Liturgi Taroma Li Döfi A/B/C hlm. 114.
FOMBASO I
Taroma Li Lowalangi nihalö moroi ba zura "Halöŵö ndra Rasul".-
Me luo da'ö, me no aefa manahae Yesu ba zorugo, Mangawuli ndra rasul moroi ba hili andrö, sotöi Hili Wanikha, numalö ba Yerusalema. Arakhagö sakilo wa'aröu hili andrö moroi ba Yerusalema. Me no larugi yomo, möi ira yaŵa ba mbate'e tanö yaŵa. Ba da'ö soso ira, ya'ia da'ö: Fetero ba Yohane ba Yakobo ba Andrea ba Filifo ba Toma ba Batolomaio ba Matai'o ba Yakobo, ono Galifai'o, ba Simoni Selote, ba Yuda, ono Yakobo. Da'ö fefu zi lö aefa'aefa mangandrö, ha sara dödö, awö ndra alawe andrö, awö Maria, ina Yesu, ba ira talifusö Yesu.- HalRas 1:12-14
Simanö daroma li Lowalangi.- Sato : Ma'andrö …
Sinunö fanema Li : Psallite No 17, 1-2 (ma Laudate No 9, 1-2 ma 79, 1-2)
FOMBASO II
Taroma Li Lowalangi nihalö moroi ba zura Wetero si föföna.-
Ya'ami ira talifusö ni'omasi'ö!
Ya omuso dödömi, na fao awömi Keriso ba wanaha famakao. Dania, na no to'ele lakhömi Keriso ba niha fefu, sowuawua tödö ami. Mohare ami, na larisa ami, börö solo'ö Keriso ami. Eluaha: No ahono ba khömi Geheha Lowalangi, Eheha lakhömiNia. Böi so samösa ba gotaluami zanaha famakao, börö me no mamunu niha ia ba ma managö ia ba ma mamazökhi si lö sökhi ba ma ihalö khönia noro niha bö'ö. Na mitaha wamakao, börö me niha keriso ami, böi aila ami, ya musuno Lowalangi, börö döi Keriso andrö.- 1 Fet 4:13-16
Simanö daroma li Lowalangi.- Sato : Ma'andrö …
Sinunö Föna Injil : Psallite No 241 (ma Laudate No 9, 3 ma 79, 3)
INJIL
Turia Somuso Dödö khö Yesu Keriso nisura Yohane.-
Me luo da'ö, Ifaöga höröNia Yesu miyaŵa ba zorugo, Imane: "He Ama, no irugi inötö iada'e: Folakhömi NonoU, ena'ö tola Ifolakhömi Ndra'ugö OnoU göi. No Öbe'e ba danga Nono kuaso ba zi sagörö ulidanö, ena'ö Ibe'e wa'auri sindruhu ba niha nitou'ö ba dangaNia. Da'e wa'auri sindruhu, na aboto ba dödö niha Ndra'ugö, Lowalangi sindruhu ba ena'ö aboto ba dödöra Yesu Keriso, nifatenge Nama. No Ufolakhömi Ndra'ugö ba gulidanö andre ba no U'asiwai halöŵö nibe'eU khöGu. He Ama, fuli be'e khöGu lakhömi si no so khöGu ba ngaiMö, fatua lö muwöwöi gulidanö andre. No Ufa'ele'ö Ndra'ugö ba niha andrö, nibe'eU khöGu moroi ba niha gulidanö. Tana khöU ira, ba no Öbe'e khöGu, ba no la'o'ö liU. Aboto sa'ae ba dödöra, wa sindruhu moroi khöU fefu hadia ia nibe'eU khöGu. No Ufa'ema khöra daroma li andrö nibe'eU khöGu, ba no latema. Sindruhu no aboto ba dödöra, wa moroi khöU U'otarai, ba lö mangiŵa dödöra, wa no Ya'ugö zamatenge Ya'o. Mangandrö Ndra'o salahira, tenga salahi niha gulidanö mangandröDo, khöra sa, nibe'eU khöGu, börö me tana khöU ira. Fefu zi so khöGu, no khö Nama göi; ba fefu zi so khö Nama, no khöGu. Tefolakhömi ndra'o ba khöra.- MöiDo khö Nama iada'e. Lö toröi Ndra'o sa'ae ba gulidanö. Ba hiza, so ira nasa ba gulidanö. He Ama Ni'amoni'ö, rorogö ira faoma fa'abölöU, si no Öbe'e khöGu, ena'ö ha sambua ira, simane Ya'ita.- Yoh 17:1-11
Simanö duria somuso dödö khö Zo'aya ya'ita, Yesu Keriso.-
Erönua:
Bakha ba wombaso siföföna andrö tarongo, hewisa waöwaö ndra nifaha’ö andrö me no aefa manahae Yesu. La’o’ö li Yesu wa böi laröi Yerusalema. Fe’asora ba Yerusalema andrö ba sifao fangandrö labalobaloi ira nifahaö we’aso Geheha Ni'amoni'ö si no ifabu’u Yesu khöra. Fanema’öra Eheha Ni’amoni’ö andrö ba no fa'atumbu Gereja. Börö wa-ha-sambuara ba he göi fa-ha-sambuada wa tola tetehegö wangandröra ba he göi fangandröda: So göi ba da’ö Maria, ina Yesu, si tobali ina Gereja göi.
Bakha ba wombaso sidua nihalö moroi ba zura Wetero siföföna andrö, sindruhu lö mamalö i’abe’e’ö dödö dozi niha samati ba wanaögö famakao börö Keriso. Na so niha nihuku börö zalania ba haniha zi te’ala börö me fasala ia wangai angetula, sinangea na itaögö wanguhuku ba fa’atosasa si fao fa’ebolo dödö. Famakao awö wa’atosasa börö döi Keriso, ba no umbu wa’amosumange ba fa’omuso dödö, he ŵa’ae na te’ala ita börö wa’atulöda. Tola aila ita iada’a börö Keriso, ba hiza ba wa’amolakhömiNia andrö tasöndra dania zulö si lö tola ihalö khöda niha.
Turia somuso dödö andrö nisura Yohane, ifaduhu’ö khöda wangandröNia khö NamaNia andrö. I’asiwai wa’auri Yesu ba gulidanö si fao fangandrö. Si föföna soguna khöNia samösa, aefa da’ö soguna khö ndra nifahaöNia ba ba gafuriatania soguna ba niha fefu si faduhu tödö khöNia, eluahania soguna khöda göi. Hadia, tola taŵa’ö ba gamozua wa’aurida, wa no taturiaigö döi Nama ba zahatö khöda ba ba niha bö’ö?
Sitölu ngawua wombaso andre, sindruhu teturiaigö khöda wa Eheha Ni’amoni’ö andrö, no Sondrara tödö ia. Baero da’ö, Eheha Ni’amoni’ö andrö no samatumbuö Gereja si no angowulua niha samati. Ba wahasambua niha samati andrö, lö mamalö I’andrö khöda wa böi taböhöi Yerusamela. Yerusalema andrö ya’ia nahia wangandrö ba nahia wanaögö famakao. Fangandrö ba no fanou’ö lala wa’auri ba gamatöröwa Lowalangi samösa. Fanaögö famakao börö Keriso andrö ba no sambua fangehaogö wamati. Da’ö na lawa’ö: Böi ege’ege ba mbawa wa’olofo, no manaronaro fönau mbawa wa’abuso. Da’e geluahania wa, ya’ita niha samati andrö sanaögö famakao börö Keriso, lö mamalö tasöndra zulö lakhömi andrö ba gamozua wa’aurida ba khö Lowalangi. Fahasambua niha samati, lö mamalö ilumö’ö Eheha Ni’amoni’ö. Ba börö wa’abölö wangandrö andrö, fahasambua niha samati andrö, faoma te’abölö’ö ba terorogö.
Afuriatania tola tasofu ba dödöda zamösana, hadia no sindruhu ita tobali niha samati? Hadia no göi faböbö ita ba gangowuloa niha samati? Hadia göi zi tola tafalua ba wombaloi we’aso Geheha Ni’amoni’ö andrö? Ba ba gafuriata, hadia no taturiaigö ia ba gotaluada ya’ita niha samati? Ya lö mamalö sinangea ita ba wombaloi we’aso Geheha Ni’amoni’ö andrö. Amen.
Nifa’anö Kat. Ingatan Sihura, S.Ag.
Umbu:
Dianne Bergant, CSA & Robert J. Karris, OFM (ed) Tafsir Alkitab Perjanjian Lama Yogyakarta Kanisius, 2002
Dianne Bergant, CSA & Robert J. Karris, OFM (ed) Tafsir Alkitab Perjanjian Baru Yogyakarta Kanisius, 2002
Martin Harun, OFM, Yohanes Injil Cinta Kasih Yogyakarta: Kanisius, 2019
St. Eko Riyadi, Pr, Yohanes “Firman Menjadi Manusia” Yogyakarta: Kanisius, 2011
0 comments:
Posting Komentar