TAROMA LI LOWALANGI LUO WANAHAE ZO'AYA BA ZORUGO DÖFI A

Liturgi Taromali Döfi A/B/C, hlm. 111. 

FOMBASO I : Halowo Rasul 1:1-11

FOMBASO II : Efesus 1:17-23

INJIL : Matai’o 28:16-20

 Erönua:

EHEHA NI’AMONI’Ö ZANGABÖLÖ’Ö NIHA BA WAMATI

Bakha ba wombaso siföföna nihalö moroi ba zura Halöwö ndra Rasul, sindruhu te’oroma’ö khöda hewisa gofanöwa wanahae Yesu andrö ba Zorugo. Siföföna sibai ta’ila hewisa ndra Rasul andrö si lö aboto ba dödö hadia geluaha wehede Yesu andrö sanandrösa ba wanasa nibe’e Yohane ba fanasa nibe’e Yesu. Fanasa nibe’e Lowalangi andrö ya’ia wanasa Geheha Ni’amoni’ö. Ba wanasa ni’amoni’ö andrö te’efa’ö niha samati moroi ba ngawalö horö. Ba hiza fanasa moroi ba Geheha Ni’amoni’ö andrö ba no fangabölö ba wanuriaigö turia sahölihöli dödö andrö. Ha sambua gangandröwa Yesu ya’ia ena’ö böi muröi Yerusalema.

Bakha ba wombaso sidua andrö tarongo gangandröwa Waulo ba niha samati ba mbanua Nefeso. Angadröwa Waulo andrö ya’ia ena’ö tebe’e ba niha samati Geheha Ni’amoni’ö sioroi Lowalangi, Ama Zo’aya ya’ita Yesu Keriso. I’andrö Geheha Ni’amoni’ö andrö ena’ö dozi niha sanema Eheha andrö so khöra wa’atuatua ba wa’aboto ba dödö haniha Lowalangi andrö. Eheha Ni’amoni’ö andrö göi dania zohagaini dödö niha samati ena’ö fa’aboto ba dödö niha samati hadia dötönafö Lowalangi ba wogaoniNia niha samati. Ba gangowalu niha samati andrö tefasindro dania Gereja andrö si no sambua boto ba Keriso andrö no högö.

Bakha ba wombaso Turia Somuso Dödö andrö tarongo wamatenge Yesu ira nifaha’ö ba wanuriaigö Turia Somuso Dödö andrö irugi wondrege danö. Ba wanuriaigöra andrö I’andrö ena’ö tebali’ö ira tobali soiNia ba tesasai fefu niha ba döi Nama ba Ono ba Eheha Ni’amoni’ö. Ba wamalua da’ö fefu, ha sambua gamabu’ula Yesu, ya’ia wa lö faröi Ia ba nifaha’öNia. Fa’alöfaröiNia andrö tefaudugö ia ba we’aso Geheha Ni’amoni’ö andrö.

Sitölu ngawua wombaso andre, edöna idönia’ö ita wa Eheha Ni’amoni’ö andrö lö faröi ba niha samati. Fa’alöfaröiNia andrö te’oroma’ö ba we’aso Geheha Ni’amoni’ö. Eheha Ni’amoni’ö andrö ba no sondrara dödö ba niha samati. Baero da’ö Eheha Ni’amoni’ö andrö zangabölö’ö niha samati irege so khöra wa’aboto ba dödö Lowalangi ba so khöra wa’aro wamati. Ba we’aso Geheha Ni’amoni’ö andrö göi dania zangabölö’ö niha samati ba wanuriaigö Turia andrö irugi wondrege danö. Fa’abölö wanuriaigö andrö tola oroma ia ba wehede, ba gamuata, ba mendrua menö ba ni’era’era dödö. Ba gafuriata tola manufu ita ba dödö zamösana, hewisa ita ba wanema’ö Eheha andrö? Hadia no göi fao khöda Geheha Ni’amoni’ö andrö? Ya lö mamalö itolo ita Lowalangi. Amen.

 

Nifa’anö Kat. Ingatan Sihura, S.Ag.

Umbu:

Dianne Bergant, CSA & Robert J. Karris, OFM (ed) Tafsir Alkitab Perjanjian Lama Yogyakarta Kanisius, 2002

Dianne Bergant, CSA & Robert J. Karris, OFM (ed) Tafsir Alkitab Perjanjian Baru Yogyakarta Kanisius, 2002

Martin Harun, OFM, Matius Injil Segala Bangsa Yogyakarta: Kanisius, 2019

St. Eko Riyadi, Pr, Matius “Sungguh, Ia ini adalah Anak Allah” Yogyakarta: Kanisius, 2011