TAROMA LI LOWALANGI LUO MIGU SI - 6 DÖFI A

Liturgi Taroma Li Döfi A/B/C, hlm. 141.

FOMBASO I

Taroma Li Lowalangi nihalö moroi ba zura Yesu Ono Zirakhi.-

Na moroi ba dödöu, tola ö'o'ö ngawalö goroisa andrö; ba famalua amuata fa'alöfaröi göi tola öfili. No ifa'oli fönau galitö ba idanö Lowalangi; oro'ö dangau ba zomasi dödöu. No so föna niha wa'auri ba fa'amate, hadia ia nifilinia tebe'e khönia. Fondrege wa'afahöna wa'atuatua Zo'aya; lö mamalömalö wa'abölöNia, ba I'ila fefu hadia ia. Lö tobini ba hörö Zo'aya gamuata niha, I'ila fefu nilaura. Lö ifarou dödö niha ba wolau horö, ba ma'ifu lö fao dödöNia ba wolau si lö sökhi. Sir 15:15-20

Simanö daroma li Lowalangi.-                    Sato : Ma'andrö …

 

Sinunö Fanema Li : Psallite No 119A             (ma Laudate No 80 ma 90, 3)

 

FOMBASO II

Taroma Li Lowalangi nihalö moroi ba zura Waulo si föföna ba niha samati ba mbanua Gorindro.-

Ya'ami ira talifusö !

Fa'atuatua wehedema ba zi no mo'ahonoa, ba tenga fa'atuatua niha gulidanö andre, tenga göi fa'atuatua ndra salaŵa gulidanö andre, si taya dania wa'abölönia. Fa'atuatua niŵa'öGu andrö, ya'ia wa'atuatua soroi Lowalangi. Lö aboto ba dödö niha gulidanö wa'atuatua andrö mböröta, ba hiza iada'e no Iforoma'ö khöda Lowalangi. Fatua lö muwöwöi gulidanö andre, no Ihonogöi nifakhoi dödöNia Lowalangi, soguna ba wa'ohahau dödöda. Ma'ifu lö'ö ba gotalua ndra samatörö zangila fa'atuatua andrö. Na no aboto ba dödöra mena'ö, tatu lö laforöfa Zo'aya lakhömi andrö. Simane tesura ba zura ni'amoni'ö: Si lö irai i'ila hörö niha, si lö irai irongo tögi dalinga niha, si lö irai möi ba dödö niha, no Ihönagö Lowalangi ba niha sangomasi'ö Ya'ia. No Ifa'ele'ö khöda nifakhoiNia andrö Lowalangi, nifa'ema GehehaNia. 1 Kor 2:6-10a

Simanö daroma li Lowalangi.-             Sato : Ma'andrö …

 

Sinunö Föna Injil : Psallite No 263                               (ma Laudate No 76)

 

INJIL

Turia Somuso Dödö khö Yesu Keriso nisura Matai'o.-

Me luo da'ö, Imane Yesu khö ndra nifahaöNia: "Tebai tobali ami ono mbanua gamatöröŵa Lowalangi, na lö tohude ami moroi khö ndra sangila amakhoita, awö ndra farizai'o andrö, ba wangomusoi'ö tödö Lowalangi. No mitema wamahaö moroi khö ndra tua, sanguma'ö: Böi amunu niha! Haniha zamunu niha, lö tola lö'ö lafatörö khönia huku. Iada'e Uŵa'ö khömi: Haniha zofönu khö dalifusönia, lafatörö ia ba huku. Haniha zi falele ba niha, lafatörö ia ba huku ba la'ohe föna zamatörö huku. No mi'ila wa so wamahaö, sanguma'ö: Böi ohorö! Iada'e Uŵa'ö khömi: Dozi haniha zamaigi ira alawe si fao fangisö, no ihoröni ndra alawe andrö ba dödönia. No mirongo wamahaö moroi khö ndra tua, sanguma'ö: Böi mifalimo ba wawu'usa! Si no öfabu'u föna Lowalangi, si fao fahölusa wamalua, lö tola lö'ö öfalua. Iada'e Uŵa'ö khömi: Böi mi'ae ba hölu! Ŵa'ö: Ya'ia, na ya'ia, ma zui: Tenga, na tenga. Si töra moroi ba da'ö, ba moroi khö gafökha."- Mat 5:20-22.27-28.33-34.37

Simanö duria somuso dödö khö Zo'aya ya'ita Yesu Keriso.-

 

EHEHA NI’AMONI’Ö ZANOLONI NIHA WANGAI ANGETULA

Bakha ba wombaso nihalö moroi ba zura Yesu Ono Zirakhi, oroma khöda hewisa wame’e Lowalangi fa’atuatua ba niha ba wamili awö wangetu’ö somasi niha. Ya'ita niha gulidanö no Ifazökhi Lowalangi, tobali ni’a’asogö si tola mamatörö ulidanö ma’asagörö. Ibe’e khöda  wa’abölö Lowalangi  ba  wamili  si  sökhi  ba si lö sökhi, somasi dödö niha. Baero da’ö, lö mamalö irorogö niha Lowalangi somasi mamalua oroisa Lowalangi. Andrö böi tafakiko ita bakha ba zi lö’atulö ba bakha ba wa’auri si lö fa’alowalangi.

Ba wombaso sidua andrö, ifaduhu’ö khöda Faulo hewisa nösi dödö Lowalangi andrö ba niha, I’otarai mbörötania. No si sökhi  wanga’azökhi Lowalangi nia andre I’otarai mböröta. Töratöra me tatema  sakramen  fanasa, no Ibe’e khöda Geheha fa’aboto ba dödö gohitö dödöNia bakha ba wa’aurida ba ta’ila lakhömiNia. Asese  eheha  wa’aniha  zomba’agö ya’ita ba wangi’ila  fa’aboto ba dödö satulö ba samabali ya’ita faoma fatambai.

Turia somuso dödö andrö nisura Matai’o, no zui sambua fanegu ba niha samati. No Ibe’e huku Lowalangi bakha  ba  dödö  niha, me  ifazökhi  niha. So wa’abölö ba niha ba wangi’ila  huku  andrö  na so  wamondrondrongo li sihede ba dödönia. Da’e sa zomasi Zo’aya, na lö mamalö tafondrondrongo li dödöda ba tafalua si fao fa’alöfaröi.

Sitölu ngawua wombaso andre, sindruhu simöi famasugi ba dödö niha hewisa niha ba wangai angetula ba lala wa’aurinia. No Ibe’e wa’atuatua Lowalangi ba niha, ba zimanö iebe’e kuaso ba niha ba wamili heza zomasi ia I’o’ö. Ba dödö niha sisamösamösa no so Geheha Ni’amoni’ö. Eheha Ni’amoni’ö zanoloni ba wame’e famahela. Ba hiza lö mamalö ba niha so gangetula. Ba zimanö moguna mu’abölö’ö Geheha Ni’amoni’ö andrö sifao fa lö mamalö ba wamondrongo Taroma Li Lowalangi. Ba wamondrongo Taroma Li Lowalangi andrö, te’abölö’ö niha, ba Eheha Ni’amoni’ö andrö aro lö mamalö ba wanoloni wangai angetula si sökhi. Ba wangai angetula andrö, moguna sibai mufahela sifao fa’abölö wamati. Amen.

 

Nifa’anö Kat. Ingatan Sihura, S.Ag.

 

Umbu:

Biro Liturgi Keuskupan Sibolga, Liturgi Taroma Li Döfi A/B/C Buku Bacaan Untuk Upacara Hari Minggu dan Hari Raya dalam Bahasa Nias, Gunungsitoli, Keuskupan Sibolga, 2012

Dianne Bergant, CSA & Robert J. Karris, OFM (ed) Tafsir Alkitab Perjanjian Lama Yogyakarta Kanisius, 2002

Dianne Bergant, CSA & Robert J. Karris, OFM (ed) Tafsir Alkitab Perjanjian Baru Yogyakarta Kanisius, 2002

Martin Harun, OFM, Matius Injil Segala Bangsa  Yogyakarta: Kanisius, 2019

St. Eko Riyadi, Pr, Matius “Sungguh, Ia Ini Adalah Anak Allah!” Yogyakarta: Kanisius, 2011