TAROMA LI LOWALANGI LUO MIGU SI - 3 BA GINÖTÖ FÖNA PASKA DÖFI A

Liturgi Taromali Döfi A/B/C hlm. 49.

FOMBASO I

Taroma Li Lowalangi nihalö moroi ba zura Moze si dua.-

Me luo da'ö, molombase Ndraono Gizara'eli ba Rafidi. Ba lö idanö, ö zato. Andrö mukökökökö ira khö Moze, lamane: "Hana wa no öheta ndra'aga ba danö Miserayi? Hadia, ba wame'e mate owökhi dödö ndra'aga, awö ndraonoma, awö guriföma?" Ba mu'ao Moze khö Zo'aya, imane: "He uwisa ba niha andrö? Hatö ma'ifu tö, ba latebu kara ndra'odo!" Imane So'aya khö Moze: "Owaöwaö föna zato ba ohe awöu zatua Ndraono Gizara'eli ösa. Si'omö andrö, famözi Nilo no, ohe tangau ba ofanö! Hiza, soDo dania ba da'ö fönau, ba dete gara ba gahe hili Horebi. Na öbözi dania gara andrö, mangumbu nidanö salua khönia, öra." Ba ilau da'ö Moze ba zanehe ndra satua Ndraono Gizara'eli andrö. Latötöi naha andrö Masa-Fanandraigö, ba Meriba-Fasosota, börö me no fasoso Ndraono Gizara'eli ba me no latandraigö Zo'aya, wanofu: Hadia so Zo'aya ba gotaluada ma lö'ö? 2 Moz 17:3-7

Simanö daroma li Lowalangi.-                    Sato : Ma'andrö …

 

Sinunö Fanema Li : Psallite No 42/43                            (ma Laudate No 91)

 

FOMBASO II

Taroma Li Lowalangi nihalö moroi ba zura Waulo ba niha samati ba mbanua Roma.

Ya'ami ira talifusö!

Börö wa'afaduhu dödöda, wa te'efa'ö ita moroi ba horö ba tola auri ita ba wa'ohahau dödö khö Lowalangi, nifa'ema Zo'aya ya'ita, Yesu Keriso. Moroi khöNia göi, wa tola ta'ondrasi wa'ebua dödö andrö khö Lowalangi, si lö tebulöbulö khöda. Omuso dödöda, börö me so wanötönada wa falukha ita lakhömi Lowalangi. Ba wanötöna andrö tebai te'ala ita, me no mulau ba dödöda wa'omasi Lowalangi andrö. Ifalua da'ö Lowalangi ba Geheha, si no Ibe'e khöda. Noa sa mate Keriso, salahida, me ifatörö ita horö na ba me lö nasa ba dödöda Lowalangi. Lö aoha ba niha mate salahi zatulö. Ba hiza mate Keriso salahida, me niha si so horö ita nasa. Ba da'e, I'oroma'ö wa'omasiNia khöda Lowalangi.- Rom 5:1-2.5-8

Simanö daroma li Lowalangi.-             Sato: Ma'andrö …

 

Sinunö Föna Injil : Psallite No 224 Döfi A                      (ma Laudate No 49)

 

INJIL

Turia Somuso Dödö khö Yesu Keriso nisura Yohane.

Me luo da'ö, Irugi Yesu mbanua Zamaria andrö, sotöi Sikhara, ba zi tambai mbenua andrö, nibe'e Yakobo khö nononia, Yosefo. So mba'a Yakobo ba da'ö. Ba me no erege dödö Yesu wofanö, mudadao Ia ba zinga mba'a andrö. So laluo. No numalö ndra nifahaö Yesu wowöli gö ba fasa. Tohare samösa ndra alawe Zamaria ba wana'u idanö.

Imane khönia Yesu: "U'andrö, be'e öGu nidanö!" Imane khöNia ira alawe Zamaria andrö: "Hana wa Ö'andrö khögu nidanö? Niha Yahudi sa Ndra'ugö, ba ira alawe Zamaria ndra'odo." Lö omasi fariawö niha Yahudi ba niha Samaria. Imane Yesu: "Na aboto ba dödöu mbuala Lowalangi ba na ö'ila haniha Zanguma'ö khöu: Be'e öGu nidanö, tatu ya'ugö na'i zangandrö khöNia idanö, ba Ibe'e khöu nidanö sangorifi niha." Imane khöNia ira alawe: "Lö khöU timba, ba no abakha mba'a andre. He moroi Öhalö nidanö wangorifi andrö? Hadia, ebua Ndra'ugö moroi khö duada Yakobo, same'e ba'a andre Khöda?" Imane Yesu : "Ifuli owökhi dödö niha samadu idanö andre, ba samadu idanö nibe'eGu khönia, lö isöndra wa'owökhi dödö sa'ae. Idanö andrö nibe'eGu khönia, sangumbungumbu sanaŵa fa'auri si lö aetu." Imane ira alawe : "Be'e ögu nidanö andrö, ena'ö lö sa'ae owökhi dödögu ba lö moguna möido ba da'e ba wangai idanö." Imane khönia Yesu : "Ae'e, kaoni wo'omou ba fuli'ö ba da'e." Imane ira alawe : "Lö fo'omogu."

Imane khönia Yesu : "Sindruhu niŵa'öu, wa lö fo'omou, börö me no dalima ndra matua sangai ya'ugö. Ba ira matua si fao khöu iada'a tenga fo'omou sindruhu. Imane ira alawe: "Awena aboto ba dödögu, wa sama'ele'ö Ndra'ugö. Hewisa? Lafosumange Lowalangi ira satuama ba hili andre, ba ya'ami, niha Yahudi, miŵa'ö, ha ba Yerusalema so nahia wanömba Lowalangi. Heza nahia sindruhu?" Imane Yesu : "Fati liGu, alawe, so ginötö dania, tenga ba hili andre lafosumange Lowalangi niha ba tenga ba Yerusalema. So ginötö dania ba no ibörögö ginötö andrö, wa Eheha andrö Zame'e kuaso ba niha ba wanömba Ama ba zi duhu, gofu heza.

Imane ira alawe andrö khö Yesu: "U'ila wa so dania Mesia andrö, nifotöi Keriso – Nibayoini andrö. Na tohare Ia, ba I'ombakha'ö khöda fefu hadia ia." Imane khönia Yesu: "Ya'odo andre ia, si fahuhuo khöu." Iröi zirege nidanö khönia ira alawe ba da'ö ba fagohi ia numalö ba mbanua wogaoni niha, imane: "Mitabu! Mifaigi Niha sangombakha khögu fefu hadia gamuatagu. Ba dödögu Ya'ia Keriso andrö." Laröi mbanua niha andrö, numalö ira khö Yesu, la'andrö khöNia, ena'ö toröi Ia khöra. Toröi Yesu ba da'ö dua ngaluo wa'ara. Ba ato nasa niha si faduhu tödö khö Yesu ba ngawalö nifaha'öNia khöra. Lamane ba ndra alawe andrö: "Faduhu dödöma iada'e, tenga ha börö ni'ombakha'öu khöma, ba hiza, börö me no marongo samösa ba aboto ba dödöma, wa Ya'ia andre sindruhu Sangorifi ösi gulidanö."- Yoh 4:5-42

Simanö duria somuso dödö khö Zo'aya ya'ita, Yesu Keriso.-

 

FANANDRAIGÖ BA FAMATI

Bakha ba wombaso siföföna andrö tarongo wekökökökö ndraono Gizara’eli khö Moze sofeta khö Lowalangi. Fekökökököra andrö ha börö wa’owökhi dödö ba wanörö tanö simate. Ba wekököra andrö, olifu ira wa lö niröi Lowalangi ira. Andrö dania wa i’ohe niha sagatua ba wamaduhu’ö segebua andrö nilau Zo’aya ba wame’e öra idanö ni’andröra. Salua andre göi, asese alua ba wa’auri niha samati. Börö wanandraigö nitaögö andrö, olifu ita wa so Lowalangi ba gotaluada. Fanandraigö nibe’eNia andrö ha ba wangi’ila hadia sindröhu lö mangiwa dödöda khö Lowalangi andrö.

Famaha’ö Waulo andre ba wombaso sidua, sindruhu ibe’e khöda wa’aboto ba dödö wa lö mamalö I’o’awögö ita Lowalangi ba ngawalö ginötö si so ya’ita. He bawa’abu dödö he ba wa abu dödö, lö irai iröi ita. Na ba mböröta ibe’e nidanö ba soinia Moze, me owökhi dödöra, Yesu ba wangöhöliNia andrö Ibe’e nidanö fangorifi, ya’ia GehehaNia niduwagöNia bakha ba dödöda. Ha bakha ba Geheha andrö wa tola faduhu dödöda khö Lowalangi, ba na so göi khöda wangomasi’ö awöda niha.

Bakha ba duria somuso dödö andrö tarongo göi wahuhuosa samösa ira alawe Zamaria khö Yesu. Hewa’ae so idaö fangorifi andrö khö Yesu, lö mamalö itandraigö ndra’alawe andrö. Töratöra me ira alawe andrö tefotöi niha baero, ibe’e khönia wanandraigö Yesu ena’ö tola I’ila hawa’ebua wamati ndra’alawe andrö. Ba gafuriata lö omasi ndra’alawe andrö na ha yaia zauri moroi ba nidanö fangorifi andrö, hiza I’andrö göi niha sato ba mbanua ena’ö lasöndra wa’auri si lö aetu andrö.

Bakha ba wa’abu dödöda ba bakha ba wa’atosasa, ba da’ö oroma wamatida. Ba moroi ba da’ö göi tola tarasoi wa’omasi Lowalangi si lö faröi, awö wamatöröNia. Andrö hare khöda, na falukha ita wa’abu dödö ba fa’atosasa. Tefohare ita me ba wanandraigö andrö aboto göi ba dödöda na sindruhu tola tataögö wanandraigö andrö sifao fa’ahele dödö. Ya lö mamalö fanandraigö nitaögöda ba wuasö ba famoni andre, tobali famasugi ba dödöda wamatida ba fangaro wanötöna ba wa’auri si lö aetu. Amen.

Nifa'anö: Kat. Ingatan Sihura, S.Ag.

Umbu:

Dianne Bergant, CSA & Robert J. Karris, OFM (ed) Tafsir Alkitab Perjanjian Lama Yogyakarta Kanisius, 2002

Dianne Bergant, CSA & Robert J. Karris, OFM (ed) Tafsir Alkitab Perjanjian Baru Yogyakarta Kanisius, 2002

Martin Harun, OFM, Matius, Injil Segala Bangsa Yogyakarta: Kanisius, 2019

Petrus Danan Widharsana & R.D. Victorius Rudy Hartono, Pengajaran Iman Katolik Yogyakarta: Kanisius, 2017

St. Eko Riyadi, Pr, Lukas “Sungguh, Ia ini Anak Allah!” Yogyakarta: Kanisius, 2011