TAROMA LI LOWALANGI LUO MIGU PASKA SI – 5 DÖFI A

Liturgi Taroma Li Döfi A/B/C hlm. 105.

FOMBASO  I

Taroma Li Lowalangi nihalö moroi ba zura "Halöŵö ndra Rasul".-

Me luo da'ö, me tobali ato niha keriso ba Yerusalema, alua wasöndrata dödö ba niha samati samake li Yunani ba niha samati samake li Ibrani. Lamane samake li Yunani: "Ira lakha mbanua khöma, lö göna ira wanolo ba zoguna sero ma'ökhö nibagibagi ba niha." Andrö la'owuloi niha samati fefu ira rasul si felendrua, lamane: "Lö sökhi, na maröi halöŵö wanuriaigö taroma li Lowalangi ba we'amöi ngoningoni ba wemanga. Börö da'ö, ya'ami ira talifusö, mifili ba gotaluami dafitu zi sökhi turia ba si no fahöna Eheha ba fa'atuatua, ena'ö mafataro ira ba halöŵö andrö. Ba ya'aga, lö tebulö ndra'aga ba wangandrö ba ba wangombakha taroma li". Fao dödö zato fefu ba niŵa'ö ndra rasul andrö. Lafili Zitefano, niha si no fahöna famati ba Eheha Ni'amoni'ö,- ba Filifo ba Prokhoro ba Nikano ba Timo ba Parmena ba Nikola'o, niha proselita moroi mbanua Andriokhia. La'ohe ira khö ndra rasul. Me mangandrö ira rasul khöra, latufa högöra tanga. Itugu teboloso daroma li Lowalangi ba itugu ato niha Keriso ba Yerusalema.- HaIRas 6:1-7a

Simanö daroma li Lowalangi.-                    Sato : Ma'andrö …  

 

Sinunö Fanema Li : Psallite No 33, 1-3                           (ma Laudate No 9 ma 72)

 

FOMBASO II

Taroma Li Lowalangi nihalö moroi ba zura Wetero si föföna.-

Ya'ami ni'omasi'ö !

Mi'ondrasi Keriso, Gowe sauri andrö, nitibo'ö niha, me laŵa'ö tödöra lö moguna, ba nituyu Lowalangi, si tobali gowe sebua böli khöNia. Ya'ami no simane gowe sauri göi. Börö da'ö, ya’omasi ami ni'oguna'ö ba wangotomosi omo Lowalangi ba Geheha. No Ibe'e khömi Lowalangi wa'a'ere ni'osambalö'ö khöNia, ena'ö mifasömba'ö fasömbata wa'aurimi,  fasömbata somasi Lowalangi, si fao fama'ema Yesu Keriso. No tesura ba zura ni'amoni'ö: No Utuyu sambua gowe sebua böli, nibe'eGu ba Ziona, si tobali gowe danedane ba watalinga. Lö falukha wa'aila niha samati khöNia. Gowe andrö sebua böli khömi ya'ami samati khö Yesu Keriso. Ba niha si lö mamati, no tobali danedane ba watalinga gowe andrö, nitibo'ö zotomo, irege tobali gowe nitendre ba kara börö wa'ate'ala. Manendre ira, me lö la'o'ö daroma li si no tehonogöi khöra.- Ya'ami no soi nituyu, ira ere ba razo, soi ni'amoni'ö, gana tana khö Lowalangi samösa. No Ikaoni ami Lowalangi moroi ba wa'ogömigömi ba we'amöi ba hagaNia sahölihöli dödö, ena'ö mituriaigö nilau wa'abölöNia andrö.- 1 Fet 2: 4-9

Simanö daroma li Lowalangi.-                       Sato : Ma'andrö …

 

Sinunö Föna Injil : Psallite No 232                              (ma Laudate No 9)

 

INJIL

Turia Somuso Dödö khö Yesu Keriso nisura Yohane.-

Me luo da'ö, Imane Yesu khö ndra nifahaöNia: "Böi mibusi dödömi! Mi'amati khö Lowalangi ba mi'amati khöGu. Oya nahia ba nomo namaGu. Na tenga simanö mena'ö, lö Uŵa'ö khömi da'ö. Udaridari ba wangöhönagö nahia khömi. Na no aefa Uhönagö nahia khömi, mangawuliDo wamaondragö ya'ami, ena'ö so ami göi ba zi so Ya'o. Mi'ila sa lala ba nahia si möi Ndra'o." Imane khöNia Toma: "He So'aya, lö ma'ila heza möi Ndra'ugö. Hewisa wa tola ma'ila lala?" Imane khönia Yesu : "Ya'odo lala we'amöi khö Nama; Ya'odo zangombakha haniha Ia, ba Ya'odo göi zame'e fa'auri ba niha. Lö si möi khö Nama, na lö itörö Ndra'o. Na no aboto ba dödömi Ndra'o, no aboto göi ba dödömi NamaGu. I'otarai iada'e no aboto ba dödömi Ia ba no mi'ila Ia." Imane Filifo khö Yesu: "He So'aya, foroma'ö khöma Nama andrö, ena'ö ahono dödöma!" Imane khönia Yesu: "Ha wa'ara no faofao Ndra'o khömi, Filifo, ba lö nasa aboto ba dödöu, Ndra'o ? Si no mangila Ya'o, da'ö zangila Ama. Hana wa öŵa'ö: Foroma'ö khöma Nama? Hadia lö faduhu dödöu, wa ha sambua Ndra'aga Nama, Ya'ia ba khöGu ba Ya'o ba khöNia? Fefu niŵa'öGu andre khömi, tenga nilau dödöGu. Ama andrö sangiagö Ya'o, da'ö zangohalöŵögöigö fefu da'e. Mifati khöGu, wa ha sambua khöGu Nama ba Ya'o sambua khöNia. Na lö'ö mamati ami ba wehedeGu, mi'amati sa ba halöŵö nilauGu andrö. Sindruhu niŵa'öGu khömi: Samati khöGu tola ilau fefu zi no Ulau andrö, ba sebua nasa tola ilau, börö me möi Ndra'o khö Nama."- Yoh 14:1-12

Simanö duria somuso dödö khö Zo'aya ya'ita, Yesu Keriso.

 

Erönua:

YESU: ERE NIHA SAMATI

Taroma Li Lowalangi nihalö moroi ba zura Halöwö ndra Rasul, no sambua halöwö ba wanutuyu ira sanoloni halöwö ndra rasul. So dafitu niha nifilira andrö, siföföna halöwöra ya’ia ba wangobadödöi (memperhatikan) ira lakha mbanua. Sidafitu andre yaia Zitefano, Filifo, Prokhoro, Nikano, Timo, Parmena, Nikola'o. Na ba ginötö iada’a tefotöi ira yaia Diakon. Diakon andre no sambua faosatö ba gofanöwa we’amöi tobali ere. Fanutuyu ira Diakon andre ena’ö mo’ofanöwa lala wanuriaigö Turia Somudo Dödö, ba lö göi niha ni’ositengagö.

Taroma li Lowalangi nihalö moroi ba Zura Wetero siföföna andrö, no sambua famaha’ö ba wahasambua niha samati ba khö Lowalangi. Ba wangondrasi Lowalangi andrö, asese sibai lawa’ö niha, ha ba we’amöi ba gereja ma ba gosali. Ba hiza nahia gowuloa niha samati nifotöi gereja ma gosali andrö, ha ba wangowasaini wamati saae da’ö. Ba hiza ya aboto ba dödöda, wa Gereja sindruhu, ya'ia wa-ha-sambua niha samati fefu khö Yesu Keriso. Fetaroda ba Gereja, ba halöŵöda ba da’ö, tefa’oli ba dadaomada zamösana tobali ndrotondroto sifaoma manundreheni ba faoma mangobadödöi. So zondrönia’ö ya'ita ya’ia ndra ere si no mututuyu, ba so göi nidönia’ö. Fefu da’ö, ena’ö sitehulu tödö ita wangondrasi Keriso Gowe sauri andrö.

Turia Somuso Dödö andrö nisura Yohane no sambua fahuhuosa Yesu awö ndra nifaha’ö andrö, mo’akhaita ba lala wondrugi khö Nama ba zorugo. Yesu zangehaogö nahia khöda ba nomo nama, awö wa no ya’ia lala ba wondrugi khö Nama. Yesu zi no tobali ere ba khöda, Ya’ia göi nifatida, ba ya’ia duho wamatida. Ba wamati khö Yesu andrö so ita ba wahasambua khö Nama.

Sitölu ngawua wombaso andre ifaduhu’ö khöda wa ba wahasambua niha samati andrö lö mamalö so nifotöi sondrönia’ö. Sondrönia’ö andrö zololohe tanga, satuturu lala, samobawa lala, ba sondrönia’ö ba wangobadödöi fefu ndrotondrotonia. Yesu si no Ere khöda ya’ita niha samati, lö mamalö so ita ba wahasambua niha samati andrö.

 

Nifa'anö: Kat. Ingatan Sihura, S.Ag.

Umbu:

Dianne Bergant, CSA & Robert J. Karris, OFM (ed) Tafsir Alkitab Perjanjian Lama Yogyakarta Kanisius, 2002

Dianne Bergant, CSA & Robert J. Karris, OFM (ed) Tafsir Alkitab Perjanjian Baru Yogyakarta Kanisius, 2002

Martin Harun, OFM, Yohanes, Injil Cinta Kasih Yogyakarta: Kanisius, 2019

Petrus Danan Widharsana & R.D. Victorius Rudy Hartono, Pengajaran Iman Katolik Yogyakarta: Kanisius, 2017

St. Eko Riyadi, Pr, Yohanes “Firman Menjadi Manusia” Yogyakarta: Kanisius, 2011