Liturgi Taroma Li Döfi A/B/C, hlm. 47.
FOMBASO I
Taroma Li Lowalangi nihalö moroi ba zura Moze si sara.-
Imane So'aya khö Gaberamo: "Heta'ö ba danömi ba ba dalifusöu ba ba nomo namau, ba ae ba danö ni'oroma'öGu khöu. Ba Ubali'ö soi sebua ndra'ugö ba Ufahowu'ö ndra'ugö ba U'ebua'ö döimö, ba tobali howuhowu ndra'ugö. Ufahowu'ö zamahowu'ö ya'ugö, ba sangelifi ya'ugö, U'elifi göi. Moroi khöu tefahowu'ö dania fefu soi ba gulidanö." Ba awu'a Gaberamo, - i'o'ö niŵa'ö Zo'aya khönia.- 1 Moz 12:1-4
Simanö daroma li Lowalangi.- Sato : Ma'andrö …
Sinunö Fanema Li : Psallite No 16 ma 119B (ma Laudate No 11)
FOMBASO II
Taroma Li Lowalangi nihalö moroi ba zura Waulo si mendrua khö Dimoteo.-
Talifusö ni'omasi'ö !
Böi aila ndra'ugö wame'e famaduhu'ö sanandrösa khö Zo'aya, böi göi aila ba zanandrösa khögu, nikuru börö Ia. Ya fao ndra'ugö khögu wanaha famakao, börö duria somuso dödö andrö, Ibe'e wa'abölö khöu Lowalangi. No I'orifi ita Lowalangi ba no ikaoni ita tobali soiNia. Tenga dali mbuabuada si sökhi, no dali nikhoi dödöNia samösa ba fa'asökhi dödöNia. Föna wamobörö ulidanö no si sökhi tödö Ia khöda ba khö Yesu Keriso. Ba abölö oroma sa'ae nikhoi dödö Lowalangi andrö, awö wa'ebua dödöNia, me to'ele Zangorifi ya'ita andrö, Keriso Yesu. Ya'ia zangalani fa'abölö wa'amate ba sanga'asogö haga ba fa'auri si lö fa'atekiko, moroi ba duria somuso dödö andrö.- 2 Tim 1:8-10
Simanö daroma li Lowalangi.- Sato : Ma'andrö …
Sinunö Föna Injil : Psallite No 223 (ma Laudate No 103)
INJIL
Turia Somuso Dödö khö Yesu Keriso nisura Matai'o.-
Me luo da'ö, I'ohe awöNia Yesu Wetero ba Yakobo ba Yohane, talifusö Yakobo; numalö ba hili salaŵa, ba zi ha ya'ira. Ba tobali Ia fönara: Humaga mbawaNia hulö haga luo, ba nukhaNia no takitakile. Ba hiza, oroma khöra Moze ba Elia, fahuhuo iraYesu. Imane Fetero khö Yesu: "He So'aya, wa'asökhi nahia da'e! Na omasi Ndra'ugö, da'ufasindro tölu nose ba da'e; sambua khöU, sambua khö Moze ba sambua khö Gelia." Me muhede ia na, ilumö'ö ira lawuo sihaga ba terongo li si otarai lawuo andrö, sanguma'ö: "OnoGu da'e, Ono omasi'ö, wa'omasiGu; mifondrondrongo liNia!" Me larongo li andrö ira nifaha'ö Yesu, lafalögu tou ira, ata'u sibai. Ba möi khöra Yesu, Itufa ira tangaNia, Imane:
"Mifaoso ! Böi mi'ata'ufi !" Me lafaöga höröra, ba lö ni'ilara, ha Yesu. Me möi ira tou moroi ba hili, Iŵa'ö khöra Yesu: "Böi mi'ombakha'ö gangilata andrö, gofu ha'ökhö, fatua lö te'orifi mangawuli Nono Niha andrö moroi ba wa'amate." Mat 17:1-9
Simanö duria somuso dödö khö Zo'aya ya'ita, Yesu Keriso.
FAMATI ZANGAMÖLÖ’Ö NIHA BA WOLO’Ö TAROMA LI LOWALANGI
Bakha ba wombaso siföföna nihalö moroi ba zura Moze si sara andre, tefarongogö khöda hewisa wahuhuosa Lowalangi nkhö Gaberamo. Fahuhuosara andrö mo’amakhaita ba wa’awu’a Gaberamo moroi ba namania numalö ba danö si lö aboto ba Gaberamo. Fefu da’ö i’o’ö Aberamo börö wawu’usa li Lowalangi khönia ya’ia 1) tobali soi sebua; 2) tefahowu’ö; 3) te’ebua’ö döinia; 4) tobali ia howuhowu ba niha. Na ta’angeraigö da’e fefu na dali wa’aniha, lö aoha khöda wondröi omo, ngambatöda, tanöda, hada khöda ba si to’ölö ita. Fefu da’e i'o’ö Aberamo börö wamatinia andrö ba khö Zo’aya. Hadia no so khöda wamati simane Aberamo andrö? ma tebai na sa taröi zomasimasi ita? Fefu da’ö no tola tobali ia su’asu’a wamatida.
Sura Waulo andrö simendrua khö Dimoteo, no sambua menemene fangaro dödö ba niha samati. Aboto ba dödöda, ya’ita niha keriso, wa Ikaoni ita Lowalangi ba wolo’ö Keriso. Ba lala Keriso andrö asese tesöndra wamakao, ba hiza lualuania molakhömi ita si fao Keriso na anau gölöda. Fa’aro dödö ba wolo’ö oroisa Lowalangi andrö, lö mamalö möi fangomuso dödö irege solakhömi ita awö Keriso andrö.
Bakha ba Duria Somuso Dödö andrö tarongo me möi Yesu awö ndra nifaha’ö Fetero ba Yakobo ba Yohane, wangandrö ba hili, sindruhu larasoi wa’ahölihöli dödö awö wa’asökhi nahia andrö si so ya’ira. Ba hiza, li andrö nirongora moroi ba mbanua si yawa, no möi börö wa’ata’ura awö wa tobali fangaro dödöra ba wolo’ö Yesu andrö. Fareta ba wamondrondrongo Li Yesu andrö tenga moroi khö Yesu, ba hiza moroi khö Nama samösa. "OnoGu da'e, Ono omasi'ö, wa'omasiGu; mifondrondrongo liNia!"
Fefu wombaso andre i'a’aro’ö dödöda ba wamati khö Lowalangi ba ba khö Zo’aya ya’ita Yesu Keriso. Ba wamati ba ba wolo’ö taroma li Lowalangi andrö, sindruhu afökhö ba akao dödö. Fa’aro dödö ba famati andrö ba daroma li Lowalangi, da’ö zitobali lohelohe ba fangabölö ba wanaögö fefu fangiwa dödö andrö. Ba gafuriata, sanau ölö andrö, da’ö ni’orifi. Amen.
Nifa'anö: Kat. Ingatan Sihura, S.Ag.
Umbu:
Dianne Bergant, CSA & Robert J. Karris, OFM (ed) Tafsir Alkitab Perjanjian Lama Yogyakarta Kanisius, 2002
Dianne Bergant, CSA & Robert J. Karris, OFM (ed) Tafsir Alkitab Perjanjian Baru Yogyakarta Kanisius, 2002
Martin Harun, OFM, Matius, Injil Segala Bangsa Yogyakarta: Kanisius, 2019
Petrus Danan Widharsana & R.D. Victorius Rudy Hartono, Pengajaran Iman Katolik Yogyakarta: Kanisius, 2017
St. Eko Riyadi, Pr, Lukas “Sungguh, Ia ini Anak Allah!” Yogyakarta: Kanisius, 2011
0 comments:
Posting Komentar