TAROMA LI LOWALANGI LUO MIGU SI – 11 DÖFI A

Liturgi Taroma Li Döfi A/B/C hlm. 155.

FOMBASO I

Taroma Li Lowalangi nihalö moroi ba zura Moze, si dua.-

No laheta ira Iraono Gizara'eli ba Rafidi ba larugi danö si mate Sina'i. Ba danö si mate andre molombase ira. Ba gamaudu hili Sina'i labe'e golombaseŵa Iraono Gizara'eli. Möi miyaŵa ba zuzu hili Moze, I'ondrasi Zo'aya. Ba muhede khönia Zo'aya moroi yaŵa, Imane: "Ŵa'ö ba ma'uwu Yakobo, ombakha'ö ba Ndraono Gizara'eli: No mi'ila wolauGu ba niha Mesirayi ba foloheGu ya'ami khöGu ba da'e, simane moyo solohe ononia ba dete gafinia. Na edöna sa'ae ami mifondrondrongo liGu ba na lö faröi ami wolo'ö gamabu'ulaGu, tobali soi sabölö ahatö khöGu ami ba gotalua soi fefu. OkhötaGu sa gulidanö ma'asagörö. Ba ya'ami tobali sanema halöŵö famatörö ba halöŵö fa'a'ere, tobali soi ni'amoni'ö khöGu."- 2 Moz 19:2-6

Simanö daroma li Lowalangi.-                    Sato : Ma'andrö …

 

Sinunö Fanema Li : Psallite No 100                      (ma 105 Laudate No 107)

 

FOMBASO II

Taroma Li Lowalagi nihalö moroi ba zura Waulo ba niha samati ba mbanua Roma.-

Ya'ami ira talifusö!

Me bakha ba wamatörö horö so ita nasa, no mate Keriso salahida, ya'ita si no mangerogö Lowalangi. Lö sa aoha tesöndra samösa niha somasi mate salahi niha satulö. Ma göi ba niha si  sökhi, so niha si lö aiŵö itehe mate ia. Ba hiza, mate Keriso salahida, me niha si so horö ita nasa. Ba da'ö I'oroma'ö khöda wa'omasiNia Lowalangi. Mendrua manö iada'e, me no aefa ita moroi ba zalada börö wa'amate Keriso, te'orifi ita moroi ba wanguhuku Lowalangi. Me no tobali si fahuwu khö Lowalangi ita börö wa'amate NonoNia, ba ginötö me si fa'udu ita nasa khöNia, ba mendrua manö iada'e, me no sökhi gamakhaitada khö Lowalangi, i'orifi ita fa'auri Keriso ba wemaosoNia. Ba si töra moroi ba da'ö: Omuso göi dödöda ba wa'asökhi dödö Lowalangi, börö Zo'aya ya'ita, Yesu Keriso, me moroi khöNia wa tasöndra gamakhaita si sökhi khö lowalangi.- Rom 5:6-11

Simanö daroma li Lowalangi.-                    Sato : Ma'andrö …

 

Sinunö Föna Injil : Psallite No 253                              (ma Laudate No 104)

 

INJIL

Turia Somuso Dödö khö Yesu Keriso nisura Matai'o.-

Me luo da'ö, me I'ila niha sato Yesu, ahakhö dödöNia ira, me no nifakao ira, ihöndrögö tou, hulö mbiribiri na lö kubalora. Imane khö ndra nifahaöNia: "Ebolo sa mbasitö, ba lö ato zohalöŵö. Andrö mi'andrö khö Zokhö basitö andrö, ena'ö Ifatenge ndra sohalöŵö ba mbasitöNia." Ba ikaoni nifahaöNia andrö si felendrua Ibe'e khöra kuaso ba wamofanö ndra afökha, awö wamadöhö fefu ngawalö wökhö ba fa'atebai.- Da'e döi ndra rasul andrö, si felendrua: Si föföna Zimoni, nifotöi göi Fetero-Gowe, awö dalifusönia Andrea. Awena Yakobo, ono Zebedaio, ba talifusönia Yohane. Filifo ba Batolomaio; Toma ba Matai'o, sanema beo andrö; Yakobo, ono Galifaio, ba Tadaio; Simoni Selote ba Yuda, banua Gariota, simanga mböli Yesu. Ifatenge Yesu ndra rasul si felendrua andrö ba Iŵa'ö li khöra, Imane: "Böi mi'ae'e ba mbanua niha si tenga soi Lowalangi. Böi göi mi'ae ba mbanua niha Zamaria. Mi'ae'e ba Ndraono Gizara'eli, si no elungu si hulö mbiribiri. Mi'ombakha'ö khöra, wa no Ibörögö wamatörö Lowalangi. Mifadöhö niha sofökhö, mi'orifi niha si mate, mifadöhö niha sobou auri ba mifofanö ndra afökha! Lö nibe'emi böli, ba böi göi mihalö mböli."- Mat 9:36-10:8

Simanö duria somuso dödö khö Zo'aya ya'ita, Yesu Keriso.-

 

Erönua:

NIHA SAMATI SANURIAIGÖ TURIA SOMUSO DÖDÖ

Bakha ba wombaso siföföna tarongo duria Ndraono Gizara’eli andrö me larugi danö simate ba sina’i. Ba hili Sina’i falukha Ndraono Gizara’eli khö Zo’aya ba tekaoni ira, ena’ö  ahatö ira khöNia tobali soiNia, soi sanema halöŵö fa’a’ere. Iraono Gizara’eli tobali salahi soi bö’ö khö Lowalangi  bakha  ba wanuriaigö Lowalangi awö gohitö dödö Lowalangi. Salua ba ndraono Gizara’eli andre, no göi sambua famaedo khöda, ya’ia wa börö wanemada fanasa ni’amoni’ö, fao ita bakha ba ngafu soi nifili Lowalangi andrö.

Bakha ba wombaso sidua andrö tarongo wamaha’ö Waulo ba mbanua Roma, wa fa’amate Keriso andrö no femöna ba niha Keriso. Mate Yesu börö horö niha. Itaögö wamakao Yesu andrö, tenga börö wa so gömönia ba niha. Ba hiza, itaögö wa’amate Yesu andrö, börö wa’omasiNia ba wangöhöli niha moroi ba huku horö fa’amate. Fefu da’ö alua ena’ö ibohouni gamakhaitada khö Lowalangi. Ba zimanö, tenga saae sawuyu ita, ba hiza no tobali ita soi ni’amoni’ö khö Lowalangi.

Bakha ba duria Somuso Dödö andrö nihalö moroi ba zura Matai’o, tarongo wogaoni ba famatenge zi-12 nifaha’ö andrö. Fogaoni ba famatenge ya’ira andrö ya’ia ba wanuriaigö turia somuso dödö ba Ndraono Gizara’eli si no elungu. Iraono Gizara’eli andrö no soi nofili Zo’aya samösa. Ifili Ndraono Gizara’eli andrö me no soi nifili Lowalangi samösa I’oroi wamobörö.

Sitölu ngawua wombaso andrö, edöna I’be’e khöda wamaduhu’ö wa soi Gizara’eli andrö no soi ohitö dödö Lowalangi. Ya’ita niha samati si no manema fanasa Ni’amoni’ö, no tesou göi ita tobali ono Lowalangi ba tefarahu ita tobali soi Ndraono Gizara’eli. Me no tesou göi ita tobali soi Lowalangi, ba zimanö tefatenge göi ita mangawuli tobali nifaha’öNia ba wanuriagö turia somuso dödö. Amen.

 

Nifa’anö Kat. Ingatan Sihura, S.Ag.

Umbu:

Dianne Bergant, CSA & Robert J. Karris, OFM (ed) Tafsir Alkitab Perjanjian Lama Yogyakarta Kanisius, 2002

Dianne Bergant, CSA & Robert J. Karris, OFM (ed) Tafsir Alkitab Perjanjian Baru Yogyakarta Kanisius, 2002

Martin Harun, OFM, Matius Injil Segala Bangsa Yogyakarta: Kanisius, 2019

St. Eko Riyadi, Pr, Matius “Sungguh, Ia ini adalah Anak Allah” Yogyakarta: Kanisius, 2011