TAROMA LI LOWALANGI LUO MIGU SI - 5 BA GINÖTÖ FÖNA PASKA DÖFI A

Liturgi Taroma Li Döfi A/B/C hlm. 56

Fombaso I                : Hezekieli 37:12-14

Fombaso II              : Roma 8:8-11

Fombaso Injil         : Yohane 11:3-7.17.20-27.34-45

LEWATÖ BA EHEHA NI’AMONI’Ö

Ba wombaso siföföna tarongo wama’ele’ö Hezeki’eli sanandrösa ba Ndraono Gizara’eli. So’aya dania zamokai lewatö soiNia Izara’eli. Ba wamokai lewatö andrö dania aboto ba dödö soiNia andrö wa no Ya’ia Yahwe, Si So andrö. I’oguna’ö wamaedo lewatö andrö me I’ila wa Iraono Gizara’eli hulö zi no mate, börö me lö khöra fehulu dödö. Andrö dania wa Ifabu’u So’aya, wa ifatenge GehehaNia ba wangorifi ya’ira mangawuli. Eheha fa’aboto ba dödö Zo’aya andrö sa zanuturu lala ba soi andrö wangi’ila hania Zo’aya andrö.

Famaha’ö Waulo andrö ba mbanua Roma, edöna ifaduhu’ö khöda wa Eheha andrö zanoloni dozi niha samati. Bakha ba wa’abölö GehehaNia, Eheha Ni’amoni’ö, Ifazökhi gulidanö Lowalangi. EhehaNia zanusugi Yesu göi moroi ba lewatö, ba ngaluo si tölu. Eheha Ni’amoni’ö göi dania nifabu’u Yesu ba niha samati khöNia me mangawuli ia khö Nama ba zorugo. Eheha Lowalangi andrö dania zangefa’ö niha samati moroi ba wa’atebai ba Ifasao ba wa’auri si lö falemba zi lö sökhi.

Lazaro andrö bakha ba wombaso Turia Somuso Dödö, no si fahuwu khö Yesu. Fa’amate Lazaro andrö, no lala wa’auri wa’aniha. Hiza börö wa’ahakhö dödö Yesu, ba sifao fa’abölö Geheha Lowalangi, Isusugi Lazaro andrö moroi ba Lewatö. Fanusugi Lazaro andrö moroi ba lewatö, sindruhu no simöi fangoroma’ö lakhömi Lowalangi ba niha samati, irege niha si so ba sangila femaoso Lazaro andrö, mamati ira khö Yesu.

Sitölu ngawua wombaso andre, sindruhu ibe’e khöda sambua gerönua sebua ya’ia lewatö ba Eheha Ni’amoni’ö same’e fa’abölö. Ba lala wa’aurida sero ma’ökhö, lewatö andrö no tödöda samösa. Bakha ba dödöda fahöna ngawalö hadia ia, ba hiza na lö Eheha Ni’amoni’ö, hulö zi lö fa’auri ba dödöda. Tödöda andre göi ba no nahia Geheha Ni’amoni’ö andrö khö Lowalangi. Eheha Ni’amoni’ö zangabölö’ö famati si so ba dödö ierege idönia’ö ba wa’auri si lö aetu. Lö mamalö isusugi dödöda Lowalangi ba ginötö föna paskah andre, ena’ö sinangea ita föna Lowalangi ba wefao ba paskah NonoNia andrö Yesu Keriso. Amen.

 

Nifa’anö Kat. Ingatan Sihura, S.Ag.

Umbu:

Biro Liturgi Keuskupan Sibolga, Liturgi Taroma Li Döfi A/B/C Buku Bacaan Untuk Upacara Hari Minggu dan Hari Raya dalam Bahasa Nias, Gunungsitoli, Keuskupan Sibolga, 2012

Dianne Bergant, CSA & Robert J. Karris, OFM (ed) Tafsir Alkitab Perjanjian Lama Yogyakarta Kanisius, 2002

Dianne Bergant, CSA & Robert J. Karris, OFM (ed) Tafsir Alkitab Perjanjian Baru Yogyakarta Kanisius, 2002

Martin Harun, OFM, Yohanes Injil Cinta Kasih Yogyakarta: Kanisius, 2019

St. Eko Riyadi, Pr, Yohanes “Firman Menjadi Manusia” Yogyakarta: Kanisius, 2011