HOHO ZATUA BA DANÖ

Hadauga nama niha ba danö

Ama sendroro böröta nga’ötö

Ya’ia nama si so ba ngai mbatö

Ya’ia zabölö wohalöwö

Ya’ia zangalui soguna bongi ma’ökhö

Yaia zanaha bawa ndri mböhö

Ya’ia zimöi föna samelegö

Na so nemali sanuwö

 

Haniha wanete zatua sitenga bö’ö

Ya’ia nama matuamö

Ya’ia zame’e khöu ononia nihalö

Ya’ia zame’e khöu sitambali tuho dödö

Ononia dania ndrela nga’ötö

Zame’e khöu ono hunö dödö

Andrö wa’atöla mbanua fasitenga bö’ö

Börö mböwö si lö aetu sagötö tanö

 

Samosa tö zatua sitebai mu’ositengagö

Ya’ia namau sibayamö

Ya’ia göi mbörö danötanö

Ya’ia mbörö howuhowu ba danö

Si lö mamalö ia ba wangandröngandrö

Khö Zo’aya sokhö ulidanö

Ena’ö sökhi lala gosisitö

Ena’ö teboka nasa gumbu löfö

 

Baböi höwöhöwö namamö

Amau sendroro ndraugö

Ifana bulu za’usö

Böli wakhe zahulö

Öu me iraono ndraugö

Baböi höwöhöwö nuwumö

Ba böi hoehoe zibayamö

Iböbö gahedalaho ndrögö

Idögö ba mbawa galitö

Ba abila zara gahemö

Aköi dambai mbö’ötömö

Ba ebua dalu nahagömö

Bötö zambua gamu’umö

 

Baböi höwöhöwö ninamö

Inau sanaba fusömö

Iwaitö ngai ba sabasöbasö

Bawondrorogö ya’ugö

Me ide’ide’ö

 

Baböi höwöhöwö nonomö

Baböi hoe-hoe mazonomö

Lö samaföfö halöwö

Lösamahea halöwömö

Lö same bawi same böwö

Lö same ana’a sa’usö

 

Nifa’anö Kat. Ingatan Sihura