TAROMA LI LUO MIGU TRINITAS FONDREGE NI'AMONI'Ö DÖFI A

Liturgi Taroma Li Döfi A/B/C, hlm. 122.

FOMBASO I

Taroma Li Lowalangi nihalö moroi ba zura Moze si dua.-

Me luo da'ö, ba zihulö wongi sibai maoso Moze, möi ia miyaŵa ba hili Sina'i andrö, i'o'ö niŵa'ö Zo'aya khönia. Möi mitou Zo'aya bakha ba lawuo ba muzizio ba ngai Moze. Mu'ao Moze, imane: Yahwe! Yahwe! Awena Itörö fönania So'aya, mu'ao Ia, Imane: "Ya'odo Yahwe. Da'e döiGu: Yahwe. Lowalangi sahakhö tödö Ndra'o ba si no ebua tödö, sebolo tödö ba si no fahöna fa'oböwö, awö wa lö faröi Ndra'o."  I'anema'ö ifaöndrö ia tou ba danö Moze, ifalögu ia tou ba imane: "He So'aya, na no atö usöndra wa'ebua dödö khöU, ya toröi Ndra'ugö ba gotaluama ba ba lala döröŵama, he ŵa'ae sabe'e börö du'i sa soiMö andrö, be'e aefa khöma lalöma, awö horöma, ba halö tana khöU ndra'aga." 2 Moz 34:4-6.8-9

Simanö daroma li Lowalangi.-                    Sato : Ma'andrö …

 

Sinunö Fanema Li : Psallite No 155                            (ma Iaudate No 82, 1)

 

FOMBASO II

Taroma Li Lowalangi nihalö moroi ba zura Waulo si mendrua ba niha samati ba mbanua Gorindro.

Ya'ami ira talifusö ni'omasi'ö!

Mi'omusoi'ö dödömi, mibe'e nihaogö ami, mifondrondrongo wamarou dödömi, ya ha sara dödömi, ya atulö ami ba nawömi, ena'ö  I'o'awögö ami Lowalangi, same'e khöda fa'omasiNia ba fa'atulöNia. Faoma mi'owai nawömi fa'agosa bawa ni'amoni'ö andrö. La'owai ami niha samati khö Lowalangi andrö fefu. Ya so khömi fefu wa'ebua dödö Zo'aya ya'ita, Yesu Keriso, ba fa'omasi Lowalangi (Ama) ba fa'awösa Geheha Ni'amoni'ö! 2 Kor 13:11-13

Simanö daroma li Lowalangi.-                    Sato : Ma'andrö …

 

Sinunö Föna Injil : Psallite No 205                            (ma Laudate No 82, 2)

 

INJIL

 

Turia Somuso Dödö khö Yesu Keriso nisura Yohane.-

Me luo da'ö, Imane Yesu khö Nikodemo: "Ha wa'ebua wa'omasi Lowalangi ba niha, irege Ilulu NonoNia si ha samösa, ena'ö lö tekiko dozi samati khöNia, ba hiza, ena'ö lasöndra wa'auri sindruhu andrö. Tenga sa ba wanguhuku soi niha Ifatenge ba gulidanö NonoNia Lowalangi, ba hiza, ena'ö I'orifi ira. Na mamati niha khö Nono Lowalangi, ba lö Ihuku ira Lowalangi. Ba no muhuku niha, si lö mamati, börö me lö mamati ira khö Nono Lowalangi si ha samösa.- Yoh 3:16-18

Simanö duria somuso dödö khö Zo'aya ya'ita, Yesu Keriso.-

 

Erönua:

FAHASAMBUA NI’AMONI’Ö

Bakha ba wombaso siföföna ba fahuhuosa Moze khö Zo’aya. Ba wahuhuosara andrö oroma khöda wa  Lowalangi, So'aya  ya'ita, ba  no lowalangi  fondrege  ni'amoni'ö, si  tebai musu'a, si tebai ita wo’angeragö, ba hiza omasi Ia fahatö khöda, toröi ba gotalua soiNia ba faofao Ia khöda. Da’e alua me föna ba Ndraono Gizara'eli, ba hiza alua göi khöda. Omasi Lowalangi faofao ba wa’aurida ba toröi Ia khöda. Ba da’e moguna wa’aro dödöda wa Lowalangi andrö no sindruhu ahatö sibai Ia ba niha samati khöNia.

Bakha ba wombaso sidua göi oroma khöda hadia dötönafö ba niha samati andrö. Niha samati ba Gorindro me föna, hulö sambua banua si so fawukasa soya ba sabua, irege bakha ba zura rasul Faulo si mendrua, oya nitegunia ba ni’atulö’önia. Ba gafuriata zurania irahugö menemenenia  ba fanegunia andrö, ba ifahowu’ö göi mbanua andrö si fao fa’omasi Lowalangi, Ama, Ono ba Eheha Ni’amoni’ö. Ba wombaso andre tebotokhi ba dödöda wa börö wolo’ö khö Lowalangi andrö, tasöndra howuhowu si lö mo’aetufa asala ta’amoni’ö ia.

Bakha ba duria somuso dödö andrö tarongo hewisa wa’omasi Lowalangi wefao ba wango’awögö soiNia, I’o’awögö ira ba wa’ahakhö dödö si lö tebulö. Andrö dania itehegö NonoNia andrö, ena’ö lö tekiko dozi samati khöNia. No Isöndra lala sabölö aro Lowalangi ba wangiagö khoda ba ba wangorifi ya’ita, niha selungu ba si tekiko. Ifatenge ba Ibe’e NonoNia si ha samösa ba wangorifi ya’ita.

Sitölu ngawua wombaso andre edöna idönia’ö ita wa börö wango’awögö niha samati andrö, lö mamalö ibelegö ia Lowalangi, I’alui lala ena’ö aro khöNia zamati andrö. Hewa’ae asese fasala niha khö Lowalangi, ba hiza no möi Keriso andrö ba wangöhöli. Na fasala zui niha ba da’ö, ba lö mamalö ifatenge nasa GehehaNia andrö Ni’amoni’ö ba wangehaogö. Ba da’e oroma khöda wahasambua Nama ba Ono ba Eheha Ni’amoni’ö andrö. Fefu da’ö moguna ba wanga’a’aro’ö dozi niha samati ba khö Lowalangi.

Andrö ba niha samati, fahasambua Nama ba Ono ba Eheha Ni’amoni’ö andrö no dumaduma si sökhi ia. Faulo ba wombaso sidua zame’e khöda menemene wa si lö tolalö’ö göi so ba gotalua niha samati andrö wahasambua si lö tebulö. Tebörögö da’ö ba wa’ohauhau dödö ba lö fawukasa, irege tesöndra dania wa’agosa bawa ni’amoni’ö andrö. Ba gafuriata tola ta’angeraigö, hadia sindruhu göi no so ita ba wahasambua ni’amoni’ö andrö? Ya faoma itolo ita Lowalangi. Amen.

Nifa’anö Kat. Ingatan Sihura, S.Ag.

Umbu:

Dianne Bergant, CSA & Robert J. Karris, OFM (ed) Tafsir Alkitab Perjanjian Lama Yogyakarta Kanisius, 2002

Dianne Bergant, CSA & Robert J. Karris, OFM (ed) Tafsir Alkitab Perjanjian Baru Yogyakarta Kanisius, 2002

Martin Harun, OFM, Yohanes Injil Cinta Kasih Yogyakarta: Kanisius, 2019

St. Eko Riyadi, Pr, Yohanes “Firman Menjadi Manusia” Yogyakarta: Kanisius, 2011