TAROMA LI LOWALANGI LUO MIGU PASKA SI – 4 DÖFI A

Liturgi Taromali Döfi A/B/C, hlm. 103.

FOMBASO I

Taroma Li Lowalangi nihalö moroi ba zura "Halöŵö ndra Rasul".-

Me luo da'ö, ba maoso Wetero, awö ndra rasul si felezara bö'ö, muhede ia, imane ba niha sato: "Ya aboto sibai iada'e ba dödö ma'uwu Gizara'eli fefu, wa Yesu andrö, niforöfami, no Ibali'ö Lowalangi tobali So'aya ba Keriso." Me larongo da'ö, oi awakhöwakhö dödö niha ba lasofu khö Wetero awö ndra rasul bö'ö, lamane : "Hadia nilauma, ya'ami ira talifusö?" Imane Fetero khöra: "Miwu'ai gera'erami ba miröi gamuata si lö sökhi. Mitehegö wanema fanasa, dozi ami, ba döi Yesu Keriso ba wangefa'ö horömi. Awena mitema mbuala Lowalangi andrö, Eheha Ni'amoni'ö. Khömi sa gamabu'ula li Lowalangi andrö ba ba ndraonomi ba he göi ba zi so ba zaröu nasa, gofu ha wa'ato nikaoni Zo'aya, Lowalangida dania." Simanö wamoboto Wetero ba dödöra. Ba faoma fehede tanö bö'ö nasa ifarou dödöra, imane : "Miheta ami ba niha si tefuyu tödö andre, nihuku Lowalangi dania!" Ato zi faduhu tödö ba niŵa'ö Wetero ba latema wanasa ni'amoni'ö. Monönö niha samati ba zi ma'ökhö andrö mato tölu ribu niha.- HalRas 2:36-41

Simanö daroma li Lowalangi.-                    Sato : Ma'andrö …

 

Sinunö Fanema Li : Psallite No 23                        (ma Laudate No 103, 1-2)

 

FOMBASO II

Taroma Li Lowalangi nihalö moroi ba zura Wetero si föföna.-

Ya'ami ira talifusö!

Na lafakao ami, he ŵa'ae no milau zi sökhi, ba na so wa'ebolo dödömi, da'ö zomasi Lowalangi. Ba da'ö sa no Ikaoni ami. No Itaögö göi wamakao Keriso salahimi ba no Iröi dumaduma khömi, ena'ö mitara laheNia. Lö irai Ifazökhi horö, ba lö murongo walimosa ba mbeweNia. Me la'o'aya Ia, lö Ifuli I'o'aya. Me lafakao Ia, lö Ifangaha wolau balö, ba hiza, Ibe'e manö gamatunöŵaNia ba danga Lowalangi, sanguhuku satulö andrö. Ya'ia samösa zolu'i horöda ba mbotoNia miyaŵa ba döla röfa. Börö da'ö no aefa ita ba gamatöröŵa horö, ba tola auri ita molo'ö somasi Lowalangi. Sokho Keriso zamadöhö ya'ita. Hulö mbiribiri sa, si no elungu, ami föna, ba no sa'ae mifuli ami khö Keriso, kubalo ba sondorogö fa'aurimi. 1 Fet 2:20b-25

Simanö daroma li Lowalangi.-                    Sato : Ma'andrö …

 

Sinunö Föna Injil : Psallite No 239          (ma Laudate No 103, 3 ma 106, 4)

 

INJIL

Turia Somuso Dödö khö Yesu Keriso nisura Yohane.-

Me luo da'ö, Imane Yesu khö ndra nifahaöNia: "Sindruhu niŵa'öGu khömi: Niha si möi bakha ba kandra mbiribiri, sanawö ba'aba'a, si lö manörö bawandruhö, no sanagö da'ö ba samara'u. Niha sanörö bawandruhö, da'ö gubalo mbiribiri. Khönia ibokai mbawandruhö sanaro, ba larongo li gubalo biribiri, na ikaoni ira molo'ö töira, ba i'ohe baero. Ba na no i'ohe baero mbiribiri andrö, mowaöwaö ia fönara ba la'o'ö ia moroi furi biribiri, me la'ila linia. Lö la'o'ö niha bö'ö. Lalau na'i moloi, börö me lö la'ila li niha bö'ö." Amaedola andrö Iŵa'ö Yesu khö ndra nifahaöNia, ba lö aboto ba dödöra niŵa'öNia khöra. Börö da'ö, Ifuli Imane Yesu: "Sindruhu niŵa'öGu khömi : Ya'odo mbawandruhö ba mbiribiri andrö. Dozi ira ha wa'ato zanguhulö Ya'o, no sanagö ba samara'u, ba lö lafondrondrongo lira biribiri. Ya'odo mbawandruhö: Na so zanörö Ya'o, we'amöi bakha, da'ö ni'orifi. Möi ia bakha ba möi ia baero, lö mamalömalö isöndra gö. Lö möi zanagö, na tenga ba wanagö ba ba wamunu ba ba wamakiko. Tani wa so Ndra'o, ena'ö lasöndra wa'auri solo'ö liGu ba ena'ö fahöna khöra wa'auri andrö." Yoh 10:1-10

Simanö duria somuso dödö khö Zo'aya ya'ita, Yesu Keriso.-

 

Erönua:

YESU GUBALO SOLOHE NIHA SAMATI BA KHÖ LOWALANGI

Bakha ba wombaso siföföna nihalö moroi ba zura Halöwö ndra Rasul, no famaduhu siföföna sibai nifalua ndra Rasul me no maoso Yesu moroi ba gotalua zimate. Tuho huhuo si föföna nifa'ema Wetero ya’ia Yesu  niforöfa börö  horö niha, no tefolakhömi, tobali So’aya ba Lowalangi niha samati. Turia da’e si oföna sibai mufa'ema ba Ndraono Gizara’eli, aefa da’ö ba soi  saröu. Iraono Gizara’elei no soi nifili Lowalangi. Fama’ema turia siföföna ba Ndraogo Gizara’eli andrö, no sambua famaduhu’ö wa Turia Somuso Dödö andrö teturiaigö ia siföföna sibai ba niha nifili. Niha nifili andrö ba ya’ia niha samati. Ba zimanö tola tasofu ba dödöda; hadia, sindruhu no tobali So’aya ba Lowalangi, Yesu andrö ba wa’aurida?

Fombaso si dua andrö nihalö moroi ba zura Wetero siföföna, no sambua menemene ma fangaro dödö niha samati. Na mutaögö wamakao ba zi lö horöda ba lalau khöda zi lö atulö, ba fa’ebolo dödö mufalua. Famakao Yesu andrö no tobali famaedo sebua ia ba niha samati. Lö sala ba lö nifaluaNia horö, ba hiza Ilu’i horö niha irugi mate ba döla röfa.  Ba zimanö, na tataögö wamakao ba fa’afökhö, moguna sibai ta’erönusi ia sifao famati ba khö Keriso wa da’ö fefu no fanandraigö niha samati.

Bakha ba Duria Somuso Dödö tarongo wehede Yesu sanandrösa ba gubalo ba biribiri. Kubalo sokhö biribiri, na möi ia wamaigi biribirinia, itörö mbawandruhö ba larongo linia biribirinia awö wa la’o’ö ia na idönisi mbiribiri andrö ba ndru’u satabö. Ba hiza na niha samarabu ia, lö itörö mbawandruhö, lö larongo linia biribiri andrö, ba lö la’o’ö ia ba wofanö ba hiza lalau moloi. Amaedola gubalo ba biribiri andrö nibe’e Yesu, edöna ifaehagö wa Lowalangi zokhö hadia ia, ba hiza Yesu no tobali ia bawandruhö ba wondrugi fa’auri si lö aetu andrö khö Nama. Yesu sa gubalo sondrönia’ö niha samati ba wanöndra fa’auri si lö aetu khö Nama ba Zorugo.

Sitölu ngawua wombaso andre idönia’ö ita ba wamati khö Yesu si no maoso andrö moroi ba gotalua zimate, ba si no tobali So’aya ba Lowalangi khöda ya’ita niha samati. Ya’ia no tobali dumaduma khöda. Börö wolu’iNia horöda watola tasöndra wa’auri si lö aetu andrö. Ya’ia sa mbawandruhö khöda ba wanöndra fa’auri si lö aetu. Ya’ia göi zi no famaedo khöda ba wanaögö famakao ba lala wa’aurida. Fanofu khöda zamösana, hadia no sindruhu mamati ita khö Yesu andrö? Hadia sindruhu no tabali’ö ia khöda dumaduma ba wamati? Ya lö mamalö itolo ita Lowalangi ba wanuriaigö famati andrö ba lala wa’auri si’ero ma’ökhö. Amen.

Nifa’anö Kat. Ingatan Sihura, S.Ag.

Umbu:

Dianne Bergant, CSA & Robert J. Karris, OFM (ed) Tafsir Alkitab Perjanjian Lama Yogyakarta Kanisius, 2002

Dianne Bergant, CSA & Robert J. Karris, OFM (ed) Tafsir Alkitab Perjanjian Baru Yogyakarta Kanisius, 2002

Martin Harun, OFM, Yohanes Injil Cinta Kasih Yogyakarta: Kanisius, 2019

St. Eko Riyadi, Pr, Yohanes “Firman Menjadi Manusia” Yogyakarta: Kanisius, 2011