TAROMA LI LOWALANGI LUO MIGU SI - 1 BA GINÖTÖ FÖNA PASKA DÖFI A

Liturgi Taroma Li Dofi A/B/C, hlm. 44.

FOMBASO I

Taroma Li Lowalangi nihalö moroi ba zura Moze si föföna.-

Iwöwöi niha So'aya, Lowalangi, tambu nihalö moroi ba danö, ba Iwuwusi ba dögi nikhunia hanuhanu fangorifi ba tobali sonoso niha andrö. Ba Ifazökhi kabu So'aya, Lowalangi, ba Gedena, tanö ba gatumbukha luo, ba Ifa'aso ba da'ö niha andrö, nifazökhiNia. Ba Ifatumbu'ö moroi ba danö ngawalö geu sowua Lowalangi, eu somasi ita wamaigi ba sami bua. Ba dalu kabu so geu same'e fa'auri si lö tebulöbulö ba he göi eu same'e fangi'ila ngawalö hadia ia. Ifa'aso niha no mege So'aya, Lowalangi, ba kabu Edena andrö ba wangehao ba ba wanaro. Ba Ibe'e goroisa ba niha So'aya, Lowalangi, Imane: "Tola ö'a sa'ae mbua geu ba kabu fefu, ba hiza, bua geu same'e fangi'ila ngawalö hadia ia, ba lö tola ö'a.  Ö'a si'aikö da'ö, ba mate ndra'ugö.

Ba no sonekhe gulö, onekhe moroi ba zaliŵaliŵa ba danö fefu nifazökhi Zo'aya, Lowalangi. Ba imane ulö ba ndra alawe: "Hadia, duhu no Iŵa'ö Lowalangi: Lö'ö manö mi'a mbua geu ba kabu?" Ba imane ira alawe khö gulö: "Tola sa ma'a mbua geu ba kabu, ba bua geu andrö si so ba dalu kabu, ba no Iŵa'ö Lowalangi: Lö tola mi'a ia, ba böi mibabaya, fa böi mate ami!" Ba imane ulö ba ndra alawe : "Ma'ifu lö mate ami. I'ila sibai sa Lowalangi: Mi'a si'aikö ia, ba tobali simane Lowalangi ami, sangila ngawalö hadia ia fefu." Ba me I'ila sa'ae ira alawe, wa ami ni'a mbua geu andrö, awö wa si sökhi famaigi, awö wa no omasiö geu da'ö ba wanöndra fa'atuatua khönia, ba ihalö mbua, - i'a, ba ibe'e göi ö ngambatönia si so ba ngainia, - ba i'a göi. Ba teboka höröra, darua ira, - ba oroma khöra wa lö nukhara.- 1 Moz 2:7-9;3:1-7

Simanö daroma li Lowalangi.-                    Sato : Ma'andrö …

 

Sinunö Fanema Li : Psallite No 51                            (ma Laudate No 7, 1-2)

 

FOMBASO II

Taroma Li Lowalangi nihalö moroi ba zura Waulo ba niha samati ba mbanua Roma.-

Ya'ami ira talifusö!

Börö niha si samösa, wa so horö ba gulidanö, ba moroi ba horö andrö tumbu wa'amate, awö wa no ikhamö niha fefu fa'amate andrö, börö me no dozi samazökhi horö ira. Na ha sambua sa mbörö, wa ikhamö fa'amate niha, moroi ba lalö zi ha samösa andrö, ba mendrua manö abölö ebua nilau zi samösa  ba niha, ya'ia Yesu Keriso. Ibe'e khöra wa'ahakhö dödö si fahöna ba I'efa'ö niha moroi ba zala ba mamatörö ira, börö zi ha samösa andrö, Yesu Keriso. Tobali simane lalö zi ha samösa (Adamo), me no möi börö wanibo'ö niha fefu, si manö göi ba wa'atulö Zi ha samösa andrö (Yesu Keriso) noa göi möi fangatulö'ö niha fefu, ba wangorifi. Hulö simane ba wa lö folo'ö niha andrö, si ha samösa sa, me no möi börö wa no a'oi sokhö horö zato, simanö göi ba wolo'ö zi ha samösa andrö, noa göi möi börö wangatulö'ö ba zato.- Rom 5:12.17-19

Simanö daroma li Lowalangi.-                    Sato : Ma'andrö …

 

Sinunö Föna Injil : Psallite No 222                              (ma Laudate No 7, 3)

 

INJIL

Turia Somuso Dödö khö Yesu Keriso nisura Matai'o.

Me luo da'ö, I'ohe ba danö simate Yesu Eheha, ena'ö itandraigö Ia afökha. Ba me no Ilau wuasö, öfa wulu wongi wa'ara, ba olofo Ia. Ba möi khöNia zanandraigö andrö, imane khöNia: Na Ono Lowalangi Ndra'ugö, ŵa'ö, ena'ö tobali roti gara andrö. Itema  linia  Yesu,  Imane : "No tesura  ba  zura ni'amoni'ö: Tenga ha ba gönia auri niha, ba ngawalö li si otarai mbawa Lowalangi."- I'ohe Yesu ba Yerusalema, banua ni'amoni'ö andrö, afökha. Ifa'aso Ia ba mbumbu nomo Lowalangi ba imane khöNia: "Na Ono Lowalangi Ndra'ugö, fazaumba'Ö si tou; noa sa tesura ba zura ni'amoni'ö: Ifatenge ndra mala'ikaNia Lowalangi ba wondrorogö Ya'ugö; lataya tangara Ndra'ugö, fa lö manendre gaheU ba gara." Itema linia Yesu : "Ba zura ni'amoni'ö no göi tesura: Böi tandraigö Zo'aya, Lowalangiu." I'ohe zui Ia afökha ba hili salaŵa sibai, i'oroma'ö khöNia fefu gamatöröŵa ba gulidanö fefu, awö lakhöminia, ba imane khöNia: "Fefu da'ö ube'e khöU, na Ötuhi danö wangalulu khögu".  Imane khönia Yesu : "Ofanö, satana! No musura ba zura ni'amoni'ö :  Khö Zo'aya, Lowalangiu, mangalulu ndra'ugö, ha Ya'ia öfosumange." Awena iröi Ia afökha, ba tohare ndra mala'ika, möi ira ngoningoniNia.- Mat 4:1-11

Simanö duria somuso dödö khö Zo'aya ya'ita, Yesu Keriso.-

Eönua:

TAROMA LI LOWALANGI ZANGABÖLÖ’Ö NIHA BA WANANDRAIGÖ

Bakha ba wombaso siföföna nihalö moroi ba zura Moze si föföna, oroma khöda hewisa wanga’asogö Lowalangi ulidanö andre ba famataroNia niha andrö ba kabu Edena. No si sökhi ba solakhömi wamakhoi Zo’aya ulidanö andre ba simanö göi niha. Awai i ambö aboto ba dödö niha lala nifakhoi Zo’aya andrö. Fa’onekhe gulö andrö ba wamaelungu niha, no göi möi böröwangiwa dödö ba niha, irege so wanahe fehede ma oroisa Lowalangi. Da’ö dania mbörö horö andrö, ya’ia me omasi göi niha tobali simane Lowalangi samösa.

Na tahaogö ta’osisi’ö nösi zura Waulo andre ba wombaso sidua, tola manö tobali ia tohutohu wombaso siföföna andrö. Ba wa’aniha föna, aekhu niha ba wa’amate ba fa’atekiko. Ba hiza, börö wangöhöli Yesu, tobali ita niha si bohou, irege tobali ita sanema ondröita wa’auri. Famati ba khö Keriso, no möi fangehao gamakhaita niha ba khö Lowalangi.

Bakha ba Duria Somuso Dödö andrö nisura Matai’o, sindruhu oroma khöda hewisa wanenawa Yesu ba ngawalö wondrönisi dödö nifaehagö gafökha. Sindruhu wa’onekhe gafökha andrö wa no i’ila hadia zifaudu wanandraigö niha. Ö, kuaso ma fa’abölö, ba lakhömö, no ohitö dödö salio sibai ira’u ösi niha. Ba hiza börö Daroma Li Lowalangi andrö, fefu da’ö lö möi fondrönisi dödö khö Yesu.

No te’ala Gadamo bakha ba wanandraigö, börö gisö’isö dödö. Ba hiza no möna Keriso bakha ba wanandraigö, börö me lö faröi Ia ba daroma li Zo’aya, ba me no I’erogö tödöNia gokhöta gulidanö, sumange ba famatörö andrö. Fefu zi so ba gulidanö andre ba no salio taya ba tenga si’ogötö’ö. Folo’ö Taroma Li Lowalangi andrö, ba no solohe niha ba wa’auri si lö aetu. Amen.

 

Nifa’anö Kat. Ingatan Sihura, S.Ag.

 

Umbu:

Biro Liturgi Keuskupan Sibolga, Liturgi Taroma Li Döfi A/B/C Buku Bacaan Untuk Upacara Hari Minggu dan Hari Raya dalam Bahasa Nias, Gunungsitoli, Keuskupan Sibolga, 2012

Dianne Bergant, CSA & Robert J. Karris, OFM (ed) Tafsir Alkitab Perjanjian Lama Yogyakarta Kanisius, 2002

Dianne Bergant, CSA & Robert J. Karris, OFM (ed) Tafsir Alkitab Perjanjian Baru Yogyakarta Kanisius, 2002

Martin Harun, OFM, Matius Injil Segala Bangsa  Yogyakarta: Kanisius, 2019

St. Eko Riyadi, Pr, Matius “Sungguh, Ia Ini Adalah Anak Allah!” Yogyakarta: Kanisius, 2011