itema Zamatenge Ya'o. Niha sanema'ö tengetenge Lowalangi, börö me no tengetenge Lowalangi ia, niha andrö itema luonia samösa dengetenge Lowalangi. Niha sanema'ö samalua somasi Lowalangi, börö me samalua somasi Lowalangi ia, itema luonia simane nibe'e ba niha samalua somasi Lowalangi. Gofu haniha zamabadugö he ha sambawa idanö ba gotalua niha side'ide andre, börö me no nifahaöGu ia, sindruhu niŵa'öGu khömi, itema luonia andrö."- Mat 10:37-42
Simanö duria somuso dödö khö Zo'aya ya'ita Yesu Keriso.-
Erönua:
SULÖ WANGOMASI’Ö LOWALANGI, FA’AURI SI LÖ AETU
Bakha ba wombaso sisara tarongo hewisa mbuala ndra’alawe andrö khö genoni Lowalangi Elisa. Buala ndra’alawe andrö ya’ia ena’ö ohahau dödö Gelisa na molombase ia ba nomora andrö. Ifazökhi sambua nahia si sökhi ba nahia tanö yawa, irege mo’ömö dödö Gelisa ba wangandrö khö Lowalangi ena’ö ibe’e howuhowunia khö ndra’alawe andrö ya’ia nono matua.
Bakha ba wombaso sidua tarongo wamaha’ö Waulo ba niha samati ba khö Keriso. Famaha’önia andrö ya’ia zanandrösa ba wanasa ni’amoni’ö nitemada. Hadia zalua na tatema Sakramen fanasa? Ba wanasa ni’amoni’ö, tefaböbö ita khö Keriso ba fao ita khöNia bakha ba wa’amate ba femaosoNia. Auri ita si fao Keriso ba khö Lowalangi, eluahania, lö tola lö’ö ta’aröu’ö ita moroi ba wa’auri sobou, si lö sökhi ba si lö atulö.
Bakha ba duria somuso dödö andrö tarongo hewisa zalua ba niha sangomasi’ö Lowalangi andrö. Niha sangomasi’ö Lowalangi ba solu’i röfania, lö mamalö itema zulö fa’auri si lö aetu. Fangomasi’ö Lowalangi andrö ena’ö si’oroi sibai dödö ma’asambua, ba mu’oroa’ö ia ba lala wa’auri si ero ma’ökhö.
Sitölu ngawua wombaso andre, edöna idönia’ö ita ba wangomasi’ö Lowalangi. Fangomasi’ö Lowalangi andrö ba si lö tola lö’ö ena’ö si’oroi sibai ba dödö ba sifao folo’ö. Fangomasi’ö ndra’alawe andrö khö Gelisa (enoni Lowalangi) ba wombaso si sara, no möi börö wanemania howuhowu Lowalangi si tebai ikhamö tödö niha. Hewa’ae no atua ia, ba hiza tola moniha nasa ia.
Ya’ita niha samati tefaböbö ita khö Lowalangi börö wanasa ni’amoni’ö si no tatema. Bakha ba wanasa ni’amoni’ö andrö I’oroma’ö göi wa’omasiNia Lowalangi, ya’ia wa I’efa’ö ita moroi ba ngawalö zala olalöwa nifaluada. Ba zitabai da’ö, börö göi wanasa ni’amoni’ö andrö tatema halöwö folo’ö Lowalangi ya’ia ba wa’atobalida tobali sama’ele’ö, razo, ba ere. Fa’atobalida sama’ele’ö andrö ya’ia ba wame’eda famaha’ö si no dumaduma si sökhi (he ba wehede mendrua manö ba mbuabua). Fa’atobalida razo, ya’ia na tadönia’ö niha ba wolo’ö si sökhi, töratöra ba wanuno Lowalangi. Fa’atobalida ere, ya’ia na tola ta’amoni’ö ita ba he göi awöda, he ba wangandrö mendrua manö wefao ba zato. Ba zimanö tola tasöndra nifabu’u Yesu andrö, sulö ba wolo’öda Ya’ia. Amen.
Nifa’anö Kat. Ingatan Sihura, S.Ag.
Umbu:
Dianne Bergant, CSA & Robert J. Karris, OFM (ed) Tafsir Alkitab Perjanjian Lama Yogyakarta Kanisius, 2002
Dianne Bergant, CSA & Robert J. Karris, OFM (ed) Tafsir Alkitab Perjanjian Baru Yogyakarta Kanisius, 2002
Martin Harun, OFM, Matius Injil Segala Bangsa Yogyakarta: Kanisius, 2019
St. Eko Riyadi, Pr, Matius “Sungguh, Ia ini adalah Anak Allah” Yogyakarta: Kanisius, 2011
0 comments:
Posting Komentar